1. Ngapi sinzi sovantu ava tara yirugana?

NGAPI sinzi sovantu ava tara yirugana momukunda gweni? Moyirongo yoyinzi, vantu kuna kurugana unene sili kupitakana pwanare. Vantu ava ava rugana kupitakanena, rorunzi kapi ava kara nosiruwo sokupwizumuka, sokukara nepata, ndi sokurugana yopampepo. (Muud. 2:23) Nye nampili ngoso, vamwe kapi va hara kurugana ntani awo kuligusa-gusa mo pokugava nokonda deyi ava dilire kurugana.—Yis. 26:13, 14.

2-3. Sihonena musinke ga tulire po Jehova naJesus kuhamena yirugana?

² Vantu vamwe kurugana unene ano vamwe nakauke, nye gazadareni ko omu Jehova naJesus ava tara yirugana. Ose twa yi diva asi Jehova kwa hara kurugana. Jesus kwa tente asi: “Tate kurugana narunye, name yimo moomo ani rugana.” (Joh. 5:17) Gazadara ko kosirugana esi ga rugene Karunga apa ga sitire vaengeli ntani uzuni. Ose kumona hena yininke yoyinzi yoyiwa eyi ga sita pevhu. Eyi yiyo ya ninkisire muepisarome a tante asi: “HOMPA, hawe, yininke eyi wa rugana yinzi! Ee, yireru omu wa yi rugana nounkurungu! Uzuni kwa zura yisitwa yoge.”—Epis. 104:24.

³ Jesus kwa honenene Oguhwe. Ntani age kwa va vaterere apa va “tulire po eguru pevega lyalyo.” Age kwa kere naJehova “ngonkurungu.” (Yis. 8:27-31) Ano konyima apa ga ya kere pevhu, age nga rugana yirugana yoyinene. Jesus kwa tere yirugana oyo ngwendi nondya ntani ayo kwa likidire asi Karunga ga mu tumine.—Joh. 4:34; 5:36; 14:10.

4. Yisinke natu lirongera ko kwaJehova naJesus kuhamena kupwizumuka?

 ⁴ Ngoso sihonena saJehova naJesus sokurugana unene kutanta asi kapi ya kara hepero kupwizumuka ndi? Hawe! Jehova kapi ga hepa kupwizumuka morwa kapi a roroka. Nye nampili ngoso, Bibeli kwa tanta asi apa Jehova ga mene kusita eguru nevhu age kwa ‘pwizumukire.’ (Ex. 31:17) Eyi kulikida asi Jehova kwa hagekere tanko kusita makura ta tara nokuhafera eyi ga sitire. Ntani nampili ngomu Jesus nga rugana unene apa ga kere pevhu, nye age nga litulire po siruwo sokupwizumuka ntani nokulya novakaume vendi.—Mat. 14:13; Ruk. 7:34.

5. Yisinke ayi digopere sinzi sovakareli vaJehova?

⁵ Bibeli kukorangeda vakareli vaKarunga va rugane. Vakareli vendi va hepa kurugana unene kapisi va kare noudwa. (Yis. 15:19) Nampo ove kurugana yipo o rere epata lyoge. Ntani varongwa vaJesus navenye kwa kara nositumbukira sokuzuvhisa mbudi zongwa. Nye simpe wa hepa siruwo sokupwizumuka. Ove kukudigopera pamwe kugwana siruwo sokurugana yirugana yoge nesi sokuza mokuzuvhisa ntani sokupwizumuka ndi? Ngapi natu diva asi siruwo sokuhura kupi natu rugana nesi natu pwizumuka?

6. Ngapi Marukusa 6:30-34 azi likida asi Jesus ga kere nehetakano koyirugana nokupwizumuka?

⁶ Ayo mulyo unene tu kare nehetakano koyirugana. Hompa Saromo kwa tjenge asi: ‘Pwa kara siruwo . . . sa nkenye eyi.’ Age kwa tumbwire yininke ngwendi siruwo sokutapeka, sokutunga, seguwo, soruhafo, sokudana ntani nayimwe hena. (Muud. 3:1-8) Yosili, yininke yivali yomulyo po meparu kuna kara kurugana ntani kupwizumuka. Jesus ga kere nehetakano koyirugana nokupwizumuka. Sikando simwe, apa vapostoli va ka tengwire mokuzuvhisa, awo “noruveze si rooru va gwene rokulya.” Makura Jesus yipo ga va tanterere asi: “Wizeni nyonelike kevega lyomaporeza, mu ka pwizumuke kanunu.” (Resa Marukusa 6:30-34.) Nampili ngomu Jesus novarongwa vendi ngava dili kugwana nkenye apa siruwo sokupwizumuka, nye age ga yi divire asi va hepa kupwizumuka.

7. Ngapi nadi ka tu vatera noveta dEsabata ngomu natu ka di lironga?

⁷ Yosili, poyiruwo yimwe twa hepa kupwizumuka ntani nokutjindja nkedi ezi atu rugana yirugana yankenye ezuva. Jehova kwa tulire po ewapaiko lyomulyo kovakareli vendi womosiruwo sanare. Awo ngava kara nEsabata nkenye sivike. Nampili ngomu atu dili kulimburukwa noveta dEsabata naina, nye simpe kuvhura tu lirongere ko yuma. Ezuva lyEsabata kuvhura kutuvatera tu dimburure nsene twa kara nehetakano koyirugana nokupwizumuka.

8. Kuliza naExodus 31:12-15, yisinke ngava rugana vantu mezuva lyEsabata?

⁸ Bibeli kutanta asi konyima zomazuva ntazimwe gokusita yininke yepevhu, Karunga kwa pwizumukire. (Gen. 2:2) Nye nampili ngoso, Jehova kwa hara kurugana, ntani age simpe kutwikira “kurugana” mononkedi dokulisiga-siga. (Joh. 5:17) Ezuva lyEsabata kwa li fene nezuva eli ga pwizumukire Jehova eli va tumbura mwaGenesis. Karunga kwa tente asi Esabata kwa kere sidiviso sopokatji kendi noVaisraeli. Alyo kwa kere ‘ezuva lyEpwizumuko lyene-lyene . . . , alyo ezuva lyokupongoka kwaJehova.’ (Resa Exodus 31:12-15.) Mezuva olyo kwato ogu va pulisilire  kurugana, yi kare asi munona, mupika ndi simuna. (Ex. 20:10) Ntani vantu ngava demenene unene kweyi yopampepo mezuva olyo.

9. Magano musinke gepuko va kere nago vantu womomazuva gaJesus kuhamena Esabata?

⁹ Esabata kwa kere ezuva lyewa kovantu vaKarunga, nye vampitisili womaukarelikarunga mosiruwo saJesus ngava gweda ko noveta davene kuhamena Esabata. Awo kwa tente asi epuko kuteza nomutwe dorukokotwa mEsabata o lye ntani epuko kuverura muveli. (Mar. 2:23-27; 3:2-5) Nye, noveta dawo kapi da lizire neyi ga here Karunga ntani Jesus ga yi zeresere.

10. Yisinke natu lirongera mo mwaMateusa 12:9-12, kuhamena omu Jesus nga tara Esabata?

¹⁰ Jesus novarongwa vendi ngava pwizumuka mEsabata morwa awo ngava limburukwa Veta zaMosesa. * Nye Jesus kwa yi likidire mononkango nomoyirugana asi kapisi epuko kuvatera wopeke mEsabata. Age kwa tente asi: “mEsabata kuvhura kuninka mo yoyiwa.” (Resa Mateusa 12:9-12.) Age kapi ga yi tere asi epuko kuvatera wopeke mEsabata. Yininke eyi ga rugene Jesus kwa likidire asi age ga kwete egano konda zomulyo zeyi Karunga ga tanterere vantu vendi va pwizumuke mEsabata. Mokumona asi vantu vaKarunga ngava pwizumuka mezuva olyo, eyi kwava pere mpito va demenene koyininke yopampepo. Jesus kwa kulilire mepata eli ngali  ruganesa ezuva lyEsabata mokukarera Karunga. Bibeli kulikida asi apa Jesus ga kere modoropa zawo moNasareta, age “ta zi mosinagoge moomu ga yika, makura ta sikama a rese.”—Ruk. 4:15-19.

11. Kwalye ga lirongerere Jesus sihonena sosiwa kuhamena yirugana?

¹¹ Josefa kwa rongere Jesus omu ava hongo yikungu nomu Jehova a tara yirugana. (Mat. 13:55, 56) Ntani Jesus ga mwene omu Josefa nga rugana unene yipo a pakere mbili epata lyendi lyenene. Jesus kwa ya tanterere varongwa vendi konyima asi: “Murugani kwa fira kugwana mfeto zendi.” (Ruk. 10:7) Yosili, Jesus nga rugana unene.

12. Matjangwa musinke aga likida omu Paurusa ga tere kurugana unene?

¹² Mupositoli Paurusa nage nga rugana unene. Sirugana sendi sosinene kwa kere sokutantera ko vantu kuhamena Jesus neyi nga rongo. Nye nampili ngoso, age simpe nga rugana yipo a lirerese ko. Vatesaronika va divire asi Paurusa nga rugana unene “masiku nomutenya” yipo a dire kuvapa “sikakata.” (2 Tes. 3:8; Yirug. 20:34, 35) Apa Paurusa ga uyungire nonkango odo, age nampo kwa tembe koyirugana yendi yonotenta. Apa ga kere moKolinte, age kwa kere membo lyaAkura naPilisikira ntani nga rugana “kumwe nawo, morwa yirugana yendi yiyo tupu yawo yokurugana notenta.” Apa Paurusa ga uyungire asi nga rugana “masiku nomutenya” kapi ga tembe asi kapi nga pwizumuka. Age nga pwizumuka mezuva lyEsabata. Mezuva olyo, age nga zuvhisire Vajuda ava nawo ngava dili kurugana mEsabata.—Yirug. 13:14-16, 42-44; 16:13; 18:1-4.

13. Yisinke natu lirongera ko kosihonena saPaurusa?

¹³ Mupositoli Paurusa kwa tura po sihonena sosiwa. Age nga rugana yirugana yopanyama nye simpe nga lihameke “moyirugana youpristeli woMbudi zoNgwa zaKarunga.” (Rom. 15:16; 2 Kol. 11:23) Age kwa korangedere vakwawo yipo va zuvhise nawo mbudi zongwa nkenye apa. Eyi yiyo ya ninkisire Pilisikira naAkura va kare ‘varugani vakwawo mosirugana saJesus Kristusa.’ (Rom. 12:11; 16:3) Paurusa kwa korangedere Vakolinte va kare “nkenye apa nomupampi moyirugana yaHompa.” (1 Kol. 15:58; 2 Kol. 9:8) Jehova kwa gendesere mupositoli Paurusa a tjange asi: “Nkenye ogu ga dira kuhara kurugana, walye a li.”—2 Tes. 3:10.

14. Yisinke ga tembe Jesus apa ga uyungire nonkango edi da kara mwaJohanesa 14:12?

¹⁴ Sirugana somulyo po pomazuva aga gopouhura kuna kara sokuzuvhisa nokutulisa po varongwa. Ntani Jesus kwa pumbire asi varongwa vendi ngava rugana yirugana yoyinene kupitakana eyi ga rugene. (Resa Johanesa 14:12.) Age kapi ga tembe asi ngatu rugana yitetu ngwendi moomu ga yi rugene. Nye age kwa tembe asi varongwa vendi ngava zuvhisa nokuronga vantu wovanzi nokomavango gomanzi ntani siruwo sosire.

15. Mapuro musinke natu lipura ntani morwasinke?

¹⁵ Nsene asi ove kurugana, lipura asi: ‘Vantu kwa diva nge koyirugana asi ame kurugana unene ndi? Ame kurugana paapa na hulira ntani kumana yirugana yange nosiruwo ndi?’ Nsene elimbururo lyoge komapuro aga kuna kara asi nhi, ayo kulikida asi muhona goge nga ku huguvara. Ntani vantu ava o rugana nawo ngava hafera kupurakena mbudi zongwa. Wa hepa kulipura hena mapuro aga kuhamena kuzuvhisa nokuronga. Lipura asi:  ‘Vantu kwa diva nge asi ame kurugana unene mokuzuvhisa ndi? Ame kuliwapaikira nawa komeho ni ka rugane matengwiro ko ndi? Ame kutengwira ko usimbu yipo ni ka zogere novantu ava ava likida elituromo ndi? Ame kulihameka mononkedi dokulisiga-siga dokuzuvhisa ndi?’ Nsene elimbururo lyoge komapuro aga kuna kara asi nhi, ove ngo gwana ruhafo mosirugana soge.

16. Ngapi omu Jesus novapositoli vendi va tere kupwizumuka, ntani ngapi sinzi sovantu ava tara kupwizumuka?

¹⁶ Jesus ga yi divire asi nage novapositoli vendi va hepere kupwizumuka poyiruwo yimwe. Nampili ngoso, vantu womosiruwo sanare nava womomazuva getu, kwa lifana nomugara gongawo gomosifanekeso saJesus. Mugara ogo kwa litanterere mwene asi: “Gu ku dame nye, lya, o nwe, o hafe.” (Ruk. 12:19; 2 Tim. 3:4) Age kwa gazarere asi yininke yomulyo po meparu kuna kara kupwizumuka ntani kulihafesa. Nye Jesus novapositoli vendi kapi va demenene mokulihafesa vene.

17. Ngapi atu ruganesa siruwo esi atu dili kuza koyirugana?

¹⁷ Naina, ose kuhonena Jesus pokuruganesa siruwo esi atu dili kuza koyirugana yipo tu pwizumuke nokuzuvhisira vakwetu ntani tu ze komapongo. Ose kutara sirugana sokutulisa po varongwa nokuza komapongo asi yirugana yomulyo, ano eyi kututumangeda tu liture mo unene moyirugana eyi. (Heb. 10:24, 25) Nampili apa atu zi kepwizumuko, ose kuhetekera ko kuza komapongo ntani kuzuvhisira vantu ava atu ligwana nawo.—2 Tim. 4:2.

18. Yisinke ana hara Hompa gwetu Jesus Kristusa tu rugane?

¹⁸ Tuna hafa mokudiva asi, Hompa gwetu Jesus Kristusa kapi a tu pura tu rugane eyi natu dira kuvhura kurugana, ntani age kutuvatera tu kare nehetakano koyirugana nokupwizumuka. (Heb. 4:15) Age ana hara tu pwizumuke. Nye ana hara hena tu rugane unene yipo tu lirere nyamwetu ntani nokutulisa po varongwa. Mosirongwa sokukwama ko, ngatu ka zogera eyi ga tu ruganena Jesus mokutuzowora.