1, 2. Morwasinke ya karera nomulyo tu purakene koMusiti nsene kuna kutokora? (Tara mafano.)

NGOMUDINKANTU, ove nampo kugwana magano gomanzi kuhamena eyi ngo rugana komeho. Vamitili navamwe kuvhura va ku tantere o kondjere elirongo lyokuzeruka ntani yirugana yokufuta yimaliwa yoyinzi. Nye Jehova kapisi yiyo ana ku harere oyo. Nampili ngoso, age kuna ku harere o lironge unene kosure yipo ngayi ka ku vatere apa ngo ka mana. (Koros. 3:23) Nampili ngoso, age kuna hara o ruganese nompango dendi mokutokora eyi ngo rugana meparu morwa nompango odo ngadi ku vatera o mu hafese pomazuva aga gopouhura.—Mat. 24:14.

² Diworoka hena asi Jehova ga diva nayinye. Age ga diva eyi ngayi horokera uzuni ou ntani ga diva siruwo esi ngau wiza uhura. (Jes. 46:10; Mat. 24:3, 36, NW) Age ga diva hena eyi ayi tu retere ruhafo neyi ayi tu retere ruguwo. Yipo nye, nampili magano govantu ga moneke asi mawa, kapi ta ga  vhuru kukara gounongo nsene kapisi gokutunda moBibeli.—Yis. 19:21.

3, 4. Ngapi omu kukwama magano gomadona ga kundamene Adamu naEva novana vawo?

³ Magano gomadona kwa tamekere apa Satana ga hovere kupukisa vantu. Age kwa tanterere Eva asi nage namugara gwendi ngava hafa nsene va tokora vene asi ngapi omu nava paruka. (Gen. 3:1-6) Nye, Satana kwa ligazarere tupu nyamwendi. Age kwa here asi Adamu naEva noruvharo rwawo va ligave kwendi nokumukarera mevango lyokukarera Jehova. Nye Satana kapi ga va pere yuma. Nainye eyi va kere nayo, Jehova yige ga yi va pere. Jehova yige ga va sitire nokuvapa sikunino sosiwa va tunge mo nomarutu gokusikilira mo ntani ehuguvaro lyokuparuka narunye.

⁴ Nye ehudi, Adamu naEva kwa ligusire ko kwaKarunga morwa kapi va limburukwire. Ayo ya va ninkisire va ligwanekere noyitundwamo yoyidona. Ngwendi moomu azi suwu mbya, nawo kwa tamekere kukurupa makura tava fu. Vana vawo nawo kwa ya ligwanekera nomaudigu morwa nzo ozo. (Rom. 5:12) Naina, sinzi sovantu kunyoka kulimburukwa Karunga. Awo kutokora kurugana eyi vana hara. (Efe. 2:1-3) Eyi kulikida asi: ‘Kutupu unongo nsene HOMPA kapisi koge ga hama.’—Yis. 21:30.

5. Ehuguvaro musinke ga kere nalyo Karunga kovantu ntani ya sika mo ndi?

⁵ Nampili ngoso, Jehova ga yi divire asi vantu vamwe kukwatera mo vadinkantu wovanzi ngava mu karera. (Epis. 103:17, 18; 110:3) Age kwa hara vantu vangoso. Nove gumwe gwawo ndi? Nsene yimo, ove kuna kuhafera ‘yininke yoyiwa’ yokutunda kwaKarunga eyi ayi kuhafesa unene. (Resa Episarome 103:5; Yis. 10:22) Ngomu natu ka yi zogera, ‘yininke yoyiwa’ kwa kwatera mo nondya dopampepo, vakaume wovawa, yitambo yoyiwa ntani umanguruki wene-wene.

6. Mauwa musinke ngatu gwanena mo nsene tu diva Karunga ntani ngapi Jehova a tu vatere yi tu tompoke?

⁶ Mokulisiga noyikorama, ose kwa kara neharo lyokudiva Musiti gwetu ntani age kutuvatera yipo yi tu tompoke. (Mat. 4:4) Nsene tu purakena kwendi, ose ngatu gwana ruhafo nonondunge. Jesus kwa tente asi: “Vehafo vaava ava dimburura asi va hepa Karunga.” (Mat. 5:3, NW) Karunga kutuvatera tu mu dive kupitira moNonkango dendi ntani nonondya dopampepo edi a gava kupitira ‘momukareli gokulimburukwa gonondunge.’ (Mat. 24:45) Ose kuhafera nondya odo morwa kupameka epuro lyetu noku nkondopeka elikwatakano lyetu naJehova.—Jes. 65:13, 14.

7. Mauwa musinke no gwanena mo monondya dopampepo edi a tu pe Karunga?

⁷ Nondya dopampepo edi a tu pe Karunga, ngadi tu vatera tu gwane unongo nonondunge edi ngadi tu vatera meparu. (Resa Yisewe 2:10-14.) Pasihonena, vantu kuuyunga asi kapi pwa kara Musiti. Nondunge ngadi tu vatera tu dimburure marongo goyimpempa gangoso. Ngadi tu vatera tu dimburure asi kapi twa hepa yimaliwa noyiweka yipo tu kare noruhafo. Nondunge ngadi tu vatera hena tu dimburure nokunyokera po nkareso zetu zondona. Yipo nye, twikira kupapara nondunge dokutunda  kwaKarunga. Nsene ngo yi rugana, ngo limonena asi Jehova kwa tu hara ntani kuna tu harere uwa.—Epis. 34:8; Jes. 48:17, 18.

8. Morwasinke no tulira po ukaume naKarunga ngesi ntani mauwa musinke ngo gwanena mo?

⁸ Uzuni waSatana ntaantani ngava ka u zonagure po. Ano Jehova yige gelike nga tu popera nokukatupa eyi twa hepa kukwatera mo nondya detu dankenye ezuva. (Hab. 3:2, 12-19) Yosili, esi yiso siruwo sokuhedera pepi naGuhyetu nokuhuguvara unene mwendi. (2 Pet. 2:9) Nsene tu yi rugana oyo, yikare asi yinke ngayi horoka, ngatu lizuvha ngwendi Ndafita ogu ga tjenge asi: “Ame kupaka HOMPA nkenye apa komeho zange; moomu ga kara korulyo rwange, neisi hena ngayi nyunganga nge.”—Epis. 16:8.

9. (a) Kuliza naJohanesa 6:44, yisinke a rugana Jehova? (b) Ngapi o lizuvhu apa o ligwana noNombangi dokoyirongo yapeke?

⁹ Jehova kukoka vantu yipo va ya hame kepata lyendi lyopampepo, eyi kuninkisa vamwe wonomutjima donongwa vawize nawo kousili. (Resa Johanesa 6:44.) Apa atu ligwana nomuntu ogu a dili kukarera Jehova, ose kudiva tupu yoyisesu kumuhamena. Nye ayo ya lisiga nomuntu ogu a karere Jehova, yikare asi muhoko gwendi musinke ndi kosirongo musinke ga tunda neraka lyendi, apa a tu ligwana nage ose kulizuvha ngwendi nare twa lidiva.

10, 11. Yisinke ayi ninkisa vakareli vaJehova va lifane ntani mauwa musinke atu gwanene mo?

¹⁰ Pasihonena, apa o ligwana noNombangi ove kudimburura asi namuvenye kuuyunga “eraka” limwe, “lyousili lyokukuhuka.” (Sef. 3:9, NW) Eyi kutanta asi namuvenye kwa pura mwaKarunga nokuparuka kuliza nonompango doBibeli ntani mwa kara nehuguvaro lyokomeho nayimwe hena ngoso. Eyi yiyo yininke ayi tu vatere tu lihuguvare nokutulisa po ukaume wokukarerera.

¹¹ Yipo nye, ngomukareli gwaJehova, ove wa kara novakaume wovawa uzuni  mudima. Ano vamwe kapi simpe wa va mona. Nombangi daJehova delike a di hafere ukaume wangoso.

12. Yitambo musinke yoyiwa no vhura kulitulira po?

¹² Resa Muudisi 11:9–12:1. Wa kara noyitambo yopampepo eyi ono hara kusikisa mo ndi? Nampo ove kuhetekera ko kuresa Bibeli nkenye ezuva. Ndi nampo kuna kuhetekera ko kuwapukurura monkedi omu o rongo. Ngapi o lizuvhu apa ayi ku tompoka ndi apa wopeke ava ku pandadeke? Ayo kukuhafesa sili. Morwasinke? Morwa ove kuna kuhonena Jesus pokutura muhowo eyi ga hara Jehova.—Epis. 40:8; Yis. 27:11.

13. Ngapi kudemenena kweyi yopampepo ya lisiga nokukondjera yininke yopanyama?

¹³ Nsene o demenena kweyi yopampepo, ngo hafa morwa yirugana yoge kapisi yomawoko-woko. Mupositoli Paurusa kwa tjenge asi: “Omu likorerere, mwa ha linyunganga. Omu kare nkenye apa nomupampi moyirugana yaHompa, yeeyi mwa diva asi yirugana yeni eyi omu ruganene Hompa kapisi yomawoko-woko.” (1 Kol. 15:58) Nye apa vantu ava kondjere yininke yomouzuni ngwendi yimaliwa nokudivikwa, awo kapi ava gwana ruhafo rwene-rwene. (Ruk. 9:25) Sihonena saSaromo kulikida usili wononkango odo.—Rom. 15:4.

14. Yisinke no lirongera ko kosihorokwa saSaromo?

¹⁴ Saromo, mugara ogu ga kere ngawo zonene ga yi limonenene, age ‘kwa tokwere kulipanda mwenyo, yipo a koneke eyi ya kara mehafo.’ (Muud. 2:1-10) Age kwa tungire nonzugo ntani kwa kere noyipata noyikunino nokurugana nayinye eyi ga here. Ngapi omu ga lizuvhire? Ya mu gwanenene po ndi? Ga hefe ndi? Saromo kwa tjenge asi: “Makura tani gazara nayinye eyi na rugana . . . , tani dimburura asi nani nayimwe si . . . kutupu sikwafo nampili kanunu.” (Muud. 2:11) Esi kuna kara sirongwa somulyo. Ngano nose tu lirongere ko.

15. Morwasinke wa hepera epuro ntani ngapi ngali ku vatera ngomu va yi tumbura mEpisarome 32:8?

¹⁵ Jehova kapi ana hara ngo rugane yininke eyi ngo ka livera komeho. Ana hara o purakene kwendi nokumulimburukwa ano wa hepa epuro mokuyirugana oyo. Kapi ngo livera komatokoro aga ono ku tura po morwa epuro eli wa kara nalyo. Yosili, Jehova kapi nga divara ‘eharo lyoge lyokufumadeka edina lyendi.’ (Heb. 6:10) Yipo nye, kondja yipo o pameke epuro lyoge. Nsene o yi rugana, ngo dimburura asi Jehova kwa ku harera uwa.—Resa Episarome 32:8.

16. Morwasinke natu tarera umanguruki wetu asi sininke somulyo ntani ngapi natu u ruganesa?

¹⁶ Paurusa kwa tjenge asi: “Apa pa kara Mpepo zaHompa, yipo pwa kara emanguruko.” (2 Kol. 3:17) Jehova kwa hara umanguruki ntani ga tu sita neharo lyokuhara umanguruki. Nye age kuna hara o ruganese nawa umanguruki woge monaruwa yipo ngau ku vatere. Nampo wa diva vadinkantu vamwe ava ava tarere mafano goruhonda ndi ava ava hondere nokulihameka momaudano gomadona nokuruganesa epangwe ntani noyikorwesa. Yininke eyi kuvhura  yi moneke pomuhowo ngwendi yiwa nye ayo kureta yitundwamo yoyidona ngwendi uvera, nomfa ntani kuninkisa vantu va kare vapika. (Gar. 6:7, 8) Vadinkantu ava kuvhura va lizuvhe asi va kara ‘noumanguruki’ nye owo kapisi usili.—Tit. 3:3.

17, 18. (a) Mauwa musinke atu gwanene mo pokulimburukwa Karunga? (b) Elisigo musinke lya kara pokatji koumanguruki ou vakere nawo oAdamu naEva nou vana kara nawo vantu naina?

¹⁷ Mokulisiga, apa atu limburukwa Jehova, ose kugwanena mo mauwa. Ayo kutuvatera tu kare tuna kanguka ntani kutupa umanguruki wene-wene. (Epis. 19:7-11) Karunga novakurona woge ngava ku huguvara nsene o ruganesa umanguruki woge monaruwa pokulimburukwa nompango daKarunga. Ntani Jehova kwa tumbwidira asi nga ka pa vakareli vendi umanguruki wokusikilira mo ou za singonona Bibeli asi: ‘Ezowoko lyouyerere wovana vaKarunga.’—Rom. 8:21.

¹⁸ Adamu naEva kwa va pere umanguruki owo. Jehova kwa va silikire sininke simwe tupu, mokudira kulya kosiyimwa sokositji simwe. (Gen. 2:9, 17) Ngoso mpangera ozo kwa kere udigu ndi? Hawe. Nye gazara ko tupu nompangera dononzi edi va tulisa po vantu.

19. Monkedi musinke Jehova naJesus vana kuturonga tu kare noumanguruki?

¹⁹ Jehova kututekura nawa. Mevango lyokutupa noveta dononzi, age kuturonga tu mu limburukwe morwa eharo. Age kuna hara tu paruke kuliza nonompango dendi nokunyenga yoyidona. (Rom. 12:9) Eudiso eli ga geve Jesus pondundu kutuvatera tu kwate egano eyi vantu ava ruganene yoyidona. (Mat. 5:27, 28) NgaHompa goUhompa waKarunga, mouzuni woupe Jesus nga ka tu ronga yipo tu tare yoyiwa neyi yoyidona ngamoomu a yi tara age. (Heb. 1:9) Nga ka tu vatera hena tu ka sikilire mo parutu nopamagazaro. Kwato ogu nga ka tu zeda mokurugana yoyidona ntani kapi ngatu ka hepa morwa yitundwamo yononzo. Ose ngatu ka hafera ‘ezowoko lyouyerere’ eli ga tu tumbwidira Jehova.

20. (a) Ngapi Jehova a ruganesa umanguruki wendi? (b) Ngapi nohonena Jehova?

²⁰ Nye simpe ngatu ka kwama noveta. Eharo lyetu kwaKarunga novakwetetu yilyo nga li ka tu tumangeda tu ka limburukwe noveta odo. Jehova kuna hara tu mu honene. Age kwa kara noumanguruki wene-wene, nye apa a ruganene kumwe novantu, age kurugana neharo. (1 Joh. 4:7, 8) Eyi kulikida asi nose kuvhura tu kare noumanguruki wene-wene nsene tu kara neharo ngwendi Karunga.

21. (a) Ngapi omu Ndafita ga lizuvhire kuhamena Jehova? (b) Yisinke ngatu ka zogera mosirongwa sokukwama ko?

²¹ Ove kuhafera ‘yininke nayinye yoyiwa’ eyi ga ku pa Jehova, ngwendi nondya dopampepo novakaume noyitambo yoyiwa ntani ehuguvaro lyokukagwana umanguruki wokusikilira mo ndi? (Epis. 103:5) Nsene yimo, ove nampo kulizuvha ngwendi Ndafita ogu ga kanderere asi: “likida nge nzira zomwenyo; kosipara soge kwa zura ehafo; ehafo lyoge kuretera nge ehafo narunye, korulyo roge uwa wanarunye wa kara ko.” Mosirongwa sokukwama ko ngatu ka zogera yitwa yomulyo atu gwana mEpisarome 16. Eyi ngayi kuvatera o dive omu no gwana ruhafo meparu.