Yikara eyi ga lirongere Jesus apa ga kere meguru kwa ya mu vaterere a ya kare sihonena sosiwa, kwava ga ya rugene kumwe nawo pevhu. Ngapi natu gwanena mo uwa mosihonena saJesus? Pokukonakona sihonena sendi, ose kuvhura kulirongera ko nompango ntatu edi nadi tu vatera tu kare varugani wovawa kumwe novakwetetu. Nompango edi nadi ka tu vatera yipo tu ruganene mouumwe kumwe novanavazinyetu.

Murugani gomuwa kwa linunupika, age kutara varugani vakwawo asi mulyo ntani kapi a hetekere ko kurugana yuma yipo a lihafese tupu mwene. Jesus kwa lirongere nkareso ozo zokulinunupika koGuhwe. Nampili ngomu Jehova ga kara Musiti, age kwa here vantu va dive yirugana yomulyo eyi ga rugana Munendi. Ose kuyikwata egano oyo mononkango edi ga uyungire Karunga asi: “Ntaantani tatu ungeni po nye vantu.” (Gen. 1:26) Apa Jehova ga uyungire nonkango odo, Jesus ga yi divire asi Jehova ga linunupika.—Epis. 18:35.

Apa Jesus ga kere pevhu, nage nga linunupike. Apa vantu ngava gava efumano kwaJesus kweyi nga rugana, age nga gava efumano olyo koGuhwe. (Mar. 10:17, 18; Joh. 7:15, 16) Jesus nga rugana paapa ga hulira mokukara nombili novarongwa vendi noku va tekura ngovakaume vendi, nye kapisi ngovakareli. (Joh. 15:15) Age hena kwa kuhwire nompadi dovarongwa vendi, yipo ava ronge sikara selinunupiko. (Joh. 13:5, 12-14) Nose  kurugana yokulifana pokutara varugani vakwetu asi mulyo kupitakana kutura muhowo eyi twa hara. Nose kuvhura kurugana yoyinzi, pokufumadeka vakwetu ntani nokunyokera po kukara nkenye apa nefumano.—Rom. 12:10.

Muntu ogu ga linunupika kuyikwata egano asi ‘ga hepa kutambura mapukururo nagenye.’ (Yis. 15:22) Yikare asi ediwo lyokuhura kupi twa kara nalyo ndi yininke eyi a tu rugana, twa hepa kudiworoka asi kwato muntu ogu ga diva yininke nayinye. Nampili Jesus nage ga yi tambwire asi koyili yininke eyi ga dira kudiva. (Mat. 24:36) Age hena ga here kudiva magano govarongwa vendi wokudira kusikilira mo. (Mat. 16:13-16) Eyi kwa ninkisire varugani vakwawo va lizuvhe nawa apa ngava kara nage! Mokulifana, apa atu linunupike ntani nokudiworoka asi ose kapi twa diva yininke nayinye ntani nokupurakena komagano govakwetetu, ose ngatu tulisa po mbili nawo ntani ngatu ‘tambura mapukururo nagenye.’

Ayo ya kara nomulyo unene kovakuronambunga va honene elinunupiko lyaJesus, ngomu vana kuruganena kumwe. Awo va hepa kudiworoka asi mpepo zokupongoka kuvhura kutumangeda nkenye mukuronambunga mokuuyunga magano aga naga va vatera va ture po matokoro gomawa. Nsene vakuronambunga va divilisa asi nkenye gumwe ana kara nemanguruko lyokugava magano gendi momapongo gawo, awo ngava tulisa po matokoro aga ngaga vatera mbungakriste.

Murugani gomuwa kukara nonkenda apa a rugana novakwawo. Age kurugana nawa novakwawo ntani kutambura magano gawo. Poyiruwo yimwe Jesus nga mono oGuhwe omu vana kulikida ufenkenda wawo. Pasihonena, Jehova kwa tumine Jesus yipo aya zowore vantu konomfa edi dava tumbukilire.—Joh. 3:16.

Jesus nga purakene komagano govakwawo apa ngayi kara hepero. Diworokeni omu Jesus ga vaterere mukadi gomoFonisiya, nampili ngomu Karunga ga mu tumine aya vatere tupu Vaisraeli. (Mat. 15:22-28) Jesus kwa kere hena noufenkenda pokudira kundindira ko yoyinzi kovarongwa vendi. Konyima zapa kaume kendi gomunene Peturusa ga mu patanene moyitaremenho yovantu, Jesus kwa liwapayikilire kumugusira po. Konyima, Jesus kwa ya pere Peturusa yitumbukira yomulyo. (Ruk. 22:32; Joh. 21:17; Yirug. 2:14; 8:14-17; 10:44, 45) Sihonena saJesus kulikida nawa-nawa asi “Ufenkenda [wetu] au moneke kovantu navenye.”—Fil. 4:5.

 Kukara noufenkenda ngayi tu tumangeda tu rugane kumwe mombili novantu wokulisiga-siga. Jesus nga tekura nawa vantu ava nga kara nawo, ano eyi kwa ninkisire nonkore edi nga di mufire mfudu di uyunge asi: “age kwa likwata ukwawo novafutisi womutero novananzo.” (Mat. 11:19) Ngwendi Jesus, nose kuvhura yi tu tompoke kuruganena kumwe novakwetetu ndi? Munazinyetu gomugara Louis ogu ga kere mutareli gonombunga ntani nga rugana koBeteli kumwe novantu wokulisiga-siga kwa tanta asi: “Kuruganena kumwe novakwetetu wokudira kusikilira mo kwa lifana nekuma eli vana kutunga nomamanya gokulisiga mounene. Morwa mamanya ogo ga lisiga, apo ngapa hepa elituromo lyenene mokuninka ekuma olyo livyukilire. Ame na hetekera ko kutura po malitjindjo mokuruganena mombili kumwe novakwetetu yipo yirugana yi tu tompoke.” Ozo kuna kara nkareso zongwa!

Poyiruwo musinke natu vhura kuruganena kumwe nombungakriste zetu? Ose twa kara nompito zokuyirugana ngoso, apa a tu kara motumbunga twetu tomoyirugana yomokuzuvhisa. Ose kuvhura tu rugane novazuvhisi ava kara noyitumbukira yokulisiga-siga mepata kupitakana eyi a tu rugana ndi vazuvhisi wonomvhura dokulisiga-siga. Ose kuvhura tu tjindje omu a tu rugana yininke ndi tu lihameke mononkedi dokulisiga-siga domokuzuvhisa, yipo ava tuna kurugana nawo va hafere kuzuvhisa.

Murugani gomuwa ‘kwa kara nougavi.’ (1 Tim. 6:18) Apa Jesus nga rugana noGuhwe, age ga dimbwilire asi awo kapi va mu horokerere yininke. Apa Jehova “ga tulire po eguru pevega lyalyo,” Jesus ‘yipo ga kere’ ntani age ga vhulire kulirongera ko koGuhwe. (Yis. 8:27) Konyima, Jesus kwa tanterere ko varongwa vendi ‘nayinye eyi ga zuvha’ koGuhwe. (Joh. 15:15) Ose kuvhura kuhonena sihonena saJehova, pokutantera ko vanavazinyetu udivi ou twa kara nawo ntani eyi twa li gwanekera nayo. Murugani gomuwa kapi a hetekere ko kupangera vakwawo pokudira kuvatantera eyi va hepa kudiva ntani neyi nayi va vatera. Age kuhafera kutantera ko wopeke eyi ga lironga.

Ose hena kuvhura kukorangeda varugani vakwetu. Ayo kutuhafesa apa gumwe a dimburura elituromo lyetu ntani noku tu pandura koyirugana eyi atu rugana. Jesus kwa li tulilire po siruwo sokutantera varugani vakwawo yikara yoyiwa eyi ga mwene mwawo. (Hetakanesa Mateusa 25:19-23; Rukasa 10:17-20.) Age hena kwa va tanterere asi ‘ngava rugana kupitakana eyi ga rugana.’ (Joh. 14:12) Mesiku lyendi lyokuhulilira komeho va ka mu dipage, Jesus kwa tanterere vapositoli vendi wovalimburukwi asi: “One nyone mwa kara name momaudigu gange.” (Ruk. 22:28) Gazadareni ko tupu omu nonkango odo da gumine nomutjima dovapositoli vendi ntani neyi dava tumangedere va rugane! Nsene tu li tulira po siruwo sokukorangeda ava a tu rugana nawo, awo ngava hafa ntani ngava rugana yoyinzi.

Munazinyetu gomugara Kayode kwa tanta asi: “Murugani gomuwa kapi ga hepa kusikilira mo, nye age kuhafesa ava a rugana nawo nokurerupika yirugana yawo.” Ove murugani gokufana ngoso ndi? Ove kuvhura kupura vanavazinyetu kuhamena omu ava kutara asi ove murugani musinke. Nsene asi awo kuhafera kurugana kumwe nove ngwendi moomu varongwa vaJesus ngava hafere kurugana kumwe nage, ove kuvhura kuuyunga ngwendi mupositoli Paurusa ogu ga uyungire asi: “Ose varugani kumwe none yipo mu hafe.”—2 Kol. 1:24.