1. Ngapi omu mboroto za kere nomulyo kovantu ava va tumbura moBibeli?

 MBOROTO kwa kere nondya dankenye ezuva kovantu ava va tumbura moBibeli. (Gen. 14:18; Ruk. 4:4) “Mboroto” kwa kere nomulyo unene, yipo nye Bibeli poyiruwo yimwe kutumbura mboroto pokutamba konondya edi atu li. (Mat. 6:11; Yirug. 20:7) Jesus kwa ruganesere mboroto moyitetu yendi yivali. (Mat. 16:9, 10) Ose kuresa simwe soyihorokwa oyo mwaJohanesa egaununo 6 ntani kuvhura tu lirongere ko ngomu natu ka yi zogera.

2. Moukaro musinke vantu va hepere nondya?

² Apa vapositoli vaJesus va mene kuzuvhisa, Jesus kwa rondere nawo mowato yipo va rute efuta lyaGalireya va ka pwizumuke po. (Mar. 6:7, 30-32; Ruk. 9:10) Awo kwa zire kevega lya hana vantu kositata saBetesaida. Poopo ngoso vantu wovanzi tava wiza noku mu kundurukida, nye Jesus kapi ga va sigilire. Age kwa va rongere kuhamena Uhompa noku verura vaveli. Ngomu lya tokere ezuva, varongwa vaJesus kwa li pulire omu vantu nava gwana nondya. Vamwe nampo kwa kere nonondya dononsesu, nye sinzi sawo va hepere kuza konomukunda dopopepi, va ka lirandere nondya. (Mat. 14:15; Joh. 6:4, 5) Yisinke ga rugene Jesus?

JESUS KWA GEVE MBOROTO PASITETU

3. Yisinke Jesus ga tanterere vapositoli vendi nava ruganena mbunga zovantu? (Tara hena efano lyopontunda.)

³ Jesus kwa tanterere vapositoli vendi asi: “Kapi va hepa  kuza, nyone nomu va pa nondya.” (Matt. 14:16) Eyi kwa monekere ngwendi udigu morwa pwa kere vagara wokusika po-5 000. Ano kugwederera ko vakadi novanona nampo pwa kere vantu wokusika po-15 000 ava va hepere nondya. (Mat. 14:21) Andiliyasa kwa uyungire asi: “Pweli mumatigona ana kara apa, age kuna kara nonomboroto ntano doyilya ntani notumfi tuvali. Nye yisinke nye nayi kwafa vantu wokuhura apa?” (Joh. 6:9) Mboroto zoyilya ngava zi li vantu woruhepo ntani navamwe, ano kotumfi nampo ngava tura ko mungwa ntani noku tu zaneka. Nye nondya edi ga kere nado mumati gwina, ngano kapi va di gwanekere vantu wovanzi.

4. Yisinke natu lirongera ko ketjangwa lyaJohanesa 6:11-13? (Tara hena mafano.)

⁴ Jesus kwa here kupakera mbili mbunga zina, makura yipo ga va tanterere va hingire motumbunga powayi. (Mar. 6:39, 40; resa Johanesa 6:11-13.) Jesus kwa pandwire oGuhwe komboroto nonomfi. Pokuyirugana oyo, age kwa yilikidire asi nondya kwa tundire koGuhwe. Ayo yakara nomulyo kwetu tu honene Jesus pokukanderera komeho tu lye, yi kare asi nyoselike tuna kara ndi novakwetu. Jesus kwa tanterere vapositoli vendi va gavere nondya, ano vantu kwa lire dogoro tava kuta. Jesus kapi ga here kuhepeka nondya edi da hupire po, yipo ga va tanterere va di pongaike, yipo nampo va ya di ruganese konyima. Jesus kwa tu tulira po sihonena sosiwa pokuruganesa nawa yiweka yetu. Nsene wa kara novana, kuvhura o va ronge mulyo gokukanderera komeho zokulya, kutambura vagenda ntani kukara nougavi ngwendi Jesus.

5. Yisinke va here kurugana vantu apa va mwene eyi ga rugene Jesus ezuva lina, ntani yisinke eyi ga rugene Jesus?

 ⁵ Vantu kwa tetukire monkedi ezi Jesus nga rongo ntani nomu ga rugene yitetu. Vantu va yi divire asi Mosesa kwa uyungire asi Karunga nga tuma muporofete gomunene, ano eyi nampo ya va ninkisire va gazare asi ‘muporofete ogo kuna kara Jesus.’ (Deut. 18:15-18) Awo nampo kwa gazarere asi Jesus kwa kere mupangeli gomuwa ogu ngano na gava nondya komuhoko nagunye gwaIsraeli. Yipo nye, vantu kwa here ‘kusininika Jesus a kare hompa gwawo.’ (Joh. 6:14, 15) Ngano Jesus ga yi tambwire, age ngano ga li hamekere moupolitika woVajuda ou wa kere mepangero lyoVaroma. Yisinke ga rugene Jesus? Bibeli kuuyunga asi age ‘kwa zire kondundu.’ Nampili ngomu va mu sininikire age kapi ga li hamekere moupolitika. Esi kuna kara sirongwa sosiwa kwetu!

6. Ngapi natu honena Jesus? (Tara hena efano.)

⁶ Vantu kapi ngava tu pura tu ninke mboroto zi kare zonzi ndi tu va verure pasitetu ndi va tu pure tu kare hompa gwawo. Nye nampili ngoso, vantu kuvhura va tu pure tu li hameke moupolitika ndi tu kwatese ko gumwe ogu vana kugazara asi kuvhura a kare mupangeli gomuwa. Sihonena saJesus sayizeresa nawa nawa morwa age kapi ga lihamekere moupolitika. Ano konyima age kwa uyungire asi: “Uhompa wange kapi wa hamena kouzuni ou.” (Joh. 17:14; 18:36) Vakriste naina kuhonena  Jesus monkedi omu ava gazara neyi ava rugana. Ose kuzuvhisa mbudi zongwa nokukanderera asi Uhompa wendi u wize. (Mat. 6:10) Tu zogereni hena sitetu sina ga rugene Jesus ntani neyi natu lirongera ko.

EYI DA FANEKESERE NOMBOROTO

7. Yisinke ga rugene Jesus novapositoli vendi? (Johanesa 6:16-20)

⁷ Konyima zapa Jesus ga kutikire mbunga, age kwa tanterere vapositoli vendi va tengure koKaperenaumu nowato, nye age kwa tengwire kondundu yipo mbunga zi dire kumuninka a kare hompa. (Resa Johanesa 6:16-20.) Ngomu vapositoli va dugire wato, mpepo zonene kwa pepere ezi za ninkisire mankupi ga yerauke. Makura Jesus ta va zire age kuna kugenda pomema, yipo ga zigidire mupositoli Peturusa nage a gende pomema. (Mat. 14:22-31) Mpepo kwa litulire apa Jesus ga rondere mowato. Eyi kwa tetukisire varongwa vendi, makura yipo va uyungire asi: “Nani yosili ove MunwaKarunga.” a (Mat. 14:33) Nye simpe kapi va kwete egano sitetu sendi sokugenda pomema nesi sokukutika vantu wovanzi. Marukusa kwa uyungire asi: “[Vapositoli] kapi va kwete egano sitetu sonomboroto morwa nomutjima dawo kapi simpe da yi pulire.” (Mar. 6:50-52) Awo kapi va yi kwete egano asi Jehova yige ga pere Jesus nonkondo dokurugana yitetu. Kutunda opo, Jesus kwa uyungire hena kuhamena sitetu somboroto ntani neyi natu lirongera ko.

8-9. Morwasinke mbunga zovantu za paparere Jesus? (Johanesa 6:26, 27)

⁸ Mbunga zovantu ava ga kutikire Jesus kwa here yininke yopanyama. Monkedi musinke? Ezuva lyokukwama ko awo kwa ya dimbwilire asi Jesus novarongwa vendi vana zi. Apa mawato gamwe gokoTibeliyasa gaya sikire, mbunga zovantu kwa rondere mawato noku za koKaperenaumu va ka papare Jesus. (Joh. 6:22-24) Awo kwa yi rugene eyi morwa va here kudiva yoyinzi kuhamena Uhompa ndi? Hawe. Awo kwa here tupu Jesus ava pe mboroto zonzi. Ngapi tuna yi diva eyi?

⁹ Tu zogereni eyi ya horokere apa mbunga zovantu za ka gwene Jesus pepi naKaperenaumu. Jesus kwa va tanterere asi awo kwa mu kweme morwa kwa here nondya. Nampili ngomu va “lire nomboroto nokukuta” Jesus kwa uyungire asi ‘nondya edi kuzonauka.’ Age kwa va tanterere va ruganene nondya “edi adi gava mwenyo gwanarunye.” (Resa Johanesa 6:26, 27.) Jesus kwa uyungire asi oGuhwe yiwo ngava gava nondya dokudira kuzonauka. Eyi kwa tetukisire vantu apa va zuvhire asi kodili nondya edi ngadi va pa mwenyo gwanarunye. Nondya musinke odo ntani ngapi va vhulire kudigwana?

10. Yisinke va hepere “kurugana” vantu yipo va ka gwane mwenyo gwanarunye?

¹⁰ Vajuda owo nampo kwa here kudiva eyi nava rugana, yipo va gwane nondya odo. Awo nampo kwa gazarere eyi a zi tanta Veta zaMosesa kuhamena eyi nava “rugana.” Nye nampili ngoso Jesus kwa va tanterere asi: “Karunga kwa hara asi mu pure mogu ga tuma.” (Joh. 6:28, 29) Va hepere kupura mwaJesus yipo ngava “gwane mwenyo gwanarunye.” Nye nampili ngoso, Jesus nga yi va tantere. (Joh. 3:16-18, 36) Ntani poyiruwo yimwe nga va tantere eyi nava rugana yipo ngava ka gwane mwenyo gwanarunye.​—Joh. 17:3.

11. Ngapi omu Vajuda va yi likidire asi awo kwa here tupu kugwana nondya? (Episarome 78:24, 25)

¹¹ Vajuda kapi va yi tambwire asi va hepere kupura mwaJesus, makura yipo va mu  pulire asi: “Sidiviso musinke no tu likida tu si mone makura tu pure moge?” (Joh. 6:30) Awo kwa uyungire asi vantu womosiruwo saMosesa kwa gwene mana pasitetu ezi ngava li nkenye ezuva. (Neh. 9:15; resa Episarome 78:24, 25.) Yipo nye, sinka sawo kwa kere sokugwana tupu nondya. Apa Jesus ga uyungire kuhamena “mboroto zousili zemeguru” ezi za dilire kufana mana ezi nazi va pa mwenyo gwanarunye, awo kapi va mu pulire hena asi yinke ga tembe. (Joh. 6:32) Awo kapi va purakenene kweyi ga va rongere Jesus yipo ngava gwane mwenyo gwanarunye. Yisinke natu lirongera ko kosihorokwa esi?

YININKE EYI NATU TARA ASI MULYO UNENE KWETU

12. Ngapi ga yi likidire Jesus asi ayo mulyo unene kukara nelikwatakano lyewa naJehova?

¹² MwaJohanesa 6 ose kulirongere mo asi sininke somulyo po unene kuna kara kulimburukwa Jehova nokukara nelikwatakano lyewa nage. Apa Satana ga hetekere Jesus, Jesus kwa yi likidire asi kukara nelikwatakano lyewa naJehova mulyo unene kupitakana nondya dopanyama. (Mat. 4:3, 4) Jesus kwa rongere omu ya kara nomulyo kwetu kukara nelikwatakano lyewa naKarunga. (Mat. 5:3) Kuvhura tu lipure asi, ‘ame kutara elikwatakano lyange naJehova asi mulyo unene kupitakana yihepwa yange yopanyama ndi?’

13. (a) Morwasinke ya dilira kukara epuko kuhafera nondya? (b) Erondoro musinke ga geve Paurusa? (1 Vakolinte 10:6, 7, 11)

¹³ Kapi ya kara epuko kukanderera yihepwa yetu yopanyama noku yi hafera. (Ruk. 11:3) Bibeli kuuyunga asi ayo mulyo unene komuntu a hafere ‘kulya nokunwa eyi ga ruganena’ ntani ‘nayinye kwaKarunga ayi tundu.’ (Muud. 2:24; 8:15; Jak. 1:17) Nye nampili ngoso, yihepwa yopanyama kapisi yi kare nomulyo unene meparu lyetu. Kuvhura tu lirongere ko kweyi mupositoli Paurusa ga tjangerere Vakriste. Age kwa uyungire kuhamena yininke yoyidona eyi va rugene Vaisraeli apa va kere momburundu ntani apa va kere pepi noNdundu zaSinayi. Mupositoli Paurusa kwa rondwere Vakriste va dire ‘kudowokera yininke yoyidona ngwendi moomu va yi dowokerere’ Vaisreali. (Resa 1 Vakolinte 10:6, 7, 11.) Jehova kwa pere Vaisraeli nondya dopanyama pasitetu. Nye mokumona asi Vaisraeli kwa ‘dowokerere’ nondya dopanyama, awo kwa fire. (Num. 11:4-6, 31-34) Apa Vaisraeli va tongamenene ntana zongorodo, awo kwa lire nokunwa va hafere. (Ex. 32:4-6) Paurusa kwa uyungire yihonena eyi, yipo a rondore Vakriste ava va parukire pomazuva apa Jerusarema ntani ntembeli zamo za kere pepi noku zi zonagura po komeho Jesus a wize pevhu. Nose kuna kuparuka pomazuva gopouhura. Yipo nye, ayo ya kara nomulyo tu dire kuhonena mapuko aga va rugene Vaisraeli.

14. Yisinke za uyunga ko Bibeli kuhamena nondya edi ngadi ka kara ko mouzuni woupe?

¹⁴ Apa Jesus ga uyungire kuhamena ‘nondya detu dankenye ezuva,’ age kwa tembe posiruwo esi ‘mpango zaKarunga nga zi sika mo pevhu ngwendi meguru.’ (Mat. 6:9-11) Ngapi ono kugazara eparu ngali ka fana mouzuni woupe? Bibeli kuuyunga asi mpango zaKarunga pevhu kwa hamena mo nondya donongwa. Jesaya 25:6-8 kutanta asi moUhompa waKarunga nga mu kakara nondya donongwa edi ngava ka hafera vantu. Mapisrome 72:16 kutanta asi: “Ewogo lyoyisima ngano tali kara mosirongo, nondundu ngano tadi zura muzangu.” Ove kuna kundindira nondya edi wa hara unene ntani o ka tereke nondya edi wa dira kulya rumwe ndi? Nampo ove kuna kundindira ngo ka tapeke  mosipata sanyamoge ntani noku ka hafera vhinyu. (Jes. 65:21, 22) Nkenye gumwe nga ka hafera yininke yoyiwa.

15. Yisinke ngava ka lironga vantu ava ngava ka vhumbura? (Johanesa 6:35)

¹⁵ Resa Johanesa 6:35. Yisinke ngava ka gwana vantu ava va lire komboroto nonomfi edi gava pere Jesus? Nampo kuvhura ngo ka limone nawo apa ngava ka va vhumbura. Nampili ngomu va dilire kupura mwaJesus, awo ngava ka va vhumbura. (Joh. 5:28, 29) Vantu owo ngava ka lironga eyi da tente nonkango edi ga uyungire Jesus asi: “Ame nyame mboroto zomwenyo. Nkenye ogu a wiza kwange, kapi hena nga fa nzara.” Awo ngava hepa kukatura epuro mwaJesus ogu ga geve eparu lyendi ngozambo. Ano posiruwo oso, vantu ava ngava ka vhumbura ngava ka va ronga, kukwatera mo vanona ava ngava ka hampurukira moParadisa. Ose ngatu ka hafa unene apa ngatu ka va ronga yininke eyi yoyiwa. Kuvatera wopeke va ka kare nelikwatakano lyewa naJehova, ngayi ka tu retera ruhafo rorunene, kupitakana kukalya nondya donontovara.

16. Yisinke ngatu ka lironga mosirongwa sokukwama ko?

¹⁶ Tuna zogere ko tupu sihonena simwe esi sakara mwaJohanesa 6, nye Jesus yinzi ga rongere kuhamena “mwenyo gwanarunye.” Vajuda ava ga uyungire nawo Jesus va hepere kumupurakena nawa. Yipo nye, nose twa hepa kupurakena nawa eyi ana kutu tantera Jesus. Mosirongwa sokukwama ko ngatu ka lironga hena Johanesa egaununo 6.