Velise ezi kuresa asi: “Ya ha ku tetura nsene o mona epangero tali hepeke vahepwe, li va hakane usili nouhungami. Nkenye erenga gogu ga li pitakana yige a li popere, ano navenye mouvali wawo marenga aga ga va pitakana yigo aga va popere.”—Muud. 5:8.

Kwetu ose vantu, kuvhura tu gazare asi velise ezi kwa tamba kovapangeli womomapangero. Nye nsene tu gazadara ko nawa, velise ezi kugava mauzera kuhamena Jehova, eyi kuvhura yi tu korangede nokutuhengagwida.

Muudisi 5:8 kwa tamba komupangeli ogu a hepeke vahepwe nokuvaninkilira mo. Mupangeli ga hepa kudiworoka asi kweli gumwe ogu ana kumutarera ogu ga mu pitakana mounankondo mepangero. Ntani kuvhura pa kare hena vantu wovanzi ava va mu pita mounankondo. Nye momapangero govantu, vapangeli navenye ufuki ano vantu wovanzi kuhepa sili morwa ufuki wangesi.

Nye nampili tu hepe unene, twa hepa kudiworoka asi Jehova kuna kuyimona nampili eyi vana kurugana vapangeli. Kuvhura tu kanderere kwaKarunga nokumutantera maudigu getu. (Epis. 55:22; Fil. 4:6, 7) Ose twa yi diva asi: “HOMPA yige a takamesa uzuni mudima, age kugava nonkondo kwanavenye ava ava hama kwendi nomutjima nagunye.”—2 Hist. 16:9.

Yipo nye, Muudisi 5:8, kutudiworokesa asi koveli vamwe va kara nounankondo mepangero. Nye unene po, velise ozo kutudiworokesa asi Jehova yige mupangeli gomunene po mouzuni naunye. Age ngesi kuna kupangera kupitira mwaMunwendi Jesus Kristusa, hompa goUhompa waKarunga. Karunga Munankondo nadinye ogu a mono nkenye eyi, age kurugana yokuhungama ngwendi Munwendi.