“Vahungami navenye ngava hafera eyi nga rugana HOMPA”
DIANA gonomvhura dokupitakana po-80, kwa kere namugara gwendi ogu nga vere uvera wokudivara-divara. Mugara gwendi kwa kere kevango oku ava pakere mbili vakurupe dogoro konomfa dendi. Diana kwa fisire hena vana vendi wovagara vavali ntani nga vere uvera wokankera zekevere. Apa vanavazinyetu womombungakriste zawo ava mu mono kepongo nomokuzuvhisa, awo kumumona asi age muntu goruhafo.
John kwa kere mutareli gonombungakriste nomvhura dokupitakana po-43. Age kwa here situmbukira sendi. Nye konyima, age kwa hagekere sirugana sendi morwa ga hepere kukapakera mbili gumwe gekoro lyendi ogu a vera-vera. Vamwe ava va mu divire apa ava mu gwana kosigongi, awo kumumona asi age simpe muntu goruhafo.
Yisinke ayi vatere Diana naJohn va kare noruhafo? Ngapi muntu ogu ana kara momaudigu na kara noruhafo? Ntani ngapi muntu ogu ana zumbanesa situmbukira esi ga hara na kara simpe noruhafo? Bibeli kugava elimbururo pokutanta asi: “Vahungami navenye ngava hafera eyi nga rugana HOMPA.” (Epis. 64:10) Nose kuvhura tu kwatese ko nonkango edi nsene tu diva eyi ayi reta ruhafo neyi ayi dili kurureta.
RUHAFO ORU A RU DILI KUKARERERA
Yininke yimwe kuturetera ruhafo. Gazara ko kuhamena vantu ava vana kulikwara. Ndi kukara mureti ntani kugwana situmbukira mombungakriste. Yininke eyi kureta ruhafo morwa ayo kwa tunda kwaJehova. Age yige mutoti gononkwara ntani yige a gava yitumbukira yomombungakriste.—Gen. 2:18, 22; Epis. 127:3; 1 Tim. 3:1.
Nampili ngoso, ruhafo rumwe kapi aru karerere. Valikwali vamwe kuvhura kuhondera ndi va fe. (Hes. 24:18; Hos. 3:1) Vanona vamwe kapi ava limburukwa vakurona vawo ndi Karunga ano konyima kuvagusa mo mombunga. Vana vaSamwere wovagara kapi ngava karere Jehova monkedi ezi a tambura, ntani yirugana yaNdafita yoyidona kwa mu kundamene momudona ntani nava vemembo lyendi. (1 Sam. 8:1-3; 2 Sam. 12:11) Yihorokwa eyi kuguvisa sili. Ayo kapi ayi tu retere ruhafo.
Mokulifana, yitumbukira mombungakriste kuvhura yi hage nampo morwa uvera ndi yitumbukira yemepata ndi pamwe malitjindjo gomombunga. Sinzi sovanavazinyetu ava ava piti moukaro owo, kapi ava kara hena noruhafo ngwendi roru va kere naro nare.
Eyi kulikida asi ruhafo rumwe kapi a ru karerere. Kuvhura tu kare noruhafo rokukarerera nampili kuna kupita momaudigu ndi? Nhi, kuvhura, Samwere naNdafita ntani navamwe kwa kere noruhafo rwangoso nampili ngomu va kere nomaudigu.
RUHAFO ORU A RU KARERERE
Jesus ga divire ruhafo rwene-rwene. Apa ga kere meguru ngosisitwa sopampepo, age nga “pembura nkenye apa komeho” zaJehova. (Yis. 8:30) Apa ga ya kere pevhu, poyiruwo yimwe nga ligwanekere nomaudigu. Nampili ngoso, age nga hafa pokurugana sirugana esi va mu pere Oguhwe. (Joh. 4:34) Ngapi ga lizuvhire apa va mu pamparere? Bibeli kutanta asi: “Age kwa lididimikilire nomfa dokositji”. (Heb. 12:2, NW) Tanko tu kakonakone nokonda mbali deyi Jesus ga uyungilire kuhamena ruhafo rosili.
Apa varongwa vaJesus 70 va ka tengwire kokuzuvhisa, awo kwa hefe sili unene morwa kwa ka rugene yitetu ntani no kukatjida mo nompepo donondona movantu. Makura Jesus tava tantere asi: “Walye omu hafere eyi asi nompepo donondona kuna ka kara mepangero lyeni. Nye hafereni eyi asi madina geni vana ga tjangere meguru.” (Ruk. 10:1-9, 17, 20) Yosili, eyi ya kere nomulyo po kwawo yo ku va hafera Jehova kupitakana kuhafera situmbukira esi va kere naso. Varongwa ngava ka hafa unene, apa Jesus nga ka diworoka yirugana yawo.
Ezuva limwe ,Jesus kwa zuvhisilire mbunga. Haga za mokuuyunga, mukadi gumwe mombunga ta ziguruka kuuyunga asi: ‘O zina womurongi ogu, va kara nerago.’ Nye Jesus yipo ga mu tanterere asi: “Ava ava zuvhu nonkango daKarunga nye tava di pungura, yiwo po verago.” (Ruk. 11:27, 28) Kukara mukurona gomuwa kuna kara situmbukira sosiwa nye kukara nelikwatakano lyewa naJehova yiyo ayi reta ruhafo rwene-rwene.
Rom. 5:3-5) Jehova kugava hena mpepo zendi kwava va mu huguvara ntani ruhafo kuna kara simwe soyimwa yompepo. (Gar. 5:22) Eyi kutuvatera tu kwate egano nonkango edi da kara mEpisarome 64:10 asi: “Vahungami navenye ngava hafera eyi nga rugana HOMPA.”
Pokudiva asi Jehova ku tu hafera, ayo ku tu pa ruhafo rorunene. Maheteko kuturetera ruguwo, nye pokudiva asi Jehova ga tu hara, kutuvatera tu twikire kukara noruhafo. Apa atu lididimikire maudigu noulimburukwi, ayo kuturetera ruhafo komutjima. (Yisinke ya vaterere John a twikire kukara noruhafo?
Eyi yiyo Diana naJohn vana tumbura ketameko va twikilire kukara noruhafo nampili ngomu va ligwanekerere nomaudigu. Diana kwa tanta asi: “Ame kwa gwana utjiliro mwaJehova ngwendi moomu a gwana munona epopero kovakondi vendi”. Ngapi omu ga yi divire asi Karunga ga mu hafera? Age kwa tente asi: “Ame kulizuvha asi Jehova ga vatera nge yipo ni twikire kuzuvhisa noruhafo. John ogu ga ya hagekere sirugana sendi soutareli kwa faturura eyi ya mu vaterere pokutanta asi: “Apa na gwene situmbukira sokudeura vakwafimbunga kosure kutunda mo-1998, ya perenge mpito zokurugana elirongo lyanyamwange kupitakana pwanare. Nage namukadendi kwa tanta asi: “Kukara nomutaro gomuwa kwankenye situmbukira ga tu pere Jehova, ya tu vaterere tu tambure malitjindjo gena noureru. Ose kwa yi rugene eyi twa hana maliverero.”
Vanavazinyetu wovanzi kwa limonena usili wononkango da kara mEpisarome 64:10. Pasihonena, koveli valikwali vamwe va rugene koBeteli zomoAmerika nomvhura dokupitaka po-30. Konyima tava va tumu mosirugana souzuvhisi wosiruwo nasinye. Awo kwa tente asi: “Nsene o zumbanesa yininke eyi wa hara, kuguvisa sili nye konyima zosiruwo, ruguwo oro kuyahaga po.” Tupu vakasikire awo kwa lituliremo unene mokuzuvhisa kumwe nombungakriste. Valikwali owo kwa tente hena asi: “Ose kutumbura kuvyukilira yininike eyi tuna hara mekanderero. Apa atu mono makanderero getu kuna kugalimburura, kutu korangeda sili ntani kutu retera ruhafo. Apa twa ya sikire mombungakriste, vanavazinyetu wovanzi mombungakriste ozo, kwa tamekere kurugana uzuvhisi wokukarerera ntani ose kwa ya kere novalirongi vavali woBibeli.
“RUHAFO RWANARUNYE”
Kapisi ureru kukara noruhafo nkenye apa morwa yininke kuvhura kuhoroka wa hana kuyindindira. Nye Jehova ga tu tumbwidira Mepisarome 64:10. Nampili ngomu a tu guwu poyiruwo yimwe, ose twa diva asi ava ava twikire kukara ngororo “vahungami” nokutwikira kudidimika nampili momaudigu, ‘ngava hafera eyi nga rugana HOMPA’. Yomulyo po ngano tu kareni nendindiro apa Jehova nga ka sikisamo etumbwidiro lyendi lyokuka unga “evhu lyepe neguru.” Ano Karunga nga ka gusa po kudira kusikiliramo nakunye kovantu, awo ‘ngava ka hafera’ narunye-narunye eyi nga ka va ruganena Karunga—(Jes. 65:17, 18).
Gazara tupu omu nga yi ka kara. Ukanguki wouwa, kwato kuvera ntani nkenye ezuva kuhafa kwelike. Maudigu nagenye aga tuna kuligwanekera nago ngesi, kapi ngatu ka ga diworoka hena. Twa kara nehuguvaro asi ‘yininke eyi yomuhowo nga yi ka dima po’ kapi nga tu ka yi diworoka hena’. Vafe nawo ngava ka va vhumbura. Wovanzi nga va ka lizuvha ngwendi moomu va lizuvhire vakondi womunona gwina gonomvhura 12 ga pindwire Jesusu koufe, ayo ‘kwa va pere sikumwamurungu’. (Mar. 5:42) Yosili vantu naveye ngava ka kara “vahungami”nawa-nawa ntani narunye nanarunye awo hena ‘ngava hafera eyi nga ka rugana HOMPA’