1. Kosinke ga demenene po Jesus mesiku lyokuhulilira lyeparu lyendi pevhu kumwe novarongwa vendi?

MESIKU lyokuhulilira lyeparu lyendi pevhu kumwe novarongwa vendi, Jesus kwa tumbwire eharo yikando konyara 30. Unene po, age kwa tanterere varongwa vendi asi va hepa ‘kulihara-hara.’ (Joh. 15:12, 17) Mokulihara-hara ya vhulire kuvatera vantu va dimburure asi awo sili varongwa vaJesus wousili. (Joh. 13:34, 35) Eharo eli kapisi malizuvho tupu. Jesus kwa tembe keharo lyokulizambera. Age kwa tente asi: “Nagumwe si ga kara neharo lyokupita lyogu a fire vakwawo. One mu vakwetu, nsene mu rugana eyi nina kumutantera.”—Joh. 15:13, 14.

2. (a) Kosinke va va divira vantu vaKarunga? (b) Mapuro musinke natu ka limburura mosirongwa esi?

² Eharo nouumwe ou va kara nawo vakareli vaJehova kuvadimbwilisa asi awo vantu vaKarunga. (1 Joh. 3:10, 11) Tuna hafa kweyi twa lihara-hara nampili ngomu twa tunda koyirongo nokonomuhoko nomomaraka ntani konontundiliro dokulisiga-siga. Kuvhura tu lipure asi: “Morwasinke eharo lina  karere nomulyo momazuva getu? Ngapi omu Jehova naJesus ava tu nkondopeke? Ngapi omu natu likida eharo eli ali ‘wapeke’ ndi eli ali nkondopeke?”—1 Kol. 8:1.

3. Ngapi omu “yiruwo yoyidigu” ayi kundama vantu?

³ Vantu wovanzi kuna kuligwanekera nomaudigu gopamalizuvho morwa “yiruwo youdigu” eyi yina zura ‘upyakadi nomaudigu.’ (Epis. 90:10; 2 Tim. 3:1-5) Wovanzi kulizuvha ngwendi va hageke kuparuka. Kwa yi ngungunyikira asi nkenye mvhura vantu wokupitakana po-800 000 kulidipaga vene. Ehudi, vanavazinyetu vamwe nawo kwa lidipaga.

4. Wolye va tumbura moBibeli ava va lizuvhire ngwendi va fe?

⁴ Vakareli vaJehova vamwe womosiruwo sanare kwa kere momaukaro aga gava ninkisire va hare kufa. Pasihonena, Joba ogu ga guvire unene kwa tente asi: “Ame na ligava, na roroka kukara nomwenyo.” (Joba 7:16; 14:13) Jona kwa dompere unene apa ya dilire kusika mo eyi ga ndindilire makura ta tanta asi: “Ngesi HOMPA, siga nge ni fe. Yokufa ame hasa, kapisi kumwe neyi yokukara nomwenyo.” (Jona 4:3) Ntani sikando simwe muporofete Eliya kwa here a fe morwa ukaro ou ga pitire kwa mu dompesere. Makura ta tanta asi: “HOMPA, yina pitakanene nye. Gusa nge mwenyo gwange; name kufa tupu nye!” (1 Vah. 19:4) Nampili ngomu va lizuvhire ngoso, Jehova ga va here ntani kwa va harerere va twikire kuparuka. Mevango lyokuvahandukira, age kwa va vaterere va funde po malizuvho gangoso nokuvakondopeka va twikire kumukarera.

5. Morwasinke twa hepera kulikida vanavazinyetu eharo unene po ngesi?

⁵ Nampili ngomu vanavazinyetu ava dili kulizuvha asi hansa va hageke kuparuka, wovanzi naina kuna kupita momaudigu ntani va hepa kuvankondopeka. Vamwe kuna kulididimikira mahepeko. Ano vamwe kuvaswaura nokuvagamba koyirugana yawo. Vamwe kulizuvha eroroko morwa kurugana rutayima yipo va mane yirugana yawo nosiruwo. Ano simpe vamwe kuligwanekera nomaudigu mepata, nampo marwaneso gokutunda kovalikwali vawo wovahapuli. Maudigu aga nagamwe hena kuninkisa vanavazinyetu va lizuvhe eroroko parutu nopamalizuvho. Yilye na vhura kuvatera vantu vangoso?

6. Ngapi a nkondopeke Jehova vakareli vendi?

⁶ Jehova kunkondopeka vakareli vendi pokuvatantera asi ga va hara unene. Ayo kwa nkondopekere Vaisraeli apa Jehova ga va tanterere asi: “Ove ntumbu kwange kwa ku hara yiyo na ku fumadeka. Wa ha tjira – ame noge na kara!” (Jes. 43:4, 5) Ngomukareli gwaJehova, kara nehuguvaro asi Jehova ga ku hara unene. * Bibeli kwa tumbwidira ava ava kwatesa ko ukareli wousili asi: ‘HOMPA nga va pa efundo. Age nga va hafera.’—Sef. 3:16, 17.

7. Monkedi musinke omu Jehova ga kara ngwendi zinya? (Tara efano pepenuno 12.)

⁷ Jehova kwa tumbwidira vakareli vendi asi nga va kwafa nokuvahengagwida yi kare asi maudigu musinke vana kupita. Bibeli kwa tanta asi: ‘Ngomu fana munona ogu ava rere ozina, tava mu hukata,  tava mu tekura neharo. Ame ngani mu hengagwida moomu a hengagwida zina munwendi.’ (Jes. 66:12, 13) Gazadara ko tupu, zinya geharo ana kurera munwendi ta mu hukata nokumutekura neharo. Sifanekeso esi kulikida omu Jehova ga hara unene vakareli vendi. Kara nehuguvaro asi Jehova ga ku hara unene ntani ove mulyo kwendi.—Jer. 31:3.

8, 9. Ngapi omu eharo eli ga tu likidire Jesus ali tu vatere?

⁸ Eharo eli ga tu likida Jehova kwa tu hedesera kwendi. Bibeli kutanta asi age “kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.” (Joh. 3:16) Jesus nage kwa tu likidire eharo poku ya tu fira. Eharo eli kututumangeda tu twikire kukarera Jehova. Nonkango daKarunga kwa tumbwidira asi nampili ‘maudigu ndi mpwagetjima’ kapi tayi vhuru ‘kutugusa mo meharo lyaKristusa.’—Rom. 8:35, 38, 39.

⁹ Eharo lyenene eli ga tu likida Jesus kutuvatera tu lididimike apa atu piti momaudigu aga aga tu koresa parutu nopamalizuvho nopampepo. (Resa 2 Vakolinte 5:14, 15.) Eharo eli ga tu likidire Jesus, kutunkondopeka nokututumangeda tu twikire kulididimikira maudigu ngwendi yimpagwa nomahepeko nomadompeso ntani yinka.

10, 11. Wolye wokuvhura kukorangeda wopeke? Faturura.

¹⁰ Nkedi zimwe omu Jehova a tu likida eharo kuna kara kupitira mombungakriste. Nose kuvhura tu likide eharo vanavazinyetu pokuvankondopeka pampepo ntani hena pamalizuvho. (1 Joh. 4:19-21) Mupositoli Paurusa kwa korangedere Vakriste asi: “Yipo nye nomu tundira kulikorangeda-korangeda oku tomu likwafa-kwafa, moomu tupu muna kurugana pwanaina.” (1 Tes. 5:11) Navenye womombungakriste kuvhura va honene Jehova naJesus pokuhengagwida nokunkondopeka vanavazinyetu.—Resa Varoma 15:1, 2.

 ¹¹ Vamwe womombungakriste ava va kara noudigu wopamalizuvho va hepa kuza kovandokotora va ka va vatere. (Ruk. 5:31) Vakuronambunga navamwe womombungakriste va yi diva asi kapi va kara noudivi wokuhakura wopeke. Nye nampili ngoso, awo kuvhura ‘kukorangeda wompwagetjima, nokukwafa varupiranonkondo, nokulididimikira navenye.’ (1 Tes. 5:14) Vakriste navenye va hepa kulididimika nokulikida nkenda ntani nokukorangeda wopeke yipo yi va nkondopeke. Nove kukorangeda wopeke ndi? Nsene o diva omu no korangeda wopeke ngayi ku tompoka kuvavatera.

12. Simwitira ko sihonena sagumwe ogu za vaterere mbungakriste zawo.

¹² Ngapi eharo eli atu likida wokuguva ali va nkondopeke? Munazinyetu gomukadi gomoEuropa kwa tanta asi: “Poyiruwo yimwe kulizuvha ngwendi ni lidipage. Nye na gwana evatero lyenene. Vanavazinyetu womombungakriste zetu kwa vatera nge. Awo kwa hara nge ntani kukorangeda nge nkenye apa. Womombungakriste kukwafa nge nampili ngomu ya kara asi wovasesu tupu va diva udigu wange wokuguva-guva. Valikwali vamwe kwa kara ngwendi vakondi vange. Awo kupakera nge mbili nkenye apa ani hepa evatero.” Yimo, kapisi navenye ava vhuru kugava evatero lyangoso. Nye, ose kuvhura kuvatera ava vana kuligwanekera nokukora kopamalizuvho pokulikida elituromo mwawo. *

13. Yisinke natu rugana yipo tu vhure kunkondopeka wopeke?

¹³ Kara mupurakeni gomuwa. (Jak. 1:19) Kupurakena nelituromo kulikida asi twa kara neharo. Kuvhura tu pure mapuro gomawa nositambo sokukwata egano omu vana kulizuvha wopeke. Monkedi zangoso ngatu diva omu natu likida nkenda nokunkondopeka wopeke. Twa hepa kuyilikida kosipara asi twa kara nosinka kwawo. Nsene munazinyetu gumwe ana hara kupwagesa malizuvho gendi, ngano tu hetekere ko kumupurakena. Nsene tu purakena nedidimiko, ngatu diva omu ana kulizuvha. Ayo ngayi vatera munazinyetu ogo a tu huguvare ntani a kare nemanguruko lyokutupurakena. Apa atu likida asi twa kara nosinka kwawo, ayo kuvahengagwida sili.

14. Morwasinke natu nyokera po kupangura vakwetu?

¹⁴ Nyokera po kupangura. Nsene o pangura ava vana guwu kuvhura ngo va guvise unene ntani kapi ngava kupurakena apa ngo hara kuvakorangeda. Bibeli kutanta asi: “Nonkango da hana mutwe nondungu kuwurura ngwendi rufuro, nye nonkango dounandunge kuverura.” (Yis. 12:18) Kapi tuna hara kukoresa ava vana dompo ‘pokuvawurura’ nononkango dokukoresa. Nye ayo kukoresa hena wopeke nsene tu uyunga twa hana kugazadara ko. Nsene tu litura moukaro ou vana ku pita wopeke ngayi tu vatera tu va korangede nokuvankondopeka.—Mat. 7:12.

15. Siruganeso musinke somulyo po natu ruganesa mokuvatera wopeke?

¹⁵ Hengagwida wopeke noNonkango  daKarunga. (Resa Varoma 15:4, 5.) Nonkango daKarunga kuna kara ugawo ou atu ruganesa mokuhengagwida wopeke. Bibeli kwa tunda ‘kwaKarunga gedidimiko nogu gehengagwido.’ Kugusa ko Matjangwa, twa kara hena noyiruganeso yimwe. Kuvhura tu ruganese Indeksi zoRuhungu ntani Buke zepaparo zoNombangi daJehova. Yiruganeso eyi kutuvatera tu gwane magano gomoMatjangwa aga naga tu vatera tu lididimikire maudigu nagenye. Ayo hena kutuvatera tu gwane magano aga natu ruganesa mokuvatera wopeke.

16. Yikara musinke nayi tu vatera yipo tu korangede wokuguva?

¹⁶ Apa atu korangeda nokunkondopeka wopeke, ayo kulikida asi ose nkenda ntani kuvapakera mbili. Jehova age “Guhya ga zura nkenda, age Karunga ogu a kwafa nkenye apa,” ntani age ‘kufira nkenda’ vakareli vendi. (Resa 2 Vakolinte 1:3-6; Ruk. 1:78; Rom. 15:13) Paurusa kwa tura po sihonena sosiwa, age kwa tente asi: ‘Nye ose tu litekureni nawa, moomu a tekura mukadi vana vendi. Pokumuhara one yipo twa mu tokomenene, kapisi pokumuretera mbudi zongwa zaKarunga pwelike, hawe, nampili pokumufira. Yimo twa mu here nye ngoso.’ (1 Tes. 2:7, 8) Apa atu likida nkenda kuna kara ngwendi Jehova ana kuturuganesa mokuvatera wopeke.

17. Mutaro musinke natu kara nago kovanavazinyetu?

¹⁷ Diworoka asi vanavazinyetu kapi va sikilira mo. Kapisi o ndindire ko yoyinzi kovanavazinyetu. Nsene o ndindira ko yoyinzi kovapuli vakweni, ayo kureta yitundwamo yoyidona. (Muud. 7:21, 22) Diworoka asi Jehova kapi a tu pura yoyinzi eyi natu dira kuvhura kusikisa mo. Nsene tu kwama sihonena sendi, ngatu vhura kulididimikira mapuko govakwetu. (Efe. 4:2, 32) Mevango lyokuvamona asi kapi vana kurugana unene twa hepa kuvapandadeka kweyi vana kusikisa mo. Ayo kuvhura yi va korangede. Epandadeko kuvhura kunkondopeka wopeke nokuvavatera va twikire noruhafo mosirugana sawo. Ayo ya wapa kuvapandadeka mevango lyokuvahetakanesa nava wopeke.—Gar. 6:4.

18. Morwasinke natu nkondopekera wopeke?

¹⁸ Nkenye nzwi zaJehova mulyo kwendi ntani kwaJesus ogu ga geve sizoweseso. (Gar. 2:20) Ose kwa hara unene vanavazinyetu. Tuna hara kuvapakera mbili monkedi zongwa zeharo. Nsene tuna hara kukorangeda wopeke, tu “kondjereni eyi ayi reta mbili neyi ayi tu koraike-koraike.” (Rom. 14:19) Ose kuna kundindira siruwo apa ngatu dira hena kukaguva. Kapi nga ku ka kara mauvera noyita nonomfa nomahepeko nomaudigu gemepata ntani madompeso. Konyima zoNomvhura Eyovi, vantu ngava ka sikilira mo. Ava ngava ka pita meheteko lyokuhulilira, ngava ka kara vana vaJehova Karunga vepevhu ntani ngava ka za “mezowoko lyouyerere wovana vaKarunga.” (Rom. 8:21) Yipo nye, tu twikireni kulikida eharo eli ali nkondopeke nokuvatera wopeke va ka gwane mfeto ozo zongwa.