1. Yininke musinke yimwe ga tu ruganena Jesus?

 KWATO muntu ogu ga vatera unene vantu ngwendi Jesus. Apa ga kere pevhu, Jesus kwa rugene yitetu mokuvatera vantu. (Ruk. 9:12-17) Age kwa geve uhwi wounene po pokutufira. (Joh. 15:13) Kutunda apa Jesus va mu vhumbwire, age kwa twikira kuvatera vantu. Age kwa tu hundilira kwaJehova a tu pe mpepo zokupongoka zi ya tu ronge nokutuhengagwida. (Joh. 14:16, 17, ftn.; 16:13) Kupitira momapongo getu, Jesus kuna kutuvatera tu dive nawa omu natu tulisa po varongwa.—Mat. 28:18-20.

2. Wolye va hamena ‘momauhwi govagara’ va tumbura moVaefeso 4:7, 8?

² Tu tareni ko uhwi umwe hena ou ga tu pa Jesus. Mupositoli Paurusa kwa tjenge asi konyima zokuza meguru Jesus, “kwa geve vagara ngomauhwi.” (Resa Vaefeso 4:7, 8.) Paurusa kwa fatwilire asi Jesus kwa geve vagara owo yipo va vatere mbungakriste mononkedi dokulisiga-siga. (Efe. 1:22, 23; 4:11-13) Neina ‘vagara owo’ kwa hamena mo vakwafimbunga novakuronambunga ntani vatareli wonombunga. a Vagara ava kapi va sikilira mo ntani nawo kulipuka. (Jak. 3:2) Nye Jesus kuvaruganesa yipo va tu vatere, awo kuna kara mauhwi aga ga tu pa.

3. Gava sihonena omu natuvenye natu kwatesa ko sirugana ‘somauhwi govagara’ ga tu pa Jesus.

³ Jesus kwa geve situmbukira ‘komauhwi govagara’ mokunkondopeka mbungakriste. (Efe. 4:12) Natuvenye kuvhura tu va vatere va sikise mo situmbukira oso somulyo. Mokuyifanekesa, vamwe yiwo ava lihameke mo mokudika Sinyanga ano  vamwe kukwatesa ko sirugana oso pokugava nondya, maugendero ntani nononkedi dimwe hena. Nose kuvhura tu kwatese ko vakwafimbunga novakuronambunga ntani vatareli wonombunga mweyi atu uyunga neyi atu rugana. Tu zeni tu ka zogere omu atu gwanene mo uwa mosirugana sawo ntani nomu natu va likida rupandu naJesus ogu ga tu pa ‘vagara ava ngomauhwi.’

VAKWAFIMBUNGA ‘KUVATERA’ MBUNGAKRISTE

4. ‘Yirugana’ musinke yimwe eyi ngava rugana vakwafimbunga mosiruwo sovapositoli?

⁴ Mosiruwo sovapositoli, vanavazinyetu vamwe wovagara kwa va horowere va kare vakwafimbunga. (1 Tim. 3:8) Ayo kumoneka asi yiwo ngava ‘vatere noyirugana’ yomombungakriste eyi ga tumbwire Paurusa. (1 Kol. 12:28) Vakwafimbunga ngava sikisa mo yitumbukira yoyinzi yipo vakuronambunga va demenene kokuronga nokukorangeda. Pasihonena, vakwafimbunga nampo va vaterere mokutjangurura Matjangwa ndi pokukaranda yininke eyi va ruganesere mokutjangwilira po Matjangwa.

5. Yirugana musinke yimwe ava rugana vakwafimbunga?

⁵ Tu tareni yirugana eyi ava rugana vakwafimbunga mombungakrise. (1 Pet. 4:10) Awo kuvhura vava pe situmbukira sokuwapaika yimaliwa mombungakriste nonomukunda dokuzuvhisira nokoyimbapiratjangwa yomombungakriste nokurugana komambako nokukara vakareli ndi kupakera mbili Sinyanga soUhompa. Yirugana nayinye eyi mulyo morwa kuvatera mbungakriste zi gende po nawa. (1 Kol. 14:40) Vakwafimbunga vamwe kukara nomaruha mepongo Eparu lyetu noyirugana yokuzuvhisa ntani nokugava yiuyungwa yanavenye. Mukwafimbunga kuvhura hena kumuninka a kare muvateli gokambunga kokuzuvhisa. Pamwe vakwafimbunga wokuwapera kuza kumwe novakuronambunga yipo va ka dingure vanavazinyetu nokuvakorangenda.

6. Nokonda musinke dimwe deyi atu pandwire vakwafimbunga?

⁶ Ngapi yirugana yovakwafimbunga ayi vatere mbungakriste? Munazinyetu gomukadi Beberly b gomoBolivia kwa tanta asi: “Tani pandura vakwafimbunga, ame kuhafera mapongo unene ntani morwa yirugana yawo, ame kudimba nokugava malimbururo nokupurakena koyiuyungwa ntani kulirongera ko konovidiyo nokomafano. Awo kudivilisa asi ava vana kara mepongo mepopero vana kara ntani nokuvatera ava ava pongere kembo pokuruganesa yikwakonentu. Konyima zepongo, awo kuzeresa nokuvarura yimaliwa ntani kudivilisa asi tuna gwana yimbapira eyi tuna hepa. Tani va pandura sili unene.” Leslie ogu ga tunga moColombia ogu mugara gwendi mukuronambunga kwa uyunga asi: “Mugara gwange kuhepa evatero lyovakwafimbunga yipo a sikise mo yirugana yokulisga-siga. Pwa hana vakwafimbunga, ngano yirugana kumuvhukira unene. Ame kupandura unene kweyi ava rugana vakwafimbunga.” Tuna si huguvara asi nove yimo o lizuvhu ngoso.—1 Tim. 3:13.

7. Ngapi natu pandura vakwafimbunga? (Tara hena efano.)

⁷ Bibeli kutukorangeda tu tantere vakwafimbunga asi ose kupandura unene kosirugana sawo. (Koros. 3:15) Krzysztof mukuronambunga ga tunga moFinland, eyi yiyo a rugana mokugava mpandu zendi kovakwafimbunga, age kwa tanta asi: “Ame kutuma sikarata ndi mbudi komukwafimbunga, mombudi ozo ame kutura mo etjangwa ntani nokutumbura nkedi zimwe omu ga korangeda nge ndi kutumbura eyi ani haferere sirugana sendi.” Pascal  naJael ava va tunga moNew Caledonia kukanderera po vakwafimbunga. Pascal kwa uyunga asi: “Ose ngesi kukanderera po vakwafimbunga nokupandura Jehova ntani nokumupura a va vatere.” Jehova kupurakena makanderero gangoso ntani mbungakriste kugwanena mo mauwa.—2 Kol. 1:11.

VAKURONAMBUNGA ‘KURUGANA UNENE’

8. Morwasinke Paurusa ga uyungilire asi vakuronambunga ngava “rugana unene”? (1 Vatesaronika 5:12, 13)

⁸ Vakuronambunga womosiruwo sovapositoli ngava rugana unene mombungakriste. (Resa 1 Vatesaronika 5:12, 13; 1 Tim. 5:17) Awo ngava “pitisire” mbungakriste ntani ngava tura po matokoro kumwe ngombunga zovakuronambunga. Ngava ‘pukurura’ nombili womombungakriste yipo va twikire kukara nepuro lyokupama. (1 Tes. 2:11, 12; 2 Tim. 4:2) Awo hena ngava pakere mbili mapata gawo ntani nokunkondopeka elikwatakano lyawo naJehova.—1 Tim. 3:2, 4; Tit. 1:6-9.

9. Yirugana musinke ava rugana vakuronambunga?

⁹ Naina vakuronambunga kurugana unene. Awo kuzuvhisa mbudi zongwa. (2 Tim. 4:5) Awo kulitura mo unene mokuzuvhisa nokuwapaika oku nava ka zuvhisira vazuvhisi ntani awo kutudeura yipo tu dive kuzuvhisa nokuronga nawa. Ntani awo kupangura nonkenda va hana mpongo. Apa munazinyetu a tura nzo zonene, vakuronambunga kuhetekera ko kumuvatera a wapukurure elikwatakano lyendi naJehova. Ntani awo kudivilisa asi mbungakriste zina zere. (1 Kol. 5:12, 13; Gar. 6:1) Sirugana sawo sosinene kuna kara sokutakamesa nonzwi daJehova ndi vasita. (1 Pet. 5:1-3) Awo kugava yiuyungwa eyi ava liwapaikire nawa, kukondja va dive nkenye ogu mombungakriste ntani kugava edinguro lyekorangedo. Vakuronambunga vamwe kuvatera kudika Yinyanga nokuyipakera mbili nokuwapaika nokugendesa yigongi nokuhamena mombunga zokudingura vaveli ntani moKomitiye zokuruganena kumwe nosipangero. Vakuronambunga kurugana unene.

10. Koyirugana ke natu pandwira vakuronambunga?

¹⁰ Jehova kwa pumbire asi vakuronambunga ngava tu pakera mbili, kapi ngatu kara ‘nowoma ndi asi tu tukuke.’ (Jer. 23:4) Munazinyetu gomoFinland ga limonene evatero lyovakuronambunga apa ozina va verere unene. Age kwa uyunga asi: “Nampili ngomu ngayi digopere nge kutantera vakwetu omu ani lizuvhu, mukuronambunga ogu na dira kuyika kwa purakenene nge nawa nokukanderera kumwe name ntani kwa tanterere nge asi Jehova ga hara nge. Kapi na kudiworoka asi yisinke ga uyungire, nye ga vaterere nge ni dire kukara nosinka. Ame nayi pura asi Jehova yige ga mu tumine a ya vatere nge posiruwo souhunga.” Ngapi omu vakuronambunga womombungakriste zeni va ku vatera?

11. Ngapi natu pandura vakuronambunga? (Tara hena efano.)

¹¹ Jehova ana hara tu likide rupandu rorunene vakuronambunga “morwa yirugana yawo.” (1 Tes. 5:12, 13) Henrietta gomoFinland kwa uyunga asi: “Vakuronambunga kuvatera nkenye apa vanavazinyetu, nye eyi kapi ayi tanta asi awo kwa kara nosiruwo sosinzi ndi nononkondo ndi asi kapi ava ligwanekere nomaudigu. Poyiruwo yimwe, ame kuvatantera asi nina hara o dive asi: ‘Ove mukuronambunga gomuwa.’” Munazinyetu Sera gomoTürkiye c kwa uyunga asi: “Vakuronambunga va hepa makorangedo yipo va twikire nosirugana sawo. Kuvhura tu va tjangere sikarata ndi tu va zigide komuzuhwa ndi komurarero ntani kupwaga nawo mokuzuvhisa.” Koyili yirugana yimwe yomukuronambunga eyi o  hafere ndi? Papara nonkedi omu no mu pandura.—1 Kol. 16:18.

VATARELI WONOMBUNGAKRISTE KUTUNKONDOPEKA

12. Ewapaiko musinke lya nkondopekere nombungakriste mosiruwo sovapositoli? (1 Vatesaronika 2:7, 8)

¹² Jesus kwa pa hena situmbukira ‘komauhwi govagara’ vamwe va vatere mbungakriste monkedi zimwe. Jesus kwa ruganesere vakuronambunga womoJerusarema yipo va tume Paurusa naBaranabasa ntani navamwe mosirugana sokudingura nombungakriste. (Yirug. 11:22) Morwasinke? Yipo va nkondopeke nombungakriste ngwendi moomu ava yi rugana vakuronambunga novakwafimbunga. (Yirug. 15:40, 41) Vagara ava kutura po malizambero gomanzi ntani kutura eparu lyawo mosiponga yipo va ronge nokukorangeda vanavazinyetu.—Resa 1 Vatesaronika 2:7, 8.

13. Yirugana musinke ava rugana vatareli wonombunga?

¹³ Sirugana sovatareli wonombunga kwa hamena mo kugendagura unene. Vamwe kugusa sinano sosire yipo va dingure nombungakriste edi da likara ure. Nkenye sivike, mutareli gonombunga kugava yiuyungwa, kuza a ka korangede vanavazinyetu, kupitisira epongo lyovazuvhisi wokukarerera neli lyovakuronambunga ntani mapongo gokuza mokuzuvhisa. Awo kuliwapaikira yiuyungwa ntani kugendesa yigongi yezuva limwe neyi yomazuva gatatu. Age kuronga konosure dovazuvhisi wokukarerera ntani poyiruwo yimwe kuwapaika epongo lyokulikarera novazuvhisi wokukarerera momukunda ogu ava dingura. Kugusa ko oyo, awo hena kurugana yirugana yimwe yomulyo yongenderera eyi azi va pe Beteli.

14. Yisinke ava tu ruganene vatareli wonombunga?

¹⁴ Ngapi nombungakriste adi gwanene  mo mauwa movatareli wonombunga? Munazinyetu gomugara gomoTurkiye kwa uyunga kuhamena edinguro lyovatareli wonombungakriste asi: “Nkenye apa vatareli wonombunga ava ya dingura mbungakriste, ayo kutumangeda nge ni vatere vanavazinyetu. Kwato mutareli gonombunga ga ninkisa nge ni lizuvhe asi ana kara noyirugana yoyinzi ndi kapi ana hara kuuyunga name.” Johanna katu tumbura kwa rugene nomutareli gonombunga mokuzuvhisa, nye kapi va gwene po vantu pomambo. Age kwa uyunga asi: “Ame kapi ngani divara ezuva olyo. Vakuru vange wovakadi kwa dirukire ntani ame kwa va rongwere unene. Mutareli gonombunga kwa korangedere nge asi, kulikara ure sininke sopokaruwogona, nye mouzuni woupe ngatu ka gwana siruwo sokukara novantu ava twa hara yikando yoyinzi.” Nose kupandura unene vatareli wonombunga kweyi va tu vatera.—Yirug. 20:37–21:1.

15. (a) Kuliza na-3 Johanesa 5-8, ngapi natu likida rupandu kovatareli wonombungakriste? (Tara hena efano.) (b) Morwasinke natu likidira rupandu kovakadi ava vakwara vagara ava ava pitisire monombungakriste ntani ngapi natu yi rugana? (Tara kakende “ Diworoka vakadi vawo.”)

¹⁵ Mupositoli Johanesa kwa korangedere Gaiyusi a tambure nawa vanavazinyetu ava ngava ya dingura nokukorangeda nombungakriste ‘nokuvarekera ntani nokuvavatera monkedi ezi azi hafesa Karunga.’ (Resa 3 Johanesa 5-8.) Nkedi zimwe omu natu yi rugana kuna kara pokuzigida mutareli gonombunga komuzuhwa ndi komurarero. Ose kuvakwatesa ko hena mosirugana sokuzuvhisa apa ava dingura mbungakriste zetu. Leslie ogu tuna tumbura nare kulikida rupandu rwendi mononkedi dimwe. Age kwa uyunga asi: “Ame kukanderera kwaJehova yipo a va pe yihepwa yawo. Name namugara gwange kuvatjangera  nombilive pokuvatantera omu madinguro gawo ga tu vatera.” Diworoka asi vatareli wonombunga kuligwanekera nomaudigu ntani kuroroka. Poyiruwo yimwe nawo kuvera nokukara noyinka ntani kuguva. Nsene o va tantera nonkango donongwa ndi o va pe ko uhwi wongandi, ayo nampo ngayi kara elimbururo komakanderero gawo.—Yis. 12:25.

TWA HEPA “VAGARA NGOMAUHWI”

16. Kuliza noYisewe 3:27, mapuro musinke nava li pura vanavazinyetu wovagara?

¹⁶ Tuna hepa vanavazinyetu wovagara yipo va kare “vagara ngomauhwi.” Nsene ove munazinyetu gomugara ogu ga gwana ekuho, kuvhura o ‘vatere monkedi zangesi ndi’? (Resa Yisewe 3:27.) Ono hara kulitulira po sitambo sokukara mukwafimbunga ndi? Ono hara kurugana unene yipo o kare mukuronambunga ndi? d Kuvhura o ture po marunduruko yipo o wapere kuza kosikora zovazuvhisi woUhompa ndi? Sure ozo nga zi kudeura yipo Jesus nga ku ruganese unene. Nsene kuna kulizuvha asi kapi to vhuru kusikisa mo yininke oyo, kanderera kwaJehova. Hundira Jehova mpepo zokupongoka yipo zi ku vatere o sikise mo nkenye sirugana esi nava ku pa.—Ruk. 11:13; Yirug. 20:28.

17. Umbangi musinke ava likida ‘vagara ava va kara ngomauhwi’ kuhamena Hompa gwetu Jesus Kristusa?

¹⁷ Vanavazinyetu wovagara ava ga horowora Jesus ‘ngovagara womauhwi’ kuna kara umbangi ou au likida asi age kuna kutupitisira momazuva aga gopouhura. (Mat. 28:20) Ose kupandura unene kweyi twa kara naHompa geharo gougavi ogu hena atu pakere mbili ntani nokutupa vanavazinyetu ava ava tu pitisire. Gazadara ko omu no likida rupandu kovagara ava ava rugana unene. Pandura nkenye apa Jehova morwa yige a gava “nkenye uhwi wouwa ou wa sikilira mo.”—Jak. 1:17.