NOVE kupandura nkenye apa ndi? Natuvenye twa hepa ku lipura epuro olyo. Bibeli kwa pumba asi sinzi sovantu womomazuva getu “kapi ngava paka mpandu.” (2 Tim. 3:2) Nampo wa diva ko vantu vamwe ava va hara asi vakwawo vava pe yuma ndi vava ruganene yininke. Ayo kulikida asi kapi va kara norupandu koyininke eyi ava gwana. Ose narunye kapi atu hafere kukara novantu vangoso.

Mokulisiga, vakareli vaJehova kuvakorangeda va ‘pandure nkenye apa.’ Yipo nye twa hepa ‘kupandura mwanayinye.’ (Koros. 3:15; 1 Tes. 5:18) Kulikida rupandu kuna kara sininke sosiwa kwetu. Pwa kara nokonda dononzi deyi natu yi ruganena.

Konda zimwe zomulyo zeyi natu karera norupandu, morwa kutuvatera tu lizuvhe nawa. Apa muntu a pandura, age kulizuvha nawa ntani ogu vana ku pandura nage hena kulizuvha nawa. Morwasinke ya karera ngoso? Gazadara ko kosihonena esi: Ngapi o lizuvhu apa mukweni a ruganesa siruwo sendi yipo a ku ruganene yuma? Ayo kulikida asi ga ku hara. Yipo nye, apa o dimburura asi mukweni ga ku hara, ayo kukuninkisa o lizuvhe nawa. Eyi yiyo ya horokerere Rutu. Bowasa kwa likidire Rutu nkenda zonene. Ano eyi kwa ninkisire Rutu a hafe, apa ga dimbwilire asi nani kweli ogu ga mu hara.—Rutu. 2:10-13.

Ayo mulyo kupandura Karunga. Nampo nove kugazadara ko koyininke yoyinzi yopanyama neyi yopampepo eyi ga kuruganena Karunga ntani neyi ana kukuruganena ngesi. (Deut. 8:17, 18; Yirug. 14:17) Ya wapa kugazadara ko momunene koyininke eyi ga kuruganena Karunga kumwe nava wa hara. Nsene o yi rugana, ayo ngayi ku vatera o kare norupandu ntani ngayi ku vatera o dimburure asi age ga ku hara ntani ove mulyo kwendi.—1 Joh. 4:9.

Kapi ya gwanena po tupu kugazadara koyininke eyi ga ku ruganena Jehova, nye wa hepa kumupandura kweyi ga ku ruganena. (Epis. 100:4, 5) Vantu kwa tanta asi: “Apa atu pandura wopeke, ayo kutuhafesa.”

Konda zimwe zomulyo zeyi natu likidira rupandu kuna kara asi ayo kunkondopeka ukaume wetu novakwetu. Natuvenye kwa hara va tu pandure. Nsene o pandura mukweni kweyi ana kuruganene, ayo ngayi nkondopeka ukaume weni. (Rom. 16:3, 4) Vantu ava va kara norupandu, awo nkenye apa kwa hara kuvatera vakwawo. Apa wopeke ava va ruganene yuma, ayo kuvatumangeda va vatere vakwawo. Nsene tu vatera wopeke, ose ngatu hafa. Jesus kwa tente asi: “Kugava kwa kara nerago, kwa pitakana kutambura.”—Yirug. 20:35.

Robert Emmons gokoUniversiti zaCalifornia, gumwe govagendesi ava va rugene ekonakono lyokuhamena rupandu kwa tanta asi: “Mokukara norupandu, pomuhowo twa hepa kuyikwata egano asi natuvenye twa hepa vakwetu. Poyiruwo yimwe, ose kugava nye poyiruwo yimwe nose kutupa yuma.” Natuvenye twa hepa vakwetu yipo tu twikire kuparuka ntani yipo tu hafe. Pasihonena, vakwetu kuvhura va tu pe nondya ndi nomutji edi twa hepa. (1 Kol. 12:21) Muntu gorupandu, nkenye apa kupandura  kweyi ava mu ruganene vakwawo. Yipo nye, lipura nyamoge asi, ame kupandura vakwetu kweyi ava ruganene nge ndi?

Konda zimwe zeyi natu karera norupandu kuna kara asi, ayo kutuvatera tu demenene koyininke yoyiwa mevango lyokudemenena kweyi yoyidona. Uruvi wetu kurugana ngwendi tjipa. Awo kutuvatera tu demenene koyininke yimwe nokunyokera po yimwe. Awo kutuvatera tu demenene koyininke yoyiwa mevango lyokugazadara kweyi yoyidona. Nsene o kara norupandu, ayo ngayi kuvatera o tare yininke monaruwa. Ano eyi ngayi kuninkisa o kare norupandu unene. Nsene o kara norupandu, ayo ngayi kuvatera o rugane eyi ga uyungire mupositoli Paurusa. Age kwa tente asi: “Omu hafe nkenye apa mwaHompa.”—Fil. 4:4.

Kukara norupandu kutuvatera tu dire kudemenena kweyi yoyidona. Nsene o kara norupandu, ngayi kudigopera kukara nomfudu nokuguva ndi o handuke. Vantu worupandu kapi ava kondjere emona. Awo ya va gwanena po eyi va kara nayo ntani kapi ava kondjere hena yimwe.—Fil. 4:12.

NgoMukriste, wa yidiva asi Satana ana hara maudigu aga ono kuligwanekera nago pomazuva aga gopouhura ga ku guvise. Age nga yi hafera nsene o kara nonkareso zokusivana nkenye apa. Nkareso ozo ngazi ninkisa vantu ava ngo zuvhisira va dire kupurakena kombudi zoge. Rupandu kwa likwatakana noyiyimwa yompepo. Pasihonena, ose kuhafa apa atu mono yininke yoyiwa eyi a tu ruganene Jehova ntani twa kara nehuguvaro momatumbwidiro gendi gokomeho.—Gar. 5:22, 23.

Ngomukareli gwaJehova, ove nampo ono kwatesa ko magano nagenye aga vana uyunga mosirongwa esi kuhamena rupandu. Nampili ngoso, ono dimburura asi ayo kapisi ureru kukara nonkareso zorupandu. Ya ha ku dompesa. Kuvhura yi ku tompoke kukara norupandu. Yisinke no rugana? Nkenye ezuva, gazadara ko koyininke eyi no gavera rupandu. Nsene o yi rugana, ayo ngayi ku vatera o kare nkenye apa norupandu. Ayo ngayi ku vatera hena o kare noruhafo kupitakana vantu ava ava demenene komaudigu gawo. Gazadara ko koyininke yoyiwa eyi o gwana kwaKarunga nokovakweni eyi ayi kuretere fuhafo. Kuvhura hena o yi tjange mobuke zoge. Kuvhura o tjange mo nkenye ezuva yininke yivali ndi yitatu eyi ono hafere.

Vakonakoni kwa tanta asi “apa atu pandura vakwetu nkenye apa, ayo kukundama uruvi wetu monaruwa nokutuvatera tu kare nkenye apa noruhafo.” Muntu gorupandu kuhafa nkenye apa. Yipo nye, gazadara ko koyininke yoyiwa eyi wa gwana ntani kara norupandu. Nsene tuna gwana yininke yoyiwa, tu “pandureni Hompa, yeeyi age muwa.” Ntani ‘atu pandureni moyipimpo nayinye.’—1 Hist. 16:34; 1 Tes. 5:18.