1-2. (a) Morwasinke yita yaHarumagedoni ayi tu hafesere? (b) Mapuro musinke natu ka zogera mosirongwa esi?

VANTU vamwe kwa pura asi yita yoyinene ndi yimpagwa yiyo ngayi zonagura po uzuni ou. Nye eyi kapisi yiyo azi rongo Bibeli. Azo kuronga asi ntaantani ngapa kare yita eyi ngayi retera vantu mauwa. Yita eyi kuyitumbura asi Harumagedoni. Eyi za uyunga Bibeli kuhamena yita eyi, ngano yi tu hafese. (Ehor. 1:3) Yita yaHarumagedoni kapi ngayi zonagura po vantu, nye ngayi va parura. Ngapi omu ngayi horoka?

² Bibeli kulikida asi yita yaHarumagedoni ngayi parura vantu pokuhagekesa po mapangero govantu. Ntani ayo ngayi parura vantu pokuzonagura po vantu wovadona nokupopera wovawa. Ayo ngayi parura hena vantu pokupopera evhu va dire kulizonagura. (Ehor. 11:18) Mokutuvatera tu yi kwate egano eyi, tu konakoneni mapuro aga gane: Yisinke Harumagedoni? Yihorokwa musinke ngayi twaredesa koHarumagedoni? Yisinke natu rugana yipo nose ngava ka tu parure poHarumagedoni? Yisinke natu rugana yipo tu twikire kulimburukwa Jehova ngomu uhura wouzuni una kuhedera pepi?

3. (a) Yisinke “Harumagedoni”? (b) Kuliza nEhororo 16:14, 16, morwasinke tuna kuuyungira asi Harumagedoni kapi za tamba kevango?

³ Resa Ehororo 16:14, 16. Nkango “Harumagedoni” kwa moneka sikando simwe tupu moBibeli, ntani moRuhebeli azo kutanta asi ndundu zaMegido. (Ehor. 16:16) Megido kwa kere sitata somoIsraeli zanare. (Jos. 17:11) Nye nkango Harumagedoni kapi za tamba kevango. Nye azo kwa tamba koukaro apa “vahompa womouzuni naunye” ngava li pongaika nositambo  sokurwanesa Jehova. (Ehor. 16:14) Nye mosirongwa esi, tatu ka ruganesa nkango “Harumagedoni” mokutamba koyita eyi ngayi horoka konyima zapa vahompa womouzuni ngava lipongaika. Ngapi omu tuna yi diva asi Harumagedoni kapisi evango? Sokuhova, kapi pwa kara ndundu ezi ava tumbura asi ndundu zaMegido. Sauvali, evango apa sa kere sitata saMegido, kapi tava vhuru kugwaneka po ‘vahompa womouzuni naunye’ novakwayita vawo ntani noyirwiso yawo, morwa evango olyo enunu unene. Sautatu, ngomu natu ka yi mona mosirongwa esi, yita yaHarumagedoni ngayi ka horoka apa ‘vahompa womouzuni’ ngava ka homokera vantu vaKarunga ava va kara mouzuni naunye.

4. Morwasinke Karunga ga fanekesera yita yendi yokuhulilira koMegido?

⁴ Morwasinke Karunga ga fanekesera yita yendi yokuhulilira koMegido? Mosiruwo sanare, yita yoyinzi ngava yi rwire moMegido ntani nomomuramba gwaJesireli. Ano poyiruwo yimwe, Jehova nga vatere vantu vendi va funde yita. Pasihonena, Karunga kwa vaterere mupanguli goVaisraeli Baraka “pokamukuro kaMegido” a funde vakwayita woVakanani ava ga pitisilire Sisera. Baraka nomuporofete gomukadi Debora kwa pandwire Jehova kweyi ga va vaterere va funde. Awo kwa dimbire asi: “Nombungururu dekeguru kwa rwire . . . ado kwa rwisire Sisera. Ruhanzo moKisoni rwa va kombere po.”—Vap. 5:19-21.

5. Ngapi omu yita yaHarumagedoni ngayi lisiga neyi ga rwire Baraka?

⁵ Baraka naDebora kwa hagesere rusumo rwawo nononkango edi asi: “Nonkore doge nadinye ngano yimo di fa ngoso, nye ava va ku hara, ngano tava paima ngwendi ezuva!” (Vap. 5:31) Mokulifana, poHarumagedoni, nonkore daJehova nado ngava di zonagura po ano ava va hara Karunga ngava va parura. Nye pwa kara elisigo pokatji koyita eyi ga rwire Baraka ntani neyi yaHarumagedoni. Vantu vaKarunga kapi ngava ka rwa poHarumagedoni. Awo kapi hena ngava kara noyirwiso. Awo ngava ‘nkondopa pokuhuguvara nawa-nawa’ mwaJehova novakwayita vendi vemeguru.—Jes. 30:15; Ehor. 19:11-15.

6. Yisinke nampo ngaka ruganesa Jehova mokukazonagura po nonkore dendi poHarumagedoni?

⁶ Yisinke ngaka ruganesa Jehova mokukazonagura po nonkore dendi poHarumagedoni? Kuvhura ngaka ruganese nonkedi dokulisiga-siga. Pasihonena, age nampo ngaka ruganesa ekankamo lyevhu ndi mvhura zakamanya ndi maruvadi. (Joba 38:22, 23; Hes. 38:19-22) Ndi age nampo kuvhura ngaka piyaganeke nonkore dendi di lipiruke dene. (2 Hist. 20:17, 22, 23) Ntani kuvhura hena ngaka ruganese vaengeli vendi va ka zonagure vantu wovadona. (Jes. 37:36) Yikare asi yisinke nga ruganesa Karunga, age ngaka funda yita oyo. Nonkore dendi nadinye ngava ka di zonagura po. Ano vahungami navenye ngava ka va parura.—Yis. 3:25, 26.

7-8. (a) Kuliza no-1 Vatesaronika 5:1-6, yisinke ngava divisa vapangeli womouzuni ou? (b) Morwasinke ediviso eli ngali karera siponga?

⁷ Komeho ngali sike “ezuva lyaHOMPA” vantu ngava divisa asi “nayinye mompora, kutupu upyakadi.” (Resa 1 Vatesaronika 5:1-6.) “Ezuva lyaHompa” eli va tumbura mo-1 Vatesaronika 5:2, kwa tamba ‘koudigu wounene.’ (Ehor. 7:14) Ngapi omu ngatu diva asi ngesi udigu wounene tau tameke? Bibeli kututantera asi ngapa kara ediviso. Alyo ngali tu vatera tu dive asi udigu wounene tau tameke.

⁸ Vantu ngava divisa asi: “Nayinye mompora, kutupu upyakadi.” Morwasinke vapangeli womouzuni ou ngava gavera ediviso olyo? Vampitisili womaukarelikarunga nawo ngava li hameka mo ndi? Kuvhura ngayi kare ngoso. Nye ediviso olyo ngali kara lyoyimpempa  ntani ngali tundilira konompepo donondona. Ediviso olyo ngali kara lyosiponga morwa ngali ninkisa vantu va lizuvhe asi mepopero vana kara, nye nani ntaantani udigu wounene u tameke. Makura “yipo ngali va gwanena ezonauko poopo, moomu tupu au gwana mukadi udigu pehampuruko.” Nye yisinke ngayi horokera vakareli vaJehova wovalimburukwi? Awo kuvhura ngayi va tetukise, nye awo ngava liwapaikira.

9. Monkedi musinke Jehova nga zonagura po uzuni waSatana?

⁹ Jehova kapi nga zonagura po uzuni waSatana posiruwo simwe tupu ngwendi moomu ga yi rugene posiruwo saNowa. Nye age nga hova kuzonagura ruha rumwe pomuhowo, ano konyima ntani nga manesa. Pomuhowo age nga zonagura po Babironi zonene, ezi za fanekesa maukarelikarunga nagenye goyimpempa. Ano poHarumagedoni ntani nye nga zonagura uzuni naunye waSatana, kukwatera mo maupolitika ntani nonongesefa. Ngesi tatu ka zogera momunene kuhamena yihorokwa eyi yivali.

10. Kuliza nEhororo 17:1, 6 ntani 18:24, morwasinke Jehova ngaka zonagwira po maukarelikarunga goyimpempa?

¹⁰ “Mpanguro zohondedi zonene.” (Resa Ehororo 17:1, 6; 18:24.) Maukarelikarunga goyimpempa kwa ninkisa vantu wovanzi va dire kufumadeka edina lyaKarunga. Ago kwa ronga vantu yimpempa kuhamena Karunga. Pokuruganena kumwe nomapangero, ago ngwendi kwa hondera pasifanekeso. Maukarelikarunga goyimpempa kwa hepeka hena vantu wovanzi nokuvavaka yimaliwa yawo. Ntani ago kwa dipaga vantu wovanzi kukwatera mo vakareli vaKarunga. (Ehor. 19:2) Ngapi Jehova ngaka zonagura po maukarelikarunga goyimpempa?

11. Yisinke sa fanekesa “sikasama sosigeha ge”? Ntani ngapi omu Karunga ngaka si ruganesa mokukazogura po Babironi zonene?

¹¹ Jehova ngaka zonagura po “hondedi zonene” pokuruganesa “nombinga murongo” dosikasama “sosigeha ge.” Sikasama oso kwa fanekesa mbunga zelipakerero lyonomuhoko (UN). Ano nombinga daso murongo, kwa fanekesa  nombunga politika edi adi kwatesa ko mbunga zelipakerero lyonomuhoko. Kuliza nosiruwo esi ga tura po Karunga, nombunga politika odo, ngadi ka rwanesa Babironi zopasifanekeso. Ado ngadi “mu hutura, ta kara rutu-rutu” pokumuhakana emona lyendi nokutura yirugana yendi yoyidona poruzera. (Ehor. 17:3, 16) Ezonauko lyaBabironi zonene ngali genderera ntani ngali tetukisa ava ava zi kwatesa ko, morwa azo kwa linenepekere pokutanta asi: “Ame kuna hingire ngwendi hompa gomukadi! Ame kapisi ni mufisayendi. Ame hena narumwe si asi ngali gwane nge eguwo!”—Ehor. 18:7, 8.

12. Yisinke nga dira kupulisira Jehova ntani morwasinke?

¹² Jehova kapi nga pulisira mapangero ga ka zonagure po vantu vendi. Morwa awo kwa simba edina lyendi ntani awo kwa mu limburukwa pokutunda moBabironi zonene. (Yirug. 15:16, 17; Ehor. 18:4) Awo hena kwa rugana unene pokuvatera vantu wopeke va tunde moBabironi zonene. Yipo nye, vakareli vaJehova kapi ‘ngaga va gwana mahepeko gendi.’ Nye nampili ngoso, epuro lyawo ngava li heteka.

13. (a) Yilye Gogo? (b) Kuliza naHesekiyeli 38:2, 8, 9, yisinke ngayi ninkisa Gogo a homokere vakareli vaJehova?

¹³ Ehomokero lyaGogo. (Resa Hesekiyeli 38:2, 8, 9.) Apa ngava mana kuzonagura po maukarelikarunga nagenye goyimpempa, vakareli vaJehova yiwo velike tupu ngava hupa po. Eyi ngayi handukisa Satana. Age nga ruganesa “nompepo dokunyata,” kutanta asi nombudi doyimpempa mokuninkisa mbunga zelipakerero yipo ngazi homokere vakareli vaJehova. (Ehor. 16:13, 14) Mbunga ozo zelipakerero kuzitumbura asi ‘Gogo gomosirongo saMagogo.’ Apa mbunga ozo ngazi homokera vakareli vaJehova, makura yita yaHarumagedoni yipo ngayi tameka.—Ehor. 16:16.

14. Yisinke nga dimburura Gogo apa nga homokera vantu vaJehova?

¹⁴ Gogo nga huguvara ‘mononkondo dopantu’ kutanta asi movakwayita vendi. (2 Hist. 32:8) Ose ngatu huguvara mwaJehova Karunga. Eyi ngayi ninkisa mbunga zelipakerero  zi tu mone asi ose tu vagova, morwa yikarunga yaBabironi zonene kapi ya vhulire kumupopera ‘kosikasama’ ntani ‘nonombinga daso murongo.’ (Ehor. 17:16) Yipo nye, Gogo nga gazara asi nose nga tu funda po usimbu. Age nga homokera vantu vaJehova “ngwendi kakunguru ana kuvindakana mosirongo.” (Hes. 38:16) Nye konyima Gogo nga dimburura asi moudigu ana kara. Ngwendi Farawo pEfuta lyEgeha, Gogo nga dimburura asi age kuna kurwisa Jehova.—Ex. 14:1-4; Hes. 38:3, 4, 18, 21-23.

15. Yisinke ngaka rugana Kristusa poyita yaHarumagedoni?

¹⁵ Kristusa kumwe novakwayita vendi vemeguru ngava popera vantu vaKarunga pokuzonagura po Gogo novakwayita vendi. (Ehor. 19:11, 14, 15) Nye yisinke ngayi horokera Satana, nkore zaJehova zonene, ogu ga ninkisa mbunga zonomuhoko zi homokere vakareli vaJehova? Jesus nga mu zugumina kumwe nonompepo donondona mosirongo sokonhi, omu ngava mu paterera nomvhura eyovi.—Ehor. 20:1-3.

16. (a) Ngapi natu yi likida asi ose twa ‘diva Karunga’? (b) Uwa musinke ngatu ka gwanena mo poHarumagedoni nsene tu diva Karunga?

¹⁶ Yi kare asi nare twa gwana usili ndi ntaantani, mokuninka asi va ka tu parure poHarumagedoni, twa hepa “kudiva Karunga” ntani twa hepa “kulimburukwa koMbudi zoNgwa zaHompa gwetu Jesus.” (2 Tes. 1:7-9) Ose “kudiva Karunga” apa atu diva eyi ga hara neyi ga nyenga ntani nompango dendi. Ose kuyilikida hena asi twa diva Karunga pokumuhara nokumulimburukwa ntani nokumukarera gelike. (1 Joh. 2:3-5; 5:3) Nsene tu yi rugana eyi, ose ngatu “divikwa kwendi” kutanta asi age nga tu hafera. (1 Kol. 8:3) Ano poyita yaHarumagedoni age ngaka tu parura.

17. Yisinke ayi tanta kulimburukwa “kombudi zongwa zaHompa gwetu Jesus”?

¹⁷ “Mbudi zoNgwa zaHompa gwetu Jesus” kwa kwatera mo nayinye eyi nga rongo Jesus eyi atu gwana moBibeli. Ose kulimburukwa  kombudi zongwa apa atu sikisa mo marongo gaJesus. Ayo kwa kwatera mo kutura uhompa muhowo momaparu getu, kuparuka kuliza nonompango daKarunga ntani nokuzuvhisa kuhamena Uhompa waKarunga. (Mat. 6:33; 24:14) Ose kulimburukwa hena mbudi zongwa apa atu kwatesa ko vamumbya vaKristusa ngomu vana kusikisa mo sirugana sawo somulyo.—Mat. 25:31-40.

18. Ngapi omu Vakriste wovagwavekwa ngava ka ruganena emukurumbunga mauwa?

¹⁸ Vakriste wovagwavekwa ngava ka ruganena mauwa “nonzwi dapeke” komeho, morwa awo kwa va vaterere. (Joh. 10:16) Ngapi omu ngava ka yi rugana? Vagwavekwa navenye 144 000, ngava kara meguru nomarutu gopampepo, komeho yita yaHarumagedoni yi ka tameke. Nawo ngava hamena mombunga zovakwayita vemeguru ezi ngazi ya zonagura Gogo nokupopera “emukurumbunga” lyovantu vaKarunga. (Ehor. 2:26, 27; 7:9, 10) Ayo ngayi hafesa emukurumbunga pokudiva asi awo kwa vaterere Vakriste wovagwavekwa apa va kere pevhu.

19-20. Ngomu uhura una kuhedera pepi, yisinke natu rugana yipo tu twikire kulimburukwa Jehova nampili momaudigu?

¹⁹ Pomazuva aga gopouhura, sinzi sovakareli vaJehova kuna kuligwanekera nomaudigu. Nye nampili ngoso, ose kuvhura tu ga lididimikire noruhafo. (Jak. 1:2-4) Sininke simwe esi nasi tu vatera kuna kara kukanderera nkenye apa. (Ruk. 21:36) Kugusa ko kukanderera, twa hepa hena kulironga Nonkango daKarunga nokuteda ko kweyi tuna kulironga nokukonakona mauporofete aga ngaga ka sika mo ntaantani. (Epis. 77:12) Nsene tu yi rugana eyi nokulitura mo unene mokuzuvhisa, ayo ngayi tu vatera tu nkondopeke epuro lyetu ntani nehuguvaro lyetu lyokomeho.

²⁰ Gazadara tupu omu ngo lizuvha apa Babironi ngava ka zi zonagura po ntani napa ngayi ka haga po yita yaHarumagedoni. Ntani gazara tupu ruhafo oru ngo ka kara naro apa vantu navenye ngava ka fumadeka edina lyaJehova nokumutambura ngomupangeli gwawo. (Hes. 38:23) Ezi yizo konda yita yaHarumagedoni ayi hafesere vantu ava va diva Karunga nokulimburukwa Munwendi nampili ngomu vana kuligwanekera nomaudigu.—Mat. 24:13.