MOUZUNI mudima, vakuronambunga kuhafera yitumbukira eyi va kara nayo mombunga zaJehova. Awo kwa kara ngwendi uhwi ou ga tu pa Jehova. Nampili ngoso, ntaantani tupu kava tulire po marunduruko. Vakuronambunga wovakurupe kava va pulire va gave yitumbukira yawo yoyinene kovakuronambunga wovadinkantu. Morwasinke?

Ngendeseso ozo zompe kuna kwatere mo asi, vatareli wonombunga nava ava rongo konosikora doUhompa, va hepa kugava yitumbukira yawo nsene vana siki konomvhura 70. Ntani hena, vakuronambunga wonomvhura 80 ngava hepa kugava yitumbukira yawo yimwe kovakuronambunga wovadinkantu, ngwendi kukara muwapaiki goMberewa zomutayi ndi muwapaiki govakuronambunga. Ngapi omu ava lizuvhu vanavazinyetu wovakurupe kewapaiko olyo? Awo kutwikira kulimburukwa Jehova nokukwama mavyukiso gombunga zendi.

Ken ogu ga kere muwapaiki goMberewa zomutayi konyara nomvhura 49 kwa tanta asi: “Ame kwa kwatesere ko eyi va tokwere, ntani  komeho zokuzuvha etokoro olyo, ame kwa kanderere kwaJehova a tume ko munazinyetu gomudinkantu a ya guse situmbukira sange.” Vanavazinyetu wovakurupe uzuni mudima nawo kulikida nkareso ezi ga likidire Ken. Nye ayo simpe kuvaguvisa morwa awo kwa hara kuvatera vapuli vakwawo.

Esperandio ogu ga kere muwapaiki govakuronambunga womombungakriste zawo kwa tanta asi: “Ayo kwa guvisire nge, nye morwa ukurupe na yi tambura asi na hepa siruwo sokulipakera nyamwange mbili.” Esperandio kuna kutwikira kukarera Jehova noulimburukwi nokuvatera mombungakriste zawo.

Ngapi nye kuhamena vatareli wonombunga ava va gwana yitumbukira yapeke? Allan ogu ga kere mutareli gonomukunda nomvhura 38 kwa tanta asi: “Ayo kwa tukukisire nge.” Nampili ngoso, ga dimbwilire omu ya kara nomulyo kudeura vadinkantu, ngesi age kuna kutwikira kukarera Jehova noulimburukwi.

Russell ogu ga kere mutareli gonombunga ntani ogu nga rongo konosikora doUhompa ure wonomvhura 40 kwa va guvisire namukadendi apa va sigire sirugana sawo. Age kwa tanta asi: “Ose kwa here sirugana setu ntani twa lizuvhire asi simpe tuna kara nononkondo dokutwikira.” Ngesi Russell namukadendi kuna kuruganesa ediwo eli va gwene va deure womombungakriste zawo.

Nsene asi kapi ya ku horokera simpe oyo, sihorokwa sa kara mwa-2 Samwere kuvhura si ku vatere o kwate egano omu ava lizuvhu ava ava gava yitumbukira yawo nokugwana ko yapeke.

Gazadara ko apa hompa Ndafita ga mu rwanesere munwendi Abisaromo. Ndafita kwa tjwayukilire ko Mahanayimu koupumezuva womukuro gwaJorodana. Ndafita kumwe novakwawo va hepere yihepwa yankenye ezuva. To diworoka asi yisinke ya horokere ndi?

Vagara vatatu womomukunda ogo kwava reterere nonguho nonondya dokulisiga-siga ntani yipako. Barasirayi nage kwa kere gumwe govagara owo. (2 Sam. 17:27-29) Ndafita kwa tengwire koJerusarema apa munwendi Abisaromo va mu fundire, ano Barasirayi kwa mu sindikilire ko a ka rute mukuro gwaJorodana. Ndafita ta mu likwambere va ze kumwe koJerusarema. Ndafita kwa tumbwidilire Barasirayi asi nga ka mu nondya nampili ngomu ga kere “ngawo zonene.” (2 Sam. 19:31-33) Ndafita kwa here kukatunga kumwe naBarasirayi yipo a gwanene ko unongo morwa ga kere nediwo lyenzi meparu. Age ngano ga kere nompito zokukatunga nokurugana mombara zahompa.

Barasirayi kwa tambwire ukaro wendi pokudimburura asi kapi nga ka yi vhura morwa age  kwa kere nonomvhura 80. Age kwa tente asi: “Nayimwe si hena yina kuhafesa nge.” Yisinke ga tembe? Barasirayi nampo ga li rongere yoyinzi meparu lyendi. Age simpe nga gava mapukururo gomawa, ngwendi moomu tupu ‘masimbi’ ga ya pukwilire hompa Rehabiyamu. (1 Vah. 12:6, 7; Epis. 92:12-14; Yis. 16:31) Yipo nye, apa Barasirayi ga tente asi nayimwe si hena yina kumuhafesa, age nampo kwa tembe asi kapi ta tompora hena yoyinzi morwa ukurupe. Age ga yi dimbwilire asi ukurupe wa mu ninkisire a dire kuhafera nondya nokudira kuzuvha nawa. (Muud. 12:4, 5) Eyi yiyo nye Barasirayi ga likwamberere Ndafita a piture munwendi gomugara Kimuhamu.—2 Sam. 19:35-40.

Marunduruko aga tuna tumbura ketameko kulikida mutaro ogu ga kere nago Barasirayi. Mbunga zaJehova kwa tura po marunduruko ogo kuliza nomutaro ogu ga kere nago Barasirayi, morwa vakurupe kapi ava vhuru kurugana yoyinzi. Naina mbunga zaJehova kugazadara ko vakuronambunga ava nava pa yitumbukira.

Vanavazinyetu wovakurupe owo kwa dimbwilire asi mbunga zaJehova ngazi pama nokutwikira kukura nsene yitumbukira eyi va kere nayo nare va yi pa vanavazinyetu wovadinkantu. Rorunzi, vanavazinyetu wovakurupe yiwo ngava deura vadinkantu, ngwendi moomu Barasirayi ga dewire munwendi ntani omu Paurusa ga dewire Timoteusa. (1 Kol. 4:17; Fil. 2:20-22) Vanavazinyetu wovadinkatu kwa yi likida asi awo “mauhwi” ntani awo kuvatera mosirugana sokutunga mbunga ndi “rutu rwaKristusa.”—Efe. 4:8-12; hetakanesa Numeri 11:16, 17, 29.

Vakareli vaJehova ava va gava yitumbukira yawo, kuna kutamununa sirugana sawo kwaJehova mononkedi dapeke.

Marco ogu ga kere mutareli gonombunga ure wonomvhura 19 kwa tanta asi: “Ukaro wange kupulisira nge mokuvatera vanturagumbo wovahapuli mombungakriste zetu.”

Geraldo ogu ga kere mosirugana sokudingura nombunga ure wonomvhura 28 kwa tanta asi: “Ose ngesi kuvatera ava va tengura monyima nokulironga Bibeli novantu wovanzi.” Age kwa tanta hena asi nage namukadendi kulironga Bibeli novantu 15 ntani sinzi sava va tengura monyima kuna kuza komapongo.

Allan ogu tuna tumbura kwa tanta asi: “Ose ngesi kulihameka mo unene mosirugana sokuzuvhisa. Ose kuhafera kuzuvhisa noyitoroli nokuzuvhisira komavango gonongesefa ntani nokovamusinda ano vavali ngesi kuna kuwiza koSinyanga.”

Nsene ove gumwe ogu ga gwana situmbukira sosipe, pwa kara nonkedi dapeke omu no vhura simpe kuvatera mombunga zaJehova. Kuvhura o kwatese ko sirugana saJehova pokuruganesa udivi woge o vatere vadinkantu mombunga zeni. Russell ogu tuna tumbura kwa tanta asi: “Jehova kuna kudeura nokuruganesa vadinkantu. Vanavazinyetu kuna kugwanena mo mauwa monkedi ezi ava rongo nomu ava korangeda.”—Tara kakende “ Vatera vadinkantu wovagara va sikise mo sirugana sawo.”

Nsene asi ntani tupu ko gwene situmbukira sapeke, twikira kusihafera. Ove kwa vatera vanavazinyetu wovanzi mosirugana soge sanare ntani kuvhura simpe o twikire kuvavatera. Awo va ku hara ntani ngava twikira simpe kukuhara.

Yomulyo po, ove kuna kutwikira kuhafesa Jehova. Age kapi nga divara ‘yirugana yoge, neharo lyokufumadeka edina lyendi, morwa ove ngo kwafa vapongoki, moomu ono kuvakwafa nelyezuva.’ (Heb. 6:10) Etjangwa olyo  kutupa ehuguvaro asi age nga tu pa yoyinzi kupitakana eyi atu mu ruganene. Jehova kukutara asi ove mulyo kwendi ntani kapi nga divara eyi o mu ruganene.

Ngapi nsene situmbukira soge kapi sa runduruka ngamoomu tuna yi tumbura? Kuvhura yi ku kundame. Monkendi musinke?

Nsene wa tura po ukaume namunazinyetu gomukurupe ogu ga gwana situmbukira sosipe, kuvhura o lirongere ko kediwo lyendi. Tambura mapukururo gendi nokumupura ko magano. Ntani koneka omu ana kuruganesa udivi wendi mokusikisa mo situmbukira sendi sosipe.

Yi kare asi o mu kurupe ogu wa gwana situmbukira sosipe ndi munazinyetu gomukadi ndi gomugara o gwanene mo mauwa moudivi wovanavazinyetu owo, diworoka asi Jehova kuhafera ava ava mu karere noulimburukwi.