1-2. Yisinke ayi tu ninkisa tu lire?

 POYIRUWO yimwe ose kulira morwa ruhafo. Pasihonena, ove nampo kwa lilire apa wa gwene mukeke ndi apa wa diworokere yininke eyi yakuhafesere ntani nampo ove kwa hefe apa wa mwene kaume koge ogu wa hura unene.

² Rorunzi ose kulira morwa kukora kokunene oku tuna kuzuvha. Pasihonena, nsene gumwe ogu twa huguvara kuna kututekura momudona. Ose hena kulira nsene kuna kuvera ntani kuna kuzuva kukora kokunene siruwo sosire ndi nsene tuna zumbanesa gumwe ogu twa hara. Ose kuvhura tu lizuvhe ngwendi omu ga lizuvhire muporofete Jeremiya apa Vababironi va zonagwire po Jerusarema. Age kwa uyungire asi: “Meho gange kuna kupupa nomukuro domahodi . . . mahodi gange ngaga pupira momukuro gwa hana kuhaga.”​—Malira. 3:48, 49.

3. Ngapi a lizuvhu Jehova apa a mono vakareli vendi kuna kuhepa? (Jesaya 63:9)

³ Jehova ga diva asi yikando yokuhura kupi atu lili morwa  maudigu aga atu ligwanekere nago. Bibeli kututantera asi age ga diva kukora oku ava lizuvhu vakareli vendi ntani age kutuzuvha apa atu mu likwambere yipo a tu vatere. (Epis. 34:15) Jehova kutupakera mbili. Age ga kara nosinka sosinene kwetu ngwendi mukurona ogu ga hara unene vana vendi. Age kutumona apa atu piti momaudigu ntani kutuvatera.​—Resa Jesaya 63:9.

4. Yihonena musinke yomoBibeli natu ka zogera ntani yisinke natu ka lironga kuhamena Jehova?

⁴ Kupitira moBibeli, Jehova kututantera omu ga lizuvhire apa vakareli vendi va guvire unene ntani nomu ga va vaterere. Pasihonena, ose kuvhura tu lirongere ko kweyi ya guvisire Hana, Ndafita ntani naHompa Hisikiya. Tatu ka zogera eyi ya va ninkisire va lire ntani nomu Jehova ga va vaterere. Ta tu ka zogera hena omu Jehova a tu hengagwida nsene tuna guwu ntani nsene ogu twa huguvara ana tu koresa ndi nsene kuna kuvera unene.

JEHOVA KUKUMONA APA O LILI NSENE ONO ZUMBANESA MUNTU OGU WA HARA

5. Ngapi ga lizuvhire Hana kweyi ya mu horokerere?

⁵ Hana kwa ligwanekerere nomaudigu aga ga mu ninkisire a lire. Mugara gwendi kwa va kwere masupareko. Ano mukadendi gumwe kuna kara Penina ogu ga nyengere Hana. Hana kwa kere nganze ano Penina nga reta. (1 Sam. 1:1, 2) Penina nga swaura Hana morwa kapi ga kere novana. Hana nga ‘lili ntani kapi nga li.’ Ngano nyove, ngano ngapi wa lizuvhire?​—1 Sam. 1:6, 7, 10.

6. Yisinke ya hengagwidire Hana?

⁶ Hana kwa ka gwene ehengagwido konkongoronzugo. Apa ga sikeme pepi nevero lyeharango lyonkongoronzugo, makura ta “kanderere neguwo lyenene oku ta lili unene.” Ta kanderere asi: “Tara udigu wange ove o diworoke nge!” (1 Sam. 1:10b, 11) Hana kwa tanterere Jehova omu ga lizuvhire. Jehova kwa fililire nkenda unene Hana apa ga mu mwene kuna kulira!

7. Ngapi ga lizuvhire Hana konyima zokukanderera kwaJehova?

⁷ Hana kwa gwene ehengagwido konyima zapa ga kanderere ntani napa ga uyungire nomupristeli gomunene Eli, nampili ngomu udigu wendi wa dilire kuhaga po posiruwo sina. Bibeli kutanta asi: “Hana ta zi ta ka lya, makura sipara sendi tasi runduruka.” (1 Sam. 1:17, 18) Age kwa geve udigu wendi kwaJehova, ano Jehova ga mu zuvhire nokumutungika ntani ta mu pe ruvharo.​—1 Sam. 1:19, 20; 2:21.

8-9. Morwasinke ya karera nomulyo tuze komapongo nkenye apa? (Vahebeli 10:24, 25) (Tara hena efano.)

 ⁸ Yisinke natu lirongera ko? Ove nampo kuna kuligwanekera noudigu ou au ku ninkisa o guve morwa nampo wa zumbanesa gumwe gekoro lyoge ndi kaume koge. Ano oyo kuvhura yi ku ninkise o hare kukara nyovelike. Nye nsene o za nkenye apa komapongo, ove ngo ka gwana ehengwido ngwendi moomu ga ka gwene Hana ehengagwido konkongoronzugo. (Resa Vahebeli 10:24, 25.) Apa atu purakene novelise domoBibeli komapongo, Jehova kutuvatera yipo tu gazare yininke yoyiwa. Ayo kutuvatera tu kare nombili momutjima nampili udigu wetu u dire kulitjindja.

⁹ Apa atu kara hena momapongo, vanavazinyetu kutukorangeda noku tulikida eharo. (1 Tes. 5:11, 14) Apa atu kara mepongo, Jehova kuruganesa vanavazinyetu yipo va tu vatere. Munazinyetu gomugara ogu a rugana uzuvhisi wosiruwo nasinye kwa uyunga asi: “Poyiruwo yimwe apa ani diworoka mukadange, ame kukara nyamelike yipo ni lire. Nye apa ani zi komapongo, ame kukagwana makorangedo. Malimbururo govanavazinyetu kukorangeda nge sili ntani apa ani kara momapongo ame kudivara yinka yange nayinye.”

10. Ngapi omu sihonena saHana nasi tu vatera nsene tuna guwu unene?

¹⁰ Hana kwa lizuvhire hansako konyima zapa ga kanderere kwaJehova nokumutantera omu ga lizuvhire. Nove kuvhura o tantere Jehova ‘yinka yoge nayinye’ ntani age nga ku purakena nokukuvatera. (1 Pet. 5:7) Munazinyetu gomukadi kwa kere namugara gwendi ogu va dipagere vawidi. Munazinyetu gomukadi ogo kwa uyunga asi: “Ame kwa guvire unene nokugazara asi kapi ngani hafa hena. Nye ame ngani lizuvhu hansa ko apa ngani kanderere kwaJehova morwa age ga hara nge unene. Poyiruwo yimwe kapi ngayi karere nge ureru kumutantera omu na ku lizuvha, nye age nga kwata nge egano. Ame kukanderera kwaJehova yipo a penge ko mbili nsene na guwu unene yipo ni vhure kurugana yininke eyi kani hara kurugana mezuva olyo.” Nsene o tantera Jehova omu ono kulizuvha, age nga ku kwata egano noku kuhengagwida nampili udigu u dire kulitjindja. Age nga ku hengagwida yipo o lizuvhe hansa ko. (Epis. 94:19; Fil. 4:6, 7) Age kumona omu ono kutwikira kumulimburukwa ntani nga ku futa.​—Heb. 11:6.

NSENE OGU WA HUGUVARA ANA KU KORESA

11. Ngapi ga lizuvhire Ndafita apa va mu hepekere?

¹¹ Ndafita kwa ligwanekerere nomaudigu aga ga mu ninkisire a lire. Sinzi sovantu kwa mu nyengere kukwatera mo vakaume vendi vamwe ntani novanekoro ava va mu koresere. (1 Sam. 19:10, 11; 2 Sam. 15:10-14, 30) Age kwa uyungire asi: “Ame na roroka kokupikauka; sinene masiku, ame kuworeka uro wange nomahodi; musato gwange kuwora komahodi, mahodi kupupa apa ani rara.” Morwasinke Ndafita ga lizuvhilire ngoso? Age kwa uyunga asi morwa nonkore dendi edi da mu hepekere. (Epis. 6:6, 7) Ndafita kwa lilire unene apa nonkore dendi da mu hepekere.

12. Yisinke ga divire Ndafita kuhamena Jehova? (Episarome 56:8)

¹² Nampili ngomu Ndafita ga ligwanekerere  nomaudigu, age gayi pulire nawa-nawa asi Jehova ga mu hara. Ano eyi ya mu ninkisire a tjange asi: “HOMPA ana zuvhu ezwi lyomalirankali gange.” (Epis. 6:8) Sikando simwe age kwa tjenge hena nonkango edi da kara mEpisarome 56:8. (Resa.) Nonkango odo kulikida nawa-nawa asi Jehova ga tu hara unene ntani ga kara nosinka omu atu lizuvhu. Ndafita gayi divire nawa-nawa asi Jehova ga mwene maudigu gendi ntani ga divire omu maudigu ogo ga mu koresere.

13. Yisinke twa hepa kudiworoka nsene kuna kututekura momudona? (Tara hena efano.)

¹³ Yisinke natu lirongera ko? Nampo ove kuna kuzuvha kukora morwa gumwe ogu wa huguvara kwa ku koresa ndi nampo gumwe ogu hambara mu likware nendi ga ku nyoka. Ndi nampo mugara goge ndi mukadoge kwa ku siga ntani nampo gumwe ogu wa hara ga hageka kukarera Jehova. Munazinyetu gumwe gomugara, mukadendi kwa honderere nokumusiga. Munazinyetu ogo gomugara kwa uyunga asi: “Ame kapi nayi pulire apa ya horokerere nge. Ame kwa guvire ntani kwa handukire nokulizuvha asi ame sininke somawoko-woko.” Nsene kweli gumwe ogu ga ku koresa, diworoka asi Jehova kapi nga ku sigilira. Munazinyetu ogo kwa uyunga hena asi: “Vantu kuvhura ngava tu korese poyiruwo noyiruwo, nye Jehova kapi nga sigilira vakareli vendi wovalimburukwi. Age nga tu vatera nkenye apa.” (Epis. 37:28) Ntani diworoka asi Jehova ga ku hara unene kupitakana nkenye muntu. Nampili va ku korese, Jehova simpe kukutara asi ove mulyo unene kwendi. (Rom. 8:38, 39) Ntani ga ku hara unene nampili vantu va ku tekure momudona.

14. Nonkango musinke dokuhengagwida atu gwana mEpisarome 34:18?

¹⁴ Nonkango daNdafita edi da kara mEpisarome 34:18 (Resa.) kuvhura kukuhengagwida nsene kwa ku koresa. Ngapi omu Jehova a vatere vantu ava va koresa? Ngwendi mukurona ana kuhengagwida munona ogu ana kulira, Jehova nage “kukara pepi” nose yipo a tu vatere nokutuhengagwida nsene gumwe ana tu koresa. Age ga liwapaikira kutuhengagwida nsene tuna guwu ndi kuna kulizuvha asi ose kwato mulyo. Age kwa tu tumbwidira yininke yoyiwa eyi nga ka rugana komeho yipo yi tu vatere tu lididimikire maudigu.​—Jes. 65:17.

 JEHOVA KUKUMONA APA O LILI NSENE KUNA KUVERA UNENE

15. Yisinke ya ninkisire Hompa Hisikiya a lire?

¹⁵ Apa Hompa gwaJuda Hisikiya ga kere nonomvhura 39, age kwa verere unene. Makura muporofete Jesaya ta mu tantere mbudi ezi za tundire kwaJehova asi nga fa. (2 Vah. 20:1) Apa Hompa Hisikiya ga zuvhire mbudi ezi, makura ta lili unene. Age kwa kanderere unene kwaJehova yipo a mu vatere.​—2 Vah. 20:2, 3.

16. Yisinke ga rugene Jehova apa ga zuvhire ekanderero lyaHisikiya?

¹⁶ Apa Jehova ga zuvhire ekanderero lyaHisikiya noku mu mona omu ana kulira, age kwa mu fililire nkenda nokumutantera asi: “Na zuvhu ekanderero lyoge nomahodi goge nago na ga mono. Ame tani ku verura.” Kupitira momuporofete Jesaya, Jehova kwa tumbwidilire Hisikiya asi age nga paruka siruwo sosire ntani nga mu ninka a popere sitata saJerusarema koVaasiliya.​—2 Vah. 20:4-6.

17. Ngapi omu Jehova a tu vatere nsene asi ose kuvera vera unene? (Episarome 41:3) (Tara hena efano.)

¹⁷ Yisinke natu lirongera ko? Yisinke no rugana nsene asi ove kuvera-vera ntani kapi o veruka? Kanderera kwaJehova nokumutantera omu ono kulizuvha nampili kuna kulira. Bibeli kututantera asi Jehova “ga kara nonkenda zonene ntani Karunga ogu a hengagwida vantu momaudigu nagenye.” (2 Kol. 1:3, 4) Jehova kapi ta gusa po maudigu getu nagenye ngesi, nye age nga tu vatera nkenye apa. (Resa Episarome 41:3.) Age kuruganesa mpepo zendi zokupongoka yipo zi tu pe nonkondo nounongo ntani nombili zomomutjima yipo tu lididimikire. (Yis. 18:14; Fil. 4:13) Age hena kutuhengagwida pokutuhuguvaresa asi kwato ogu hena nga ka vera komeho.​—Jes. 33:24.

18. Kolili etjangwa ali ku hengagwida apa o ligwanekere noudigu wounene ndi? (Tara kakende “ Novelise dimwe edi adi tu hengagwida nsene tuna guwu.”)

¹⁸ Hompa Hisikiya kwa mu hengagwidire nonkango daJehova. Nose kuvhura tu gwane ehengagwido moBibeli. Bibeli kutuhengagwida nokutuvatera tu kare tuna litura nsene tuna guwu. (Rom. 15:4) Munazinyetu gomukadi ogu ga kara koUtokero waAfrika nga lira lira apa va mu kwatekere kankera. Age kwa uyunga asi: “Jesaya 26:3, kuna kara etjangwa limwe eli ali hengagwida nge. Nampili ngomu natu dira kugusa po maudigu aga tuna kuligwanekera nago, nye movelise ozo Jehova kwa tumbwidira asi nga tuvatera tu liture nokulididimikira nkenye maudigu.” Kolili etjangwa ali ku hengagwida  apa o ligwanekere noudigu wounene ndi?

19. Mauwa musinke tuna kundindira komeho?

¹⁹ Ose kuna kuparuka pomazuva gopouhura ntani maudigu nga ga ligwederera unene. Ngomu tuna yi lirongo mosihonena saHana, naNdafita ntani naHompa Hisikiya, Jehova kutumona apa atu guwu ntani nage ku mu guvisa. Nsene kuna kuligwanekera nomaudigu, twa hepa ku diworoka asi Jehova ga tu hara unene ntani twa hepa kukanderera kwendi yipo tu mu tantere omu tuna kulizuvha. Twa hepa kukara novanavazinyetu nsene kuna kuligwanekera nomaudigu ntani twa hepa kutwikira kuresa Bibeli yipo zi tu hengagwide. Jehova nga ka tu futa nsene tu twikira kumulimburukwa. Age kwa tumbwidira asi nga kokota po mahodi nagenye goruguwo. (Ehor. 21:4) Ano komeho ose ngatu ka lira tupu morwa ruhafo.