Ame kwa hampuruka nge mo-1927 moAmerika. Ose kwa tu reta tuvatano. Nyame, naJetha, Don, Karl, ntani Joy. Natuvenye kwa tokomenene kukarera Jehova. Mo-1943 Jetha yipo ga zire kosikora zauvali zaGiliyata. Ano mo 1944 Don yipo ga zire moBeteli zomoBrooklyn, New York ntani mo-1947 Karl nage yipo ga zire moBeteli, Joy nage kwa zire moBeteli mo-1951. Sihonena sawo nesi sovakurona vange kwa korangedere nge ni ruganene Jehova unene.

Otate noyina kwa here unene Karunga ntani ngava resa Bibeli. Awo kwa tu vaterere nose tu hare Karunga. Apa otate vakere vakwayita mo Europa posiruwo soyita yokuhova youzuni mudima awo kwa hagekere kuza kongereka. Oyina kwa hefe apa otate va ka tengwire kembo awo vazuni, makura oyina tava tantere otate asi: “Karl, tu ze kongereka ngwendi moomu ngatu zi nare.” Otate tava limburura asi: “Tani ku sindikire ko tupu nye kapi nani ka wilira.” Makura oyina yipo va pulire otate asi: “Morwa sinke?” Otate tava limburura asi: “Posiruwo soyita, vapitisili woukareli Karunga kwa tungikire vakwayita vawo yipo yi ka va tompoke kukarwa moyita. Ngoso Karunga kwa kwatesere ko vakwayita navenye ava va lirwanesere ndi?”

Apa oyina va zire kongereka, vagara vavali woNombangi daJehova kwa wizire pembo lyetu, makura yipo vapere otate nobuke mbali edi ava tambura asi Light, edi adi zogere kuhamena Buke zEhororo. Otate kwa yi haferere, yipo va tambwire nobuke odo. Apa vaya di mwene oyina, nawo yipo va resere mo. Ezuva limwe, oyina kwa resere mosaitunga asi Nombangi daJehova kuna kuzigida vantu yipo va lironge nawo Bibeli pokuruganesa nobuke Light. Oyina yipo va zire, apa va ka sikire tava gwana mukadi gomukurupe ana kwaterere buke ozo. Oyina yipo va mu pulire asi: “Yipo muna kulirongera novantu buke ezi ndi?” Mukurupe ogo ta limburura asi: “Nhi, kuvhura mu wilire tupu.” Sivike sa kwemeko, oyina kwa zire nose, ano kutunda opo ose ngatu zi ko nkenye sivike.

 Apa twa kere mepongo, munazinyetu kwa pulire nge ni rese Episarome 144:15 eli ali tanta asi vantu woruhafo vaava ava karere Jehova. Ame kwa here unene etjangwa olyo ntani 1 Timoteusa 1:11, eli ali tanta asi Jehova “Karunga goruhafo.” Ntani ame kwa here hena Vaefeso 5:1, eli ali tu korangeda tu ‘honene Karunga.’ Ame nayi dimbwilire asi na hepere kukarera Musiti gwange ntani noku mu pandura nkenye apa. Eyi kuna kara yininke eyi na hepere kurugana nkenye ezuva.

Mbungakriste kwa kere nokilometa dokusika po 32 pepi na Chicago. Nye nampili ngoso, ose nkenye apa ngatu zi komapongo ntani naya divire yoyinzi kuhamena Bibeli. Tani diworoka sikando simwe apa mupitisili ga pulire Jetha a limburure mepongo. Apa na purakenene kelimbururo lyendi, ame kwa gazarere asi yilyo elimbururo hambara ni gave, ngano na zerwire kuwoko ni limburure, makura yipo na tamekere kuliwapaikira malimbururo mononkango da nyamwange. Nye yomulyo po, ame kwa tulire po ezokomeho novambya vange ntani novakuru vange. Ame kwa gwene ekuho mo 1941.

Tani diworoka apa twa kere nosigongi mo-1942 moCleveland, Ohio. Epata lyetu kwa kere monotende novanavazinyetu wokulisiga-siga pepi nevango apa sa karere sigongi. Vanavazinyetu wokupitakana po-50 ava vakere monodoropa kwa purakenene kelikwamo kupitira konoterefona, posiruwo esi ya kere Yita yaUvali yoUzuni mudima ntani Nombangi daJehova kwa di hepekere unene. Posiruwo somasiku, ame kwa mwene vanavazinyetu vana pirukidisa matuwa oku nava vhura kutundilira vantu ava nava hara kutuhomokera. Mwa nkenye etuwa kwa tulire mo munazinyetu ogu na vhura kutakamesa masiku nagenye. Nsene pa horoka yininke yoyidona, vanavazinyetu tava pembesa nokutemesa noramba detuwa va minikire ava vana hara kutuhomokera, makura vanavazinyetu va gwene mpito zoku duka va ya tu popere. Vantu vaJehova kwa liwapaikilire nayinye. Kwato yoyidona ya horokere morwa ame kwa lizuvhire epopero ntani kwa ponyokere po nawa.

Konyima zomvhura zimwe, ame kwa yi dimbwilire asi apa twa kere posigongi sina, oyina kapi va kere nosinka ndi va tjire nkenye eyi. Nye awo kwa huguvarere unene mwaJehova nombuga zendi. Ame kapi ngani divara sihonena sawo sosiwa.

Komeho tu kare nosigongi, oyina yipo va kere muzuvhisi gokukarerera. Awo kwa didilikire yitwa yomulyo eyi va uyungire posigongi kuhamena sirugana sosiruwo nasinye. Apa twa zire kembo, oyina kwa uyungire asi: “Ame nina hara kutwikira uzuvhisi wokukarera, nye kapi tani yi sikisa mo nsene ni pakera hena mbili embo lyetu.” Oyina kwa tu pulire nsene kuvhura tu va vatere. Yipo twa va tanterere asi nawa tupu. Makura yipo va tu pere nkenye ogu nzugo zimwe ndi mbali ezi na vhura kuzeresa komeho zokulya. Komeho tu ze kosure, azo nzugo za zere, ano oyina ngava tara mo va divilise nsene nzugo nazinye zi na zere ntani nava za mokuzuvhisa. Oyina ngava rugana unene ntani kapi va tu sigilire. Oyina ngava kara nose nkenye apa nsene tuna ka tunda kosure ndi nsene kuna kulya muzuhwa. Mazuva gamwe nsene tuna ka tunda kosure, ose nga tu zi noyina mokuzuvhisa, eyi kwa tu vaterere tu kwate egano uzuvhisi wokukarerera.

Ame kwa tamekere uzuvhisi wokukarerera apa nakere nonomvhura 16. Nampili ngomu otate va dilire kukara Mbangi zaJehova posiruwo sina, awo kwa hefe kweyi nali tulire mo mokuzuvhisa. Sikando simwe masiku, ame kwa tanterere otate asi nampili ngomu na kurugana unene mokuzuvhisa nye simpe kapi na gwana muntu ogu ana hara kulironga Bibeli. Yipo na pulire otate asi: “Muna hara kulironga name Bibeli ndi?” Otate kwa gazadarere ko nakauke, makura yipo va yi tambwire asi tava lirongo name Bibeli. Otate kwa kere muntu gokuhova ogu na lirongere nage Bibeli. Ayo kwa hafesere nge sili unene.

Ose kwa lirongere buke “The Truth Shall Make You Free.” Ngomu twa lirongere, otate kwa vaterere nge ni kare murongi gomuwa. Pasihonena, konyima zokuresa paragarafu, otate kwa uyungire asi: “Nina kwata egano eyi dina kuuyunga nobuke, nye ngapi ono yidiva asi eyi va tjanga monobuke edi usili?” Yipo na va tanterere asi: “Kapi tani vhuru kumulimburura ngesi, nye apa ngatu ya lironga sikando sokukwama ko, kuvhura ngani ya limburure epuro olyo.” Ame na gwene etjangwa eli lya kwatesere ko sitwa esi twa lirongere. Kutunda opo ame ngani lirongo omu nani liwapaikira nawa ntani omu nani rugana epaparo. Ano eyi kwa vaterere nge ni dive nawa Bibeli zange ntani ya vaterere hena otate. Awo kwa tulire pasirugana eyi ngava lirongo ntani vagwene ekuho mo-1952.

Ame kwa sigire embo lyetu apa na kere nonomvhura 17. Jetha kwa kere mutumwa, ano Don kwa zire moBeteli. Navenye kwa here sirugana sawo, eyi kwa korangedere nge unene. Yipo na tulire mo ehundiro lyokuza koBeteli ntani koSikora zaGiliyata. makura yipo nayi sigire momawoko ga Jehova. Ame kwa zire moBeteli mo-1946.

Mwaza nomvhura ame kwa kere noyitumbukira yokulisiga-siga moBeteli nokulironga yininke yoyipe. Apa na kere nonomvhura 75 moBeteli, vanavazinyetu kwa rongere nge omu ava nduruka nobuke nomu ava varura yimaliwa. Ame kwa lirongere kurandanga yininke yomoBeteli ntani omu ava tumu yininke yomulyo komavango gokulisiga-siga. Ame ngani hafere erongo lyoBibeli eli ngava gava poukareli wongura ngura ntani yiuyungwa eyi ngava gava moBeteli.

Ame kwa lirongerere ko hena kwa mumbyange gomugara Karl ogu ga wizire moBeteli mo-1947. Age kwa kere murongwa ntani murongi gomuwa goBibeli. Age kwa vaterere nge omu nani liwapaikira siuyungwa esi va pere nge. Ame kwa tanterere Karl asi mauzera manzi nakara nago, nye kapi na diva asi ngapi nani ga ruganesa. Karl yipo ga pulire nge asi: “Joel, Sipiso siparatjangwa sosiuyungwa soge?” Yipo na kwete egano eyi ga tembe. Na hepere tupu kuruganesa mauzera aga ga faturura siparatjangwa sosiuyungwa sange ntani nokudira  kutura mo mauzera nagenye aga gana kara mosiuyungwa. Ame kapi na divarere eyi ga rongere nge.

Mokukara noruhafo moBeteli, twa hepa kulihameka nkenye apa mosirugana sokuzuvhisa ntani ngayi tu hengagwida unene. Tani diworoka sihorokwa simwe esi sa horokere moAmerika masiku. Name namunazinyetu gomugara kwa zire tuka dingure mukadi ogu ga tambwire sifo soRuhungu ntani Awake. Ose kwa mu tanterere asi: “Kongurova ezi ose kuna ku zogera novantu kuhamena makorangedo aga ga kara moBibeli.” Mukadi ogo yipo ga limbwilire asi: “Nsene munahara kuzogera yokuhamena Bibeli, kuvhura mu hwilire.” Ose kwa resere nokuzogera matjangwa gamwe aga ga uyunga kuhamena Uhompa waKarunga ntani Paradisa. Age kwa hefe sili unene makura yipo ga tantere ko vakaume vendi va ya kare po pelirongo lyendi lyoBibeli sikando sokukwama ko. Nage nepata lyendi kwa ya karera Jehova noulimburukwi.

Ame kwa paparere mulikwali hambara nomvhura murongo komeho ni ya ligwane namukadange. Yimwe eyi ya vaterere nge ni gwane mukadi gokuwapera kuna kara kukanderera kwaJehova nokugazadara ko eyi ngani rugana namukadange konyima zokulikwara.

Posigongi esi sa kere mo-1953 moYankee Stadium, yipo na ligwene namunazinyetu gomukadi Mary Aniol. Munazinyetu ogo kwa kere kumwe naJetha moSikora zauvali zaGiliyata ntani awo kwa kere vatumwa momukunda gumwe tupu. Mary kwa simwitilire nge kuhamena sirugana sendi soutumwa moCaribbean ntani malirongo goBibeli aga ga rugene. Ngomu twa ya lidivire nawa, ose kwa yi dimbwilire asi twa kere noyitambo yokulilfana. Ose kwa lihere unene ntani kwa likwere mwaKudumogona 1955. Monomvhura dononzi, Mary kwa yi likidire asi age kwa kere uhwi ou wa tundire kwaJehova ntani kwa kere gosihonena sosiwa. Age kwa haferere nkenye situmbukira va mu pere ntani nga rugana unene nokuvatera wopeke. Age kwa tulire Uhompa muhowo. (Mat. 6:33) Ose kwa rugene kumwe mosirugana soutareli nomvhura ntatu, ano mo-1958 yipo twa zire koBeteli ngovalikwali.

Yininke yinzi na lirongerereko kwa Mary. Pasihonena, ketamekero lyononkwara detu, ose kwa tokwere kuresa kumwe Bibeli. Nkenye ezuva ngatu resa novelise 15. Ano konyima zokuresa novelise dongandi, nkenye gumwe nga uyunga eyi ana lirongere ko ntani natu zogera natuvenye omu natu yi tura pasirugana. Rorunzi Mary nga tantere nge eyi ga lirongere koGiliyata ntani eyi ga lirongere apa ga kere mutumwa. Yininke eyi na lirongerereko kwendi kwa vaterere nge ni liwapaikire nawa yiuyungwa ntani omu nani korangeda vanavazinyetu wovakadi.​—Yis. 25:11.

Mukadange kwa dogorokere mo-2013. Ame kuna kundindira ngani kalimone nage mouzuni woupe. Posiruwo esi, nina tokomene kuhuguvara unene mwaJehova. (Yis. 3:5, 6) Apa ani gazadara ko eyi vantu vaJehova nga va ka rugana mouzuni woupe, ayo kuhafesa nge nokuhengagwida nge. Ose ngatu ka lironga yininke yoyipe ntani nokuka diva momunene Murongi gwetu goMunene Jehova! Yimo, kapi tani vhuru ku mu pandura koyininke nayinye eyi ga ronga nge ntani nonkenda ezi ga likidange.