1, 2. Sinka musinke ava kara naso vakurona apa vana vawo ava ligava kwaJehova nokuvakuhwa?

VARONGWA wovanzi woBibeli kuligava kwaJehova nokuvakuhwa. Sinzi sawo kuna kara vanona ava va kulira mousili nokutokora kukarera Jehova. (Epis. 1:1-3) Ngomukurona goMukriste, ove kuna kundindira nononkondo kukamona vana woge kuna kugwana ekuho.—Hetakanesa 3 Johanesa 4.

² Nampili ngoso, ove simpe kuvhura o kare nosinka. Nampo wa mona vadinkantu vamwe ava va gwana ekuho, nye konyima va ya tamekere kukara nomasinganyeko kuhamena eyi va pura. Sinzi sawo kwa hageka kukarera Jehova. Oyo kuvhura yi ku ninkise o kare nosinka asi nampili munoge a tambure usili, konyima kuvhura nga ya dire kukara neharo lyenene kwaJehova. Age kuvhura nga ya kare ngwendi Vakriste womoEfeso ava ga tanterere Jesus asi: ‘Yeyi mwa zumba eharo lyeni lyokuhara nge moomu mwa here nge pomuhowo.’  (Ehor. 2:4) Ngapi omu no vatera munoge a twikire kuhara Karunga ntani ‘a kure, nkumwe nga ka paruke’? (1 Pet. 2:2) Mokugwana elimbururo tu tareni sihonena saTimoteusa.

3. (a) Ngapi omu Timoteusa ga ya kere Mukriste ntani ngapi ga tulire pasirugana eyi ga lirongere? (b) Yitwa musinke yitatu eyi Paurusa ga tanterere Timoteusa?

³ Apa Paurusa ga ka dingwire moLisitira momvhura 47, age nampo Timoteusa ntani ana kutambura usili. Nampili ngomu Timoteusa ga kere simpe mudinkantu, age ga tulire pasirugana eyi ga lirongere. Ano konyima zonomvhura mbali ta ya kara mutumwa nokurugana kumwe naPaurusa. Konyima zonomvhura 16, Paurusa kwa tjangerere Timoteusa asi: “Kara mousili ou wa lironga, yiyo wa u pura nawa-nawa, yeeyi ava va u ku ronga, wa va diva. Ove hena hawa tunda unona woge, matjangwa gokupongoka [Matjangwa goRuhebeli] wa ga diva, aga aga ku pe ukonentu, o paruke pokupura Jesus Kristusa.” (2 Tim. 3:14, 15) Koneka asi Paurusa kwa tanterere Timoteusa asi: (1) ga divire matjangwa gokupongoka, (2) ga pulire nawa-nawa mweyi ga lirongere, ntani (3) ga kere noukonentu pokupura mwaJesus Kristusa.

4. Yiruganeso musinke nava ruganesa vakurona mokuvatera vana vawo? (Tara efano pepenuno 18.)

⁴ Ngomukurona goMukriste, ono harere munoge a dive matjangwa gokupongoka omu mwa hamena matjangwa goRuhebeli naga goRugereka. Nampili vanonagona awo kuvhura va lironge nokudiva vantu ava va tumbura moBibeli noyihorokwa yamo. Mbunga zaJehova za gava yiruganeso yoyinzi kovakurona mokuvatera vana vawo. Kuvhura o ruganese eyi ya kara meraka lyeni. Diworoka asi ayo mulyo kwamunoge mokudiva Matjangwa yipo a kare nelikwatakano lyewa naJehova.

5. (a) Yisinke ayi tanta ‘kupura nawa-nawa’? (b) Ngapi tuna yi diva asi Timoteusa kwa pulire nawa-nawa mbudi zongwa kuhamena Jesus?

⁵ Kudiva matjangwa gokupongoka mulyo unene. Nye kapi ya gwanena po tupu kuronga vanona kuhamena vantu ava va tumbura moBibeli noyihorokwa yamo. Diworoka asi Timoteusa nage kwa ‘pulire nawa-nawa.’ Age ga divire Matjangwa goRuhebeli kutunda unona wendi. Konyima ga ya yi pulire asi Jesus yige Mesiyasa. Epuro lyaTimoteusa kwa ya nkondoparere yipo ga gwene ekuho nokurugana sirugana soutumwa naPaurusa.

6. Ngapi no vatera vana woge va pure nawa-nawa eyi ava lirongo?

⁶ Ngapi omu no vatera vana woge va pure nawa-nawa eyi o va rongo ngwendi Timoteusa? Kara nedidimiko. Epuro kapi ava lipingi ntani ayo kugusa siruwo mokukara nalyo. Vanona va hepa “nondunge” yipo va pure mweyi azi rongo Bibeli. (Resa 2 Timoteusa 2:7.) Ngomukurona, vatera vana woge va nkondopeke epuro lyawo, unene po nsene tava pura mapuro. Tu konakoneni sihonena simwe.

7, 8. (a) Ngapi guhya gumwe a lididimikire pokuronga munwendi? (b) Posiruwo musinke wa hepere kukara nelididimiko pokuronga munoge?

⁷ Thomas, guhya ga kara nomunona gomukadona gonomvhura 11 kwa tanta asi: “Munwange nga pura nge nsene asi Jehova kwa ruganesa elisinto a retese po eparu ntani konda zeyi atu dilire kulihameka moyininke ayi horoka momukunda  ngwendi kuhorowora. Poyiruwo yimwe ame na hepere kutakamesa mokudira kumutantera eyi na pura. Ame na yi divire asi kukara nepuro kwa hamena mo maumbangi gomanzi.”

⁸ Thomas ga yi divire hena asi ga hepere kukara nedidimiko yipo yi mu tompoke mokuronga munwendi. Yosili, elididimiko ndi ‘ezaverero’ mulyo koVakriste. (Koros. 3:12) Age hena ga yi dimbwilire asi ngayi gusa siruwo mokuvatera munwendi a kare nepuro. Ga hepere kuruganesa Matjangwa yipo munwendi a pure nawa-nawa mweyi nga lirongo. Thomas kwa tanta asi: “Unene po koyininke yomulyo, name namukadange kwa hara kudiva nsene sili munwetu ga pura eyi ana kulironga ntani nsene kuyihafera. Ayo kutuhafesa apa a pura mapuro. Nsene a dira kupura mapuro kweyi atu mu rongo, ayo ku pa nge sinka.”

9. Ngapi no vatera munoge a pure mweyi va tjanga moBibeli?

⁹ Nsene vakurona va lididimikira mokuronga vana vawo, vanona ngava ya dimburura “unene nounaure nomusika” gwepuro. (Efe. 3:18) Kuvhura tu va ronge kuliza nonomvhura dawo. Ngomu lina kunkondopara epuro lyawo, awo ngayi va rerupira mokutantera ko vakwawo wokosure ndi wopeke eyi va lironga. (1 Pet. 3:15) Pasihonena, kuvhura va faturure kutundilira moBibeli asi yisinke ayi tu horokere apa atu fu ndi? Awo va yi pura eyi za faturura Bibeli kuhamena vafe ndi? * Diworoka asi pokuronga vana woge wa hepa kulididimika, ntani ayo mulyo unene mokuyirugana.—Deut. 6:6, 7.

10. Yisinke va hepa kurugana vakurona mokuvatera vana vawo va kare nepuro?

¹⁰ Vakurona, sihonena seni mulyo unene mokuvatera vana veni va kare nepuro. Stephanie zinya govana wovakadona vatatu kwa tanta asi: “Kutunda tupu apa vana vange va kere awo simpe vanonagona ngani lipura asi, ‘Ame kuvatera vana vange va dive konda zeyi na pulira asi Jehova yipo ga kara ntani asi age eharo neyi nompangera dendi da karera donongwa po ndi? Sihonena sange kulikida vana vange asi na hara Jehova ndi?’ Mokuninka asi vana vange va pure nawa-nawa mweyi va lironga, name na hepa kuyipura.”

11, 12. Yisinke unongo ntani morwasinke wa dilira kukorera konomvhura domuntu?

¹¹ Ngomu tuna yi zogere Timoteusa (1) ga divire Matjangwa ntani (2) ga pulire nawa-nawa mweyi ga lirongere. Nye yisinke ga tembe Paurusa apa ga uyungire asi matjangwa gokupongoka nga ga mu pa unongo ndi ‘ukonentu a paruke?

¹² Buke Insight on the Scriptures, Volume 2 kwa tanta asi moBibeli, nkango unongo kwa kwatera mo “kuruganesa nondunge mokukohonona po maudigu, kuhenduka yiponga, kutura po yitambo nokuyisikisa mo ndi kuvatera wopeke nawo va rugane yokulifana.” Bibeli kutanta asi: ‘Ugova kuvhura u kakatere momutjima gomunona.’ (Yis. 22:15) Muntu ga kura pampepo kulikida asi ga kara nounongo. Kukura pampepo kapi kwa korera konomvhura,  nye mokutjira Jehova nokuhara kumulimburukwa.—Resa Episarome 111:10.

13. Ngapi omu vadinkantu nava likida asi va kara noukonentu?

¹³ Vadinkantu ava va kura pampepo kapi ‘aga va yeragura mankumpi’ ngwendi madowo ndi makondjeso gokutunda kovakwawo. (Efe. 4:14) Nye, awo kutwikira kutura po marunduruko pokuruganesa ‘nondunge’ va ‘hangure uwa koudona.’ (Heb. 5:14) Awo kuyilikida asi kuna kukura pampepo pokutura po matokoro gomawa nampili vakurona vawo va dire kuvamona. (Fil. 2:12) Unongo owo mulyo morwa ngau va pa mwenyo. (Resa Yisewe 24:14.) Ngapi omu no vatera vana woge va kare nounongo? Pomuhowo, va vatera va dive epuliro lyoge. Yi likida mosihonena nomononkango doge asi ove kuparuka kuliza nonompango domoBibeli.—Rom. 2:21-23.

14, 15. (a) Yisinke ga hepa kuteda ko mudinkantu ogu ana hara kugwana ekuho? (b) Ngapi no vatera vana woge va dimburure mauwa gonompango domoBibeli?

¹⁴ Nampili ngoso, yinzi ya hamena mo kupitakana tupu kutantera vana woge kuhamena yoyiwa neyi yoyidona. Kuvhura hena o va vatere va tede ko komapuro ngwendi gaaga asi: ‘Morwasinke Bibeli za silikira yininke eyi ayi moneka ngwendi yiwa? Ngapi omu nani yi diva asi nompango domoBibeli nkenye apa kuretera nge mauwa?’—Jes. 48:17, 18.

¹⁵ Nsene asi munoge ana hara kugwana ekuho, mu vatera a tede ko kuhamena eyi ya hamena mo mokukara Mukriste. Mauwa musinke ga hamena mo? Maudigu musinke ga hamena mo? Morwasinke mauwa aga aga tundu mokugwana ekuho ga karera mulyo kupitakana eyi natu zumbanesa? (Mar. 10:29, 30) Ya wapa kuteda ko nawa koyininke nayinye oyo komeho zokuza pontambo zokugwana  ekuho. Nsene o vatera vana woge va dive mauwa aga aga tundu mokulimburukwa nomaudona aga aga tundu mokudira kulimburukwa, ngava tunga po epuro. Epuro musinke olyo? Asi nompango domoBibeli kureta nkenye apa mauwa.—Deut. 30:19, 20.

16. Yisinke nava rugana vakurona nsene vana vawo va kara nomasinganyeko kweyi va pura?

¹⁶ Yisinke no rugana nsene munoge a kara nomasinganyeko kweyi ga pura konyima zokugwana ekuho? Pasihonena, kuvhura a tameke kuhafera yininke yomouzuni ndi a kare nomasinganyeko nsene asi kuvhura sili a gwanene mo mauwa monompango doBibeli. (Epis. 73:1-3, 12, 13) Ngomukurona, monkedi omu no kohonona po udigu owo ngayi ninkisa munoge a twikire kukarera Jehova ndi a hageke kumukarera. Hetekera ko mokudira kumuhandukira, yi kare asi age munona ndi mudinkantu. Nye mu vatera a dimburure asi ove wa mu hara ntani ono hara kumuvatera.

17, 18. Mononkedi musinke vakurona nava vatera vana vawo nsene vana kara nomasinganyeko?

¹⁷ Mudinkantu ogu ga gwana ekuho kwa ligava kwaJehova. Eyi kutanta asi age kwa tumbwidira mokuhara Jehova nokutura mpango zendi muhowo. (Resa Marukusa 12:30.) Twa hepa kutara etumbwidiro olyo asi mulyo morwa Jehova nage kulitara asi mulyo. (Muud. 5:4, 5) Litulira po siruwo sosiwa mokuzogera namunoge monkedi zongwa kuhamena eyi. Komeho zokuyirugana oyo, ruganesa nawa yiruganeso eyi za gava mbunga zaJehova kovakurona. Monkedi zangoso ngo vhura kufatwilira nawa munoge asi etokoro lyendi lyokuligava kwaJehova mulyo unene ntani nga gwanena mo mauwa.

¹⁸ Pasihonena, ove kuvhura o gwane mapukururo konhi zosiparatjangwa “Mapuro ava pura vakurona,” konyima zobuke Questions Young People Ask—Answers That Work, Volume 1. Azo kupukurura vakurona mokudira kugenderera kugazara asi vana vawo vana sigi usili, nye va hetekere ko kutarurura eyi yina yi retesa po. Nampo makondjeso govakaume. Ndi nampo mukuma ndi kulizuvha asi vadinkantu vakwawo kuna kurugana nawa pampepo kuvapitakana. Mobuke ozo kwa faturura mo hena asi maukaro aga kapi aga likida asi munoge kapi ana hara hena kulironga Bibeli. Nye nampo kogeli hena maudigu gamwe aga ana kuligwanekera nago gana kuheteka epuro lyendi. Azo kwa gava hena nonkedi dimwe omu mukurona na vatera munwendi ogu ana kara nomasinganyeko kuhamena eyi ga pura.

19. Ngapi vakurona nava vatera vana vawo va kare ‘noukonentu ou ngau va parura’?

¹⁹ Ngovakurona, one mwa kara nositumbukira ‘sokutekura oku tomu pukurura vana veni kuliza neyi ga hara’ Jehova. (Efe. 6:4) Ngomu tuna yi lirongo, ayo kapi ya gwanena po tupu kuvaronga eyi azi uyunga Bibeli, nye hena kuvavatera va kare nepuro mweyi vana kulironga. Eyi nga yi pameka epuro lyawo nokuvatumangeda va ligave kwaJehova nokumukarera nomutjima nagunye. Ngano nonkango daJehova nompepo zendi ntani elituromo lyeni li vatere vana veni va kare ‘noukonentu ou ngau va parura.’