Hawe, kapisi yiyo za tamba velise ezi. Nye azo kwa tamba komuntu ogu a ligwanekere nomaudigu nkenye apa, nye age ta ga lididimikire.

Tu konakoneni tanko velise 15 ntani 17 zoYisewe 24, ado kutanta asi: “Wa ha fana ngwendi mudinikarunga ogu a gazara kuhokora muhungami ndi kumugusa embo lyendi. Kutupu mbudi muhungami nampili a punduke, yeeyi age kupinduka narunye; nye yihuna kuhanagura po mudinikarunga. Walye o hafa nsene nkore zoge zina kara noudigu, ove hena walye o hafa nsene ana punduka.”—Yis. 24:15-17.

Vantu vamwe kugazara asi velise 16 kwa tamba komuntu ogu a tura nonzo nye ta litezurura nokukara nelikwatakano lyewa naJehova. Vampitisili womaukarelikarunga vavali womoBritania kwa tjanga asi “vazuvhisi vanare ntani vanaina, yimo ava zi faturura velise ozo.” Awo kwa gweda ko asi “muntu gomuwa kuvhura a ture . . . nonzo dononene, nye simpe kapi ta hageke kuhara Karunga ntani age kuvhura kulitezurura nkenye apa a tura nonzo.” Egano eli kuvhura kuhafesa muntu ogu ga hara kuzonena mowina. Morwa age ta gazara asi nampili a zone ngapi, Karunga nga mu gusira po.

Nye oyo kapisi yiyo za tamba velise 16.

Nkango zoRuhebeli va toroka “kupunduka” va ruganesa movelise 16 ntani 17 kuvhura kuziruganesa momarupe gokulisiga-siga. * Kuvhura kutamba kokugwa kwene-kwene ndi kongombe za mbwakama monzira ndi komuntu ana liganda keguru lyonzugo. (Deut. 22:4, 8) Nye nkango ozo kuvhura hena kutanta yapeke nsene kuna kuziruganesa pasifanekeso. Ngwendi asi: “HOMPA kudimbwilira muntu nzira ezi na genda. Age ta mu gendesa ezi ga hara. Nsene a gwa nokugwililira po si, yeeyi HOMPA ta mu kwata kokuwoko.”—Epis. 37:23, 24; Yis. 11:5; 13:17.

Konekeni eyi ga uyungire Profesora Edward H. Plumptre asi: “Nkango zoRuhebeli [“kugwa”] kapi ngava zi ruganesa mokutamba kokutura nzo.” Mulirongi gumwe hena kwa faturura velise 16 asi: “Ayo kwato eyi nayi kwafa mokuhepeka vantu vaKarunga morwa awo nkenye apa ngayi va tompoka, nye vadinikarunga kapi ngayi va tompoka!”

Yipo nye, Yisewe 24:16 kapi azi tamba komuntu ogu a tura nonzo nye kwa tamba komuntu ogu a ligwanekere nomaudigu nkenye apa. Mouzuni ou woudona muntu gomuhungami kuvhura a kare nouvera ndi nomaudigu gapeke. Ntani kuvhura mapangero ga mu hepeke morwa epuro lyendi. Nye age kuhuguvara mwaKarunga a mu vatere ano ayo ngayi mu vatera a lididimikire ntani yi mu tompoke. Gazara tupu vakareli vaKarunga ava wa mona omu yina kuvatompoka. Morwasinke? Morwa twa yi diva asi “Jehova kukwafa navenye ava ava kara moudigu; age kuzerura ava va nunupa.”—Epis. 41:1-3; 145:14-19.

“Muhungami” kapi a hafa apa vamwe ava ligwanekere nomaudigu. Nye age kumuhengagwida morwa ga diva asi ‘nsene a limburukwa kwaKarunga, nayinye tayi mu gendi monaruwa.’—Muud. 8:11-13; Joba 31:3-6; Epis. 27:5, 6.