1. Morwasinke ekuho lya karera nomulyo? (Tara efano.)

NKENYE mvhura, varongwa wovanzi woBibeli kugwana ekuho. Sinzi sawo kuna kara vadinkantu novanonagona. Vamwe nampo kwa kulira mousili. Nove gumwe gwawo ndi? Nsene yimo, ove kwa tura po etokoro lyewa. Ekuho kuna kara sininke somulyo koVakriste yipo ngava ka gwane eparu.—Mat. 28:19, 20; 1 Pet. 3:21.

2. Morwasinke no dilira kutjira mokuligava kwaJehova?

² Nampili ngomu ekuho ali reta mauwa, simpe yinzi ya hamena mo. Ngwendi yininke musinke? Pezuva lyoge lyekuho, ove kwa limbwilire asi, nhi kepuro eli asi: “Kuliza nonzambo zaJesus Kristusa, one mwa litezurura kononzo deni nokuligava nyamweni kwaJehova mokurugana mpango zendi ndi?” Apa va ku kuhwire ove kwa likidire asi wa ligava kwaJehova. Ove kwa tumbwidilire asi ngomu hara ntani nokutura mpango zendi muhowo kupitakana nkenye eyi. Olyo  kuna kara etokoro lyomulyo. Kuvhura nye o livere kweyi wa tulire po etokoro olyo ndi? Hawe. Kuligava kwaJehova kapisi sininke sepuko. Nye mokulisiga, muntu ogu a dili kukarera Jehova kwa kara mepangero lyaSatana. Muzonaguli kapi ga hara asi o ka paruke. Age nga hafa nsene ngo zumbanesa mwenyo gwanarunye, pokulipakerera nendi mokurwanesa upangeli waJehova.

3. Mauwa musinke atu gwana pokuligava kwaJehova?

³ Gazadara ko omu ga ku tungika Jehova morwa kuligava kwendi nokugwana ekuho. Mokumona asi ove wa ligava kwaJehova, kuvhura o uyunge nononkondo asi: “HOMPA name ga kara, neisi ngani tjilira; vantu va tompore nge yinke?” (Epis. 118:6) Kwato yomulyo ya pitakana kuhama kwaKarunga ntani nokudiva asi age ga ku hara.

4, 5. (a) Monkendi musinke eligawo lya kara situmbukira sanyamwetu? (b) Maudigu musinke ava ligwanekere nago Vakriste navenye?

⁴ NgoMukriste ogu ga gwana ekuho, elikwatakano lyoge naJehova kapi lya korera movakondi woge. Aso situmbukira soge mokuruganena eparu lyoge, nampili kwa tunga membo lyovakurona woge. Morwasinke ya karera nomulyo koge mokudiva eyi? Morwa kapi ono diva asi maudigu musinke ngo ligwanekera nago komeho. Pasihonena, nsene kwa gwene ekuho ove simpe munonagona, ngo ligwanekera nomaudigu ngomu ono kukura. Mudinkantu gumwe gomukadona kwa tanta asi: “Munona kapi nga vhura kulivera eyi ga karera gumwe goNombangi daJehova morwa asi yeeyi a dili kudana sipito segwaneso kosure. Nye mwaza nomvhura apa malizuvho gokuligwanekera panyama na ga ya nkondopara, ga hepa kuyipura asi kulimburukwa nompango daJehova kureta mauwa.”

⁵ Vanona kapisi yiwo velike ava ligwanekere nomaudigu. Nampili ava va gwana ekuho moukondi nawo kuligwanekera nomaudigu. Maudigu ogo kuwiza po morwa nonkwara ndi uvera ndi yirugana. Yi kare asi tuvanona ndi tuvakondi, natuvenye ngatu ligwanekera nomaudigu aga ngaga heteka ulimburukwi wetu kwaJehova.—Jak. 1:12-14.

6. (a) Yisinke ayi tanta asi eligawo lyoge kwaJehova kapisi lyopokaruwogona tupu? (b) Yisinke no lirongera ko ketjangwa lyomoVafilipi 4:11-13?

⁶ Mokukuvatera o twikire kulimburukwa momaukaro nagenye, wa hepa kudiworoka asi etumbwidiro lyoge lyokukarera Jehova kapisi lyopokaruwogona tupu. Ayo kutanta asi ove kwa tanterere Musiti asi ngo twikira kumukarera nampili vakaume ndi vakurona woge va hageka. (Epis. 27:10) Momaukaro nagenye kanderera kwaJehova a ku vatere o sikise mo mugano ogu wa tulire po apa wa ligeve kwendi.—Resa Vafilipi 4:11-13.

7. Yisinke ayi tanta kuruganena eparu lyoge “noutjirwe nekankamo”?

⁷ Jehova kuna hara o kare kaume kendi. Pwa hepa elituromo mokunkondopeka ukaume woge naJehova ntani nokuruganena eparu lyoge. Vafilipi 2:12 kutanta asi: “Kovekedeni nye mokuruganena eparu lyeni noutjirwe nekankamo.” Nonkango odo kulikida omu no nkondopeka ukaume woge naJehova nokutwikira kukara mulimburukwi mwankenye maudigu. Twa hepa kunyokera po kulihuguvara nyamwetu, morwa nampili vakareli vaJehova wovalimburukwi vanare va ya hagekere  kumukarera. Yipo nye, yisinke no rugana mokuruganena eparu lyoge?

8. Yisinke ya kwatera mo melirongo lyanyamoge lyoBibeli ntani morwasinke ya karera nomulyo?

⁸ Ukaume wetu naJehova kwa hamena mo nonkendi mbali, kumupurakena nokuuyunga nendi. Elirongo lyanyamwetu lyoBibeli kuna kara nkedi ezi atu purakene kwaJehova. Ayo kwa kwatera mo kuresa Nonkango daKarunga noyimbapiratjangwa yetu ntani nokuteda ko. Twa hepa kudiworoka asi kulironga Bibeli kapi kwa fana ngwendi muntu gwina ana kuresa tupu kwelike a ka tjange ekonakono kosure. Nye ayo kwa fana ngwendi kuna kuza morugendo roruwa omu no ya diva yoyinzi nokuyadimburura yikara yaJehova. Eyi ngayi kuvatera o hedere pepi naJehova ano nage nga ku hedera pepi.—Jak. 4:8.

9. Yiruganeso musinke ya ku vatera melirongo lyoge lyoBibeli?

⁹ Mbunga zaJehova kwa kara noyiruganeso eyi nayi kuvatera o rugane nawa elirongo lyoge lyoBibeli. Pasihonena, ko-jw.org koRuingilisa koruha “Vadinkantu” kugwana ko “Yirongwa yElirongo lyoBibeli” eyi nayi ku vatera o lirongere ko koyihorokwa yomoBibeli. Ako hena kugwana ko yirongwa “Yinke azi rongo Bibeli sili?” mokukuvatera o pameke epuro lyoge. Yirongwa oyo ngayi ku vatera o dive omu no fatwilira wopeke kuhamena epuliro lyoge. Magano gamwe kuvhura kugagwana mosirongwa “Vadinkantu tava pura . . . Ngapi omu nani hafera ereso lyoBibeli?” moAwake! zaKudumogona 2009. Kulironga ntani kuteda ko mulyo koge mokuruganena eparu lyoge.—Resa Episarome 119:105.

10. Morwasinke kukanderera kwa karera nomulyo koMukriste ogu ga gwana ekuho?

¹⁰ Apa atu lirongo Bibeli ose kupurakena kwaKarunga, ano apa atu kanderere ose kuuyunga nendi. Mukriste kapisi a tare ekanderero ngwendi asi sininke tupu esi asi mu pe erago yipo yi mu tompoke. Nye, kukanderera kuna kara nkedi ezi atu uyunga noMusiti gwetu. Jehova kuna hara o uyunge nendi. (Resa Vafilipi 4:6.) Nsene  kuna kara noyinka, Bibeli kutukorangeda tu ‘twike HOMPA udigu wetu.’ (Epis. 55:22) Vanavazinyetu va limonena omu Jehova ga va vatera pokurugana oyo. Nsene o rugana oyo, Jehova nga ku vatera.

11. Morwasinke no pandwira Jehova nkenye apa?

¹¹ Kukanderera kapi mwa kwatera tupu kupura Jehova a ku vatere. Bibeli kuuyunga asi: “Omu pandure Karunga nkenye apa.” (Koros. 3:15) Poyiruwo yimwe kuvhura tu demenene unene komaudigu getu nokudivara mauwa aga twa gwana. Nkenye ezuva gazadara ko nampili yininke yitatu eyi no vhura kupandwira Jehova mekanderero. Mudinkantu gomukadona gedina Abigail ogu va kuhwire nonomvhura 12, kwa tanta asi: “Ame kulizuvha asi Jehova ga fira kumupandura unene kupitakana navenye womouzuni. Twa hepa kuruganesa nkenye mpito mokumupandura komauhwi aga ga tu pa.” Abigail kulipura epuro eli ga zuvhire sikando simwe asi: ‘Ngapi no lizuvha nsene Jehova a ku pa yeeyi tupu o hundire yelike, kuvhura o kare nanayinye eyi wa hepa ndi?’

12, 13. Morwasinke ya karera nomulyo kugazadara ko omu Jehova ga ku vatera?

¹² Hompa Ndafita ogu ga limonene omu Jehova ga mu vaterere kwa tente asi: “Hetekeni mu tare asi HOMPA ngapi omu ga wapa! Verago vaava ava gwana uvando mwendi!” (Epis. 34:8) Velise ozo kulikida mulyo gokulimonena omu Jehova ga tu vatera. Pokuresa Bibeli noyimbapiratjangwa yetu ntani nokuwiza komapongo, ove ngo zuvha yihorokwa yimwe omu Jehova ga vatera vamwe va twikire kumulimburukwa. Nye, ngomu ono kuyadiva Jehova, wa hepa kumuheteka yipo o limonene omu ana kukuvatera meparu. Ngapi omu wa heteka Jehova nokulimonena omu ga wapa?

¹³ Vakriste navenye kwa limonena omu Jehova ga wapa monkedi zokulikarera. Jehova kwa zigida vantu yipo va hedere pepi nage ntani naMunwendi. Jesus kwa tente asi: “Nagumwe si a vhuru kuwiza kwange, ntudi Tate ogu ga tuma nge yige a mu koke.” (Joh. 6:44) Ove kulizuvha asi Jehova yige ga ku kokera kwendi ndi? Mudinkantu kuvhura a uyunge asi: ‘Jehova kwa koka vakondi vange, ame kwa va kwama tupu.’ Nye apa wa ligeve kwaJehova nokukukuhwa, ove kwa likidire asi wa tulisa po elikwatakano nendi. Ngesi Jehova ga ku diva. Bibeli kutanta asi: “Ogu ga hara Karunga, yige ga divikwa po kwendi.” (1 Kol. 8:3) Wa hepa kupandura kweyi wa kara mombunga zaJehova.

14, 15. Ngapi kuzuvhisa na kukuvatera o pameke epuro lyoge?

¹⁴ Nkedi zimwe hena no limonena omu Jehova ga wapa kuna kara pokuzuvhisa. Ove kuvhura o zuvhise mononzira ndi kosure. Vamwe kuvadigopera kuzuvhisira vakwawo wokosure. Kuvhura o li zuvhe ngoso morwa kapi ono diva nsene nava yi tambura ndi hawe. Ayo hena kudigopa unene po nsene kuna kuzuvhisira mbunga zovantu mevango lyokuzuvhisira gumwe pamundinda. Yisinke nayi kuvatera?

¹⁵ Pomuhowo, gazadara ko konda zeyi wa pulira epuliro lyeni. Mwa kara noyirongwa ko-jw.org meraka lyeni ndi? Nsene kapi ono diva, litulira po siruwo oyi papare. Ayo kwa yi wapaika nositambo sokumuvatera  mu tede ko kweyi mwa pura neyi mwa yi pulira ntani omu no fatwilira wopeke epuliro lyeni. Nsene o kara nepuro lyokupama nokuliwapaikira nawa, ayo ngayi kutumangeda o zuvhisire wopeke kuhamena Jehova.—Jer. 20:8, 9.

16. Yisinke nayi kuvatera yipo o uyunge nemanguruko kuhamena epuliro lyoge?

¹⁶ Poyiruwo yimwe nampili ono liwapaikire kuvhura yi ku digopere kuzuvhisira wopeke. Mudinkantu gomukadona gonomvhura 18 ogu va kuhwire nonomvhura 13, kwa tanta asi: “Nayi diva nawa-nawa eyi na pura, nye pamwe kudigopera nge kuyifatwilira wopeke.” Ngapi omu a kohonona po udigu owo? Age kwa tanta asi: “Ame kuuyunga tupu nawo ngonzogera. Vakwetu wokosure kuuyunga nemanguruko yininke eyi ava rugana. Name na hepa kukara nemanguruko. Monzogera zetu novakwetu ame kupitisa mo yimwe yokuhamena Bibeli. Nampili ngomu nzogera azi dili kudemenena koBibeli, vamwe simpe kukara neharo lyokudiva ko momunene kuhamena eyi ani rugana pokuronga vantu Bibeli. Poyiruwo yimwe awo kupura mapuro. Apa ani ruganesa nkedi ozo, ayo kurerupira nge kuzogera nawo. Ano konyima kulizuvha sili ruhafo.”

17. Yisinke hena nayi kuvatera o uyunge nava wopeke?

¹⁷ Nsene o fumadeka nokulikida elituromo mwava wopeke, awo ngava kupurakena. Olivia gonomvhura 17 ogu va kuhwire age simpe munonagona kwa tanta asi: “Ame ngani tjira asi vantu kuvhura va monenge ngwendi kwa zaruka pokuuyunga nawo kuhamena Bibeli.” Konyima ga ya rundwilire nkareso zendi nokudira kutjira vantu. Age kwa tente hena asi: “Sinzi sovadinkantu kapi va diva kuhamena Nombangi daJehova. Ose nyoselike tupu Nombangi va diva posure zetu. Yipo nye, nkareso zetu kuvhura zi va ninkise va purakene ndi hawe. Ngapi nsene asi ose woma ndi nomuga kuzuvhisira wopeke? Vantu kuvhura ngava tu mone asi kapi twa hafera kukara Nombangi daJehova. Awo kuvhura ngava dire kutupurakena morwa kapi twa kara nemanguruko. Nye nsene tu uyunga nemanguruko kuhamena eyi twa pura, nokuyipitisa nkenye apa monzogera zetu zankenye ezuva, ngava tu fumadeka.”

18. Yisinke ya hamena mo mokuruganena eparu lyoge?

¹⁸ Ngomu tuna yi lirongo, kuruganena eparu lyoge, aso situmbukira sosinene. Amo kwa hamena mo kulironga Nonkango daKarunga nokuteda ko, kukanderera kwaJehova ntani nokugazadara ko omu ga kutungika. Nsene oyi rugana nkenye apa, ngayi kuvatera o yi pure nawa-nawa asi Jehova kaume koge. Ano ayo, ngayi kutumangeda o tantere ko wopeke kuhamena epuliro lyoge.—Resa Episarome 73:28.

19. Morwasinke ya karera nomulyo o kondje mokuruganena eparu lyoge?

¹⁹ Jesus kwa tente asi: ‘Muntu ogu ga hara kukwama nge, a lidine ntani, ta damuna [sitji] sendi, ta kwama nge.’ (Mat. 16:24) Kukwama Kristusa kwa hamena mo kuligava kwaJehova nokukuhwa. Ayo kureta mauwa ngesi ntani komeho mwenyo gwanarunye. Yipo nye, kondja paapa wa hulira mokuruganena eparu lyoge.