1, 2. (a) Ngapi omu Jehova ga lisiga novanankondo? (b) Yisinke natu ka konakona mosirongwa esi?

VANANKONDO kwa hara “kupangera” nokuhepekera mo wopeke. (Mat. 20:25; Muud. 8:9) Nye Jehova ga lisiga novantu vangoso. Nampili ngomu ga kara Munankondo nadinye, age kugazadara ko vantu wokudira kusikilira mo. Age nkenda ntani kutupakera mbili. Jehova kapi a tu pura tu rugane eyi natu dira kuvhura kusikisa mo, morwa age “kudiworoka asi ose mbundu zevhu.”—Epis. 103:13, 14.

² MoBibeli kwa kara mo yihorokwa yoyinzi eyi ayi likida asi Jehova kugazadara ko vakareli vendi. Tu konakoneni yihorokwa yitatu. Sokuhova, omu Jehova ga vaterere mudinkantu Samwere a tware mbudi zepanguro komupristeli Eli. Sauvali, omu Jehova ga lididimikilire nampili ngomu Mosesa ga kere nomasinganyeko mokupitisira Vaisraeli. Ntani sautatu, omu Jehova ga mangwilire Vaisraeli moEgipite. Ngomu natu ka  konakona yihorokwa eyi, tu tareni eyi natu lirongera ko kwaJehova.

3. Sininke musinke sokutetukisa sa horokerere Samwere esiku limwe, ntani epuro musinke ayi retesa po? (Tara efano pepenuno 23.)

³ Samwere kwa tamekere ‘kuruganena’ Jehova konkongoronzugo apa ga kere simpe munona. (1 Sam. 3:1) Esiku limwe apa Samwere ga mene yirugana yendi, tapa horoka sininke sokutetukisa. * (Resa 1 Samwere 3:2-10.) Age kwa zuvhire gumwe ogu ana kumuzigida. Samwere kwa gazarere asi mupristeli gomukurupe Eli yige ana kumuzigida, makura ta dukire kwendi nokutanta asi: “Nyame ogu, ogu muna zigida.” Nye Eli ta tanta asi kapisi yige ana mu zigida. Apa ya horokere sikando sautatu, Eli ta dimburura asi Karunga yige ana kuzigida Samwere. Yipo ga tanterere mumati eyi na ka uyunga, ano age ta ka yi rugana. Morwasinke Jehova ga dilire kutantera Samwere posikando sokuhova asi yige ana kumuzigida? Bibeli kapi za yi uyunga, nye yihorokwa eyi ya kweme ko kulikida asi Jehova kwa gazadarere ko Samwere. Monkedi musinke?

4, 5. (a) Yisinke ga rugene Samwere apa Jehova ga mu tanterere a tware mbudi kwaEli? (b) Yisinke natu lirongera ko kosihorokwa oso kuhamena Jehova?

⁴ Resa 1 Samwere 3:11-18. Veta zaJehova kwa pangerere vanona va fumadeke vakurupe, unene po vapanguli. (Ex. 22:28; Lev. 19:32) Ayo kapi ya kere ureru kwaSamwere mokuza kwaEli a ka mu tantere mbudi zepanguro ezi ga mu tanterere Karunga. Sihorokwa esi kulikida asi Samwere “kwa tjilire kusansekera ko Eli emoneko lyendi.” Nampili ngoso, Jehova kwa yi zeresere kwaEli asi yige ga zigidire Samwere. Oyo kwa ninkisire Eli a pure Samwere asi: “Nonkango musinke edi ana uyunga noge Hompa? Wa ha di hapa nge.” Samwere makura “ta mu tantere nayinye.”

⁵ Esi kapisi sikando sokuhova Eli ga zuvhire mbudi zangoso morwa “muporofete” gwaKarunga ga mu tanterere nare mbudi zokulifana. (1 Sam. 2:27-36) Sihorokwa esi kulikida asi Jehova munongo ntani kugazadara ko wopeke.

6. Yisinke natu lirongera ko monkedi omu Karunga ga vaterere Samwere?

⁶ Ove o mudinkantu ndi? Nsene yimo, sihorokwa saSamwere kulikida asi Jehova ga diva maudigu goge ntani kukwata egano omu o lizuvhu. Ove nampo nomuga kuzuvhisira vakurona ndi kukudigopera kulisiga novadinkantu vakweni. Kara nehuguvaro asi Jehova nga ku vatera. Yipo nye, mu tantera maudigu goge nagenye. (Epis. 62:8) Teda ko koyihonena yovadinkantu ava va tumbura moBibeli ngwendi saSamwere. Ntani zogera novanavazinyetu wovakurona nava wovadinkantu ava va pita momaudigu ngwendi aga ono kupita. Awo kuvhura ngava ku tantere omu Jehova ga va vaterere, nampo mononkedi edi va dilire kundindira.

7, 8. Ngapi omu Jehova ga yi likidire asi ga gazadarere ko Mosesa?

⁷ Apa Mosesa ga kere nonomvhura 80, Jehova kwa mu pere situmbukira soudigu. Age ga hepere kukagusa Vaisraeli moEgipite omu va kere vapika. (Ex. 3:10) Mosesa kwa tukukire morwa age kwa kere musita moMidiyana ure wonomvhura 40. Yipo ga tente asi: “Nyame yilye ni ka ze kwaFarawo asi ni  ka guse mo Vaisraeli moEgipite?” Karunga ta limburura asi: “Ame ngani kara noge.” (Ex. 3:11, 12) Age kwa tanterere hena Mosesa asi masimbi goVaisraeli ‘naga ka ku zuvha.’ Nampili ngoso, Mosesa ta limburura asi: “Nsene va nyoka . . . kupura yange?” (Ex. 3:18; 4:1) Ayo kumoneka asi Mosesa kwa patanesere Karunga. Nampili ngoso, Jehova ga lididimikilire. Age kwa pere hena Mosesa nonkondo dokurugana yitetu, ano eyi kwa mu ninkisire a kare muntu gomuhowo ogu ga kere nononkondo dangoso.—Ex. 4:2-9, 21.

⁸ Mosesa simpe ta ligusa-gusa mo pokutanta asi kapi ga diva kuuyunga. Nye Karunga ta mu tanterere asi: “Ame nani ka ku kwafa mokuuyunga, neyi no ka uyunga.” Mosesa ga pulire ndi? Hawe, age kwa tanterere Karunga a tume ko gwapeke. Oyo kwa handukisire Jehova, nye ga kwete egano ukaro waMosesa, yipo ga va tumine kumwe naArona a ka mu uyungire po.—Ex. 4:10-16.

9. Ngapi omu edidimiko nonkenda zaJehova ya vaterere Mosesa?

⁹ Yisinke natu lirongera ko kosihorokwa esi kuhamena Jehova? Mokumona asi age Munankondo nadinye, ngano ga tjilisire Mosesa yipo a limburukwe. Nye Jehova ga lididimikire, nokutekura nombili mukareli gwendi gokulinunupika. Nkedi ezi ga ruganesere Jehova za vaterere Mosesa ndi? Nhi. Mosesa kwa ya kere mupitisili gomuwa nokuhetekera ko kutekura vantu nonkenda nokuvagazadara ko ngwendi moomu ga mu tekwire Jehova.—Num. 12:3.

10. Mauwa musinke ngo gwanena mo nsene o honena Jehova mokugazadara ko wopeke?

¹⁰ Yisinke natu lirongera ko? Nsene ove nturagumbo ndi mukurona ogu ga kara novana ndi mukuronambunga, ove wa kara nositumbukira sosinene. Ya kara nomulyo asi o honene Jehova pokulikida nkenda  nokulididimika ntani kugazadara ko vemepata lyoge ndi womombungakriste. (Koros. 3:19-21; 1 Pet. 5:1-3) Nsene o kondja mokuhonena Jehova naJesus Kristusa, vantu ngava ku mangurukira ntani ngo va hengagwida. (Mat. 11:28, 29) Ntani hena, ngo kara sihonena sosiwa kwava wopeke.—Heb. 13:7.

11, 12. Ngapi Jehova ga vaterere vantu vendi va dive asi mepopero va kere apa ga va gusire moEgipite?

¹¹ Apa Vaisraeli va tundire moEgipite momvhura 1513 komeho zokuwiza Jesus pevhu, awo kwa pitakanene pomamiliyona gatatu. Mombunga ozo kwa hamenene mo vanona novakondi nava wokuvera ndi wokuremana. Pwa hepere mupitisili gomuwa gonondunge mokugendesa mbunga ozo zonene. Ano Jehova ga yi likidire asi age mupitisili gomuwa pokuruganesa Mosesa. Ngoyitumdwamo, Vaisraeli kwa lizuvhire epopero ngomu va sigire sirongo esi va yikire.—Epis. 78:52, 53.

¹² Jehova kwa vaterere vantu vendi va dive asi mepopero vana kara. Age kwa va gusire moEgipite awo “vana humata nawa” ndi ngwendi mbunga zovakwayita. (Ex. 13:18) Ewapaiko lyombunga olyo kwa ninkisire Vaisraeli va dimburure asi Karunga yige ga va pitisilire. Jehova hena kwa yi likidire asi nawo ga kere pokuvagendesa mutenya “neremo” ano masiku “nouzera womundiro.” (Epis. 78:14) Pokuvaruganena oyo, ngwendi Jehova kwava tanterere asi: “Mwa ha tjira. Ngani mu pitisira nokumupopera.” Yosili, awo va hepere epopero olyo morwa ukaro ou wa ya kweme ko.

13, 14. (a) Ngapi omu Jehova ga vaterere Vaisraeli pEfuta lyEgeha? (b) Ngapi omu Jehova ga likidire nonkondo dendi koVaegipite?

¹³ Resa Exodus 14:19-22. Gazara asi komeho zeni kuna kara ko Efuta lyEgeha ano konyima zeni vakwayita vaFarawo. Karunga makura ta va popere. Ngundi zeremo tazi ka kara konyima zovakwayita woVaisraeli nokuviva Vaegipite va kare momundema. Nye ove noVaisraeli vakweni kuna kara mouzera. Makura to mono Mosesa omu ana kugonwena kuwoko kwendi kontunda zefuta, makura emupepo lyenene lyokoupumezuva tali tepana mema. Ano nove nepata lyeni noyimuna yeni ntani nava wopeke tomu gendi pevhu mwa hana kulirombera. Poopo ngoso to dimburura yuma yokutetukisa. Pevhu olyo muna kugenda kwato usenete, alyo ekukukutu ntani ureru kugenda po. Ngoyitundwamo, nampili womaranga nawo kuna kuvatompoka mokukasika mesinya mwina.

¹⁴ Resa Exodus 14:23, 26-30. Posiruwo sooso, mougova wendi Farawo ogu ga hara kulitumba ta hwilire mefuta a mu konke. Ano Mosesa ta gonwene hena kuwoko kwendi kontunda zefuta. Mema makura taga mbanduka ga ligwanekere. Ano Farawo novakwayita vendi tava fu.—Ex. 15:8-10.

15. Yisinke natu lirongera ko kosihorokwa esi kuhamena Jehova?

¹⁵ Kosihorokwa esi tatu lirongere ko asi Jehova kapi ga hara epiyagano, sikara sendi oso kutuvatera tu dive asi nga tu popera. (1 Kol. 14:33) Jehova musita geharo ogu a pakere mbili vantu vendi. Age kuvapopera kononkore dawo. Eyi kutuhengagwida ngomu tuna kuhedera kouhura wouzuni ou.—Yis. 1:33.

16. Ngapi natu gwanena mo mauwa pokukonakona omu Jehova ga poperere Vaisraeli?

¹⁶ Jehova simpe kupakera mbili vakareli  vendi ngombunga pampepo nopanyama. Age hena nga ka va popera poudigu wounene ou una kara pepi. (Ehor. 7:9, 10) Yipo nye, yi kare asi vanona ndi vakurona ndi wokukanguka ndi yirema, vakareli vaKarunga kapi ngava kara nowoma posiruwo oso. * Nye awo ngava hafa. Awo ngava diworoka nonkango daJesus Kristusa asi: “Tareni keguru mu kankure nomutwe deni, yeeyi eparu lyeni pepi lina kara.” (Ruk. 21:28) Vantu vaKarunga ngava kara simpe nehuguvaro mwaJehova apa ngazi va homokera mbunga zonomuhoko ezi ngazi lipakerera. Mbunga ozo nonkondo unene kupitakana Farawo. (Hes. 38:2, 14-16) Morwasinke vantu vaKarunga ngava karera nehuguvaro? Morwa va diva asi Jehova kapi a runduruka. Komeho, age simpe nga yi likida asi age kugazadara ko vantu vendi pokuvapopera.—Jes. 26:3, 20.

17. (a) Mauwa musinke natu gwanena mo pokuteda yihorokwa yomoBibeli eyi ya likida omu Jehova a pakere mbili vakareli vendi? (b) Yisinke ngatu ka lironga mosirongwa sokukwama ko?

¹⁷ Yihorokwa eyi tuna zogere mosirongwa esi kuna kara yimwe eyi ayi likida omu Jehova a gazadara ko vakareli vendi pokuvalikida nkenda nokuvapitisira ntani kuvapopera. Ngomu ono kuteda yihorokwa eyi, papara mauzera aga naga kuvatera o dimburure yikara yaJehova. Nsene o lironga unene kuhamena yikara yaJehova, ngomu hara unene ntani epuro lyoge ngali nkondopara. Mosirongwa sokukwama ko ngatu ka lironga omu natu honena Jehova pokugazadara ko wopeke. Ngatu ka demenena kepata kombungakriste ntani mokuzuvhisa.