SIRONGWA SELIRONGO 43
RUSUMO 90 Likorangeda-korangedeni
Ngapi omu no nyokera po masinganyeko?
“Konakoneni nayinye.”—1 TES. 5:21.
OKU SINA DEMENENE SIRONGWA
Omu natu nyokera po masinganyeko aga naga kundama elikwatakano lyetu naJehova.
1-2. (a) Masinganyeko musinke gamwe ava kara nago vakareli vaJehova? (b) Yisinke natu ka zogera mosirongwa esi?
NATUVENYE yi kare asi vanona ndi vakondi kukara nomasinganyeko a poyiruwo yimwe. Pasihonena, gazadara kuhamena mudinkantu ogu ana kusinganyeka nsene Jehova kumupakera mbili. Kuvhura a kare nomasinganyeko nsene kuvhura a gwane ekuho. Ndi gazadara ko munazinyetu gomugara ogu ga here kutura Uhompa waJehova muhowo apa ga kere mudinkantu mevango lyokukondjera yimaliwa yoyinzi. Age ngesi mukondi ntani kapi ana kara noyimaliwa yokugwanena po a rerese ko epata lyendi. Age kuvhura a singanyeke nsene ga tulire po etokoro lyewa. Gazadara ko kuhamena munazinyetu gomukadi gomukurupe ogu ana dili kukara nononkondo dononzi. Age kuvhura a dompe mutjima morwa kapi ana kurugana eyi nga rugana nare. Wa li pura rumwe mapuro aga asi: ‘Jehova kupakera nge mbili ndi? Malizambero aga na tura po mulyo kwaJehova ndi? Ame simpe mulyo kwaJehova ndi?’
2 Nsene tu dira kugwana malimbururo komapuro aga, ayo kuvhura ngayi tu ninkise tu dire kukara nepuro mwaJehova ntani nokuhageka kumukarera. Mosirongwa esi tatu ka zogera omu nompango domoBibeli nadi tu vatera nsene tuna kara nomasinganyeko asi (1) Jehova kutupakera mbili (2) nsene asi kapi twa tulire po matokoro gomawa (3) nsene ose simpe mulyo kwaJehova.
YISINKE NAYI KUVATERA O NYOKERE PO MASINGANYEKO?
3. Nkedi musinke zimwe nazi tu vatera yipo tu nyokere po kukara nomasinganyeko?
3 Nkedi zimwe ezi nazi tu vatera tu nyokere po masinganyeko kuna kara pokupapara malimbururo moBibeli. Nsene tu yi rugana ngoso ukaume wetu naJehova ngau nkondopara ntani ngatu ‘kora mepuro.’—1 Kol. 16:13.
4. Ngapi natu ‘konakona nayinye?’ (1 Vatesaronika 5:21)
4 Resa 1 Vatesaronika 5:21. Koneka asi Bibeli kututantera tu ‘konakone yininke nayinye.’ Ngapi omu natu yi rugana? Nsene tuna kara nosinka kuhamena yuma yongandi twa hepa kutara eyi za uyunga ko Bibeli. Koneka sihonena somudinkantu ogu ana kusinganyeka nsene Jehova kumupakera mbili. Age kuvhura ayi tambure ngorooro asi Jehova kapi a mu pakere mbili ndi? Hawe. Ga hepa ‘kukonakona’ Bibeli yipo a dive nsene Jehova kumupakera mbili.
5. Ngapi natu gwana malimbururo koyinka eyi atu kara nayo?
5 Apa atu resa Bibeli ayo kwa fana ngwendi Jehova ana kutuuyungisa. Nsene tuna hara kugwana malimbururo komapuro getu twa hepa kurugana ko yuma kupitakana tupu kuresa Bibeli. Ngomu tuna kuresa Bibeli twa hepa kuresa Matjangwa aga ga zogera kuhamena yinka eyi tuna kara nayo. Kuvhura tu rugane epaparo pokuruganesa yiruganeso eyi za gava mbunga zaJehova nsene tuna kara nosinka. (Yis. 2:3-6) Twa hepa kukanderera kwaJehova noku mu pura a tu vatere yipo tu gwane elimbururo kosinka esi tuna kara naso. Twa hepa kuresa Bibeli tu gwane magano aga gana lizi noukaro wetu. Kuvhura hena tu rese yihorokwa yomoBibeli ya va va pitire moukaro wokulifana.
6. Ngapi mapongo aga tu vatere tu nyokere po masinganyeko?
6 Jehova kutuuyungisa hena kupitira momapongo getu. Nsene tu za nkenye apa komapongo, ose kuvhura ngatu zuvhe yuma yongandi mosiuyungwa ndi melimbururo lyagumwe ano eyi kuvhura ngayi tu vatere tu nyokere po masingangeyeko. (Yis. 27:17) Tu zogereni omu natu nyokera po masinganyeko.
NSENE ONO KARA NOMASINGANYEKO ASI JEHOVA KAPI A KU PAKERE MBILI
7. Epuro musinke ava lipura vamwe?
7 Wa lipura rumwe nsene Jehova kukupakera mbili ndi? Nsene ove kulizuvha asi kwato mulyo, kuvhura o gazare asi ayo udigu kukara kaume kaJehova. Hompa Ndafita nampo nage kwa lipulire epuro olyo. Age kwa mu tetukisire kweyi Jehova a pakere mbili vantu makura yipo ga pulire asi: “Hompa, muntu koge yinke, o ka mu dive; munwamuntu, o ka mu pakere mbili?” (Epis. 144:3) Kupi no gwana elimbururo kepuro eli?
8. Kuliza 1 Samwere 16:6, 7, 10-12 yisinke Jehova a mono movantu?
8 Bibeli kuturonga asi Jehova ga diva ava ava tara vakwawo asi kwato mulyo. Pasihonena, Jehova kwa tumine Samwere kembo lyaIsayi yipo a ka gwaveke gumwe govana vendi wovagara ogu nga kara hompa gwaIsraeli. Isayi kwa zigidire vana vendi ntambali va ze kwaSamwere, nye age kapi ga zigidire munwendi gomunona po Ndafita. b Nye Jehova kwa horowere Ndafita. (Resa 1 Samwere 16:6, 7, 10-12.) Jehova ga yi divire asi Ndafita ga mu here unene.
9. Morwasinke no yi pulira asi Jehova kukupakera mbili? (Tara hena efano.)
9 Gazadara ko tupu kuhamena omu Jehova ga ku pakera mbili. Age kukupa mavyukiso gomawa kuliza noukaro woge. (Epis. 32:8) Eyi kulikida asi ga ku diva nawa. (Epis. 139:1) Apa o sikisa mo mapukururo gaJehova nokudimburura omu ga ku vatera, ove ngo yi pura nawa-nawa asi age kukupakera mbili. (1 Hist. 28:9; Yirug. 17:26, 27) Jehova kumona elituromo lyoge. Age ga diva yikara yoge yoyiwa ntani ana hara kukara kaume koge. (Jer. 17:10) Ntani age nga hafa unene nsene ngo kara kaume kendi.—1 Joh. 4:19.
“Nsene o za kwendi, age ta ku tambura.”—1 Hist. 28:9 (Tara paragarafu 9) c
APA O KARA NOMASINGANYEKO KUHAMENA MATOKORO AGA WA TURA PO
10. Mapuro musinke nampo natu lipura apa atu gazadara kuhamena matokoro aga twa tura po nare?
10 Poyiruwo yimwe vamwe kuvhura va singanyeke kuhamena matokoro aga va tura po nare nokulipura nsene awo kwa tulire po matokoro gomawa. Nampo awo kwa sigire yirugana yoyiwa ndi kwa tokwere kudira kurugana ngesefa yipo va karere Jehova momunene. Nampo pana piti nomvhura dononzi ngesi, awo kuvhura va mone vakaume vawo ava va za kelirongo lyokuzeruka vana kara noyimaliwa yoyinzi ntani kwa kuparuka nawa. Ayo kuvhura kuvaninkisa va lipure asi: ‘Ame kwa tura po matokoro gomawa mokukarera Jehova ndi? Ndi ngano na litulire mo unene yipo ni kare noyimaliwa yoyinzi?’
11. Yisinke ya dompesere mutjangi gEpisarome 73?
11 Nsene ove kulipura mapuro ogo, koneka omu ga lizuvhire mutjangi gEpisarome 73. Age kwa mwene vantu ava va kere noukanguki wouwa ntani ava va ngawopere ntani ava va monekere ngwendi kapi va kara nomaudigu. (Epis. 73:3-5, 12) Apa ga mwene omu yina kuvatompoka, age kwa lizuvhire ngwendi etokoro eli ga tulire po lyokukarera Jehova kapi lya kere lyewa. Magazaro aga ‘kwa mu hepekere ezuva mudima.’ (Epis. 73:13, 14) Ngapi omu ga lididimikilire malizuvho gendi gomadona?
12. Kuliza noMapisarome 73:16-18, yisinke ya vaterere muEpisarome yipo a dire kukara nomagazaro gomadona?
12 Resa Episarome 73:16-18. Mutjangi gEpisarome kwa zire koNtembeli zaJehova. Vakareli vaJehova kwa mu vaterere yipo a gazare nawa. Age ga kwete egano asi nampili ngomu vamwe va parukire nawa, nye kapi va kere nehuguvaro lyokomeho. Kudiva yininke eyi ya mu vaterere a kare nombili zopamagazaro ntani kutura Jehova meparu lyendi kwa kere etokoro lyewa po kwendi. Ano eyi kwa mu ninkisire a tokomene kukarera Jehova.—Epis. 73:23-28.
13. Ngapi no gwana mbili zopamagazaro nsene ove kusinganyeka kuhamena matokoro aga wa tura po nare? (Tara hena efano.)
13 Nonkango daKarunga kuvhura kukuvatera yipo o kare nombili zopamagazaro. Monkedi musinke? Diworoka yininke yoyiwa eyi wa kara nayo kukwatera mo mauwa aga aga tundu kwaJehova ntani diworoka asi Jehova kapi a vatere vantu ava ava dili kumukarera. Awo kuvhura va huguvare unene moyininke eyi va tompora meparu morwa kapi va kara nehuguvaro lyokomeho. Nye mokulisiga Jehova kwa kutumbwidira yininke yoyiwa yokomeho. (Epis. 145:16) Ntani ose ngano kapi tuna diva eparu lyetu omu lina fana nsene twa tulire po matokoro gapeke. Nye ava ava tura po matokoro morwa va hara Jehova novantu nkenye apa awo kugwana yininke yoyiwa.
Gazadara ko koyininke yoyiwa eyi ga tumbwidira Jehova (Tara paragarafu 13) d
NSENE OVE KUNA KUSINGANYEKA ASI KWATO MULYO KWAJEHOVA
14. Maukaro musinke vana kuligwanekera nago vanavazinyetu vamwe ntani epuro musinke nampo nava li pura?
14 Vakareli vamwe vaJehova kulizuvha asi awo kapi vana kurugana ngwendi eyi ngava rugana nare morwa vana kurupa nokuvera-vera ndi yirema. Maukaro ogo kuvhura ga va ninkise va lizuvhe asi awo kwato mulyo kwaJehova. Awo kuvhura va li pure asi: ‘Ame mulyo kwaJehova ndi?’
15. Yisinke ga pulire nawa-nawa mutjangi gEpisarome 71?
15 Mutjangi gEpisarome 71 nage kwa kere nosinka sokulifana. Age kwa kanderere asi “Wa ha zumbira nge asi morwa nonkondo dina pili nge!” (Epis. 71:9, 18) Nampili ngomu muEpisarome ga lizuvhire ngoso, age ga yi pulire nawa-nawa asi nsene a twikira kukarera Jehova noulimburukwi, age nga mu pitisira nokumuvatera. Muepisarome ogo ga ya dimbwilire asi Jehova kuhafera navenye ava ava rugana paapa va hulira yipo va twikire kumukarera nampili ngomu va kara nomaupirankondo gawo.—Epis. 37:23-25.
16. Ngapi omu vakarupe va kara nomulyo kwaJehova? (Epis. 92:12-15)
16 Nsene asi o mukurupe, diworoka asi Jehova kumona ukaro woge. Age kuvhura a ku vatere o twikire kumukarera noulimburukwi nampili ngomu ono kurupa. (Resa Episarome 92:12-15.) Mevango lyokudemenena kweyi no dira kusikisa mo, gazadara ko kweyi no vhura kurugana. Pasihonena, ove kuvhura o vatere vakweni kupitira mosihonena soge sosiwa ntani pokuvalikida eharo. Kuvhura o tantere ko vakweni omu ga ku vatera Jehova nomvhura dononzi ntani matumbwidiro aga ono kundindira nononkondo ngaga ka sike mo komeho. Ntani diworoka asi makanderero goge kuvhura kuvatera vapuli vakweni. (1 Pet. 3:12) Yi kare asi ukaro musinke tuna kupita, natuvenye kuvhura kuruganena Jehova ndi vakwetetu yuma yongandi.
17. Morwasinke natu nyokera po kulihetakanesa novakwetu?
17 Nsene asi kapi ono kurugana yoyinzi mosirugana saJehova, kara nehuguvaro asi Jehova kuhafera nkenye eyi o sikisa mo. Ove kuvhura o hetakanese yirugana eyi ono kurugana neyi vana kurugana vakweni. Nyokera po kuyirugana oyo. Morwasinke? Morwa Jehova kapi a tu hetakanesa nava wopeke. (Gar. 6:4) Pasihonena, Mariya kwa pere Jesus magadi gondiro. (Joh. 12:3-5) Mokulisiga, mufisayendi kwa geve kontembeli yimaliwa yivali yoyitenda eyi ya dilire kukara nomulyo. (Ruk. 21:1-4) Nye Jesus kapi ga hetakanesere eyi va geve vakadi owo vavali, age kwa yi mwene asi navenye kwa likidire epuro. Jehova nage kutara asi nkenye eyi atu mu ruganene mulyo yi kare asi yinunu ndi yinene, sinene tupu kuna kuyirugana neharo.
18. Yisinke nayi tu vatera tu funde po masinganyeko? (Tara hena kakende “ Nonkango daJehova kuvhura di ku vatere o funde po masinganyeko.”)
18 Natuvenye kukara nomasinganyeko poyiruwo noyiruwo. Ngwendi moomu tupu tuna yi lirongo, Bibeli kuvhura kutuvatera tu funde po masinganyeko. Rugana unene yipo o gwane malimbururo komapuro aga aga kuninkisa o kare nomasinganyeko. Nsene o yi rugana ove kapi ngo kara nosinka. Jehova ga ku diva pamundinda, age kuhafera matokoro nagenye wa tura po yipo o mu ture muhowo meparu lyoge ntani nga ku futa. Kara nehuguvaro asi Jehova ga hara vakareli vendi navenye wovalimburukwi ntani kuvatara asi awo mulyo.
RUSUMO 111 Nokonda detu dehafo
a EFATURURO LYONKANGO: Mosirongwa esi kuna kuzogera mo kuhamena masinganyeko aga aga tu ninkisa tu lizuvhe asi ose kwato mulyo kwaJehova ndi matokoro aga twa tura po. Aga kapisi masinganyeko aga va tumbura moBibeli aga aga ninkisa muntu a dire kukara nepuro mwaJehova nomomatumbwidiro gendi.
b Nampili ngomu Bibeli azi dili kututantera nomvhura daNdafita apa Jehova ga mu horowere, nye age nampo kwa kere simpe mudinkantu.—Tara Ruhungu 1 Sitarara 2011, epe. 29, para. 2.
