NSENE ono hara kudiva siruwo, yisinke no rugana? Ove kuvhura o tare povili zoge. Nsene kaume koge a ku pura asi: ‘Ngesi vili musinke?’ Ngapi no mu limburura? Pwa kara nonkedi dokulisiga-siga omu ava tumbura siruwo. Tu tareni ko nonkedi dimwe.

Tu tante asi vili zimwe zina kupitisa ko nominute 30 kometaha. Kuvhura o mu limburure asi 1:30. Kuliza noku wa tunga ntani nompo zeni kuvhura o tante asi 13:30. Nkedi ozo zokutumbura vili kwa liza nomu ava varura vili. Ano komavango gamwe vili ozo kuzitumbura asi “harufa zombali,” kutanta asi nominute ko 30 zi toone vili zombali.

Ngomuntu ogu o resa Bibeli, ove nampo kulipura omu siruwo ngava si tumbura nare. Siruwo ngava si tumbura mononkedi dokulisiga-siga. Matjangwa goRuhebeli kwa tumbura yiruwo ngwendi “ngurangura,” “mutenya gwa twa,” ntani “ngurova.” (Gen. 8:11; 19:27; Deut. 28:29; 1 Vah. 18:26) Poyiruwo yimwe, yiruwo kwa yi hangwire kuliza nonovili edi ngayi gusa.

Moyiruwo yanare, vanomeni ngava va va ruganesa, unene po masiku. Nomvhura dononzi komeho va ya hampuruke Jesus, Vaisraeli kwa hangwire masiku momaruha gatatu. (Epis. 63:6) Vapanguli 7:19 kwa tumbura ‘enomeno lyopokatji komasiku.’ Momazuva gaJesus, Vajuda ngava kwama nkedi zoVagereka noVaroma zosiruwo somasiku esi va hangwire momaruha gane.

Mavangeli kwa tumbura maruha ogo yikando yongandi. Pasihonena, ago kwa kere ‘masasiku’ apa Jesus ga gendere pomema a ze kovarongwa vendi ava va kere mowato. (Mat. 14:25) Mosifanekeso simwe Jesus kwa tente asi: “Diveni asi nturagumbo nsenesi a diva asi siruwoke na wiza muwidi masiku, amesi ngano ta rungarara a vivike asi va dire kumuyomborora monzugo zendi.”—Mat. 24:43.

Jesus kwa tumbwire yiruwo oyo apa ga tanterere varongwa vendi asi: “Vangarareni nye, yeeyi kapi muna diva asi mwenyembo siruwoke nga wiza, ndi ngurova ndi pokatji komasiku ndi paapa ayi zigi yikondomboro ndi ezuva tali si.” (Mar. 13:35) Ruha rokuhova ngava ru tumbura asi “ngurova,” aro ngaru tameke pokukatoka ezuva dogoro povili zauntane masiku. Ruha rwauvali ngava ru tumbura asi “pokatji komasiku,” aro ngaru tameke povili zauntane zomasiku dogoro pokatji komasiku. Ruha rwautatu ‘apa yikondomboro ngayi zigi,’ ngaru tameke pokatji komasiku dogoro povili zautatu monongura. Posiruwo esi nampo yipo sa zigire sikondomboro mesiku eli va mu kwete Jesus. (Mar. 14:72) Ruha rwaune romasiku oru ngava tumbura asi ‘masasiku,’ kwa tamekere koyiha yovili zautatu monongura dogoro ezuva tali pumu.

Yipo nye, nampili ngomu pwa dilire kukara novili posiruwo sanare, koyili simpe eyi ngava kwama vantu mokuvavatera va dive siruwo.