‘Nonkango daKarunga kwa kara nononkondo’
“Nonkango daKarunga kwa kara nomwenyo nononkondo.”—HEB. 4:12.
MARUSUMO: 114, 113
1. Ngapi omu tuna yi diva asi Bibeli kurundurura eparu lyovantu? (Tara efano.)
NGOVAKARELI vaJehova, ose twa diva asi Nonkango dendi “kwa kara nomwenyo nononkondo.” (Heb. 4:12) Sinzi setu twa limonena omu Bibeli za rundurura eparu lyetu. Vamwe kwa kere vakorokotji, ngava koko epangwe ntani ngava hondere. Ano vamwe kwa gazarere asi kuna kuhafera eparu nye tava ya dimburura asi nayinye eyi va kondjerere nayimwe si. (Muud. 2:3-11) Ntani vamwe ava va monekere asi kapi tava vhuru kutura po marunduruko, Bibeli za ya va rundurura. Ove nampo kwa hara kuresa yihorokwa eyi ava tura moRuhungu kuhamena, “Bibeli kurundurura eparu lyovantu.” Nampili konyima zokuyadiva usili womoBibeli, Vakriste kutwikira kutura po marunduruko.
2. Ngapi Nonkango daKarunga da vaterere vapuli vakwetu posiruwo sovapositoli?
2 Kapisi yi tu tetukise pokumona marunduruko aga vana kutura po vantu pokulironga Nonkango daKarunga. Noposiruwo sovapositoli pwa kere vamwe ava va hamenene kombunga zava ngava ka parukira meguru ava va hepere kutura po marunduruko. (Resa 1 Vakolinte 6:9-11.) Apa Paurusa ga tumbwire ava ngava dira kupinga Uhompa waKarunga, ga tente hena asi: “Vakweneni vamwe yimo va kere.” Nye nevatero lyoMatjangwa nompepo zokupongoka zaKarunga va vhulire kutura po marunduruko. Nampili konyima zokutambura usili womoMatjangwa, vamwe simpe va hepere kutura po marunduruko. MoBibeli kwa tumbura mo mugwavekwa mosiruwo sovapositoli ogu va gusire mo mombunga ano konyima tava mu tengwidire mo. (1 Kol. 5:1-5; 2 Kol. 2:5-8) Ayo kutukorangeda pokudiva maudigu aga va pitire vapuli vakwetu nomu va tulire po marunduruko nevatero lyoNonkango daKarunga.
3. Yisinke natu ka tarurura mosirongwa esi?
3 Mokumona asi Nonkango daKarunga kwa kara nononkondo dokurundurura eparu lyovantu, ngano tu di ruganese nawa. (2 Tim. 2:15) Mosirongwa esi tatu ka tarurura omu natu ruganesa Nonkango daKarunga (1) meparu lyetu, (2) moyirugana yokuzuvhisa, ntani (3) nsene kuna kugava siuyungwa. Eyi natu ka lironga ngayi tu tumangeda tu likide rupandu nokuhara Guhyetu gemeguru ogu atu rongo morwa uwa wanyamwetu.––Jes. 48:17.
MEPARU LYETU
4. (a) Yisinke twa hepa kurugana mokugwanena mo uwa moNonkango daKarunga? (b) Siruwoke o resa Bibeli?
4 Mokugwanena mo uwa moNonkango daKarunga, twa hepa kudiresa nkenye ezuva. (Jos. 1:8) Pomazuva aga, udigu kugwana siruwo. Nampili ngoso, twa ha pulisira yininke ya hana hepero yi tu donganese mokuresa Bibeli. (Resa Vaefeso 5:15, 16.) Sinzi sovakareli vaJehova va litulira po siruwo mokuresa Bibeli nkenye ezuva, yi kare asi ngurangura ndi metaha ndi ngurova. Awo kulizuvha ngwendi mutjangi gepisarome ogu ga tente asi: “Ee, yireru omu na hara Veta zoge! Ame kuziteda ezuva mudima.”—Epis. 119:97.
5, 6. (a) Morwasinke ya karera nomulyo kuteda? (b) Ngapi omu natu vhura kuteda? (c) Mauwa musinke wa gwanena mo pokuresa Nonkango daKarunga nokuteda ko?
5 Mevango lyokuresa tupu, ayo mulyo hena kuteda ko kweyi tuna kuresa. (Epis. 1:1-3) Nsene tu yi rugana oyo, ose ngatu vhura kutura pasirugana eyi tuna kulironga. Pokuresa Bibeli, sitambo setu sa hepa kukara asi Nonkango daKarunga di tu twe komutjima.
6 Ngapi omu natu vhura kuteda? Vamwe nsene vana mana kuresa egaununo lyongandi moBibeli, awo tanko kuhageka va lipure asi: ‘Yisinke nina lirongere ko kuhamena Jehova? Ame kuna kutura pasirugana meparu lyange eyi nina resa ndi? Kokuli oku nani hepa kuwapukurura ndi?’ Pokuteda ko unene koNonkango daKarunga, ngayi tu tumangeda tu ture pasirugana mapukururo gamo. Ntani ose ngatu di ruganesa unene meparu lyetu.—2 Kol. 10:4, 5.
MOYIRUGANA YOKUZUVHISA
7. Ngapi omu natu ruganesa Nonkango daKarunga moyirugana yokuzuvhisa?
7 Yisinke nayi tu vatera tu ruganese nawa Nonkango daKarunga moyirugana yokuzuvhisa? Twa hepa kudiruganesa nkenye apa ngomu tuna kuzuvhisa nokuronga vantu. Munazinyetugara gumwe kwa pulire asi: “Nsene o pwaga naJehova mokuzuvhisa, ngo mu pulisira a uyunge ndi nyovelike ngo hokwa kuuyunga?” Sitwa sendi kwa kere asi: Apa atu resa Nonkango daKarunga moyirugana yokuzuvhisa, ose kuna kupulisira Jehova a uyunge novantu. Pokuresa etjangwa eli lina lizi noukaro womuntu, ngayi mu twa komutjima kupitakana tupu kumutantera nonkango. (1 Tes. 2:13) Lipura asi: ‘Ame kulitulira po sitambo sokuresa Nonkango daKarunga apa ani zuvhisa mbudi zongwa ndi?’
8. Morwasinke natu dilira kuresera tupu vantu Matjangwa apa atu zuvhisa?
8 Apa atu zuvhisire vantu, kapisi tu va resere tupu Matjangwa. Morwasinke? Morwa sinzi sawo kapi va zi diva nawa. Nampili mosiruwo sovapositoli mwa kere vantu vangoso. (Rom. 10:2) Yipo nye, nsene tuna resere muntu etjangwa kapisi tu gazare nare asi ana li kwata egano. Twa hepa kumufatwilira nawa eyi zina kutanta velise nazinye. Pokuyirugana ngoso, Nonkango daKarunga nga di vhura kumutwa komutjima.—Resa Rukasa 24:32.
9. Ngapi natu likida efumadeko koBibeli nsene tuna hara kulikida muntu eyi za uyunga ko? Gava sihonena.
9 Ntani hena pokulikida muntu eyi za uyunga ko Bibeli twa hepa kuyirugana nefumadeko. Pasihonena, kuvhura tu uyunge asi: “Tu tareni omu a lizuvhu Musiti gwetu kuhamena yininke oyo.” Nsene kuna kuuyunga nomuntu ga hana asi Mukriste, kuvhura tu tante asi: “Tu tareni eyi ga uyunga ko Matjangwa gokupongoka.” Ano muntu ogu ga lironga unene, kuvhura tu mu pure asi: “Wa di zuvha rumwe nonkango edi ndi?” Yipo nye, ose kuuyungisa nkenye muntu kuliza noukaro wendi.—1 Kol. 9:22, 23.
10. (a) Simwitira sihorokwa samunazinyetugara gumwe. (b) Simwitira omu wa mona Nonkango daKarunga kuna kuguma muntu komutjima.
10 Pokuruganesa Nonkango daKarunga, vazuvhisi wovanzi va limonena omu da guma vantu komutjima. Pasihonena, munazinyetugara kwa ka dingwire muswamane ogu nga resa yifo yetu nomvhura dononzi. Mevango lyokumupa tupu sifo soRuhungu, ta mu resere etjangwa lya kere mosifo oso. Age kwa resere 2 Vakolinte 1:3, 4 asi: ‘Guhya ga zura nkenda, age Karunga ogu atu hengagwida nkenye apa. Age yige a tu hengagwida momaudigu getu nagenye.’ Nonkango odo kwa twire sili komutjima muswamane gwina makura ta pura munazinyetugara a rese hena etjangwa olyo. Muswamane ogo kwa uyungire asi nage namukadendi kwa hepere ehengagwido. Ano kutunda opo age ga here kupurakena kombudi zomoBibeli. Nove no yi kwatesa ko asi apa atu zuvhisa, Nonkango daKarunga kuguma vantu komutjima.—Yirug. 19:20.
NSENE KUNA KUGAVA SIUYUNGWA
11. Situmbukira musinke va kara naso vanavazinyetugara ava ava gava yiuyungwa?
11 Apa atu kara momapongo nokoyigongi yetu ose kuyihafera morwa kuna kukarera Jehova. Ose hena kugwanena mo uwa kweyi atu lirongo. Vanavazinyetugara ava ava gava yiuyungwa poyilika oyo kuhafera situmbukira sawo. Nye hena va hepa kudiworoka asi aso kuna kara situmbukira somulyo. (Jak. 3:1) Yipo nye, va hepa kudivilisa asi eyi vana kuronga kuna kuliza noNonkango daKarunga. Ngapi omu no ruganesa Bibeli nsene kuna kugava siuyungwa?
12. Ngapi ogu ana kugava siuyungwa na divilisa asi kuna kuruganesa Matjangwa?
12 Divilisa asi eyi ono kuuyunga kuna kuliza noMatjangwa. (Joh. 7:16) Yisinke ya hamena mo? Kapisi o demenene unene koyihonena noyifanekeso nye faturura nawa novelise edi ono kuresa. Ntani diworoka asi kuronga nawa kapi ayi tanta asi wa hepa kuresa matjangwa gomanzi. Ntani nsene o resa matjangwa gomanzi, vantu kapi ngava ga diworoka. Yipo nye, horowora nawa matjangwa aga no resa ntani ga resa nawa nokugafaturura, nokugava sifanekeso sina kugakwatesa ko ntani faturura omu vantu nava tura pasirugana yitwa oyo. (Neh. 8:8) Nsene vana kupe ekamo lyosiuyungwa, resa mo nokutara matjangwa aga vana tura mo. Ntani koneka omu mauzera ogo gana kuliza nomatjangwa vana tura mo. Makura ruganesa matjangwa ogo ono horowora mokupwagesa yitwa yomosiuyungwa. (Kuvhura o gwane magano gamwe mobuke Gwanena mo uwa moSikora zoUkareli pepenuno 21 dogoro 23.) Yomulyo po, hundira Jehova a ku vatere o pwagese magano gomoNonkango dendi.—Resa Esira 7:10; Yisewe 3:13, 14.
13. (a) Ngapi munazinyetukadi gumwe ga gwanenene mo uwa momatjangwa aga ga ka zuvhire kepongo? (b) Mauwa musinke wa gwanena mo momatjangwa aga wa zuvha komapongo?
13 Munazinyetukadi gomoAustralia kwa mu twire komutjima matjangwa aga va resere kepongo. Nampili ngomu ga parukire eparu lyedona, apa ga ya kulire ga lirongere Bibeli nokuligava kwaJehova. Pomuhowo nga lizuvhu asi Jehova kapi ga mu hara. Nye mwaza siruwo, ta ya dimburura asi ga mu hara. Yisinke ya mu vaterere? Age kwa tedere ketjangwa eli ga ka zuvhire kepongo nokulihetakanesa nonovelise dimwe. * Nove ga kutwa rumwe komutjima matjangwa aga wa ka zuvhire komapongo nokoyigongi yetu ndi?—Neh. 8:12.
14. Ngapi omu natu mu pandura Jehova koNonkango edi ga tu pa?
14 Ose kuna lizuvha ruhafo kweyi Jehova ga tu pa Nonkango dendi, Bibeli. Age kapi tupu ga tu pa Nonkango dendi, nye ga sikisa mo etumbwidiro lyendi asi ado ngadi kara dogoro narunye. (1 Pet. 1:24, 25) Yipo nye, tu reseni Nonkango daKarunga nkenye ezuva nokutura pasirugana eyi tuna kuresa ntani nokudiruganesa mokuvatera wopeke. Nsene ngatu yi rugana oyo, ngatu likida asi twa fumadeka nokuhara Bibeli nye unene po Jehova Karunga ogu ga zi tu pa.
^ para. 13 Tara kakende “ Eyi ya vaterere nge.”
