KUDIMBA nonsumo kwa kere nomulyo mompo zoVaisraeli. Bibeli kwa uyunga asi vantu ngava dimbi nonsumo nokuruganesa yikwanomusika. Maruha gamwe gomoBibeli kwa tjanga mo nonsumo, pasihonena mobuke zoMapisarome, Rusumo rokononsumo ntani Malirankali. Buke zedina Music in Biblical Life kwa tanta asi: “Bibeli kulikida nawa-nawa asi Vaisraeli ngava dimbi nonsumo meparu lyawo.”

Kudimba nonsumo nkenye ezuva. Vaisraeli ngava dimbi nonsumo edi ngadi pwagesa malizuvho gawo. (Jes. 30:29) Vakadi ngava siki nongomagona nokudimba nonsumo noruhafo ntani nokudana apa hompa gomupe ngava mu dwareke nkata napa vakwayita ngava fundu moyita ntani poyipito youkareli. (Vap. 11:34; 1 Sam. 18:6, 7; 1 Vah. 1:39, 40) Vaisraeli ngava dimbi hena nonsumo apa ngava guwu. (2 Hist. 35:25) Buke McClintock and Strong’s Cyclopedia kwa uyunga asi: “Vaisraeli kwa here unene kudimba nonsumo.”

Kudimba nonsumo mombara zahompa. Vahompa woVaisraeli ngava hafere kudimba nonsumo. Hompa Sauru kwa zigidire Ndafita a ka mu sikire po siumba mombara. (1 Sam. 16:18, 23) Ano apa Ndafita ga kere hompa, age kwa pangerere yikwanomusika nokutota po nonsumo donongwa ntani nokuwapaika vantu va dimbe pontembeli zaJehova. (2 Hist. 7:6; Amosa 6:5) Hompa Saromo kwa kere novadimbi wovakadi nava wovagara mombara zendi.—Muud. 2:8.

Kudimba nonsumo moukareli. Somulyo po unene, Vaisraeli ngava dimbi nonsumo va karere Jehova. Vagara wokusika po 4 000 kwa ruganesere yisiko pontembeli moJerusarema. (1 Hist. 23:5) Awo kwa ruganesere nombendo, yiumba noyisikwa yapeke. (2 Hist. 5:12) Nye vadimbi ava va kere noudivi wokudimba kapisi yiwo velike ngava karere Jehova. Vaisraeli wovanzi ngava dimbi nonsumo morugendo apa ngava zi koyipito yankenye mvhura koJerusarema. (Epis. 120–134) Kuliza nomatjangwa goVahebeli, Vaisraeli ngava dimbi nonsumo domoMapisarome a posipito soPaska.

Nonsumo simpe mulyo kovantu vaJehova. (Jak. 5:13) Kudimba kuna kara ruha roukareli wetu. (Efe. 5:19) Nonsumo kutureta mouumwe noVakriste vakwetu. (Koros. 3:16) Ntani ado kutunkondopeka apa atu piti momaudigu. (Yirug. 16:25) Nonsumo kuna kara nkedi zongwa atu likida epuro mwaJehova ntani asi twa mu hara.