Sitambo sosihorokwa somwaDeuteronomium 22:25-27, kapisi sokulikida unzoni womugara, morwa mugara ogo ga kere nare nounzoni. Veta ozo kwa demenenene mokulikida asi mukadona kapi ga kere nounzoni. Tu konakoneni novelise dimwe.

MwaDeuteronomium 22:23, 24, kwa tumbura mo mugara ogu ga honderere “mositata” nomukadona ogu va vandekera. Mugara ogo kwa kere nounzoni wokuhondera morwa vantu ngava tara mukadona ogo va vandekera asi ga kwara. Nye ngapi kuhamena mukadona ogo? Age kapi ga ‘takumine apa ga kere mositata’ Ngano ga takumine, vakwawo ngano va mu zuvhire ntani ngano va mu poperere. Nye kapi ga takumine. Eyi kulikida asi nage kwa honderere, yipo nye, navenye kwa va gwene unzoni.—Deut. 22:23, 24.

Novelise dokukwama ko kwa tumbwire hena ukaro umwe. Ado kwa tanta asi: “Ano mugara, nsene a gwanekera nomukadona ogu va vandekera, moyihwa, makura a mu kwate a mu rarere kononkondo, opo ngoso mugara gelike nye nava dipaga. Mukadona nokumurugana si yuma, yeeyi kwendi kutupu nzo zokuvhura kumudipagesa. Eyi kuna lifana ngwendi mugara ogu ana di sara mukwawo, ta mu dipaga nampili kapi ana mu zono yuma, yeeyi mugara kuna rarere mukadona gokuvandekera kononkondo moyihwa, age nampili ka takuma kapi ngano ana gwana ekwafo, yeeyi nagumwe si ana mu zuvhu a mu popere.”—Deut. 22:25-27.

Moukaro owo, vapanguli va yi divire asi mukadona ga ‘takumine nye kwato ogu ga mu poperere.’ Yipo nye, mukadona ogo kapi ga honderere. Nye mugara ga kere nounzoni wokuhondera morwa age kwa kwete mukadona ogu va vandekera “a mu rarere kononkondo.”

Nampili ngomu Veta ozo za likidire asi mukadona kapi ga kere nounzoni, nye sihorokwa somwaDeuteronomium 22:23, 24, kulikida asi mugara kwa kere nounzoni wokuhondera. Tuna si huguvara asi vapanguli ngava ‘konakona nawa-nawa’ udigu owo, yipo va ture po etokoro kuliza nonompango daKarunga.—Deut. 13:14; 17:4; Ex. 20:14.