Valikwali va hepa kuruganesa nompango domoBibeli pokutokora nsene tava ruganesa sikandaneso ezimo IUD. Eyi ngayi va vatera mokutura po matokoro aga aga hafesa Jehova.

Jehova kwa pangerere Adamu naEva ntani Nowa nepata lyendi asi: “Livhareni mu zwide evhu.” (Gen. 1:28; 9:1) Bibeli kapi za uyunga asi Vakriste va hepa kukwama mpangera ozo. Yipo nye, valikwali va hepa kutokora pwavene nsene tava ruganesa yikandaneso mazimo mokusesupika mapata gawo ndi mokudira kukara novana. Yitwa musinke nava tarurura?

Ayo ya wapa koVakriste mokugazadara ko konompango domoBibeli nsene asi tava ruganesa yikandaneso mazimo. Eyi ngayi va vatera mokunyokera po kuligusa ezimo. Kuligusa ezimo kulirwanesa neyi za uyunga ko Bibeli kuhamena mulyo geparu. Vakriste kapisi va liguse ezimo morwa ezimo kutwaredesa kehampuruko lyomukeke. (Ex. 20:13; 21:22, 23; Epis. 139:16; Jer. 1:5) Nye ngapi kuhamena kuruganesa sikandaneso ezimo IUD?

MoRuhungu 15 Kudumonkuru 1979 (pepenuno 30-31) kwa zogerere mo magano ogo. Posiruwo sina, IUD ngava zi rugana noyiplastika eyi ngava tura momukoga gomukadi mokukandana po ezimo. Sirongwa oso kwa fatwilire asi vantu kapi va divire nawa-nawa omu IUD ngazi rugana. Vadiviunsitwe wovanzi kwa tanta  asi IUD kwa kandanene yitjandera mokugwanekera nomauta gomukadi yipo mukeke a liforome.

Nye, maumbangi gamwe kwa likidire asi poyiruwo yimwe yitjandera ngayi ligwanekere neuta nokutameka kuliforoma. Euta eli lina tameke nare kuliforoma mukeke apa nali za mezimo omu azi kara IUD, kapi a li twikire kuliforoma morwa sikandeneso ezimo IUD kukandana po mukeke mokutwikira kuliforoma. Eyi kuna kara ngwendi kuna ligusa ezimo. Sirongwa somoRuhungu oro kwa ya hagesere asi: “Mukriste ogu ana hara kuruganesa IUD ga hepa kuteda ko unene konompango domoBibeli kuhamena mulyo gweparu komeho zokuziruganesa.”—Epis. 36:9.

Kutundilira mo-1979 apa sa pwege sirongwa sina pwa horoka marunduruko kuhamena uhaku.

Ngesi pana kara marudi gavali go IUD. Zimwe kwa kara mo kavera kongoporo ntani azo kwa ya tamekere kuziruganesa moAmerika mo-1988. Ano nkwawo ezi za kara nononkondo dokukandanesa euta mokuliforoma, kwa tamekere kuzirandesa mo-2001. Ngapi omu adi rugana no IUD edi mbali?

Kavera: Ngomu tuna yi tumbura, noIUD kukandana yitjandera mokuza momukoga. Kavera kongopora aka ka kara moIUD kwa kara nouhungu ou au dipaga yitjandera yipo yi dire kuligwanekera neuta lyomukadi. * Ntani hena azo kutjindja mukoga gomukadi.

Nomutji: No IUD dimwe kwa kara mo nomutji dokukandana mazimo. No IUD odo nado kukandana euta mokuliforoma. Kovakadi vamwe IUD kukondera euta mokuwiza momukoga. Ano nsene euta kapi lina kuza momukoga kapi tali liforoma li kare mukeke. No IUD edi hena kutjindja mukoga gomukadi. * Ado hena kukondera yitjandera mokuza mokukoga gomukadi.

Ngomu tuna yi tumbura no IUD odo nadinye kutjindja mukoga gomukadi. Nye ngapi nsene euta li za momukoga nokutameka kuliforoma? Ayo kuvhura kuhoroka nye mukadi kapi ta kara nezimo. Vadiviunsitwe kwayi pura asi eyi kapi ya hwa kuhoroka nye poyiruwo yimwe kuvhura kuhoroka nsene kwa kuruganesa nomutji dokukandanesa mazimo.

Yipo nye, kapi twa diva nawa nsene asi no IUD edi kuvhura kukandana euta mokuliforoma. Nampili ngoso, Vadiviunsitwe va gwana maumbangi asi morwa yininke eyi tuna tumbagura, ezimo kuvhura kulikandana po pokuruganesa no IUD.

Valikwali ava vana hara kuruganesa IUD va hepa kuzogera na ndokotora ogu ga kara noudivi kuhamena nomutji da hamena mo ntani mauwa nomaudona aga nayi ka retera mukadi. Ntani va ha pulisira ndokotora ndi muntu gwapeke mokuvatokwera po. (Rom. 14:12; Gal. 6:4, 5) Va hepa kutokora vene. Pokutokora, sitambo sawo si kare mokuhafesa Karunga ntani yipo va kare nezwi lyewa lyokomutjima.—Hetakanesa 1 Timoteusa 1:18, 19; 2 Timoteusa 1:3.