Sirongwa Selirongo 50
Jehova kwa tura po ewapaiko yipo tu manguruke
“Divisa emanguruko kovantu navenye ava va tunga mosirongo.”—LEV. 25:10.
RUSUMO 22 Uhompa u wize pevhu!
ETWAROMO *
1-2. (a) Yisinke Mvhura zElilikido? (Tara kakende “ Yisinke Mvhura zElilikido?”) (b) Yisinke ga tumbwire Jesus mwaRukasa 4:16-18?
MOYIRONGO yimwe, vantu kudana silika nsene hompa ana pangere nomvhura dokusika 50. Mvhura ozo, awo kuzitumbura asi mvhura zelilikido. Sipito oso kuvhura kusidana ezuva limwe ndi sivike ndi kupita opo, nye konyima zosiruwo vantu kuhageka kudana sipito oso nokusidivara.
2 Ngesi tatu ka zogera kuhamena silika somulyo kupitakana silika soMvhura zElilikido esi ngava dana Vaisraeli nkenye apa konyima zonomvhura 50. Silika soMvhura zElilikido kwa pere Vaisraeli emanguruko. Morwasinke natu lirongera kuhamena silika oso? Morwa silika soMvhura zElilikido kutudiworokesa eyi ga tu ruganena Jehova yipo tu gwane emanguruko lyanarunye. Jesus nage kwa tumbwire emanguruko olyo.—Resa Rukasa 4:16-18.
Apa Vaisraeli va mwene vapika kuna kutengura komapata gawo ntani mapya kuna kugatengwida ko moMvhura zElilikido, ayo kwa va hafesere (Tara paragarafu 3) *
3. Kuliza naLevitikus 25:8-12, ngapi omu Vaisraeli ngava gwanene mo uwa moMvhura zElilikido?
3 Nsene tu kona-kona ewapaiko lyoMvhura zElilikido eli ga tulisire po nare Jehova, ayo kuvhura yi tu vatere tu kwate egano eyi ga tembe Jesus apa ga uyungire kuhamena emanguruko. Jehova kwa tanterere Vaisraeli asi: “To pongora nye mumvho gounomurongo ntano, makura to divisa emanguruko kovantu navenye ava va tunga mosirongo. Momvhura ozo maugawo nagenye aga va randesere, ngava ga tengwida kwavenyago ndi koruvharo rwawo.” (Resa Levitikus 25:8-12.) Mosirongwa sa ka pita, twa zogerere omu Vaisraeli ngava gwanene mo mauwa mezuva lyEsabata. Nye ngapi omu Vaisraeli ngava gwanene mo uwa moMvhura zElilikido? Pasihonena, nsene Muisraeli ta tokora kurandesa epya lyendi yipo a fute makongo gendi, moMvhura zElilikido, epya lyendi eli ga randesere kwa li mu tengwidilire. Yipo nye, mugara ogo kwa gwene epya lyendi eli ga randesere ntani konyima vana vendi kwa pingire epya olyo. Ngapi kuhamena mugara ogu ga randesere munwendi ndi nyamwendi a kare mupika yipo a fute makongo gendi? MoMvhura zElilikido, mupika ogo nage kwa tengwire “koruvharo rwawo.” Yipo nye, kwato gumwe ogu ga kere mupika ga hana ehuguvaro lyokumanguruka! Ewapaiko eli kulikida asi Jehova kwa here vantu vendi.
4-5. Morwasinke ya karera nomulyo tu lironge kuhamena Mvhura zElilikido?
4 Uwa musinke hena ngava gwanene mo moMvhura zElilikido? Bibeli kutanta asi: “HOMPA Karunga gweni nga mu tungika mosirongo esi nga mu pa. Nagumwe si gomokatji keni nga kara noruhepo.” (Deut. 15:4) Eyi ya lisiga neyi yina kuhoroka neina mouzuni. Ose kumona vantu wonongawo kuna kungawopa, ano woruhepo kuna kuhepa unene.
5 Mokumona asi ose Vakriste, ose kapi atu kwama Veta zaMosesa. Eyi kutanta asi ose kapi atu kwama veta zoMvhura zElilikido kuhamena kumangurura vapika ntani nokugusira po ava va tu korota ndi tu tengwide mapya aga twa randa. (Rom. 7:4; 10:4; Efe. 2:15) Nye ya kara nomulyo tu lironge kuhamena Mvhura zElilikido. Morwasinke? Morwa nose kuvhura tu hafere umanguruki ngwendi ou Jehova ga wapaikilire Vaisraeli.
JESUS KWA DIVISIRE KUHAMENA UMANGURUKI
6. Kosinke va hepa kutumangurura?
6 Natuvenye twa hepa kutumangurura morwa ose vapika wononzo. Ose kuvera, kukurupa ntani kufa morwa nonzo. Wovanzi kuyidimburura eyi apa ava litara montarero ndi apa ava zi kwa ndokotora a ka va hakure. Ayo kutudompesa hena apa atu tura nonzo. Mupositoli Paurusa kwa tente asi age kwa mu tura “moupika wononzo edi adi pangere morutu [rwendi].” Age kwa tente hena asi: “Oru ruhepo rwange ame muntu ame rureru oru! Yilye ogu nga yoworora nge mo morutu oru rokutwara nge konomfa?”—Rom. 7:23, 24.
7. Yisinke ga pumbire Jesaya kuhamena umanguruki?
7 Nampili ngoso, Karunga kwa tura po ewapaiko yipo va tu zowore ndi va tu mangurure kononzo. Jehova kuyirugana eyi kupitira mwaJesus. Nomvhura 700 komeho Jesus a wize pevhu, muporofete Jesaya kwa pumbire kuhamena emanguruko lyenene lyokomeho. Emanguruko olyo ngali ka sikisa mo yininke yoyinzi kupitakana emanguruko eli ngava hafere Vaisraeli moMvhura zElilikido. Age kwa tente asi: “Mupangeli HOMPA kwa zwida nge mpepo zendi. Age kwa horowora nge yiyo ga tuma nge ni tware mbudi zongwa komapongo, ni verure mutjima gwanyanyauka, ni zuvhise emanguruko lyononkwate.” (Jes. 61:1) Kwalye wa tamba uporofete ou?
8. Kwalye wa tamba uporofete wokuhamena emanguruko?
8 Uporofete owo womulyo kwa tamekere kusika mo apa Jesus ga tamekere nosirugana sendi pevhu. Apa Jesus ga zire mosinagoge moNasareta, omu ga kulilire, age kwa resere uporofete owo koVajuda ava va pongere mosinagoge. Age kwa tente asi: “Mpepo zaHompa pozili pwange, yeeyi age kwa gwaveka nge asi ani udisire vahepwe Mbudi zoNgwa. Age kwa tuma nge asi ani zuvhisire nonkwate emanguruko, ano vatwiku emahuko, ni ya hepurure ava va kara moruhepo, oku tani divisa mumvho ogu nga parura Hompa vantu vendi!” (Ruk. 4:16-19) Ngapi omu Jesus ga sikisire mo uporofete owo?
VANTU WOKUHOVA KUGWANA EMANGURUKO
Jesus kwa divisire emanguruko mosinagoge zomoNasareta (Tara paragarafu 8-9)
9. Kosinke va here kumanguruka sinzi sovantu womomazuva gaJesus?
9 Vantu kwa tamekere kugwana umanguruki ou ga pumbire Jesaya ntani ou ga resere Jesus, mosiruwo sovapositoli. Twa yi diva asi eyi usili morwa Jesus kwa divisire asi: “Naina etjangwa eli lina siki mo, nanyamweni muna lizuvhire ko.” (Ruk. 4:21) Sinzi sovantu ava va zuvhire eyi ga resere Jesus nampo kwa gazarere asi tava manguruka kepangero lyaRoma. Awo nampo kwa lizuvhire ngwendi vagara vavali ava va tente asi: “Ose kwa huguvarere ose asi yige gokuyazowora Israeli.” (Ruk. 24:13, 21) Nye Jesus kapi ga korangedere varongwa vendi va dire kulimburukwa kepangero lyonyanya lyaRoma. Age kwa va korangedere va “futire hompa gwaRoma eyi ya mu hamena.” (Mat. 22:21) Monkedi musinke Jesus ga mangwilire vantu posiruwo sina?
10. Kosinke Jesus ga mangwilire vantu?
10 MunwaKarunga kwa wizire a ya mangurure vantu mononkedi mbali. Zokuhova, Jesus kwa vaterere vantu va manguruke komarongo gepuko aga ngava rongo vampitisili womaukarelikarunga. Sinzi soVajuda kwa va sininikire va kwame nompo ntani nomarongo goyimpempa. (Mat. 5:31-37; 15:1-11) Vantu ava ngava tanta asi kuna kuvatera vakwawo va karere Karunga nawa, nawo kapi ngava karere Karunga nawa-nawa. Awo kwa kere ngwendi vatwiku vana kupitisira vakwawo. Apa va nyokere Mesiyasa ntani nousili ou nga rongo, awo kwa twikilire kukara momundema ntani moupika wononzo. (Joh. 9:1, 14-16, 35-41) Apa Jesus ga rongere vantu usili ntani nokuvatulira po sihonena, age kwa likidire vantu wokulinunupika omu nava manguruka komarongo goyimpempa.—Mar. 1:22; 2:23–3:5.
11. Monkedi musinke zauvali omu Jesus ga mangwilire vantu?
11 Nkedi zauvali omu Jesus ga mangwilire vantu kuna kara pokuvazowora moupika wononzo edi va pinga. Mokumona asi Jesus kwa geve eparu lyendi ngosizoweseso, Karunga kwa gusilire po vantu ava va likidire epuro monzambo ozo. (Heb. 10:12-18) Jesus kwa tente asi: “Ntene a mu zowora Muna, makura tomu zowokerere.” (Joh. 8:36) Emanguruko olyo kwa kere nomulyo unene kupitakana emanguruko eli ngava gwana Vaisraeli moMvhura zElilikido! Pasihonena, mugara gomupika ogu ngava mangurura moMvhura zElilikido nampo ga ya kere mupika hena ntani konyima ga ya fire.
12. Wolye va hovere kugwana emanguruko eli ga divisire Jesus?
12 Momvhura 33 poPentekoste, Jehova kwa gwavekere vapositoli ntani novagara vamwe novakadi wovalimburukwi. Age kwa va tumbwire asi vana vendi, morwa komeho awo ngava ka pangera kumwe naJesus meguru. (Rom. 8:2, 15-17) Vantu ava yiwo va hovere kugwana emanguruko eli ga divisire Jesus mosinagoge zomoNasareta. Vagara novakadi owo kapi hena va kere moupika womarongo goyimpempa aga ngava rongo vampitisili womaukarelikarunga goVajuda. Karunga kwava mangwilire hena moupika wononzo. Emanguruko olyo kwa tamekere momvhura 33 apa Jesus ga gwavekere Vakriste wovagwavekwa, ntani ngali ka haga kehagero lyonomvhura eyovi depangero lyaKristusa. Yininke musinke yoyiwa ngayi horoka kutunda posiruwo esi dogoro kehagero lyepangero lyaJesus lyonomumvho eyovi?
MAMILIYONA GOVANTU NGAVA VA MANGURURA
13-14. Kugusa ko vagwavekwa, wolye hena nava vhura kugwana emanguruko eli ga divisire Jesus?
13 Naina, mamiliyona govantu ava va tunda monomuhoko nadinye kwa hamena ‘kononzwi dapeke.’ (Joh. 10:16) Awo kapi ngava ka pangera kumwe naJesus meguru. Nye Bibeli kutanta asi awo va kara nehuguvaro lyokukaparukira pevhu narunye. Nove wa kara nehuguvaro olyo ndi?
14 Nove kuvhura o gwane mauwa gamwe aga ava gwana vagwavekwa. Mokumona asi wa kara nepuro monzambo zaJesus, kuvhura o hundire Jehova a ku gusire po nonzo doge. Eyi kutuvatera tu kare nelikwatakano lyewa naJehova ntani nezwi lyewa lyokomutjima. (Efe. 1:7; Ehor. 7:14, 15) Gazara hena kuhamena mauwa aga atu hafere morwa twa manguruka komarongo goyimpempa aga twa pulire nare. Jesus kwa tente asi: “Ngomu kwata egano usili, awo ngau mu zowora.” (Joh. 8:32) Yosili, ose tuna hafa kweyi va tu mangurura!
15. Emanguruko musinke ngatu ka gwana ntani mauwa musinke ngatu ka hafera komeho?
15 Komeho, ose ngatu ka hafera hena emanguruko lyenene. Ntaantani tupu Jesus nga ka guse po maukarelikarunga nagenye goyimpempa ntani nomapangero govantu wovadona. Karunga nga popera “emukurumbunga” eli ali mu karere ntani awo ngava ka hafera mauwa gomanzi moparadisa pevhu. (Ehor. 7:9, 14) Vantu wovanzi ngava ka va vhumbura, ntani ngava ka va mangurura kwanayinye eyi za retesa po nzo zaAdamu.—Yirug. 24:15.
16. Emanguruko musinke lyenene lina kundindira vantu komeho?
16 Posiruwo sepangero lyonomumvho eyovi, Jesus ntani nava ngava ka pangera nage, ngava ka vatera vantu va ka kare noukanguki wokusikilira mo ntani nelikwatakano lyewa naJehova. Siruwo esi ngasi ka kara ngwendi Mvhura zElilikido ezi ngava dana Vaisraeli. Eyi kutanta asi vantu navenye ngava ka karera Jehova noulimburukwi ntani ngava ka sikilira mo, va hana nonzo.
Mouzuni woupe, ose ngatu ka rugana yirugana eyi ngayi ka tu retera ruhafo (Tara paragarafu 17)
17. Yisinke lya pumba etjangwa lyaJesaya 65:21-23, kuhamena vantu vaKarunga? (Tara efano lyopontunda.)
17 Uporofete wokuhamena omu eparu ngali ka kara pevhu kuugwana mwaJesaya 65:21-23. (Resa.) Vantu kapi tupu ngava ka hingira va hana yirugana. Bibeli kutanta asi vantu vaKarunga ngava ka rugana yirugana yoyiwa eyi ngayi ka va hafesa. Apa ngadi pwa nomumvho eyovi depangero lyaKristusa, kuvhura tu kare nehuguvaro asi: “Unsitwe ngava u zowora mo moupika wezonauko, ngau ze mezowoko lyouyerere wovana vaKarunga.”—Rom. 8:21.
18. Morwasinke natu uyungira asi ose kuna kutundindira meho zongwa komeho?
18 Posiruwo soVaisraeli, Jehova kwa va pangerere va rugane nokupwizumuka. Eyi ngayi ka horoka hena komeho mepangero lyaKristusa lyonomumvho eyovi. Ose ngatu ka kara hena nosiruwo sokukarera Jehova. Kukarera Jehova kuna kara sininke somulyo esi asi tu retere ruhafo. Mouzuni woupe, ose ngatu ka twikira kukarera Jehova. Yipo nye, vantu wovalimburukwi navenye ngava ka hafa posiruwo sonomumvho eyovi depangero lyaKristusa morwa natuvenye ngatu ka kara noyirugana yokuhafesa ntani natuvenye ngatu ka karera Karunga.
RUSUMO 142 Kwaterera kehuguvaro lyetu
^ para. 5 Jehova kwa tulire po ewapaiko yipo a mangurure Vaisraeli. Aso kwa kere silika soMvhura zElilikido ndi Jubilee. Naina Vakriste kapi ava kwama Veta zaMosesa, nye kuvhura tu lirongere ko yuma kosilika oso. Mosirongwa esi, tatu ka tara omu silika esi ngava dana Vaisraeli asi tu diworokesa ewapaiko eli ga tulire po Jehova yipo a tu zowore ntani nomu natu gwanena mo mauwa.
^ para. 61 EFANO Epenuno 9: MoMvhura zElilikido, vantu ava va kere vapika kwava mangwilire ntani kwa tengwire komapata gawo ntani kwa va tengwidilire mapya gawo.
