Wa resa nawa yirongwa yomoRuhungu romvhura ezi ndi? Tara nsene kuvhura o limburure mapuro aga gana kukwama ko:

Sihonena musinke ga tu tulira po Jehova omu natu tekura vakadi?

Age kutekura vakadi monkedi zongwa ntani kapi a tara vagara asi mulyo unene kupitakana vakadi. Jehova ga kara nosinka kovakadi ntani kukwata egano omu ava lizuvhu. Age hena kwa huguvara vakadi woVakriste yipo va sikise mo sirugana sendi.​—w24.01, epe. 15-16.

Ngapi natu tura pasirugana etjangwa lyomoVaefeso 5:7, eli a litanta asi: “Mwa ha va honena”?

Mupositoli Paurusa kwa tu rondora tu nyokere po vakaume ava ngava tu ninkisa tu dire kulimburukwa Jehova. Vakaume owo kwa kwateramo ava atu kara kara nawo ndi ava atu litjangere nawo kointaneta.​—w24.03, epe. 22-23.

Nombudi musinke doyipempa twa hepa kunyokera po?

Twa hepa kunyokera po nombudi edi twa dili kudiva nsene usili, nombudi odo kuvhura tu digwane kovanavazinyetu ntani kuvhura tu di gwane kovarwanesi usili ava ava lininkisa ngwendi vana hara kupurakena kombudi zetu.​—w24.04, epe. 12.

Yisinke twa diva ntani neyi twa dira kudiva kuhamena omu Jehova nga ka pangura Hompa Saromo, nava ga zonagwire mositata saSodoma naGomora ntani nava ga zonagwire koruhanzo?

Kapi tuna diva nsene Jehova nga ka vhumbura vantu owo. Nye eyi twa diva yeyi asi Jehova ga kara nonkenda ntani ga diva mauzera nagenye.​—w24.05, epe. 3-4.

Yisinke adi tu huguvaresa nonkango edi asi Karunga “Emanya”? (Deut. 32:4)

Jehova kutupopera. Age mulimburukwi ntani kapi nga tu sigilira. Ntani nkenye apa nga sikisa mo matumbwidiro gendi. Jehova kapi a litjindji. Yikara ntani nositambo sendi kapi ayi litjindji.​—w24.06, epe. 26-28.

Yisinke nayi kuvatera yipo o yike mbungakriste zeni zompe?

Huguvara mwaJehova yipo za ku vatere ngwendi moomu ga vaterere vakareli vendi womosiruwo sanare. Nyokera po kuhetakanesa mbungakriste zeni zompe nezi zanare. Li hameka mo mombungakriste ntani tulisa po vakaume wovape.​—w24.07, epe. 26-28

Yisinke natu lirongera ko koyifanekeso yitatu eyi yakara mwaMateusa egaununo 25?

Sifanekeso sononzwi noyikombo kwa faturura mulyo gokulimburukwa. Ano sifanekeso sovakadona wonondunge nava womagova kwa fanekesa eyi ya karera nomulyo kuliwapaikira nokuvangarara. Ntani sifanekeso soyimaliwa kwa faturura mulyo gokurugana unene.​—w24.09, pp. 20-24.

Kupi za hulire monaure nzugo zepevero lyontembeli ezi ga tungire Saromo?

Kuliza no-2 Histoli 3:4, matjango gamwe ganare kwa tumbura mo nometa 53, ano matjango gamwe nomatoroko gamwe kwa tumbura mo nometa 9. Ayo kumoneka asi efatururo eli lyokuhulilira lya liza nonometa dekuma lyontembeli.​—w24.10, epe. 31.

Yisinke ayi tanta komukwafimbunga mokukara “nomukadi gumwe tupu?” (1 Tim. 3:12)

Ayo kutanta asi age kwa kwara mukadi gumwe tupu ntani kapisi a hondere ndi a lihorese kovakadi vapeke.​—w24.11, epe. 19.

Morwasinke natu uyungira asi nonkango edi ga uyungire Jesus mwaJohanesa 6:53 kapi da tamba kweyi yahorokere poMurarero gwaHompa?

Johanesa 6:53 kwa uyunga mo kuhamena kulya rutu rwaJesus nokunwa honde zendi. Jesus kwa uyungire nonkango edi apa ga kere moGalireya momvhura 32. Nonkango edi kwa di tanterere Vajuda ava vahepere kupura mwendi. Nye nampili ngoso, Murarero gwaHompa kwa gu tulisire po konyima zomvhura zimwe moJerusarema. Jesus kwa uyungisire ava nga ka pangera nawo meguru.​—w24.12, epe. 10-11.