ESIMWITITI
Na gwanena mo mauwa pokurugana kumwe novanavazinyetu
MOMVHURA 1930 yikandwise, vakondi vange James naJessie Sinclair yipo va dirukilire momukunda gomositata saNew York. Awo kwa ka lidivire naWillie Sneddon ogu ga tundire nage koSikotoranda. Apa va ligwene pomuhowo tava simwitire kuhamena makoro gawo. Oyo kwa horokere komeho va ya hampuruke nge.
Onane kwa tanterere Willie asi omama wovagara namukurwawo kwa deme apa sikepa sawo sa litoonene mo mina ezi za kere mefuta. Makura Willie tava tantere asi: “Oguhwo kuna kupya momundiro gwanarunye.” Age kwa kere gumwe goNombangi daJehova, ano monkedi ezi gava limbwilire kwa va tukukisire.
Willie naLiz Sneddon
Onane kwa handukire morwa va yi divire asi otate vawo kwa kere muntu gomuwa. Nye Willie tava pura asi: “Ngapi nomu lizuvha nsene ni mu tantera asi Jesus kwa zire momundiro gwanarunye?” Makura onane tava diworoka eyi ngava va rongo kongereka asi Jesus kwa zire momundiro gwanarunye ano mezuva lyautatu ta vhumbuka. Awo tava lipura asi: “Nsene asi vadinikarunga yiwo ava zi momundiro gwanarunye, morwasinke ga zi lilire mo Jesus?” Eyi kwa ninkisire onane va hare kulironga Bibeli. Awo va ya tamekere kuza komapongo ano mo-1940 tava gwana ekuho.
Kumwe nonane ano konyima notate
Posiruwo sina, vakondi kapi ngava va korangeda va lironge Bibeli novana vawo. Apa ngava zi onane komapongo ntani mokuzuvhisa, ame ngani kara notate membo. Konyima zosiruwo, nose twa ya tamekere kuza komapongo. Onane ngava litura mo mokuzuvhisa ntani va kere novarongwa velituromo. Sikando simwe awo kwa rongere varongwa vawo ngombunga morwa mambo gawo kwa li kere pepi. Apa ngazi pata sure, ngani zi nawo moyirugana yokuzuvhisa. Na lirongerere ko yoyinzi kwawo kuhamena Bibeli ntani nomu nani zi ruganesa mokuronga wopeke.
Apa na kere munona kapi na here nawa usili. Nye apa naya kere nonomvhura 12
tani ya tameke kuzuvhisa ntani ngani lihameke mo nkenye apa. Ame kwa ligeve kwaJehova apa na kere nonomvhura 16 ano mo-24 Pembankuru 1954 tani gwana ekuho posigongi sa kere moKanada.TANI KA RUGANA KOBETELI
Vanavazinyetu vamwe womombungakriste zetu ngava rugana koBeteli. Awo kwa vaterere nge. Ayo ngayi tetukisa nge monkedi ezi ngava rongo nokufaturura Matjangwa. Nampili ngomu vamitili vetu ngava kondjesa nge ni ze kerongo lyokuzeruka, ame kwa here kuza koBeteli. Yipo na tulire mo ehundiro lyokuza koBeteli posigongi esi sa kere moKanada apa na gwene ekuho. Mo-1955 yipo na tulire mo hena ehundiro posigongi esi sa kere mositata saNew York. Mo-19 Sitarara 1955 apa na kere nonomvhura 17 tava tambura nge koBeteli moBrooklyn. Ezuva lyange lyauvali moBeteli, tani tameke kurugana momberewa omu ngava tura kumwe mapepa. Konyima naya ruganesere mahina aga ngaga tura kumwe yipepa monobuke.
Apa na ka tamekere koBeteli nonomvhura 17
Konyima tani ka rugana modepartemende zoyifo morwa na divire kutopa-topa. Pwanare vanavazinyetu ngava tjanga noaderesi dava ngava tura mo mahundiro goRuhungu no Awake! Ano konyima zomakwedi gongandi tani ka rugana ko departemende zokutuma yimbapira. Mutareli gwetu Klaus Jensen kwa tanterere nge ni vatere musingi ogu nga twara yimbapiratjangwa komazenga va ka yi tume. Ose hena ngatu twara yimbapiratjangwa koposa va ka yi tume konombungakriste domoAmerika. Munazinyetu Jensen kwa tanterere nge asi sirugana oso va pere nge nga si pameka rutu rwange morwa ame kwa kere norutu rorununu.
Yosili, eyi ga tanterere nge munazinyetu Jensen, ya vaterere nge ni pame parutu.Departemende zoyifo ngazi rongere yifo eyi ngadi hundire nombungakriste. Yipo nye naya divire maraka omu yimbapiratjangwa yetu ava yi nduruka moAmerika nokuyituma koyirongo yokulisiga-siga. Maraka gamwe kapi naga zuvha rumwe nye ya hafesere nge pokuzuvha asi yimbapiratjangwa oyo ngava yi tumu komavango gokulisiga-siga. Nampili ngomu na dilire kudiva yirongo oyo, konyima na ya gwene mpito zokuka dingura yimwe.
Robert Wallen naCharles Molohan kumwe name naDon Adams
Momvhura 1961 yipo na tamekere kurugana momberewa zoyimaliva ezi nga pitisire Grant Suiter. Konyima zonomvhura dongandi, tava zigida nge komberewa zaNathan Knorr, ogu nga pitisire sirugana soNombangi daJehova. Makura ta tantere nge asi munazinyetu ogu nga rugana momberewa zendi ta zi koSikora zoYirugana yoUhompa ure wokwedi ano apa nga ka tengura nga ya rugana modepartemende zoYirugana yoKuzuvhisa. Tava pe nge situmbukira sendi nokurugana kumwe naDon Adams. Makura tani ya dimburura asi Don yige ga tambwire ehundiro lyange lyokuwiza koBeteli. Robert Wallen naCharles Molohan kuna kara vamwe ava ngava rugana momberewa ozo. Natuvenye moune wetu kwa rugene kumwe nomvhura dokupitakana po-50. Yosili, ayo ya hafesa nge pokurugana kumwe novanavazinyetu wovalimburukwi.—Epis. 133:1.
Sikando sange sokuhova kukadingura moVenezuela mo-1970
Momvhura 1970, yipo va pere nge situmbukira sokudingura nomberewa domutayi doWatch Tower Society. Ame ngani dingura mapata goVabeteli novatumwa
uzuni mudima mokuvakorangeda nokutara eyi ngadi tompora nomberewa domutayi. Ayo ya hafesere nge pokukalimona novanavazinyetu ava va tundire koSikora zaGiliyata ntani pokuvamona omu ngava twikire mosirugana sawo. Ame kulizuvha ruhafo kweyi na dingura yirongo yokupitakana po-90.Ee ruhafo musi mokudingura vanavazinyetu moyirongo yokupitakana po-90!
TANI GWANA KAUME
Vanavazinyetu womoBeteli zomoBrooklyn kwa va gawinine monombungakriste dokulisiga-siga mositata saNew York. Ame kwa tulire nge mombungakriste zomomukunda gwaBronx. Mbungakriste zokuhova momukunda gwina kwa zi gawinine pavali. Ame ngani zi kombungakriste ezi za hovere kukara po zedina Upper Bronx.
Momvhura 1960 yikandwise epata lyokoLatvia kwa dirukilire momukunda omu za kere mbungakriste zetu. Apa ga mene sure munwawo gombeli gomukadona Livija, ta tameke uzuvhisi wokukarerera. Konyima zomakwedi gongandi ta dirukire komukunda oku va hepere vazuvhisi. Yipo na tamekere kumutjangera mokumudivisa eyi ngatu tompora mombungakriste. Ano nage nga tjangere nge a divise nge omu nga si va tompoka sirugana sokuzuvhisa.
Name naLivija
Konyima zonomvhura dongandi, Livija ta ya kara muzuvhisi gosiruwo nasinye. Age kwa here kuruganena Jehova unene, yipo ga tulire mo ehundiro lyokuza koBeteli, ano mo-1971 tava mu tambura. Ayo kwa hafesere nge sili unene. Mo-27 Sikukutu 1973 tava tu kwareke ano siuyungwa setu sononkwara kwa si geve munazinyetu Nathan Knorr. Yisewe 18:22 kwa tanta asi: “Nsene mukadi ono gwana, sininke sosiwa ono gwana; ayo sidiviso asi HOMPA kwa ku hafera.” Name namukadange Livija kwa rugana koBeteli kupitakana nomvhura 40. Ose simpe kuvatera mbungakriste zapeke za kara momukunda gwaBronx.
KURUGANA KUMWE NOVANAVAZINYETU
Ame kwa hafera kurugana kumwe namunazinyetu Nathan Knorr. Age nga rugana unene ntani nga vatere vatumwa uzuni mudima. Sinzi sovatumwa owo kwa kere Nombangi daJehova dokuhova koyirongo omu va va tumine. Ayo kwa guvisire nge apa munazinyetu Nathan Knorr ga tamekere kuvera kankera mo-1976. Apa wa ya didire uvera wendi, ta pura nge ni mu resere yimbapiratjangwa komeho va ka yi nduruke. Ta tantere nge ni zigide Frederick Franz nage aya kare po. Konyima naya dimbwilire asi munazinyetu Nathan Knorr yige nga resere Frederick Franz morwa age kapi nga mono nawa.
Tatu ka dingura moTogo kumwe naDaniel Sydlik namukadendi Marina mo-1977
Munazinyetu Nathan Knorr kwa dogorokere mo-1977, ayo kwa hengagwidire Ehor. 2:10) Munazinyetu Franz yipo gaya gusire situmbukira sendi.
vanavazinyetu ava vamu divire morwa age kwa ya fire noulimburukwi. (Posiruwo oso ame kwa ya kere hamutjanga gwaMilton Henschel ogu nga rugana kumwe naNathan Knorr. Age kwa pere nge situmbukira sokuvatera munazinyetu Franz. Ame ngani mu resere yimbapiratjangwa komeho va ka yi nduruke. Age nga purakene nawa apa ngani mu resere ntani nga diworoka yininke usimbu. Ayo ya hafesere nge mokumuvatera dogoro apa gaya dogorokere mwaSindimba 1992.
Oku na rugene nomvhura dononzi
Nomvhura 61 edi na kere koBeteli kwa genderera sili. Vakondi vange kwa ya dogorokere noulimburukwi, ame kuna ku ndindira nononkondo mokukavamona pevhumbuko. (Joh. 5:28, 29) Mauwa aga na gwana mokuruganena kumwe novanavazinyetu wovalimburukwi manzi unene kupitakana eyi nau vhura kugava uzuni ou. Name namukadange, kuvhura tu tante asi nomvhura nadinye twa karera Jehova, ‘ehafo lyendi [kwa ya kara] nonkondo detu.’—Neh. 8:10.
Sirugana sokuzuvhisa kapi sa korera momuntu gongandi, aso kuvhura kutwikira komeho. Ame nina hafa kweyi na gwene mpito zokurugana kumwe novanavazinyetu wovalimburukwi nomvhura dononzi. Sinzi sovagwavekwa ava ngani rugana nawo va dogoroka. Nye nina hafa kweyi na kere kaume kawo mosirugana saJehova.