1. Situmbukira musinke ga gava Jehova kovakurona?

JEHOVA kwa sitire valikwali wokuhova neharo lyokukara novana. Bibeli kutanta asi: “Vana, yigava yaHOMPA.” (Epis. 127:3) Yisinke adi tanta nonkango odo? Gazara asi mukweni ta ku pura o takamese yimaliwa yendi yoyinzi. Ngapi no lizuvha? Ayo nayi kuhafesa mokudiva asi age ga ku huguvara. Nye nampo no kara nosinka omu no vhura kupungura yimaliwa oyo. Mokulifana, Jehova kwa pa vakurona sininke somulyo unene kupitakana yimaliwa, esi nava vhura kutakamesa. Age kwa va pa situmbukira sokupakera mbili vana vawo nokuvavatera va kare noruhafo.

2. Mapuro musinke natu ka zogera?

² Yilye ogu na tokwera po valikwali nsene kuvhura va kare novana ntani siruwo musinke nava vhura kukara nawo? Ntani yisinke nava vhura kurugana vakurona yipo vana vawo ngava kare noruhafo? Koneka nompango dimwe domoBibeli edi nadi vhura kuvatera valikwali woVakriste yipo va ture po matokoro gomawa.

3. (a) Yilye gokuvhura kutokora nsene valikwali kuvhura va kare novana ndi hawe? (b) Nompango musinke nadi vatera vanekoro novakaume va dire kusininika wopeke?

³ Monompo dimwe, vantu kundindira valikwali wovape va tameke kukara novanona. Ekoro lyawo ntani novantu vamwe, kuvhura va sininike valikwali wovape yipo va kare novanona. Munazinyetu gomugara Jethro gomoAsia kwa tanta asi: “Valikwali vamwe womombungakriste ava  va kara novana kusininika valikwali ava va dira kukara novana va kare novana.” Munazinyetu Jeffrey gomoAsia, nage kwa tanta asi: “Vamwe kutantera valikwali wokudira vana asi kwato ogu ngava pakera mbili apa ngava kurupa.” Nye valikwali va hepa kutokora vene nsene asi ngava kara novanona ndi hawe morwa aso kuna kara situmbukira sawo. (Gar. 6:5) Nampili ngomu vekoro novakaume va harera valikwali wovape va hafe, nye va hepa kuyikwata egano asi valikwali vene yiwo wokuvhura kutokora nsene ngava kara novana ndi hawe.—1 Tes. 4:11.

4-5. Mapuro musinke va hepa kuzogera valikwali ntani siruwo musinke nava zogera mapuro ogo? Faturura.

⁴ Ayo ya wapa kovalikwali ava vana hara kukara novana va zogere mapuro aga gavali: (1) Siruwoke vana hara kukara novanona? (2) Ntani vana vangapi ngava kara nawo? Siruwoke nava zogera mapuro ogo? Ntani morwasinke ya karera nomulyo kuzogera mapuro ogo?

⁵ Sinzi sovalikwali kuzogera kuhamena vana komeho va likware. Morwasinke ya karera nomulyo? Ayo kuvavatera navenye va kare nomagano gokulifana. Ntani ya wapa hena kuzogera nsene ngava sikisa mo situmbukira oso. Valikwali vamwe kwa tokora kudira kukara novana konyima zokulikwara mvhura zimwe ndi mbali. Awo kuyirugana eyi yipo va gwane siruwo sokunkondopeka tanko nonkwara dawo. Ntani ayo kuvavatera va lidive unene komeho va ya kare novana, morwa va yi diva asi kukara novana kumana siruwo nononkondo.—Efe. 5:33.

6. Yisinke va tokora valikwali vamwe morwa mazuva aga tuna kuparuka?

⁶ Valikwali vamwe kukwama sihonena sovana vaNowa vatatu novakadi vawo. Awo kapi va kere novana komeho zoruhanzo. (Gen. 6:18; 9:18, 19; 10:1; 2 Pet. 2:5) Jesus kwa hetakanesere mazuva getu ‘komazuva gaNowa’ ntani ngesi ose twa diva asi ose kuna kuparuka ‘poyiruwo yoyidigu.’ (Mat. 24:37; 2 Tim. 3:1) Eyi yiyo valikwali vamwe ava tokwere kudira kukara novana posiruwo esi yipo va ruganese siruwo sawo mokukarera unene Jehova.

7. Ngapi omu etjangwa lyaRukasa 14:28, 29 ntani Yisewe 21:5 nali vatera valikwali?

⁷ Apa valikwali wonondunge ava tokora nsene ngava kara novanona ntani vangapi  ngava kara nawo, awo kuhova tanko ‘kuhingira va varure.’ (Resa Rukasa 14:28, 29.) Sinzi sovalikwali ava va rera vanona kwa tanta asi mokurera vanona, wa hepa kukara noyimaliwa. Ntani wa hepa kukara nosiruwo nononkondo. Yipo nye, ayo mulyo kovalikwali va lipure mapuro aga: ‘Natuvenye ngatu rugana yipo tu rande yininke eyi tuna hepa mepata lyetu ndi? Natuvenye twa diva eyi twa hepa ndi? Nsene ngatu rugana natuvenye, yilye ogu nga takamesa vana vetu? Sihonena salye ngava kwama?’ Valikwali ava ava zogere mapuro ogo kukwama mpango ezi za kara moYisewe 21:5.—Resa.

8. Maudigu musinke ngava ligwanekera nago valikwali woVakriste ntani yisinke na rugana nturagumbo geharo?

⁸ Wa hepa kukara nosiruwo nononkondo mokurera vanona. Yipo nye, nsene valikwali va kara novanona wovanzi posikando simwe, ayo kuvhura yi va digopere kugwana siruwo sokuvapakera mbili navenye. Valikwali vamwe ava va rera vana wovanzi kwa tanta asi ayo kapisi ureru. Ayo kuvhura yi rorore mukadi parutu nopamalizuvho. Eyi kuvhura yi mu digopere kukanderera, kuza moyirugana yokuzuvhisa nkenye apa ntani nokurugana elirongo lyendi lyoBibeli. Vamwe kuvakarera hena udigu kupurakena komapongo nokugwanena mo uwa. Yipo nye, mugara ga hepa kuvatera mukadendi novanona, yi kare asi komapongo vana kara ndi membo. Pasihonena, kuvhura a vatere mukadendi noyirugana yemembo. Ga hepa hena kurugana unene yipo navenye va gwanene mo uwa moukareli wepata. Vagara va hepa hena kupwaga kumwe nomapata gawo mokuzuvhisa nkenye apa.

9-10. Yisinke va hepa kurugana vakurona ava vana hara kuvatera vana vawo?

⁹ Yininke musinke yimwe va hepa kurugana vakurona yipo va vatere vana vawo va hare Jehova? Ngapi omu nava vhura kupopera vana vawo koyininke yoyidona mouzuni ou? Koneka yininke yimwe eyi nava vhura kurugana vakurona.

¹⁰ Kanderera yipo Jehova a ku vatere. Koneka sihonena saManowa namukadendi. Awo kwa kere vakurona vaSimisoni. Apa Manowa ga divire asi nage namukadendi tava kara nomunona gomugara, age kwa likwamberere kwaJehova yipo a va vatere omu nava vhura kurera munwawo.

11. Kuliza noVapanguli 13:8, ngapi omu vakurona nava honena Manowa?

¹¹ Nihad naAlma wokosirongo saBosnia  naHerzegovina, kwa lirongerere ko kosihonena saManowa. Awo kwa tanta asi: “Nose kwa likwamberere kwaJehova ngwendi Manowa, yipo a tu vatere tu dive omu natu kara vakurona wovawa. Ano Jehova kwa limbwilire makanderero getu mononkedi dokulisiga-siga. Pasihonena, age kwa tu limbwilire kupitira moMatjangwa, moyimbapiratjangwa, komapongo ntani koyigongi.”—Resa Vapanguli 13:8.

12. Sihonena musinke ga tulire po Josefa naMariya ko vana vawo?

¹² Ronga vana woge kupitira mosihonena soge. Eyi o rugana ngayi kundama unene vana woge kupitakana eyi o uyunga. Josefa naMariya kwa tulilire po vana vawo sihonena sosiwa, kukwatera mo naJesus. Josefa nga rugana unene yipo a pakere mbili epata lyendi. Ntani age nga korangeda vemepata lyendi va hare Jehova nokumukarera. (Deut. 4:9, 10) Josefa nga twara epata lyendi “nkenye mvhura” koJerusarema yipo va ka dane sipito soPaska. Age kwa yi rugene eyi nampili ngomu za dilire kukara po Veta zangoso. (Ruk. 2:41, 42) Vagara vamwe ava va kere nomapata nampo ngava tara rugendo oro asi ngaru mana siruwo, ntani ndiro unene. Nye Josefa kwa here unene kukarera Jehova ntani age kwa rongere vana vendi va rugane yininke yokulifana. Mariya nage kwa divire nawa Matjangwa. Yipo nye, age kwa rongere vana vendi va hare Nonkango daKarunga kupitira mosihonena sendi ntani neyi nga uyunga.

13. Ngapi omu valikwali vamwe va kweme sihonena saJosefa naMariya?

¹³ Nihad naAlma ava tuna tumbura, kwa here kukwama sihonena saJosefa naMariya. Ngapi omu sihonena oso sa va vaterere va rere munwawo gomumati a hare Jehova nokumukarera? Awo kwa tanta asi: “Ose ngatu paruka kuliza nonompango daJehova, yipo munwetu a lirongere ko.” Nihad kwa tanta hena asi: “Rugana yininke eyi ono harere munoge a rugane.”

14. Morwasinke valikwali va hepera kudiva asi wolye vana kuzogera nawo vana vawo?

¹⁴ Vatera vana woge va horowore vakaume wovawa. Valikwali va hepa kudiva vakaume wovana vawo ntani neyi ava rugana. Eyi kwa kwatera mo kudiva asi vantu musinke vana kuzogera nawo kupitira kointaneta ntani nokoserefoni. Vantu ava ava zogere nawo vanona, kukundama eyi ava gazara neyi ava rugana.—1 Kol. 15:33.

15. Yisinke nava lirongera ko vakurona kosihonena saJessie?

¹⁵ Yisinke nava rugana vakurona nsene kapi va diva yoyinzi kuhamena yikwakonentu? Guhya gumwe gomoPhilippines gedina Jessie kwa tente asi: “Ose kwa divire tupu yininke yoyisesu kuhamena yikwakonentu. Nye ayo kapi ya tu ninkisire tu dire kutantera vana vetu kuhamena siponga soyikwakonentu.” Nampili ngomu Jessie ga divire yoyisesu kuhamena yikwakonentu, age kapi ga silikire vana vendi va dire kuyiruganesa. Age kwa tanta asi: “Ame ngani korangeda vana vange varuganese yikwakonentu mokulironga eraka lyapeke, kuliwapaikira komapongo ntani yipo va rese Bibeli nkenye ezuva.” Nove wa kara novana ndi? Nsene yimo, nove wa resa nokuzogera novana woge yirongwa eyi ya kara ko-jw.org^® eyi ya zogera kuhamena omu natu ruganesa intaneta ndi? Wa  zogera nawo vidiyo Ove mupika goselefoni zoge ndi? Ntani Be Social-Network Smart? * Novidiyo noyirongwa oyo ngayi kuvatera o ronge vana woge omu nava ruganesa nawa yikwakonentu.—Yis. 13:20.

16. Yisinke ava rugana sinzi sovakurona ntani uwa musinke ava gwanene mo?

¹⁶ Sinzi sovakurona kuvatera vana vawo va tulise po ukaume kumwe nava wosihonena sosiwa mombungakriste. Pasihonena, N’Déni naBomine valikwali womoCôte d’Ivoire ngava zigida nkenye apa mutareli gonombunga a ya rare membo lyawo. N’Déni kwa tanta asi: “Eyi kwa vaterere sili munwetu gomumati. Age kwa tamekere kurugana uzuvhisi wokukarerera, ngesi age kuna kara mutareli gonombunga gokuvatera.” Nove kuvhura o rugane yokulifana kovana woge ndi?

17-18. Siruwo musinke nava tameka vakurona kuronga vana vawo?

¹⁷ Ronga vana woge kutundilira kounona. Nsene vakurona va ronga vana vawo kutundilira kounona, awo ngava gwanena mo uwa. (Yis. 22:6) Gazadara ko kuhamena Timoteusa ogu nga rugana kumwe nomupositoli Paurusa. Age kwa mu rongere ozina Eunike ntani nozinakuru Roise ‘kutunda kounona wendi.’—2 Tim. 1:5; 3:15.

¹⁸ Valikwali vamwe womoCôte d’Ivoire, Jean-Claude naPeace ya va tompoka kurera vana vawo ntazimwe va hare Jehova nokumukarera. Yisinke ya va vatera yipo yi va tompoke? Awo kwa kweme sihonena saEunike naRoise. Awo kwa tanta asi: “Ose kwa tamekere kuronga vana vetu Nonkango daKarunga kutunda tupu apa vava hampurukire.”—Deut. 6:6, 7.

19. Yisinke ayi tanta kuronga vana woge Nonkango daKarunga?

¹⁹ Yisinke ayi tanta ‘kuronga’ vana woge Nonkango daKarunga? Nkango ozo kutanta asi kuruguruka kuronga. Eyi kulikida asi vakurona va hepa kukara nkenye apa novana vawo. Poyiruwo yimwe, vakondi kuvhura yi va handukise pokuruguruka kuronga vana vawo. Nye va hepa kuyitara asi azo kuna kara mpito  zokuvatera vana vawo va kwate egano Nonkango daKarunga nokusikisa mo eyi vana kulironga.

20. Faturura omu natu tura pasirugana Episarome 127:4, nsene kuna kuronga vanona.

²⁰ Diva nawa vana woge. Episarome 127 kwa hetakanesa vanona koyikutji. (Resa Episarome 127:4.) Ngwendi moomu yikutji ava yi ruganesa koyininke yokulisiga-siga ntani kapi ya hetakana, vanona nawo kwa lisiga. Yipo nye, vakurona va hepa kudiva omu nava ronga nkenye munona. Valikwali womoIsraeli ava ya tompoka mokurera vana vawo vavali kwa tumbura sininke simwe esi sa va vatera. Awo kwa tanta asi: “Ose ngatu lirongo Bibeli novana vetu nkenye ogu pwagelike.” Kapi yina kutanta asi natuvenye twa hepa kuyirugana monkedi ozo, nye nove kuvhura o yi heteke.

21. Ngapi omu Jehova a vhuru kuvatera vakurona?

²¹ Vakurona poyiruwo yimwe kuvhura va lizuvhe asi ayo kapisi ureru kuronga vana vawo. Nye vana kuna kara uhwi wokutunda kwaJehova. Age ga liwapaikira kuvatera vakurona. Age kupurakena komakanderero gawo. Ntani age kulimburura makanderero ogo kupitira moBibeli, moyimbapiratjangwa ntani makorangedo govakurona ava va kura pampepo.

22. Yininke musinke yimwe eyi ava gava vakurona kovana vawo?

²² Vantu vamwe kuuyunga asi ayo kugusa nomvhura 20 mokurera munona, nye situmbukira esi kapi asi haga. Vakurona va hepa kugava siruwo sawo neharo kovana vawo ntani nokuvaronga Bibeli. Vanona va lisiga monkedi omu ava tambura edeuro. Nye sinzi sovanona ava va rera vakondi ava va hara Jehova kulizuvha ngwendi munazinyetu Joanna Mae gomoAsia. Age kwa tanta asi: “Ame kupandura kweyi vakurona vange va dewire nge nokuronga nge ni hare Jehova. Awo kapi tupu va reta nge pontunda zevhu, nye awo kwa vatera nge ni gwane eparu lyoruhafo.” (Yis. 23:24, 25) Sinzi soVakriste yimo ava lizuvhu nawo ngoso.