1-2. Yisinke nava rugana vakurona nsene vana vawo kuna kuvapura kuhamena Karunga ntani Bibeli?

 SINZI sovantu va yi dimburura asi yinzi ya hamena mo mokurera munona. Nsene asi ove mureti, tatu kupandura kweyi o rugana unene o vatere munoge a kare nepuro lyokupama mwaJehova. (Deut. 6:6, 7) Ngomu ana kukura munoge, kuvhura nga tameke kupura asi morwasinke Jehova a tu silikire kurugana yininke yimwe?

² Pomuhowo nampo kuvhura o kare nosinka kuhamena mapuro aga a pura munoge. Kuvhura nampo o gazare asi munoge kwa kukupura mapuro morwa kapi ga pura mwaKarunga nomoBibeli. Ngomu vanona vana kukura, awo kupura mapuro yipo va nkondopeke epuro lyawo. (1 Kol. 13:11) Yipo nye, kapisi hepero o kare nosinka nsene vana woge kuna kukupura mapuro, nye ruganesa mpito ozo yipo o va vatere va nkondopeke epuro lyawo mwaKarunga nomoBibeli.

3. Yisinke natu ka zogera mosirongwa esi?

³ Mosirongwa esi natu ka zogera omu vakurona nava vatera munawo ndi vana vawo (1) va kare nepuro mwaKarunga nomoBibeli (2) va kwate egano mulyo gokulimburukwa nompango domoBibeli kuhamena yoyiwa neyi yoyidona ntani (3) va dive omu nava tantera ko vakwawo eyi va pura. Natu ka zogera hena eyi ya karera nomulyo kovanona va pure mapuro ntani yininke yimwe eyi vakurona nava rugana kumwe novana vawo yipo va zogere kuhamena yininke eyi twa pura.

VATERA MUNOGE A PURE MWAKARUNGA NOMOBIBELI

4. Mapuro musinke nampo na vhura kupura munona ntani morwasinke?

⁴ Vakurona va hepa kudimburura asi nsene awo kwa pura  mwaKarunga, kapi ayi tanta asi vana vawo nawo ngava pura mwaKarunga. Kapi va mu reta nepuro mwaJehova, ano eyi ya lifana novana veni. Mwaza siruwo, munona kuvhura a pure mapuro ngwendi gaga asi: ‘Ngapi nani yi diva asi Karunga yipo ga kara? Kuvhura ni pure eyi ya kara moBibeli ndi?’ Bibeli kutukorangeda tu ruganese ‘nondunge detu nokukonakona nayinye.’ (Rom. 12:1; 1 Tes. 5:21) Ngapi no vatera munoge a nkondopeke epuro lyendi?

5. Yisinke nava rugana vakurona yipo va vatere munawo a huguvare moBibeli? (Varoma 12:2)

⁵ Vatera munoge a gwane maumbangi aga aga likida asi eyi azi rongo Bibeli usili. (Resa Varoma 12:2.) Nsene munoge ta pura mapuro, ruganesa mpito ozo mokumuvatera a gwane malimbururo moBuke zepaparo zoNombangi daJehova. Kuvhura a tare konhi zosiparatjangwa “Bibeli” mokaparatjangwagona “Kwa zi retesa po mpepo zaKarunga” yipo a gwane maumbangi aga aga likida asi Bibeli kapisi buke tupu ezi va tjenge vagara nye azo kuna kara “Nonkango daKarunga.” (1 Tes. 2:13) Pasihonena, kuvhura a rugane epaparo kuhamena Ninivhe, sitata soVaasiliya. Valirongi vamwe woBibeli womosiruwo sanare kwa tente asi sitata saNinivhe kapi sa kere ko. Nye koyiha yomvhura 1850, valirongi kwa gwene erunda lyositata saNinivhe. Ano eyi kulikida asi sihorokwa esi somoBibeli usili. (Sef. 2:13-15) Komauzera gomanzi kuhamena omu ezonauko lyaNinivhe lyasikisa mo uporofete womoBibeli, kuvhura a rese sirongwa “Wa yi diva ndi?” moRuhungu rwaMangundu 2021. Pokuhetakanesa eyi a lirongo moyimbapiratjangwa yetu neyi a lirongo monobuke edi ava tumbura asi encyclopedia ntani nonobuke dimwe hena, ngayi vatera munoge a huguvare unene mweyi a zi rongo Bibeli.

6. Ngapi vakurona nava vatera munawo a gazadare ko komaumbangi aga aga likida asi Bibeli usili? Gava sihonena. (Tara hena efano.)

⁶ Vatera munoge a dimburure asi maumbangi aga ga kara moBibeli usili. Vakurona kuvhura va papare nompito dokulisiga-siga yipo va zogere novana vawo kuhamena Bibeli ndi kuhamena kukara nepuro mwaKarunga. Kuvhura mu ronge muneni kuhamena yininke eyi pokukadingura nzugo pungwiro ndi Beteli. Pasihonena, kuvhura o ruganese nobuke ndi novidiyo edi adi likida yininke yomosiruwo sanare kuhamena Bibeli. Eyi kuvhura kuvatera munoge a yi pure asi eyi azi rongo Bibeli usili. Kuvhura o ronge munoge kuhamena emanya lyoVamowaba, ano emanya eli nomvhura dalyo 3 000 ntani kwa tjanga po edina Jehova. Emanya eli kuligwana  monzugopungwiro zomoPeris ezi ava tumbura asi Louvre. Karuha kemanya lyoVamowaba kukagwana monzugopungwiro koruha “Bibeli ntani edina lyaKarunga” koMberewa zonene zoNombangi daJehova zomoAmerika, moWarwick. Eyi va tjanga pokamanya oko kulikida asi Hompa Mesa goVamowaba kwa rwanesere Vaisraeli, ano eyi kwa liza neyi za uyunga Bibeli. (2 Vah. 3:4, 5) Apa munoge nga mona maumbangi aga aga likida asi eyi azi rongo Bibeli usili, epuro lyendi ngali nkondopara.​—Hetakanesa 2 Histoli 9:6.

7-8. (a) Yisinke natu lirongera ko monkedi omu Jehova ga sita yininke? Gava sihonena. (Tara hena efano.) (b) Mapuro musinke naga vatera munoge a pure moMusiti?

⁷ Korangeda vana woge va gazadare ko koyininke eyi ga sita Jehova. Vakurona, korangedeni vana veni va tare koyininke eyi ya va kundurukida nsene kuna kugenda nawo, pasihonena mowiza ndi konondundu. Va tantereni asi pweli gumwe gonondunge unene ogu ga sita yininke nayinye eyi ava mono. Pasihonena, nsene o tara monkedi omu va sita nondoma nonombya dimwe nomahako goyimeno ntani nombungururu dimwe, ove ngo dimburura asi kwa yi sita monkedi zongwa. Vadiviunsitwe kwa lironga marupe gamwe goyininke eyi ure wonomvhura donzi. a

⁸ Munoge nga lironga yininke yoyinzi kosure kuhamena unsitwe. Pasihonena, nonkondo devhu kuninkisa sininke esi vana zugumine meguru si gwire pevhu nokuvatera mankupi gefuta ga dire kupitakana murudi ogu ga tura po Jehova ntani kuvatera yinamwenyo yi vhure kuparuka pevhu. Yilye ogu ga tura po nonkondo edi adi tura yininke kumwe? Yilye ogu ga tura yininke oyo yi kare mompompa? Nsene munoge a lipura mapuro gangoso, ayo ngayi mu vatera yipo a yi pure asi Karunga yige ga sita yininke nayinye. (Heb. 3:4) Pamwe kuvhura o mu pure asi: “Nsene asi Karunga yige ga tu sita, ngoso kapi nayi wapa kwetu mokuuyunga asi yige ga tu tulira po noveta kuhamena omu natu gwana ruhafo ndi?” Makura mu fatwilira asi noveta odo kudigwana moBibeli.

VATERA MUNOGE A KWATE EGANO MULYO GOKULIMBURUKWA NOMPANGO DAKARUNGA

9. Yisinke nayi ninkisa munona a pure mapuro kuhamena mulyo gokukwama nompango domoBibeli?

⁹ Nsene munoge ta kupura mulyo gokukwama nompango domoBibeli kuhamena youhunga neyi yepuko, hetekera ko kukwata egano konda zeyi ana kukupulira mapuro ogo. Ga yi pura asi eyi azi uyunga Bibeli kuhamena yoyiwa neyi yepuko usili ndi? Ndi kumudigopera kufatwilira vakwawo eyi ga pura? Yi kare asi konda musinke, kuvhura o ronge munoge a kwate egano eyi ya karera nomulyo kulimburukwa  nompango daKarunga pokulironga nage buke Hafera Eparu Narunye. b

10. Ngapi no vatera munoge a kare kaume kaJehova?

¹⁰ Vatera munoge a kare kaume kaJehova. Ngomu ono kulironga Bibeli namunoge, ruganesa mapuro noyifanekeso eyi ya kara mobuke Hafera Eparu Narunye yipo o kwate egano omu a tara yininke. (Yis. 20:5) Pasihonena, mosirongwa 8 Jehova kwa mu hetakanesa kwakaume ogu a tu pe madiworokeso aga naga tu popera nokutuvatera. Konyima zokuzogera 1 Johanesa 5:3, kuvhura o pure munoge asi: “Mokumona asi Jehova kaume gomuwa, ngapi natu tara yininke eyi a tu tantere tu rugane?” Kuvhura li kare epuro lyoureru, nye kuvhura ngali vatere munoge a kwate egano asi Jehova kutupa nompango morwa ga tu hara.​—Jes. 48:17, 18.

11. Ngapi no vatera munoge a kwate egano mulyo gokulimburukwa nompango domoBibeli? (Yisewe 2:10, 11)

¹¹ Zogereni mauwa aga atu gwanene mo apa atu tura pasirugana nompango daKarunga. Nsene kuna kuresa kumwe Bibeli ndi konakona Matjangwa nkenye ezuva, zogereni omu nompango domoBibeli da vatera epata lyeni. Pasihonena, vatera munoge a kwate egano asi ose kugwanena mo uwa apa atu rugana unene ntani apa atu uyunga usili. (Heb. 13:18) Kuvhura hena o mu ronge omu kukwama nompango domoBibeli adi tu vatere tu kare noukanguki wouwa noruhafo. (Yis. 14:29, 30) Kuzogera nompango edi, ngayi vatera munoge a di limburukwe.​—Resa Yisewe 2:10, 11.

12. Ngapi omu Steve namukadendi va vatera munawo a kwate egano mulyo gokulimburukwa nompango domoBibeli?

¹² Steve ogu ga tunga moFransa kwa faturura omu nage namukadendi va vatera munawo gomumati Ethan gonomvhura 16 a kwate egano asi Jehova kwa tura po noveta morwa ga tu hara. Steve kwa uyunga asi: “Ose kumupura mapuro ngwendi gaga asi: ‘Morwasinke Jehova ana harere tu limburukwe mpango ezi? Ngapi a yi likida asi ga tu hara? Yisinke nayi horoka nsene no dira kuzilimburukwa?’” Mapuro aga kwa vatera Ethan a kwate egano asi eyi a tu rongo Jehova usili. Steve kwa uyunga hena asi: “Sitambo setu kuna kara sokuvatera Ethan a dimburure asi moBibeli kwa kara mo unongo ou wa pitakana wovantu.”

13. Ngapi vakurona nava vatera munawo a limburukwe nompango domoBibeli? Gava sihonena.

¹³ Deura munoge a limburukwe nompango domoBibeli. Pasihonena, tu tante asi nampo munoge vana mu pura a rese sirongwa monkondwarongero. Vadani ava va ruganesa mobuke ozo, awo nampo kurugana yininke eyi a tara Jehova asi epuko. Awo nampo kuhondera ntani kurugana yininke yonyanya, eyi nayi ninkisa muresi a temwinine nkareso zawo. Kuvhura o pure munoge a gazadare ko nsene asi eyi ava rugana vantu owo yaliza nonompango domoBibeli. (Yis. 22:24, 25; 1 Kol. 15:33; Fil. 4:8) Eyi ngayi vatera munoge a zuvhisire ko mitili gwendi novanasure vakwawo apa ngava mu pura a kumburure ko kobuke ozo.

RONGA MUNOGE A DIVE OMU NA FATWILIRA VAKWAWO EYI GA PURA

14. Sirongwa musinke nampo nasi digopera Mukriste gomudinkantu kufatwilira ko vakwawo ntani morwasinke?

¹⁴ Poyiruwo yimwe vadinkantu woVakriste kuvhura va kare nowoma kutantera ko vakwawo eyi va pura. Kuvhura va kare nowoma nsene va va pura va faturure eyi va dilira kupura melisinto. Morwasinke? Vamitili vawo kuvhura va uyunge asi elisinto usili, nye  kapisi egano tupu eli lyawiza po. Nsene o mukurona, ngapi no vatera munoge a pure nawa-nawa asi eyi ga pura usili?

15. Yisinke nayi vatera mudinkantu goMukriste a yi pure nawa-nawa asi eyi ga pura usili?

¹⁵ Vatera munoge a yi pure nawa-nawa asi eyi ga pura usili. Kapisi hepero munoge a kare nowoma, morwa ga diva usili kuhamena unsitwe. (2 Tim. 1:8) Morwasinke? Morwa vadiviunsitwe nawo va yi kwatesa ko asi yininke kapi ya wiza po pwa yene. Awo kwa gwana maumbangi aga aga likida asi pweli Karunga gonondunge ogu ga sita yininke nayinye. Yipo nye, awo kapi va pura melisinto eli ava rongo konosure nadinye. Munoge nga kara nepuro lyenene nouradi nsene a diva eyi ya vatera vanavazinyetu yipo va yi pure asi eparu kwa lisita. c

16. Ngapi vakurona nava vatera munawo yipo a fatwilire vakwawo kuhamena eyi ga pulira moMusiti? (1 Peturusa 3:15) (Tara hena efano.)

¹⁶ Vatera munoge a fatwilire vakwawo eyi ga pulira moMusiti. (Resa 1 Peturusa 3:15.) Kuvhura mu zogere yirongwa eyi ya kara ko-jw.org eyi ya zogera kuhamena unsitwe nelisinto, makura munoge kuvhura a horowore po efatururo eli ana kumona asi kuvhura li ka vatere vakwawo va ka kwate egano usili kuhamena Musiti. Liyombereseni kumwe omu na ka yi faturura nokumudiworokesa asi kapisi a ka lipatane novanasure vakwawo. Mu korangeda a ka faturure monkedi zoureru nsene pweli ogu na ka mu purakena. Pasihonena, munasure mukwawo kuvhura a mu tantere asi: “Ame kupura tupu eyi ani mono ntani kapi na mona rumwe Karunga.” Mudinkantu goMukriste kuvhura a limburure asi: “Gazara asi ove nampo kuna kugenda mositata ndi modoropa, makura to mono nzugo zongwa. Yisinke nampo no gazara apa no zi mona? Kweli ogu ga dika nzugo ozo. Mokulifana, kweli ga sita uzuni ou twa kara noyinamwenyo nayinye eyi ya kara mo.

17. Ngapi omu vakurona nava vatera munawo a papare nompito dokutantera ko vakwawo kuhamena usili womoBibeli? Faturura.

¹⁷ Vatera munoge a papare nompito yipo a tantere ko vakwawo usili womoBibeli. (Rom. 10:10) Kuvhura o hetakanese kuronga vantu Bibeli komukeke ogu ana kulironga kugenda. Pomuhowo mukeke kulironga kusikama. Ano  mwa za siruwo age na hetekera ko kulironga kugenda nakauke-nakauke. Mokulifana, mudinkantu goMukriste kuvhura a tameke kuzuvhisira ko vakwawo nakauke-nakauke. Pasihonena, age nampo kuvhura a pure munasure mukwawo asi: “Wa yi diva asi vadiviunsitwe kutemwinina yininke eyi ga sita Jehova ndi? Tanko ni ku likide ko vidiyo.” Konyima zokumulikida vidiyo zomonovidiyo dokutwikira Was It Designed? kuvhura a uyunge asi: “Nsene asi vadiviunsitwe kugwana efumano lyoyininke eyi ava rugana pokutemwinina yininke eyi ya kara po nare, yilye nye ogu lyafira efumano?” Nkedi ezi kuvhura zi vatere munasure mukwawo a hare kudiva ko yoyinzi kuhamena Jehova.

TWIKIRA KUVATERA MUNOGE A NKONDOPEKE EPURO LYENDI

18. Ngapi vakurona nava twikira kuvatera vana vawo va nkondopeke epuro lyawo mwaKarunga?

¹⁸ Ose kuna kuparuka mouzuni omu mwa kara vantu ava va dira kupura mwaJehova. (2 Pet. 3:3) Vakurona, ngomu muna kulironga Bibeli novana veni, va korangedeni va lironge yirongwa eyi nayi va vatera va fumadeke Nonkango daKarunga nonompango dendi kuhamena youhunga neyi yepuko. Vatereni vana veni va kare nepuro lyenene mwaJehova pokuzogera nawo eyi ga sita Jehova. Va va tereni va kwate egano mauporofete gomoBibeli gokutetukisa aga ga sikamo ntani somulyo po unene kanderereni kumwe novana veni ntani va kanderereni po. Nsene mu yi rugana Jehova nga tungika elituromo lyeni lyokuvatera vana veni va nkondopeke epuro lyawo.​—2 Hist. 15:7.