Kapisi yiyo ga tembe. Satana kapi ga tanterere Eva asi nsene a lya kositji esi ga va silikire Karunga age nga moneka tupu ngwendi ana fu, nye mwenyo gwendi (egano eli va pura vantu naina asi mwenyo gwa ha fu) nga gu twikira kuparuka. Satana kwa tanterere Eva kupitira mezoka asi nsene a lya kositji oso age ‘kapi nga fa.’ Age kwa tembe asi Eva nga twikira kuparuka nokuhafera eparu pevhu nokurugana nkenye eyi ana hara ga hana Karunga.—Gen. 2:17; 3:3-5.

Nsene asi erongo lyoyimpempa kuhamena mwenyo gwa ha fu kapi lya tundilira moEdeni, kupi nye lya tunda? Kapi tatu diva nawa-nawa. Nye twa yi diva asi poRuhanzo rwaNowa, vantu navenye ava ngava karere yikarunga yoyimpempa kwa va zonagwire po. Mokumona asi Nowa gelike nepata lyendi ava ngava karere Karunga gosili yiwo velike va parukire, kwato hena gumwe ogu ga rongere magano ogo goyimpempa.

Yipo nye, erongo eli lya divikwa kuhamena mwenyo gwa ha fu, kwa wizire po tupu konyima zoRuhanzo. Apa Karunga ga piyaganekere eraka lyovantu ava va tungire ruhungu rwaBabironi, awo kwa lihanenene “mwa za uzuni omo.” Nampo siruwo esi yipo va hanesere erongo eli asi vantu kwa kara nomwenyo gwa ha fu. (Gen. 11:8, 9) Nampili ngomu twa dira kudiva siruwo esi lya tamekere erongo olyo lyoyimpempa, nye ose twa yi diva asi Satana muzonaguli ‘guhya vanayimpempa’ yige ga li retesere po ntani age ga yi haferere apa lya lihanenene mouzuni.—Joh. 8:44.