1-3. (a) Yininke musinke yimwe twa pura? (b) Morwasinke evhumbuko lya karera nomulyo? (Tara efano.)

NSENE va kupura asi: ‘Yisinke mwa pura?’ Yisinke ngo limburura? Nampo ove ngo limburura asi Jehova yige Musiti ntani Mugavi geparu. Kuvhura hena ngo uyunge asi ove kwa pura mwaJesus Kristusa ogu ga tu fira. Ntani hena asi vantu vaKarunga ngava ka paruka narunye moparadisa pevhu. Nye ngapi kuhamena evhumbuko, kuvhura o tantere muntu ogo asi nalyo kuna kara sininke so mulyo po esi wa pura ndi?

² Twa kara nonokonda domulyo deyi natu tanterera ko wopeke eyi twa pura kuhamena evhumbuko, nampili ngomu twa kara nehuguvaro lyokukapita moudigu wounene nokukaparuka narunye. Mupostoli Paurusa ga yi likidire asi evhumbuko mulyo. Age kwa tente asi: “Nsene asi evhumbuko lyovafe kutupu, ntudi Kristusa nage kapi va mu pindura koufe.” Ngano Kristusa kapi va mu pindwire koufe, ngano kapi ga kara Hompa gwetu ntani ngano mbudi ezi atu zuvhisa kuhamena Uhompa wendi, zomawoko-woko. (Resa 1 Vakolinte 15:12-19.) Nye ose twa yi diva asi Jesus va mu vhumbwire. Ose twa lisiga noVasadukayi ava va dilire kupura mevhumbuko. Nampili vantu va tu sindagure nokutuswaura, ose simpe kukwaterera  kepuliro lyetu mevhumbuko.—Mar. 12:18; Yirug. 4:2, 3; 17:32; 23:6-8.

³ Paurusa kwa tente asi erongo ‘lyevhumbuko lyovafe’ kwa kere ruha ‘rwe tameko lyerongo lyaKristusa.’ (Heb. 6:1, 2) Paurusa ga yi likidire asi ga pulire mevhumbuko. (Yirug. 24:10, 15, 24, 25) Nampili ngomu evhumbuko lyovafe lya kara ruha ‘rwe tameko lyerongo lyaKristusa,’ simpe twa hepa kulironga kuhamena sirongwa esi. (Heb. 5:12) Morwasinke?

4. Mapuro musinke natu lipura kuhamena evhumbuko?

⁴ Apa vantu ava tameke kulironga Bibeli awo kuyadiva yihorokwa yanare yevhumbuko ngwendi saRasarusa. Awo hena kuyalironga kuhamena Abirahamu naJoba naNdaniyera ava va kere nehuguvaro asi komeho vafe ngava ka va pindura. Nye ngapi no limburura nsene gumwe a ku pura omu pe umbangi womoBibeli asi evhumbuko kuvhura kuhoroka nampili pa pite nomvhura dononzi? Bibeli za likida siruwo apa ngali ka horoka evhumbuko ndi? Malimbururo komapuro ogo, kunkondopeka epuro lyetu. Tuzeni tu ka konakone ko Matjangwa gamwe.

5. Yisinke natu ka konakona?

⁵ Ayo ureru kupura mevhumbuko lyomuntu ogu ana fu nokumuvhumbura konyima tupu zosiruwo songandi. (Joh. 11:11; Yirug. 20:9, 10) Nye ngapi kuhamena vantu ava va fa nare-nare? Kuvhura tu yi huguvare asi vantu ngava ka va vhumbura yi kare asi nare va fa ndi? Ove wa pura nawa-nawa mevhumbuko eli lya ya horokere konyima zonomvhura dononzi kutunda apa va yi pumbire ndi? Evhumbuko lyalye lya kere? Ngapi omu ya likwatakana nevhumbuko eli ono kundindira?

6. Ngapi omu Jesus ga hamenene mo mesikiliro mo lyetjangwa Episarome 118?

⁶ Tuzeni tu ka konakone evhumbuko eli va pumbire nare mEpisarome 118, eli nampo ga tjenge Ndafita. Age kwa tjenge asi: “Tu parura HOMPA, tu parura! . . . Karunga a tungike ogu ana kuwizira medina lyaHOMPA!” Vantu kwa temwininine nonkango douporofete ou kuhamena Mesiyasa, apa Jesus ga hwililire moJerusarema moNisani 9, komeho tupu va ka mu dipage. (Epis. 118:25, 26; Mat. 21:7-9) Nye ngapi Episarome 118 lya likidire evhumbuko eli lya ya horokere komeho? Episarome olyo kwa tente hena asi: “Emanya eli va zumbire vatungi asi edona, yilyo nye lina kara lyene po lyemekovhu.”—Epis. 118:22.

7. Ngapi omu Vajuda va nyokere Jesus?

⁷ “Vatungi” ava va nyokere Mesiyasa kuna kara vampitisili woVajuda. Yinzi va rugene kupitakana tupu kunyoka kuyitambura asi yige Kristusa. Vajuda wovanzi kwa here asi Piratusa a tokore mokudipaga Jesus. (Ruk. 23:18-23) Awo yiwo va twaredesere Jesus va ka mu dipage.

8. Ngapi omu Jesus ga ya kere “emanya lyemekovhu”?

⁸ Nsene asi Jesus kwa mu nyokere nokumudipaga, ngapi omu ga ya kere ‘gemekovhu’? Age kwa ya kere gemekovhu apa va mu vhumbwire. Jesus kwa yi kwatesere ko apa ga geve sifanekeso kuhamena mwenyasikunino ogu ga tumine vakareli vendi kovanasikunino. Vanasikunino owo ngava hepeke vakareli. Mwenyasikunino yipo ga tokwere kutuma ko munwendi nye tava ka mudipaga. Mokulifana, Vaisraeli ngava tekura momudona vaporofete ava gava tuminine Jehova. Ano konyima Jehova kwa tumine Munwendi a huru. Nye vantu kwa ya dipagere Munwendi. Konyima apa Jesus ga geve sifanekeso  oso, age kwa temwinine uporofete wa kara mEpisarome 118:22. (Ruk. 20:9-17) Mupositoli Peturusa kwa uyungire yininke yokulifana apa ga uyungisire ‘vapangeli woVajuda nomasimbi gawo novalirongi womatjangwa ava va pongere moJerusarema.’ Age kwa uyungire kuhamena ‘Jesus Kristusa Munasareta, ogu va pamparerere kositji, nye Karunga yiyo ga mu pindwire koufe.’ Age kwava tanterere asi: “Jesus yige googu va tjanga asi, ‘Emanya eli va zumbire vatungi, yilyo lya kara emanya lyemekovhu.’”—Yirug. 3:15; 4:5-11; 1 Pet. 2:5-7.

9. Yisinke va pumbire mEpisarome 118:22?

⁹ Yosili, uporofete ou va pumbire mEpisarome 118:22 kuhamena evhumbuko kwa ya sikilire mo konyima zonomvhura dononzi. Mesiyasa kwa ya mu nyokere nokumudipaga, nye va ya mu vhumbwire nokuyakara emanya lyemekovhu. Jesus kwa ya kere “ogu ga pa Karunga edina lyokutuparura.”—Yirug. 4:12.

10. (a) Yisinke va pumbire mEpisarome 16:10? (b) Morwasinke natu yi pulira asi Episarome 16:10, kapi lya sikilire mo posiruwo saNdafita?

¹⁰ Tu tarurureni etjangwa limwe hena eli lya uyunga kuhamena evhumbuko. Etjangwa olyo kwa ya sikilire mo konyima zonomvhura dononzi, alyo kuvhura kunkondopeka epuro lyetu asi evhumbuko kuvhura kuhoroka nampili pa pite nomvhura dononzi. MEpisarome 16, Ndafita kwa tjenge asi: “Yeeyi mwenyo gwange kapi ngo gu sigilira mosirongo sovafe, ndi Mupongoki goge o mu sigilire nye a wore.” (Epis. 16:10) Ndafita kapi ga tembe asi kapi ngafa ndi a dire kuza mosirongo sovafe. Nonkango daKarunga kwa tanta asi Ndafita ga ya kurupire nokufa, makura “tava mu vhumbike mositata saNdafita.” (1 Vah. 2:1, 10) Kwalye nye lya tamba Episarome 16:10?

11. Siruwo musinke Peturusa ga fatwilire Episarome 16:10?

¹¹ Konyima zonomvhura dononzi kutunda apa Ndafita ga tjenge Episarome 16:10, Peturusa ga ya fatwilire ogu lya tembe Episarome olyo. Konyima tupu zoyivike yongandi apa Jesus ga fire nokumuvhumbura, Peturusa kwa fatwililire Vajuda novantu ava va ya rundurukilire koukarelikarunga woVajuda kuhamena Episarome 16:10. (Resa Yirugana 2:29-32.) Age kwa va tanterere asi, Ndafita ga fire ntani va mu vhumbikire. Vantu ava va yi purakenene va yi kwatesere ko. Bibeli kapi za yi likida asi kweli ogu ga patanesere Peturusa apa ga uyungire asi: “Ndafita kwa mwene yokomeho yaKarunga, yiyo nye ga uyungilire yepinduro koufe” lyaMesiyasa.

12. Ngapi Episarome 16:10, lya sikilire mo ntani ngapi ayi tu pe ehuguvaro mevhumbuko lyokomeho?

¹² Peturusa kwa nkondopekere sitwa sendi apa ga temwinine nonkango daNdafita demEpisarome 110:1. (Resa Yirugana 2:33-36.) Monkedi omu ga fatwilire Matjangwa ya vaterere vantu va pure asi Jesus kwa kere ‘Hompa ntani Kristusa.’ Unene po, ayo kwa vaterere vantu va yi pure asi etjangwa lyemEpisarome 16:10 kwa sikilire mo apa Jesus va mu vhumbwire. Konyima mupositoli Paurusa kwa ruganesere maumbangi gokulifana apa ga uyungisire Vajuda mositata saAntiyokiya zomoPisidiya. Maumbangi ogo kwa va tetukisire ntani va here kudiva ko yoyinzi. (Resa Yirugana 13:32-37, 42.) Nose twa hepa kuyipura asi mauporofete gena gomoBibeli ga ya sikilire mo nampili ngomu pwa pitire nomvhura dononzi.

13. Mapuro musinke ava lipura vamwe kuhamena evhumbuko?

¹³ Ayo kutukorangeda mokudiva asi evhumbuko  kuvhura kuhoroka nampili pa pite nomvhura dononzi. Nye vamwe kuvhura va lipure asi: ‘Ayo ngoso kutanta asi, na hepa kundindira nomvhura dononzi komeho ni ka mone vahali vange ndi? Siruwoke ngali ka horoka evhumbuko?’ Jesus kwa tanterere vapositoli vendi asi koyili yininke va dira kudiva. Ntani asi kapi va hepere kudiva ‘yiruwo noyinema eyi ga penge Karunga mononkondo damwene.’ (Yirug. 1:6, 7; Joh. 16:12) Nampili ngoso, ose twa diva mauzera gamwe kuhamena siruwo apa evhumbuko ngali tameka.

14. Ngapi evhumbuko lyaJesus lya lisiga nomavhumbuko gamwe?

¹⁴ Mokukwata egano asi evhumbuko ngali horoka, diworoka mavhumbuko gamwe va tumbura moBibeli. Evhumbuko lyomulyo po kuna kara lyaJesus. Ngano kapi va mu vhumbwire ngano kapi ngatu ka mona vahali vetu. Vantu ava va vhumbwire komeho zaJesus, ngwendi Eliya naElisa kapi va parukire narunye. Awo va ya fire hena nokutengwira kombundu. Nye mokulisiga, Jesus kwa ‘mu pindwire koufe, kapi nga fa hena, nomfa kutupu hena nonkondo dokumupangera.’ Age ngesi meguru ana kara ntani nga kara “narunye-narunye.”—Rom. 6:9; Ehor. 1:5, 18; Koros. 1:18; 1 Pet. 3:18.

15. Morwasinke Jesus ava mu tumbwire asi “gomuhoverera”?

¹⁵ Evhumbuko lyaJesus ngomuntu gopampepo yilyo lya kere lyokuhova ntani alyo mulyo. (Yirug. 26:23) Age kapisi gelike va vhumbwire ngosisitwa sopampepo nokuza meguru. Jesus kwa tumbwidilire vapositoli vendi wovalimburukwi asi ngava ka pangera nendi meguru. (Ruk. 22:28-30) Nye, mokukagwana mfeto ozo va hepa kufa pomuhowo. Ngwendi Kristusa, nawo kuvavhumbura nomarutu gopampepo. Paurusa kwa tjenge asi: ‘Kristusa yige va hova kupindura koufe, mwava navenye va fa.’ Age ga yi likidire asi koveli vamwe ngava za meguru apa ga tente asi: ‘Nye nkenye ogu porufo rwendi: gomuhoverera va pindura koufe Kristusa, ntani vava va hama kwaKristusa, apa nga wiza.’—1 Kol. 15:20, 23.

16. Mauzera musinke twa diva kuhamena siruwo esi va tameka kuvhumbura ava ava zi meguru?

¹⁶ Nonkango daPaurusa kutuvatera tu dive siruwo esi va tameka kuvhumbura ava ava zi meguru. Aso kwa tameka ‘pekaropo lyaKristusa.’ Ngesi Nombangi daJehova da yi pura kuliza noBibeli asi ekaropo lyaKristusa kwa tamekere mo-1914, ntani uhura wouzuni ou pepi una kara.

17, 18. Yisinke ngayi horokera vagwavekwa vamwe pekaro po lyaKristusa?

 ¹⁷ Bibeli kwa gava mauzera gamwe kuhamema evhumbuko lyava ngava za meguru asi: ‘Ose kwa mu harera kudiva yokuhamena ava va tu siga . . . Ose twa pura asi Jesus kwa fire, yiyo ga vhumbuka hena. Yipo nye natu pulira asi Karunga nga reta kumwe . . . ava va fa. Yiyo tuna kumutantera: ose ava ngatu hupa po, ose simpe tu vanamwenyo pezuva eli nga wiza Hompa, ose kapi ngatu pitakana vafe.  . . yipo nye nga wiza mwene Hompa, a tunde keguru. Ava va fira mepuro lyaKristusa, yiwo ngava lihova kuvhumbuka. Makura ntani ngava tu yambura kumwe nawo nose ava ngatu kara tu vanamwenyo posiruwo oso, tu simbagwire Hompa pomaremo keguru, tu gwanekere nendi. Makura ngatu ka kare narunye nendi.’—1 Tes. 4:13-17.

¹⁸ Evhumbuko lyokuhova kwa tamekere konyima tupu ‘zekaropo lyaKristusa.’ Poudigu wounene vagwavekwa ava ngava kara vazuni, ngava ‘va yambura’ va simbagwire Jesus. (Mat. 24:31) Ava ngava yambura kapi ngava fa, ‘ngava va situnukisa mokaruwogona tupu ngapa katu popi, apa ngaru hagara rumbendo rwepanguro lyokuhulilira.’—1 Kol. 15:51, 52.

19. Evhumbuko musinke ‘lyewa po’ tuna kundindira?

¹⁹ Naina, sinzi soVakriste wovalimburukwi kapisi vagwavekwa ntani kapi ngava ka pangera naJesus meguru. Nye awo kuna kundindira “ezuva lyaHOMPA” apa nga ka zonagura po vadinikarunga. Kwato ogu ga diva siruwo apa ngali sika mo ezuva olyo, nye maumbangi kulikida asi ntaantani li ka horoke. (1 Tes. 5:1-3) Apa ngali pita ezuva olyo, ngapa ka horoka evhumbuko lyapeke moparadisa pevhu. Ava ngava ka vhumbura ngava ka sikilira mo ntani kapi ngava ka fa hena. Olyo ngali ka kara ‘evhumbuko lyewa po’ kupitakana ava va vhumbwire nare nye konyima va ya fire.—Heb. 11:35.

20. Morwasinke natu huguvarera asi vafe ngava ka va vhumbura nkenye ogu porufo rwendi?

²⁰ Bibeli kuuyunga kuhamena ava ava zi meguru asi kuvavhumbura “nkenye ogu porufo rwendi.” (1 Kol. 15:23) Kuvhura tu huguvare asi evhumbuko lyepevhu nalyo ngorooro ngali horoka. Kuvhura tu lipure asi: “Ngoso vantu vana kufa ngesi ngava va vhumbura ketamekero lyepangero lyaJesus lyonomuvho eyovi nokukava tambura vahali vawo ndi? Ngoso vakareli vaKarunga vanare wovalimburukwi ngava va vhumbura pomuhowo va ka wapaike vantu vaKarunga mouzuni woupe ndi? Ngapi kuhamena vantu ava va dira kukarera Jehova nampili rumwe? Siruwo musinke ngava ka va vhumbura ntani kupi? Pwa kara mapuro gomanzi natu vhura kulipura. Kapisi hepero kuyilipakera sinka, twa hepa tupu kundindira ngatu ka yi limonene. Twa si huguvara asi ngayi ka tu tetukisa mokuka mona omu Jehova nga ka yi rugana.

21. Ehuguvaro musinke wa kara nalyo kovafe?

²¹ Posiruwo esi, twa hepa kunkondopeka epuro lyetu mwaJehova. Kupitira mwaJesus, Jehova kwa tumbwidira asi vafe kapi ngava divara ntani nga ka va vhumbura. (Joh. 5:28, 29; 11:23) Mokukwatesa ko asi Jehova nga ka vhumbura vafe, Jesus kwa tente asi Abirahamu naIsaka ntani Jakopo “navenye yige va kerera po nomwenyo.” (Ruk. 20:37, 38) Yosili, twa kara nonokonda dononzi deyi natu uyungira ngwendi Paurusa ogu ga tente asi: “Ehuguvaro lyomwaKarunga eli na kara nalyo . . . asi vantu navenye ngava va pindura koufe.”—Yirug. 24:15.