Mupositoli Paurusa kwa tjangerere Timoteusa asi: “Tani kuganesa komeho zaKarunga naJesus Kristusa ntani komeho zovaengeli ava ga horowora asi o konakone nawa yininke nayinye komeho o ture po etokoro pwa hana elitondororo nompongo.”​—1 Tim. 5:21.

Pomuhowo tu zogereni vaengeli ava va dira kuhamena kombunga ezi ga horowora Karunga. Vaengeli owo kapi va hamena kosivaro so-144 000. Apa Paurusa ga tjangerere Timoteusa nonkango odo, vagwavekwa simpe kapi vana va vhumbwire keparu lyemeguru. Vapositoli novagwaveka kapi simpe vana kara yisitwa yopampepo. Yipo nye, awo kapi va hamena ‘kovaengeli ava ga horowora’ Karunga.​—1 Kol. 15:50-54; 1 Tes. 4:13-17; 1 Joh. 3:2.

Ntani “vaengeli ava ga horowora” Karunga, awo kapisi vaengeli ava va dilire kulimburukwa posiruwo soruhanzo. Vaengeli ava kwa kwatesere ko Satana ntani awo kwa ya kere nompepo donondona edi da ya kere nonkore daJesus. (Gen. 6:2; Ruk. 8:30, 31; 2 Pet. 2:4) Komeho, Jesus nga ka zugumina Satana nonompepo dendi donondona mekero lyere unene nomvhura dokusika po-1 000.​—Juda 6; Ehor. 20:1-3, 10.

“Vaengeli ava ga horowora” Karunga ga tembe mupositoli Paurusa kuna kara vaengeli vemeguru ava va kwatesere ko “Karunga naJesus Kristusa.”

Meguru kwa kara mo vaengeli wovanzi. (Heb. 12:22, 23) Jehova kupa vaengeli navenye yirugana yokulisiga-siga. (Ehor. 14:17, 18) Pasihonena, Jehova kwa tumine muengeli gumwe tupu a ka dipage vakwayita woVaasiliya wokusika po-185 000. (2 Vah. 19:35) Vaengeli wovanzi nampo ngava va pa situmbukira ‘sokupongaika nokugusa ko koUhompa waJesus vapukisi nava ava teza po veta zaKarunga.’ (Mat. 13:39-41) Vaengeli vamwe nampo ngava va pa situmbukira ‘sokupongaika vahoroworwa vendi’ va ze meguru. (Mat. 24:31) Ntani vaengeli vamwe kwa va pa situmbukira ‘sokutupopera.’​—Epis. 91:11; Mat. 18:10; hetakanesa Mateusa 4:11; Rukasa 22:43.

“Vaengeli ava ga horowora” Karunga ava va tumbura mwa-1 Timoteusa 5:21, nampo kuna kara vaengeli ava va pa situmbukira sokuvatera mbungakriste. Kuliza netjangwa olyo, Paurusa kwa pukwilire vakuronambunga va gendese nawa yitumbukira yawo ntani womombugakriste nawo va hepa kulimburukwa vakuronambunga. Paurusa kwa uyungire asi vakuronambunga kapisi va kare ‘nelitondororo nompongo’ ntani kapisi va ture po matokoro va hana kuhova kugazadara ko nawa. Ano Paurusa yiyo ga va pere konda zomulyo zeyi va hepera kukwama evyukiso lyendi. Age kwa uyungire asi vakuronambunga kuvatera vapuli vakwawo “komeho zaKarunga naJesus Kristusa ntani komeho zovaengeli ava ga horowora” Karunga. Vaengeli vamwe kwa kara nositumbukira sokuvatera nombungakriste. Pasihonena, awo kupopera vakareli vaJehova nokuvavatera mokuzuvhisa ntani awo kutantera Jehova kuhamena eyi vana kumona.​—Mat. 18:10; Ehor. 14:6.