1, 2. (a) Yisinke nayi horoka nsene muntu a dira kukara nelipangero? (b) Morwasinke yina karere nomulyo tu konakone kuhamena nkareso zelipangero?

ELIPANGERO kuna kara sikara esi natu tunga po nevatero lyaKarunga. (Gar. 5:22, 23) Jehova yige a likida nawa-nawa nkareso zelipangero. Nye ose kapi twa sikilira mo yipo nye kutudigopera kukara nonkareso zelipangero. Maudigu gomanzi ava ligwanekere nago vantu kuwiza po morwa kudira kukara nonkareso zokulipangera. Nkareso ozo kuninkisa muntu a dire kurugana yirugana nosiruwo ntani a dire kutompora nawa kosure ndi koyirugana. Azo hena kuninkisa muntu a uyunge nonkango donondona, a kare nkorwi nonyanya, mupika gomadowo ndi kutwaredesa kelizumbo nomakongo, kudompa mutjima ndi mauvera gomukagu ndi gwana ezimo wa hana kukwara ntani nayimwe hena.—Epis. 34:11-14.

² Vantu ava va dira kukara nonkareso zokulipangera kuliretera vene maudigu ntani nava wopeke. Momazuva aga udigu kugwana nkareso ozo movantu. Koyiha yomvhura 1940, kwa rugene ekonakono kombinga zelipangero, ano makonakono ganaina kulikida asi vantu kapi vana kulikida nawa-nawa nkareso ozo. Ava ava lirongo Nonkango daKarunga kapi tayi va tetukisa morwa moBibeli kwa pumba mo asi “pomazuva  gopouhura,” vantu kapi ngava kara nonkareso zelipangero.—2 Tim. 3:1-3.

3. Morwasinke ya karera nomulyo koVakriste va tunge po nkareso zokulipangera?

³ Morwasinke natu tungira po nkareso zelipangero? Tu tareni nokonda mbali domulyo. Zokuhova, vantu ava ava pangere malizuvho gawo kapi ava kara nomaudigu gomanzi. Awo kapi ava handuka usimbu ndi va guva-guve ndi va kare nosinka ntani awo kuvarerupira kutulisa po ukaume navamwe. Zauvali, mokuninka asi Karunga atu hafere, twa hepa kupangera malizuvho getu gomadona nokunyokera po mazedo. Adamu naEva kapi va hafesere Karunga. (Gen. 3:6) Gazadara ko komaudigu va ligwanekera nago ava va dira kukara nonkareso zokulipangera.

4. Yisinke nava diworoka owo vana kukondja kutunga po nkareso zelipangero?

⁴ Ose vantu kutudigopera kukara nonkareso zokulipangera morwa kapi twa sikilira mo. Jehova ga diva udigu wovakareli vendi, age ana hara kuvavatera va funde po madowo gomadona. (1 Vah. 8:46-50) Ntani navenye ava vana hara kumukarera nye kuna kukondja kupangera madowo gawo, Jehova ana hara kuvavatera morwa age kaume gomuwa. Tu tareni sihonena esi ga tura po Jehova. Natu ka tara hena yihonena yoyiwa neyi yoyidona yovantu ava va tumbura moBibeli. Konyima natu ka lironga hena magano gamwe aga naga tu vatera tu tunge po nkareso zelipangero.

5, 6. Ngapi omu Jehova ga likidire elipangero?

⁵ Nayinye eyi a rugana Jehova kwa hungama morwa age kwa sikilira mo. (Deut. 32:4) Nye ose kapi twa sikilira mo. Nampili ngoso, ose kuvhura kutunga po nkareso zelipangero pokulirongera ko kosihonena saJehova. Mononkedi musinke Jehova ga likidire elipangero?

⁶ Tu tareni omu Jehova ga lizuvhire apa Satana ga mu rwanesere. Jehova ga hepere kurugana ko yuma. Eyi ga uyungire Satana ya handukisire nokunyegenyesa vaengeli wovalimburukwi. Apa o mono ruhepo oru ga retesa po Satana nove pamwe kukuhandukisa. Nye Jehova kapi ga handukire poopo. Age kwa rugene eyi ya hungama. Ntani kwa lididimikira ehomono lyaSatana nokugendesa udigu owo monkedi zongwa. (Ex. 34:6; Joba 2:2-6) Morwasinke? Morwa Jehova kapi ga hara ngapa ka zonauke nampili muntu gumwe nye “kwa hara asi navenye ngava litezurure.”—2 Pet. 3:9.

7. Yisinke natu lirongera ko kwaJehova?

⁷ Tuna lirongere ko kwaJehova asi komeho tu uyunge ndi tu rugane yuma, kapisi tu genderere kurugana ko yuma. Nsene ono hara kutura po etokoro lyomulyo, wa hepa kugazadara ko pomuhowo. Hundira nondunge kwaKarunga o dive eyi no uyunga ndi no rugana. (Epis. 141:3) Nsene udigu una horoka, ose vantu ureru kuhanduka usimbu. Sinzi setu kwa ya livera morwa kugenderera kuuyunga ndi kurugana yuma.—Yis. 14:29; 15:28; 19:2.

8. (a) Kupi natu gwana yihonena yovantu ava va likidire nkareso zelipangero? (b) Yisinke ya vaterere Josefa a nyokere po ezedo lyamukadaPotifara? (Tara efano pepenuno 3.)

⁸ Wolye va tumbura moBibeli ava va likidire nkareso zelipangero? Poveli va tumbura moBibeli ava va likidire nkareso zelipangero apa va va hetekere. Josefa MunwaJakopo  kuna kara gumwe gwawo. Apa nga rugana membo lyaPotifara, age kwa pitire mezedo eli ga nyokerere po. MukadaPotifara kwa mu here morwa age kwa kere “norutu roruwa nosipa sosiwa.” Yisinke ya vaterere Josefa a nyokere po ezedo lyomukadi gwina? Age kwa gazadarere ko unene koyitundwamo yokuhondera. Apa ga mwene asi udigu una didi, makura ta duka mo membo. Age kwa tente asi: “Ngapi omu nani rugana-rugana udona wa hura opo, ni zone kwaKarunga gwange!”—Gen. 39:6, 9; resa Yisewe 1:10.

9. Yisinke no vhura kurugana yipo o nyokere po mazedo?

⁹ Yisinke natu lirongera ko kwaJosefa? Nsene kuna kutuzeda tu teze po noveta daKarunga twa hepa kuhenduka. Vamwe kwa kere makurulya nomakurunwa ntani ngava koko makanya nepangwe nokuhondera komeho va ya kare Nombangi daJehova. Nampili konyima zekuho, poyiruwo yimwe vamwe kuhara kutengwira konkareso zawo zanare. Nsene asi nove gumwe gwawo, teda ko unene koyitundwamo yoyidona yokudira kupangera madowo. Gazadara ko komeho zosiruwo maukaro aga naga vhura kukutura mezedo yipo o tokore eyi no vhura kurugana. (Epis. 26:4, 5; Yis. 22:3) Nsene ngo ligwanekera nomazedo, kanderera kwaJehova a kupe ko nondunge o vhure kulipangera.

10, 11. (a) Udigu musinke ava piti vadinkantu wovanzi? (b) Yisinke nayi vatera vadinkantu va nyokere po ezedo lyokuligwanekera panyama?

¹⁰ Naina vadinkantu woVakriste kuna kupita mezedo ngwendi eli ga pitire Josefa. Tu tareni sihonena saKim. Sinzi sovakwawo wokosure kwa kere novamati, ano konyima zosikondovike awo ngava simwitire omu ngava hafere eligwanekero panyama. Kim kapi ga kere nomumati. Age kwa uyunga asi pamwe nga lizuvhu “uresi” ntani vakwawo ngava mu tara asi egova morwa kwato mumati. Nye Kim ga ya yi dimbwilire asi eligwanekero panyama yilyo ezedo ava ligwanekere nalyo vadinkantu. (2 Tim. 2:22) Pamwe kosure ngava mu pura nsene ga ligwanekera rumwe panyama nomumati. Age nga ruganesa mpito ozo mokuvafatwilira konda zeyi nga dili kuyirugana. Kuna kupandura vadinkantu navenye ava ava nyokere po ezedo lyokuligwanekera panyama ntani Jehova nage kumuhafesa.

¹¹ MoBibeli kwa tumbura mo vamwe ava va gwililire mezedo lyokuligwanekera panyama. Ntani kwa tumbura mo hena yitundwamo yoyidona yokudira kupangera madowo getu. Nkenye ogu ana kupita moukaro ngwendi waKim a gazadare ko unene kosihorokwa somumati gegova ogu va tumbura moYisewe egaununo 7. Gazadareni ko hena tupu udona ou ga rugene Amunoni. (2 Sam. 13:1, 2, 10-15, 28-32) Vakurona kuvhura va vatere vana vawo va tunge po nkareso zelipangero pokuruganesa novelise odo poukareli wepata pokuzogera nawo kuhamena eligwanekero panyama.

12. (a) Ngapi omu Josefa ga pangerere malizuvho gendi apa ga mwene vakuru vendi? (b) Momaukaro musinke natu hepa kupangera malizuvho getu?

¹² Josefa ga tulire po hena sihonena sosiwa. Apa vakuru vendi va wizire koEgipite va ya rande nondya, age kwa lipangerere mokudira kulihorora mwene kwawo. Age kwa here kudiva eyi ya kere monomutjima dawo. Apa ga lizuvhire kukora komutjima, ta tundu po pwawo a ka papare evega a ka lire. (Gen. 43:30, 31; 45:1) Nsene Mukriste mukweni ndi muntu gwapeke ana kuhandukisa, rugana eyi ga rugene Josefa o nyokere po  kuhanduka. (Yis. 16:32; 17:27) Nsene gumwe gekoro va mu gusa mo mombunga, wa hepa kupangera malizuvho goge yipo o dire kupapara nompito dokuuyunga nendi. Udigu kulipangera momaukaro ogo, nye nga yi kara ureru nsene tu diva asi eyi tuna kurugana kuna kuliza nosihonena saKarunga nomavyukiso gendi.

13. Yisinke tuna lirongera ko kwahompa Ndafita?

¹³ Bibeli za tumbura hena sihonena sosiwa sahompa Ndafita. Nampili ngomu ga kere nononkondo kapi ga handukire apa Sauru naSimiye va mu handukisire. (1 Sam. 26:9-11; 2 Sam. 16:5-10) Nye momaukaro gamwe kapi ga vhulire kulipangera ngwendi apa ga honderere naBateseba ntani apa ga handukilire Nabali ogu ga nyokere kumupa ko nondya. (1 Sam. 25:10-13; 2 Sam. 11:2-4) Nampili ngoso, koyili yoyiwa natu lirongera ko kwaNdafita. Sokuhova, ava ava pitisire mombunga zaKarunga va hepa kulipangera yipo va dire kuruganesa momudona unankondo wawo. Sauvali, kapisi tu gazare asi kapi ngatu ligwanekera nomazedo.—1 Kol. 10:12.

14. Yisinke ya horokerere munazinyetugara gumwe ntani yisinke natu lirongera ko nsene tu pita moukaro wokulifana?

¹⁴ Yisinke no vhura kurugana o tunge po nkareso zelipangero? Tu konakoneni sihorokwa esi. Mugara gumwe kwa mbwende etuwa lyaLuigi. Mugara ogo ta tameke kutuka nokuhara kurwanesa Luigi nampili ngomu ga kere mepuko. Luigi ta kanderere nokuhundira Jehova a mu vatere a dire nage kuhanduka, makura ta hetekere ko kukava mugara ogo nye kapi ya tompokere. Makura Luigi ta tjanga mauzera goasuransi zogo mugara, konyima ta tundu po nokusiga mugara ogo age simpe kuna kuharauka. Konyima zosivike, apa Luigi ga zire a ka tare mukadi ogu ga likidire elituromo moBibeli ta ka nongonona asi mugara gwendi yige ga mbwende etuwa lyendi. Mugara ogo tali fu nomuga nokuhundira egusiropo konkareso zendi. Yipo ga tanterere Luigi asi na mu vatera mokutantera kampani zoasuransi zi rugane ko usimbu mokutuma yimaliwa. Mugara ogo nage ga purakenene konzogera zomoBibeli nokukwatesa ko eyi va uyungire. Luigi ga nongwenene mulyo gweyi ga dilire kuhanduka apa sa horokere siponga ntani neyi ya vhulire kuhoroka nsene asi nage ngano ga handukire.—Resa 2 Vakolinte 6:3, 4.

15, 16. Ngapi Bibeli nazi vhura kukuvatera nyamoge ntani nepata lyoge?

¹⁵ Kulitura mo unene mokulironga Bibeli ngayi vatera Vakriste va tunge po nkareso zelipangero. Karunga kwa tanterere Josuwa asi: “Nonkango edi dobuke ezi zoVeta, walye adi tundu mo mokana koge, nye o di tede mutenya nomasiku, asi o sikise mo nawa-nawa nayinye eyi va tjangera mo. Morwa ntani ngayi ku wapera nononzira doge, ove ngo kare nerago.” (Jos. 1:8) Ngapi omu Bibeli nazi vhura kukuvatera o tunge po nkareso zelipangero?

¹⁶ MoBibeli kwa kara mo yihorokwa eyi ya likida mauwa gokulipangera ntani maudona gokudira kulipangera. Jehova ga kere nositambo seyi ga pulisilire yihorokwa oyo va yi tjange. (Rom. 15:4) Ayo mulyo asi tu rese nokuteda ko nokulironga yihorokwa oyo. Gazadara ko eyi no vhura kulirongera ko nyamoge ntani nepata lyoge. Hundira Jehova a kuvatere o ture pasirugana Nonkango  dendi. Nsene o nongonona asi wa kara noudigu wokulipangera moyininke yongandi, yi tambura. Makura hundira Jehova a kuvatere, ntani hetekera ko kutura po marunduruko. (Jak. 1:5) Papara ko magano moyimbapiratjangwa yetu aga naga vhura kukuvatera.

17. Ngapi vakurona nava vatera vana vawo va tunge po nkareso zelipangero?

¹⁷ Ngapi no vatera vana woge va tunge po elipangero? Vakurona va yi diva asi kapi ya kara ureru kovanona mokulipangera. Yipo nye vanona va hepa kulironga kutunga po nkareso ozo ano vakurona va hepa kutura po sihonena sosiwa. (Efe. 6:4) Nsene o dimburura asi vana woge kuna kuvadigopera kupangera madowo gawo, lipura nsene asi ove kuna kutura po sihonena sosiwa. Diworokeni asi sihonena seni sokuza nkenye apa mokuzuvhisa nokomapongo ntani kurugana ukareli wepata mulyo unene. Mwa ha lizuvha udona nsene mu nyoka pamwe kupa vana veni eyi vana mu hundire. Jehova kwa pere Adamu naEva nompangera yipo va vhure kufumadeka upangeli wendi. Mokulifana, mokuronga vanona va kare nonkareso zokulipangera, vakurona va hepa kuvapisura nokutura po sihonena sosiwa. Yininke yomulyo po nomu vhura kuronga vana veni kuna kara kutambura upangeli waKarunga nokufumadeka noveta dendi.—Resa Yisewe 1:5, 7, 8.

18. Morwasinke no yi pulira asi vakaume wovawa ngava kuvatera?

¹⁸ Yi kare asi o mukurona ndi hawe, ya kara nomulyo kuhorowora vakaume wovawa. Likwata ukwawo nava ngava kukorangeda o ture po yitambo yoyiwa nokunyokera po nonkareso donondona. (Yis. 13:20) Vakaume wovawa ngava ku ninkisa nove o kare muntu gomuwa ntani ngo honena nkareso zawo zongwa zelipangero. Ntani hena nkareso zoge zongwa ngazi korangeda vakweni. Elipangero mulyo yipo atu hafere Karunga ntani tu kare nelikwatakano lyewa novakwetu.