1-2. Yisinke natu lirongera ko kosihonena saAngelito?

VAKURONA woge Nombangi daJehova ndi? Nsene yimo, diworoka asi elikwatakano lyoge naJehova kapi lya korera movakurona woge. Yi kare asi vakurona vetu kukarera Karunga ndi hawe, nkenye gumwe gwetu ga hepa kutunga po elikwatakano naJehova.

² Gazadara ko kosihonena samunazinyetu gomugara Angelito. Navenye vemepata lyawo kwa kere Nombangi. Nye nampili ngoso, apa ga kere munona, age kapi ga lizuvhire asi ga kara nelikwatakano naKarunga. Age kwa tanta asi: “Ame ngani karere Jehova morwa kwa here tupu kurugana eyi ngava rugana vemepata lyetu.” Nye nampili ngoso, Angelito kwa tokwere kulitulira po siruwo sokulironga Nonkango daKarunga nokuteda ko ntani ga tamekere kukanderera nkenye apa. Yisinke ga li rongere? Angelito kwa tanta asi: “Ame kwa lirongere asi mokukara nelikwatakano naJehova, ntudi na hepa kumudiva nyamwange.” Sihonena saAngelito kutuvatera tu lipure mapuro aga gomulyo: Elisigo musinke lya kara po pokatji kokudiva Jehova nokudiva nawa Jehova? Ntani yisinke natu rugana yipo tu dive nawa Jehova?

3. Elisigo musinke lya kara po pokatji kokudiva Jehova nokudiva nawa Jehova?

³ Kuvhura tu gazare asi twa diva Jehova morwa twa diva edina lyendi ntani neyi ga tanta ndi ga rugana. Nye, yinzi  ya hamena mo mokudiva nawa Jehova. Twa hepa kulitulira po siruwo yipo tu lironge kuhamena Jehova noyikara yendi. Eyi ngayi tu vatera tu kwate egano eyi a ruganene yininke yongandi, neyi a uyungire yininke yongandi. Ntani ngayi tu vatera tu dive nsene asi Jehova kumuhafesa eyi atu gazara neyi atu rugana. Makura apa ngatu ya dimburura eyi ana tu harere Jehova, ose ngatu yi rugana.

4. Ngapi nayi ka tu vatera yihonena yomoBibeli eyi natu ka zogera?

⁴ Vamwe kuvhura va tu zore morwa ose tuna hara kukarera Jehova ntani kuvhura hena va tu rwanese pokutumona kuna kuwiza komapongo. Nye nsene tu huguvara Jehova, age kapi nga tu sigilira. Ose ngatu tunga po ukaume naKarunga ou ngau karerera. Kuvhura tu dive nawa Jehova ndi? Nhi, sihonena saMosesa nahompa Ndafita kulikida asi kuvhura yi tu tompoke, nampili ngomu twa dira kusikilira mo. Ngomu natu ka zogera eyi va rugene, natu ka gwana malimbururo komapuro aga gavali: Yisinke va rugene yipo va dive Jehova? Ntani yisinke natu lirongera ko koyihonena yawo?

5. Yisinke ga tokwere kurugana Mosesa?

⁵ Mosesa kwa tokwere kukarera Karunga. Apa Mosesa ga kere nonomvhura 40, age kwa horowere po kulipakerera novantu vaKarunga, mevango lyokumutumbura asi age “gwamunwaFarawo gomukadi.” (Heb. 11:24) Mosesa kwa sigire epundi eli ga kere nalyo moEgipite. Apa Mosesa ga kwatesere ko Vaisraeli, age ga yi divire asi ngayi handukisa unene Farawo. Hompa Farawo kwa kere hompa gononkondo ntani Vaegipite ngava mu tara asi age karunga. Eyi ga rugene Mosesa kwa likidire asi ga kere nepuro lyenene. Age kwa huguvarere mwaJehova. Eyi kwa mu ninkisire a kare nelikwatakano lyenene naJehova eparu lyendi nalinye.—Yis. 3:5.   

6. Yisinke natu lirongera ko kosihonena saMosesa?

⁶ Yisinke natu lirongera ko? Ngwendi Mosesa, natuvenye twa hepa kulipura asi: Nose ngatu karera Jehova nokulipakerera kumwe novantu vendi ndi? Eyi kuvhura yi tante asi twa hepa kutura po malizambero yipo tu karere Jehova ntani vantu ava va dira kudiva Jehova kuvhura ngava tu rwanese. Nye nsene tu huguvara Guhyetu gemeguru, age nga tu vatera.

7-8. Yisinke ga twikilire kulironga Mosesa?

⁷ Mosesa kwa twikilire kulironga kuhamena yikara yaJehova ntani nokurugana mpango zendi. Pasihonena, apa Jehova ga pulire Mosesa a guse Vaisraeli moEgipite, age kwa lizuvhire asi kapi ta vhuru kuyisikisa mo. Karunga kwa limbwilire Mosesa nonkenda ntani ga mu vaterere. (Ex. 4:10-16) Eyi kwa ninkisire Mosesa a ze a ka tantere Farawo mbudi zokutunda kwaJehova. Mosesa kwa mwene omu Jehova ga ruganesere nonkondo dendi apa ga zowere Vaisraeli ntani nokuzonagura po Farawo kumwe novakwayita vendi pEfuta lyEgeha.—Ex. 14:26-31; Epis. 136:15.

⁸ Apa Mosesa ga gusire Vaisraeli moEgipite, awo ngava sivana nkenye apa. Nye nampili ngoso, Mosesa ga mwene omu Jehova ga likidire elididimiko koVaisraeli ava ga zowere moupika. (Epis. 78:40-43) Mosesa kwa mwene hena asi Jehova ga linunupika apa ga purakenene kwaMosesa mokudira kuzonagura po Vaisraeli.—Ex. 32:9-14.

9. Kuliza noVahebeli 11:27, elikwatakano lyokuhura kupi ga kere nalyo Mosesa naJehova?

 ⁹ Konyima zapa Vaisraeli va tundire moEgipite, Mosesa kwa kere nelikwakano lyenene naJehova ngwendi googu ana kutara Oguhwe vemeguru. (Resa Vahebeli 11:27.) Bibeli kulikida elikwatakano eli ga kere nalyo Mosesa naJehova pokutanta asi: “Hompa ta uyunga naMosesa, awo kuna litara, moomu tupu ava uyunga vantu namukwawo.”—Ex. 33:11.

10. Yisinke twa hepa kurugana yipo tu dive nawa Jehova?

¹⁰ Yisinke natu lirongera ko? Mokudiva nawa Jehova, twa hepa kulironga yikara yendi ntani nokurugana mpango zendi. Jehova kuna hara asi: “vantu navenye va paruke, awo hena va ka sike kediwo lyousili.” (1 Tim. 2:3, 4) Nkedi zimwe omu natu rugana mpango zaKarunga kuna kara pokuronga vantu kuhamena Jehova.

11. Ngapi omu atu diva nawa Jehova apa atu rongo wopeke Bibeli?

¹¹ Apa atu rongo vantu kuhamena Jehova, ose kumudiva nawa. Pasihonena, ose kuyamona omu Jehova ga kara nonkenda apa a tu vatere tu gwane vantu wovawa mokuzuvhisa. (Joh. 6:44; Yirug. 13:48) Ose kumona omu Nonkango daKarunga da kara nononkondo apa adi vatere varongwa vetu woBibeli va sige nkareso zawo zondona nokudwara muntu gomupe. (Koros. 3:9, 10) Ntani ose kumona omu Jehova ga kara nelididimiko, morwa age kututuma yikando yoyinzi yipo tu ka vatere vantu va mu dive yipo ngava ka gwane eparu komeho.—Rom. 10:13-15.

12. Kuliza naExodus 33:13, yisinke ga pulire Mosesa kwaJehova ntani morwasinke?

¹² Mosesa kwa tere asi elikwatakano lyendi naJehova mulyo. Mokumona asi Jehova kwa ruganesere Mosesa a rugane yitetu yokulisiga-siga, eyi kulikida asi ga divire nawa Jehova. Nye simpe age kwa pulire Jehova a mu vatere yipo a mu dive unene. (Resa Exodus 33:13.) Mosesa kwa kere nonomvhura dokupitakana po-80 apa ga pulire Jehova, nye ga yi divire asi simpe ga hepere kulironga yoyinzi kuhamena oGuhwe vemeguru.

13. Ngapi natu yi likida asi elikwatakano lyetu naJehova mulyo?

¹³ Yisinke natu lirongera ko? Yi kare asi siruwo sokuhura kupi twa karera Jehova, twa hepa kutara elikwatakano lyetu naJehova asi mulyo. Nkedi zimwe omu natu yi likida asi elikwatakano lyetu naJehova mulyo, kuna kara pokuuyunga nendi kupitira mekanderero.

14. Ngapi omu kukanderera a ku tu vatere tu dive Karunga?

¹⁴ Kuuyunga kumwe, kuninkisa ukaume wopokatji kovantu u nkondopare. Yipo nye, uyunga kumwe naJehova kupitira mekanderero ntani mu tantera omu ono kulizuvha ntani neyi ono kugazara. (Efe. 6:18) Krista ogu ga tunga moTurkey kwa tanta asi: “Nkenye apa ani tantere Jehova eyi nina kugazara ntani apa ani dimburura omu ana kulimburura makanderero gange, ayo kuninkisa nge ni mu hare unene nokumuhuguvara. Apa ani mono Jehova kuna kulimburura makanderero gange, ayo kuvatera nge ni tare Jehova ngaKaume gwange ntani ngwendi Otate.”

15. Ngapi omu Jehova ga tere hompa Ndafita?

¹⁵ Apa hompa Ndafita va mu hampurukire, vakurona vendi ntani sinzi sovantu ngava karere Jehova. Nye eyi kapisi yiyo ya ninkisire Ndafita a karere Jehova.  Age kwa tungire po mwene elikwatakano naJehova ntani Jehova kwa mu here unene. Jehova kwa tente asi Ndafita “mugara ga za nge komutjima.” (Yirug. 13:22) Yisinke ya ninkisire Ndafita a kare nelikwatakano lyenene naJehova?

16. Yisinke ga dimbwilire Ndafita kuhamena Jehova apa nga tara kounsitwe?

¹⁶ Ndafita kwa lirongere kuhamena Jehova kupitira mounsitwe. Apa Ndafita ga kere munona, age nga lisa nonzwi doguhwe. Age nampo kwa ruganesere siruwo oso, yipo a gazadare ko koyininke eyi ga sita Jehova. Pasihonena, apa nga tara keguru masiku, age nga mono nombungururu dononzi. Nye age kapi tupu ga mwene nombungururu, nye ga dimbwilire hena yikara yoyiwa yogu ga di sita. Ndafita kwa tjenge asi: “Eguru kusanseka efumano lyaKarunga, ano mbando zeguru kuudisa yirugana yomawoko gendi!” (Epis. 19:1, 2) Apa Ndafita ga gazadarere ko kuhamena omu Jehova ga sita vantu, age ga dimbwilire unongo waJehova. (Epis. 139:14) Ngomu Ndafita ga dimbwilire yininke eyi ga sita Jehova, ayo kwa mu ninkisire a linunupike.—Epis. 139:6.

17. Yisinke ngatu dimburura nsene tu teda ko kounsitwe?

¹⁷ Yisinke natu lirongera ko? Hafera unsitwe. Litulira po siruwo yipo o tare uzuni wouwa ou ga sita Jehova. Teda ko nkenye ezuva koyininke eyi ya ku kundurukida, ngwendi yimeno, yikorama ntani vantu yipo o dive eyi yina kukuronga kuhamena Jehova. Nsene o yirugana, ove ngo lironga yininke yokulisiga-siga nkenye ezuva kuhamena Guhyetu geharo. (Rom. 1:20) Ntani ove ngo hara Jehova unene nkenye ezuva.

18. Kuliza nEpisarome 18, yisinke ga dimbwilire Ndafita?

¹⁸ Ndafita ga yi dimbwilire asi Jehova kwa mu vaterere. Pasihonena, apa Ndafita ga poperere nzwi zoguhwe kwanyime nekerundu, age ga yi dimbwilire asi Jehova yige ga mu vaterere a dipage yikorama oyo yononkondo. Apa Ndafita ga dipagere Golyata mugara getundusika, age ga yi divire asi Jehova yige ga mu vaterere. (1 Sam. 17:37) Ntani apa ngayi mu tompoka kutjwayuka hompa Sauru ogu nga mu fire mfudu, age ga yi dimbwilire asi Jehova yige ga mu poperere. (Epis. 18:1) Ngano Ndafita ga linenepekere, age ngano ga uyungire asi yininke nayinye oyo kwa yi rugene mononkondo damwene. Nye Ndafita kwa linunupikire, ano eyi kwa mu ninkisire a dimburure asi Jehova kwa mu poperere meparu lyendi.—Epis. 138:6.

19. Yisinke natu lirongera ko kosihonena saNdafita?

¹⁹ Yisinke natu lirongera ko? Twa hepa kurugana ko yuma kupitakana tupu kuhundira Jehova a tu vatere. Twa hepa hena kudimburura omu Jehova a tu vatere ntani nosiruwo esi a yi rugana. Nsene twa li nunupika, ose ngatu kwata egano asi kapi tatu vhuru kurugana yininke nayinye ntani ngatu kwata egano asi Jehova yige atu vatere tu rugane eyi atu dili kuvhura kurugana. Apa ngatu dimburura omu Jehova ana kutuvatera, ayo ngayi nkondopeka elikwatakano lyetu nage. Munazinyetu Isaac gomoFiji ogu ga karera Jehova siruwo sosire ga limonena usili womononkango edi. Age kwa tanta asi: “Apa ani gazadara kuhamena eparu lyange, ame kudimburura omu Jehova ga vatera nge kutunda tupu apa na tamekere kulironga Bibeli. Ayo kuvatera nge ni mu hare unene.”   

20. Yisinke natu lirongera ko kelikwatakano eli ga kere nalyo Ndafita kumwe naJehova?

 ²⁰ Ndafita kwa honenene yikara yaJehova. Jehova kwa sita vantu nevhuliko lyokuvhura kuhonena yikara yendi. (Gen. 1:26) Nsene tu lironga kuhamena yikara yendi, ayo ngayi tu tumangeda tu mu honene. Ndafita kwa divire nawa Jehova, eyi yiyo ya mu ninkisire a honene Jehova monkedi omu nga tekura vantu wopeke. Koneka sihonena simwe. Ndafita kwa zonene kwaJehova apa ga honderere naBateseba ntani nokudipaga mugara gwendi. (2 Sam. 11:1-4, 15) Nye Jehova kwa likidire nkenda kwa Ndafita, morwa Ndafita nga likida nkenda kovakwawo. Mokumona asi Ndafita ga kere nelikwatakano lyewa naJehova, eyi kwa ninkisire Vaisraeli va mu hare ntani Jehova kwa mu ruganesere a kare sihonena kovahompa ava va kweme ko moIsraeli.—1 Vah. 15:11; 2 Vah. 14:1-3.

21. Kuliza noVaefeso 4:24 ntani 5:2, yisinke ngayi tu horokera nsene tu ‘kara moomu ga kara’ Karunga?

²¹ Yisinke natu lirongera ko? Twa hepa kuheteka “kukara moomu ga kara” Karunga. Nsene tu yi rugana, ose ngatu gwanena mo mauwa ntani ngayi tu vatera tu mu dive. Nsene tu honena yikara yaKarunga, ose ngatu likida asi tu vana vendi.—Resa Vaefeso 4:24; 5:1, 2.

22-23. Yisinke ngayi horoka nsene tu tura pasirugana eyi tuna kulironga kuhamena Jehova?

²² Ngomu tuna yi lirongo, kuvhura tu lironge kuhamena Jehova kupitira mounsitwe ntani moNonkango dendi Bibeli. MoBibeli kwa kara mo yihonena yoyinzi yovakareli vaJehova wovalimburukwi ava natu vhura kuhonena, ngwendi Mosesa ntani naNdafita. Jehova ga rugana ko ruha rwendi. Nose twa hepa kurugana ko yuma nokulironga unene kumuhamena.   

²³ Ose kapi ngatu hageka kulironga kuhamena Jehova. (Muud. 3:11) Nye somulyo po kapisi yininke yokuhura kupi twa lironga, nye eyi tuna kuruganesa eyi twa lironga. Nsene tu tura pasirugana eyi tuna kulironga nokuhonena Guhyetu gemeguru geharo, age nga twikira kutuhedera pepi. (Jak. 4:8) Jehova kwa tu tumbwidira kupitira moNonkango dendi asi age kapi nga zumba ava vana hara kumudiva nawa.