Honena sikara saJehova sonkenda
“HOMPA, Karunga goMufenkenda, age Karunga gombili.”—EX. 34:6.
1. Monkedi musinke Jehova ga lisingwenene kwaMosesa ntani morwasinke ya karere nomulyo?
POSIKANDO simwe, Karunga kwa lisingonwene mwene kwaMosesa edina lyendi noyikara yendi. Yikara yokuhova ga tumbwire kuna kara nkenda nombili. (Resa Exodus 34:5-7.) Mevango lyokutantera Mosesa yikara yendi ngwendi nonkondo ndi unongo, age kwa mu tanterere yikara eyi ya likidire asi age kwa hara kuvatera vakareli vendi. (Ex. 33:13) Ayo kutuhafesa kweyi Karunga ga tumbwire yikara oyo yoyiwa mevango lyokutumbura yikara yikwawo. Sirongwa esi tasi ka zogera kuhamena sikara sonkenda eyi ya kwatera mo hena kuvatera ava vana kuhepa.
2, 3. (a) Yisinke yina kulikida asi vantu kwa kara nosikara sonkenda? (b) Morwasinke natu lirongera sikara sonkenda?
2 Vantu kwa va ungire va fane Karunga. Morwa Jehova ga kara nonkenda, vantu navenye nawo kulikida nkenda mokuvatera wopeke. Nampili ava va dira kudiva Karunga gosili nawo Gen. 1:27) MoBibeli kugwana mo yihonena omu Jehova navamwe va likidire nkenda. Diworoka sihorokwa sonohondedi mbali edi da litatanene komeho zaSaromo kuhamena asi yilye po zinya gomukeke. Apa Saromo ga hetekere kuteta mukeke pokatji, zinya gomukeke ogo yipo ga likwamberere kwaSaromo a sige mukeke. Nkenda kwa mu ninkisire a hare kugava mukeke gwendi komukadi gwapeke. (1 Vah. 3:23-27) Ntani diworoka sihonena samunwaFarawo ogu ga poperere Mosesa apa ga kere mukeke. Nampili ngomu ga divire asi mukeke gwina kwa kere Muhebeli ntani va hepere kumudipaga nye age ta mu “retere nkenda” nokutokora kumurera nga munwendi.—Ex. 2:5, 6.
kulikida nkenda. (3 Morwasinke natu lirongera kuhamena sikara sonkenda? Morwa Bibeli kututumangeda tu honene Jehova. (Efe. 5:1, 2) Nampili ngomu va tu sita nosikara sonkenda nye morwa kudira kusikilira mo, ose pamwe kuliharera uwa wanyamwetu. Poyiruwo yimwe, ose kutudigopera kuvatera vantu wopeke. Vamwe kuvadigopera kutokora kuvatera wopeke. Yisinke nayi kuvatera yipo o vhure kutwikira kuvatera wopeke? Pomuhowo, gazadara ko omu Jehova ga likida nkenda ntani omu wopeke va zi likida. Sauvali, gazadara ko omu no honena Karunga ntani nomu no gwanena mo mauwa.
JEHOVA, SIHONENA SOSIWA PO SONKENDA
4. (a) Morwasinke Jehova ga tuminine vaengeli va ze koSodoma? (b) Yisinke natu lirongera ko kosihorokwa saRoto novana vendi wovakadona?
4 MoBibeli mwa kara yihonena yoyinzi omu Jehova ga likidire nkenda. Gazadara ko eyi Karunga ga ruganenene Roto. Mugara ogo kwa mu ‘koresere’ yikara yoyidona yovantu ava va tungire moSodoma naGomora. Karunga kwa tokwere kuzonagura po vantu vena wovadona. (2 Pet. 2:7, 8) Age kwa tumine vaengeli va ka popere Roto. Vaengeli owo kwa tumangedere Roto nepata lyendi va tjwayuke mo moyitata eyi va ya zonagwire. Bibeli kutanta asi: “Nye age kuna kulikatakata, owo [vaengeli] makura tava mu kwata kokuwoko namukadendi novana vendi wovakadi vavali, morwa HOMPA kwa [va fililire nkenda]. Makura ta va pwagesa ponze zositata.” (Gen. 19:16) Sihorokwa oso kulikida asi Jehova ga diva maudigu aga ava ligwanekere nago vakareli vendi wovalimburukwi.—Jes. 63:7-9; Jak. 5:11; 2 Pet. 2:9.
5. Ngapi Nonkango daKarunga edi da kara mwa-1 Johanesa 3:17 adi tu vatere tu likide nkenda?
5 Jehova kapi tupu a likida nkenda nye age hena kwa ronga vakareli vendi omu nava likida sikara oso. Vaisraeli kwa va silikire kugusa erwakani lyomuntu ogu ga va lira makongo. (Resa Exodus 22:26, 27.) Poyiruwo yimwe ogu nga korotesa makongo, ngayi mu tumangeda kugusa erwakani lyogu ga mu lira makongo nokumusiga ga hana yuma yokulikudumika pokurara. Nye Jehova kwa rongere vantu vendi va nyokere po nkareso zangoso. Vantu vendi va hepere kukara wonkenda. Mpango zina kutuvatera tu likide nkenda kwava wopeke. Tuna hara kuvatera vakwetu ava vana kuhepa.—Koros. 3:12; Jak. 2:15, 16, resa 1 Johanesa 3:17.
6. Yisinke natu lirongera ko kweyi Jehova ga likidire nkenda Vaisraeli?
6 Jehova kwa fililire nkenda Vaisraeli nampili ngomu va zonene. Bibeli kutanta asi: “HOMPA Karunga gozinyakurwawo, kwa twikilire kuvatumina vaporofete va rondore mbunga zendi, yeeyi asi age kwa here kuvaparura nontembeli.” (2 Hist. 36:15) Nose kuvhura tu likide nkenda kovantu yipo va litezurure kononzo dawo ntani yipo Karunga a va hafere. Jehova kapi ga hara asi ngapa zonauke nampili gumwe. (2 Pet. 3:9) Tu twikireni kuzuvhisira vantu dogoro apa Karunga nga ka zonagura po vadinikarunga.
7, 8. Morwasinke epata limwe lya yi pulilire asi Jehova kwava vaterere?
7 Pwa kara yihorokwa yoyinzi omu Jehova ga likida nkenda zendi. Tu tareni eyi ya horokerere epata limwe omu mwa kere mumati gonomvhura 12 gedina Milan. Sihorokwa esi kwa horokere posiruwo soyita pokatji konomuhoko mo-1990. Milan namumbyendi gomumati novakondi vendi ntani Nombangi dimwe kwa zire ko Serbia nombesa va tunde ko Bosnia. Awo kwa zire kosigongi oku ngano vakurona vendi va ka gwene ekuho. Nye apa va ka sikire pomururani, vakwayita tava pwagesa mo epata lyoMilan mombesa morwa awo kwa kere womuhoko gwapeke, nye vapuli vakwawo kwava sigire va pite. Konyima zokukara modorongo mazuva gavali, mukwayita yipo ga pulire mukondi gwawo eyi nava va rugana. Epata lina lya zuvhire eyi ga uyungire mukondi govakwayita asi: “Va twareni mukavaroye.”
8 Ngomu mukwayita gwina ga uyungire novakwayita vakwawo, makura tapa wiza vagara vavali kepata olyo nokulidivisa vene asi awo Nombangi. Vagara owo kwa zuvhire eyi ya horokerere epata olyo kovakwawo mombesa. Awo tava tantere Milan namumbyendi va ronde nokupita pomururani morwa vanona kapi va va pulire nodokumende. Makura tava tantere vakondi vaMilan va kunduruke mururani va ka ligwane komeho. Milan kapi ga divire eyi na rugana. Vakondi vendi yipo va pulire asi: “One ngoso kuna kugazara asi awo kuvhura va tu sige tu pite mawoko-woko ndi?” Ngomu va gendere, ayo kwa kere ngwendi vakwayita kapi vana kuvamona. Epata lina lya ka ligwene kumwe novana vawo. Awo va twikilire norugendo rwawo rokuza kosigongi ntani awo va yi divire asi Jehova kwa limbwilire makanderero gawo. Bibeli kwa likida asi poyiruwo yimwe Jehova kapi nga vyukilire kupopera vakareli vendi. (Yirug. 7:58-60) Milan kwa tanta asi: “Jehova ga tu vaterere tu pite pomururani gwina.”—Epis. 97:10.
9. Yisinke ga rugene Jesus apa ga mwene mbunga zovantu? (Tara efano pepenuno 8.)
9 Ose kuvhura tu lirongere ko kwaJesus. Age kwa fililire nkenda mbunga ezi ga mwene “yeeyi va hepere va lifane nononzwi dokuzumbana da hana musita.” Yisinke ga rugene apa ga mwene mbunga ozo? Age kwa ‘tamekere kuvaronga yoyinzi.’ (Mat. 9:36; resa Marukusa 6:34.) Nkareso zendi za lisigire nezi zoVafalisayi, ava ngava dili kuvatera wopeke. (Mat. 12:9-14; 23:4; Joh. 7:49) Ngwendi Jesus, ngano yi ku tumangede mokuronga wopeke Bibeli.
10, 11. Kuvhura tu likide nkenda nkenye apa ndi? Faturura.
10 Jehova kapi a likida nkenda momaukaro gamwe. Jehova kwa likidire nkenda moyihorokwa yimwe yomoBibeli eyi tuna zogere. Nampili ngoso, hompa Sauru kapi ga limburukwire apa ga rugene yininke 1 Sam. 15:3, 9, 15) Jehova Mupangeli gouhunga. Age kwa diva nomutjima dovantu ntani ga diva nsene asi muntu ana kara sili nonkenda zene-zene. (Malira. 2:17; Hes. 5:11) Siruwo ta si wiza apa Jehova ngaya zonagura po vantu ava nyoka kumulimburukwa. (2 Tes. 1:6-10) Posiruwo oso age kapi hena nga va fira nkenda morwa ga va pangura nare asi awo vadinikarunga. Pokukazonagura po vadinikarunga, Jehova nga ka likida nkenda vahungami ava nga ka parura.
eyi ga gazarere asi kuna kulikida nkenda. Age kwa parwire mwenyo gwaAgaga ogu ga kere nkore zovantu vaKarunga ntani hena kapi ga dipagere yimuna. Ngoyitundwamo, Jehova kwa nyokere Sauru mokudira kukara hompa goVaisraeli. (11 Yipo nye, ose kapi twa kara nononkondo dokupangura vantu nsene asi awo ngava ka va zonagura po ndi ngava ka va parura. Nye, twa hepa kulitura mo mokuvatera vantu. Ngapi omu natu likida nkenda kovantu? Tu tareni nonkedi dimwe.
TUNGA PO SIKARA SONKENDA NOKUSILIKIDA
12. Ngapi omu no likida nkenda kwava wopeke?
12 Vatera nkenye apa. Kulikida nkenda kwava wopeke nokovapuli vakwetu kuna kara sihepwa sava ava honene Jesus. (Joh. 13:34, 35; 1 Pet. 3:8) Nkenda kutanta hena asi “kuhepa kumwe novakwetetu.” Muntu gonkenda kwa hara kuvatera vantu ava vana kupita momaudigu. Yipo nye, papara nompito mokuvatera wopeke. Pasihonena, kuvhura o vatere gumwe noyirugana yemembo.—Mat. 7:12.
Likida nkenda pokuvatera wopeke (Tara paragarafu 12)
13. Sikara musinke vantu vaKarunga ava likida apa ayi horoka yimpagwa?
13 Vatera moyimpagwa. Nkenda kututumangeda tu vatere vantu ava ayi kundama yimpagwa. Vantu vaJehova kwa va divira kevatero eli ava gava nsene pana horoka yimpagwa. (1 Pet. 2:17) Munazinyetukadi goMuyapani kwa tungire momukunda omu mwa horokere ekankamo lyevhu nomankupi gomanene mo-2011. Age kwa tanta asi: “Ayo kwa korangedere nge nokuhengagwida nge” kelituro mo lyovalizambeli ava va tundire konomukunda dapeke nokoyirongo yapeke va ya wapukurure eyi ya zonaukire. Age kwa tjenge hena asi: “Sihorokwa esi kwa vatera nge ni dimburure asi Jehova kupakera nge mbili. Ntani vapuli vakwetetu uzuni mudima kwa lihara-hara ntani awo kutukanderera po.”
14. Ngapi omu no vatera vaveli novakurupe?
14 Vatera vaveli novakurupe. Ose kulikida vantu nkenda apa atu va mono kuna kuhepa. Kuna kundindira nononkondo apa mauvera noukurupe ngayi ka haga po. Yipo nye, ose kukanderera asi Uhompa waKarunga u wize. Nye posiruwo esi twa hepa kulitura mo unene mokuvatera ava vana ku hepa. Tu tareni eyi ga tjenge mutjangi gumwe kuhamena ozina ava va kere nouvera wokudivara-divara. Ezuva limwe awo kwa li tjisilire yuma koyikoverero yawo. Apa va here kulizeresa, makura tava zuvhu vantu kuna kungongora kevero. Vantu owo va ngongwere kevero kwa kere Nombangi edi ngadi dingura mukadi ogo. Awo kwa pulire mukadi ogo nsene kuvhura va mu vatere. Mukadi ta limburura asi: “Ayo kufisa nomuga, nye nawa tupu.” Makura vakadi vena tava mu vatere kuzeresa. Konyima tava ninki ko kofi nokuhingira va simwitire. Munwa gwa googwina mukadi kwa mu hafesere sili. Age kwa tjenge asi: “Tani pandura Nombangi. Awo kusikisa mo eyi ava rongo vantu.” Nkenda kututumangeda tu vatere wokuvera novakurupe.—Fil. 2:3, 4.
15. Ngapi sirugana sokuzuvhisa asi vatere vantu?
15 Vatera vantu pokuvaronga Bibeli. Maudigu aga ava ligwanekere nago vantu kututumangeda tu va ronge Bibeli. Nkedi zimwe omu natu yi rugana eyi kuna kara pokuvaronga kuhamena Karunga ntani neyi Uhompa wendi ngau ka ruganena vantu. Ano nkedi zimwe hena, pokuvavatera va dimburure mulyo gokuparuka kuliza nonompango daKarunga. (Jes. 48:17, 18) Litura mo unene mosirugana sokuzuvhisa esi asi yererepeke Jehova nokulikida nkenda wopeke.—1 Tim. 2:3, 4.
KUKARA NONKENDA MULYO KWANYAMWETU
16. Uwa musinke atu gwanene mo pokulikida nkenda?
16 Valirongi woukanguki kwa tanta asi kulikida nkenda kuvhura kukundama ukanguki wetu monaruwa ntani nonkareso zetu apa atu kara novantu. Nsene o vatera vantu kapi ngo lizuvha mukuma ndi o kare nomagazaro gomadona nye ove ngo kara noruhafo. Yosili, ove ngo gwanena mo uwa. (Efe. 4:31, 32) Vakriste ava ava vatere vakwawo kukara nezwi lyewa lyokomutjima morwa awo kusikisa mo nompango domoBibeli. Kukara nonkareso zangoso kutuvatera tu kare vakurona wovawa novalikwali wovawa ntani vakaume wovawa. Ava ava likida nkenda nawo kugwana evatero kovakwawo.—Resa Mateusa 5:7; Rukasa 6:38.
17. Morwasinke ono harere kutunga po sikara sonkenda nokusilikida?
17 Kulikida nkenda mulyo unene, nye kapisi tu yi ruganene morwa kuhara tupu kugwanene mo mauwa. Nye twa hepa kuyirugana morwa tuna hara kuhonena nokuyererepeka Jehova Karunga. (Yis. 14:31) Age kwa tu tulira po sihonena sosiwa. Tu mu honeneni pokuhara vanavazinyetu ntani nava wopeke pokuvalikida nkenda.—Gar. 6:10; 1 Joh. 4:16.