1. Ngapi ava lizuvhu vantu vamwe kuhamena kuparuka narunye?

 SINZI sovantu kuhetekera ko kulya nondya doukanguki ntani kuhufena yipo va paruke siruwo sosire. Nye nampili ngoso, awo ngava kurupa nokufa. Awo kugazara asi kapi tatu vhuru kuparuka narunye. Nye mwaJohanesa 3:16 ntani 5:24 Jesus kwa uyungire asi vantu kuvhura ngava ka gwane “mwenyo gwanarunye.”

2. Yisinke ali tanta Etjangwa lyaJohanesa egaununo 6 kuhamena mwenyo gwanarunye? (Johanesa 6:39, 40)

² Ezuva limwe Jesus kwa kutikire vantu wovanzi poku va pa mboroto nonomfi. a Eyi ga tanterere Jesus vantu ezuva lyokukwama ko, kwa kere mulyo unene kupitakana sitetu esi ga rugene. Age kwa tanterere vantu ava va mu kweme koKaperenaumu pepi nezenga lyaGalireya, oku ga ka va tanterere asi vantu ngava ka va vhumbura noku ka paruka narunye. (Resa Johanesa 6:39, 40.) Eyi kutanta asi vakaume novanekoro vetu ava twa zumbanesa ngava ka va vhumbura ntani  ngatu ka paruka narunye kumwe nawo. Nye nonkango edi ga uyungire Jesus mwaJohanesa egaununo 6, kwa digoperere sinzi sovantu mokudikwata egano ntani kuna kudigopera sinzi sovantu neina. Yisinke ga uyungire Jesus?

3. Nonkango musinke ga uyungire Jesus edi da kara mwaJohanesa 6:51?

³ Apa Jesus ga kutikire mbunga pasitetu nomboroto, mbunga kwa gazarere kuhamena mana ezi ga geve Jehova koVaisraeli apa va kere momburundu. Mbunga zina za divire hena asi Matjangwa kutumbura mana asi “mboroto zemeguru.” (Epis. 105:40; Joh. 6:31) Jesus kwa ruganesere mana ezi va divire nare pokuvaronga sirongwa somulyo. Nampili ngomu Karunga ga geve mana pasitetu, ava va zi lire, konyima simpe va ya fire. (Joh. 6:49) Mokulisiga, Jesus kwa litumbwire mwene asi “mboroto zousili zemeguru,” “Mboroto zokutunda kwaKarunga” ntani “mboroto zomwenyo.” (Joh. 6:32, 33, 35) Jesus kwa fatwilire elisigo eli lya kere po pwendi ntani nomana. Age kwa uyungire asi: “Ame nyame mboroto zomwenyo ezi za tunda meguru. Nkenye ogu a li mboroto ezi nga paruka narunye.” (Resa Johanesa 6:51.) Vajuda owo kapi va kwete egano eyi ga uyungire Jesus asi age kwa kere “mboroto” ezi za tundire meguru kupitakana mana ezi ga geve Jehova koVaisraeli ava va kere momburundu. Jesus kwa uyungire hena asi: “Mboroto ezi ngani mu pa kuna kara rutu rwange.” Nsene tu kwata egano eyi ga tembe Jesus, ose ngatu yi pura nawa-nawa asi kuvhura ngatu ka gwane mwenyo gwanarunye kumwe novanekoro vetu. Tu tareni eyi ga tembe Jesus.

MBOROTO ZOMWENYO NTANI RUTU RWENDI

4. Morwasinke Vajuda vamwe yava tetukisire eyi ga uyungire Jesus?

⁴ Vajuda vamwe kwa tetukire apa Jesus ga va tanterere asi “mboroto ezi ngani mu pa kuna kara rutu rwange oru ngani gava mokuparura uzuni.” Awo nampo kwa gazarere asi Jesus kwa here ku va pa rutu rwendi va lye. (Joh. 6:52) Vajuda owo kwa tetukire hena apa Jesus ga tente asi: “Nsene mu dira kulya rutu rwaMunwaMuntu nokudira kunwa honde zendi, kapi ngomu paruka.”​—Joh. 6:53.

5. Morwasinke natu yi pulira asi Jesus kapi ga tembe asi Vajuda va hepere kulya rutu rwendi nokunwa honde zendi?

⁵ Momazuva gaNowa, Karunga kwa tanterere vantu va dire kulya honde. (Gen. 9:3, 4) Ano konyima Jehova kwa tanterere Vaisraeli asi kapisi va lye honde. Nkenye ogu ga lire kohonde, va hepere “kumugusa mo mokatji kovantu vendi.” (Lev. 7:27, ftn.) Jesus kwa tanterere Vajuda valimburukwe nayinye eyi ya kere moVeta zaMosesa. (Mat. 5:17-19) Yipo nye, Jesus kapi ga tembe asi Vajuda va hepere kulya rutu rwendi nokunwa honde zendi. Pokuuyunga nonkango odo, Jesus kwa here kuvaronga eyi nava rungana yipo ngava ka gwane “mwenyo gwanarunye.”​—Joh. 6:54.

6. Ngapi tuna yi diva asi Jesus kwa ruganesere sifanekeso apa ga uyungire nonkango edi da kara mwaJohanesa 6:53?

⁶ Yisinke ga tembe Jesus? Apa Jesus ga uyungire nombunga zovantu, age kwa ruganesere sifanekeso. Age hena kwa ruganesere sifanekeso apa ga uyungire asi: “Nye nkenye ogu a nu mema aga ani mu pe ame, kapi nga fa hena enota, morwa mema aga ngani mu pa ngaga kara ngwendi mema aga aga dili  kupwira, aga ngaga mu pa mwenyo gwanarunye.” (Joh. 4:7, 14) b Jesus kapi ga tanterere mukadi goMusamaliya asi nga gwana mwenyo gwanarunye pokunwa mema gena gemetope. Mokulifana, Jesus kapi ga tanterere mbunga ezi za kere moKaperenaumu asi ngava gwana mwenyo gwanarunye pokulya rutu rwendi nokunwa honde zendi.

MALISIGO AGA GA KARA PO POKATJI KOYIHOROKWA YIVALI

7. Yisinke ava uyunga vamwe kuhamena nonkango edi ga uyungire Jesus edi da kara mwaJohanesa 6:53?

⁷ Vantu vamwe kuuyunga asi nonkango daJesus edi da kara mwaJohanesa 6:53 kuhamena kulya rutu rwendi ntani nokunwa kohonde zendi, kwa faturura eyi vantu nava vhura kurugana poMurarero gwaHompa. (Mat. 26:26-28) Awo kuuyunga asi nkenye ogu a kara poMurarero gwaHompa, ga hepa kulya komboroto nokunwa kovhinyu. Yipo nye, ayo ya kara nomulyo kwetu mokudiva asi yipi yo po youhunga neyi yepuko morwa vantu wovanzi uzuni mudima kuyalipakerera kumwe nose posilika oso. Tu tareni elisigo eli lya kara pokatji kosihorokwa esi sa kara mwaJohanesa 6:53 ntani neyi ga uyungire Jesus poMurarero gwaHompa.

8. Malisigo musinke ga kara po poyihorokwa yivali eyi ga uyungire Jesus? (Tara hena mafano.)

⁸ Tu kona koneni elisigo eli lya kara po poyihorokwa  eyi yivali. Sokuhova, siruwo musinke ntani kupi Jesus ga uyungilire nonkango edi da kara mwaJohanesa 6:53-56? Age kwa di uyungire apa ga kere moGalireya momvhura 32 komeho a tulise po Murarero gwaHompa moJerusarema. Sauvali, yilye ga di tanterere nonkango odo? Sinzi sovantu ava Jesus ga tanterere nonkango odo kapi va kere nosinka komarongo gendi, nye awo kwa here tupu nondya. (Joh. 6:26) Awo kwa genderere kusiga Jesus apa ga va tanterere yininke eyi va dilire kukwata egano. Varongwa vendi vamwe nawo kwa mu sigire. (Joh. 6:14, 36, 42, 60, 64, 66) Nye apa Jesus ga tulisire po Murarero gwaHompa konyara konyima zomvhura zimwe mo-33 siruwo saneina, vapositoli vendi 11 wovalimburukwi kapi va mu sigire nampili ngomu va dilire kukwata egano yininke yimwe eyi ga va rongere. Awo va yi pulire nawa nawa asi Jesus MunwaKarunga ogu ga tunda meguru. (Mat. 16:16) Age kwa va pandadekere kweyi va rugene apa ga va tanterere asi: “One nyone mwa kara name momaudigu gange.” (Ruk. 22:28) Nonkango edi da kara mwaJohanesa 6:53 kapi da tamba kweyi yaya horokere poMurarero gwaHompa. Tu zogereni ko hena maumbangi gamwe.

KWALYE DA TAMBA NONKANGO EDI GA UYUNGIRE JESUS?

9. Wolye ga tanterere Jesus nonkango edi ga uyungire poMurarero gwaHompa?

⁹ Jesus kwa pere vapositoli vendi mboroto za hana yihaheso apa va kere poMurarero gwaHompa noku va tantera asi azo kwa fanekesa rutu rwendi. Makura ta va pe vhinyu noku va tantera asi azo kwa fanekesa “honde zange zegwanekero.” (Mar. 14:22-25; Ruk. 22:20; 1 Kol. 11:24) Eyi ga va tanterere kuhamena egwanekero olyo kwa kere mulyo unene. Age kwa li tumbwire asi egwanekero lyepe ntani vaava tupu ngava ka pangera naJesus va hamena mo. (Heb. 8:6, 10; 9:15) Vapositoli kapi va kwete egano eyi ga va tanterere Jesus, nye awo kwa va gwavekere nompepo zokupongoka yipo ngava ka pangere naJesus meguru.​—Joh. 14:2, 3.

10. Elisigo musinke lya kara po kweyi Jesus ga uyungire moGalireya neyi ga uyungire poMurarero gwaHompa? (Tara hena efano.)

¹⁰ Nonkango edi ga uyungire Jesus poMurarero gwaHompa kwa tembe tupu ‘kosiundagona.’ Vapositoli vendi yiwo va hovere kukara mo mokambungagona oko. (Ruk. 12:32) Vapositoli owo yiwo ga tanterere Jesus va lye mboroto nokunwa vhinyu. Ntani vamwe ava va hamena kokambunga oko, va hepa kulya komboroto nokunwa kovhinyu poMurarero gwaHompa. Awo yiwo ngava ka pangera kumwe naJesus meguru. Eyi Jesus ga tanterere vantu ava va kere moGalireya ntani eyi ga tanterere Vapositoli vendi poMurarero gwaHompa, ya lisiga. Eyi Jesus ga uyungire poMurarero gwaHompa kwa tembe tupu kokambungagona. Ano eyi ga uyungire moGalireya kwa tembe kovantu wovanzi.

11. Ngapi nonkango edi ga uyungire Jesus moGalireya adi likida asi kapi ga tembe tupu kovantu wovasesu?

¹¹ Sinzi sovantu ava ga uyungire nawo Jesus moGalireya kwa here tupu ndondya. Jesus kwa va tanterere asi kugwana mwenyo gwanarunye mulyo unene kupitakana nondya. Ntani asi ava va fa ngava ka va vhumbura noku kaparuka narunye. Jesus kwa tanterere mbunga nonkango edi. Nye poMurarero gwaHompa, age kwa uyungisire tupu vapositoli vendi. Apa ga uyungisire mbunga  zomoGalireya, age kwa demenene komauwa aga ngava ka gwana vantu navenye. Jesus kwa va tanterere asi: “Nkenye ogu a li mboroto ezi nga paruka narunye, yeeyi mboroto ezi ngani mu pa kuna kara rutu rwange oru ngani gava mokuparura uzuni.”​—Joh. 6:51. c

12. Yisinke twa hepa kurugana yipo ngatu ka gwane mwenyo gwanarunye?

¹² Jesus kapi ga uyungire asi nkenye muntu nga ka gwana mwenyo gwanarunye, nye vaava tupu ava pura mwendi yiwo ngava ka gwana mwenyo gwanarunye. Sinzi sovantu neina kuuyunga asi va pura mwaJesus ntani awo kumutumbura asi muzowoli gwawo. (Joh. 6:29) Vamwe womoGalireya kwa pulire mwaJesus, nye konyima kwaya mu zumbire. Morwasinke?

13. Yisinke twa hepa kurugana yipo tu kare varongwa vaJesus wosili?

¹³ Sinzi sovantu kwa here kukwama Jesus morwa nondya edi ga va pere ntani kweyi ga va verwire nokuvaruganena yininke eyi va here. Jesus pamwe nga vatere vantu, nye sitambo sendi sosinene kwa kere sokuronga vantu Nonkango daKarunga. Vantu va hepere kutambura nokulimburukwa eyi ga va rongere. Pokuyirugana ngoso, awo kwa yi likidire asi vana tambura ezigido lyendi asi ‘wizeni kwange.’​—Joh. 5:40; 6:44.

14. Yisinke twa hepa kurugana yipo ngatu ka gwanene mo uwa monzambo zaJesus?

¹⁴ Jesus kwa korangedere vantu yipo va kare nepuro. Jesus kwa va rongere asi  awo ngava ka gwana mwenyo gwanarunye morwa rutu rwendi nohonde zendi ezi nga vhura kugava. Vantu va hepere kuyipura nokutambura erongo olyo. (Joh. 6:40) Nonkango edi da kara mwaJohanesa 6:53, kulikida asi twa hepa kupura mwaJesus yipo ngatu ka gwane mwenyo gwanarunye. Uhwi ou kwa u tambesera kovantu navenye.​—Efe. 1:7.

15-16. Yininke musinke yomulyo tuna lirongo mo mwaJohanesa egaununo 6?

¹⁵ MwaJohanesa egaununo 6 tuna lirongere mo yininke yoyinzi ntani yomulyo eyi yina tu korangeda. Tuna lirongo asi Jesus ga kara nosinka kovantu. Apa Jesus ga kere moGalireya, age kwa verwire vantu ntani kwa va rongere kuhamena Uhompa nokuvapa nondya. (Ruk. 9:11; Joh. 6:2, 11, 12) Yomulyo po unene, age kwa va rongere kuhamena “mboroto zomwenyo.”​—Joh. 6:35, 48.

¹⁶ Ava ga tumbwire Jesus asi “nonzwi dapeke” kapi va wapera kulya komboroto nokunwa vhinyu poMurarero gwaHompa. (Joh. 10:16) Nye awo kugwanena mo mauwa monzambo zaJesus Kristusa. Awo kuyirugana oyo pokupura mwaJesus ntani nomauwa gamwe aga atu gwanene mo morwa nzambo ozo. (Joh. 6:53) Nye ava ava li komboroto nokunwa kovhinyu, awo kuyilikida asi va kara negwanekero lyepe naJesus ntani ngava ka pangera kumwe nage meguru. Yi kare asi ose kwa hamena kovagwavekwa ndi kononzwi dapeke, sihorokwa sakara mwaJohanesa egaununo 6 mulyo kwetu ntani kuturonga mulyo gweyi twa hepera kupura mwaJesus yipo ngatu ka gwane mwenyo gwanarunye.