1-2. Ngapi egano lyomwaMuudisi 11:6 lya li fana nosirugana setu sokuzuvhisa mbudi zongwa?

MOYIRONGO yimwe vantu kwa hara kutambura mbudi zongwa. Awo kuzi ndindira nononkondo. Nye moyirongo yimwe vantu kapi va kara neharo lyokutambura mbudi zongwa. Ngapi vantu womomukunda gweni ava tara mbudi zongwa? Yi kare asi monkedi musinke ava zi tambura, Jehova kuna kundindira ko kwetu tu twikire kuzuvhisa dogoro nga uyunge asi sirugana sina pu.

² Jehova ga tura po nare siruwo apa sirugana sokuzuvhisa ngasi pwa, konyima “ntani nye ngaku kwama uhura.” (Mat. 24:14, 36) Ano posiruwo esi, ngapi omu natu sikisa mo nonkango edi asi ‘O kune ngurangura nongurova’? *—Resa Muudisi 11:6.

3. Yisinke natu ka konakona mosirongwa esi?

³ Mosirongwa sa ka pita katu lirongere yininke yine eyi natu rugana yipo yi tu tompoke kukara “vakwati wovantu.” (Mat. 4:19) Mosirongwa esi tatu ka zogera yininke yitatu eyi natu rugana tu twikire kuzuvhisa yi kare asi maukaro musinke tuna kupita. Tatu ka zogera eyi ya karere nomulyo tu (1) ture muhowo sirugana sokuzuvhisa meparu lyetu (2) tu lididimikire ntani (3) tu kare nepuro lyenene.

4. Morwasinke natu tulira muhowo sirugana esi ga tu pa Jehova?

⁴ Jesus kwa pumbire yihorokwa eyi ngayi likida asi aga kuna kara mazuva gopouhura ntani noyininke yimwe eyi ngayi vhura  kudonganesa vasikuli vendi va dire kudemenena kosirugana sokuzuvhisa. Age kwa tanterere varongwa vendi asi: “Rungarareni.” (Mat. 24:42) Momazuva gaNowa, pwa kere yininke yoyinzi eyi ya ninkisire vantu va dire kupurakena eyi gava rondwere Nowa. Yininke oyo kuvhura nose kutudonganesa neina. (Mat. 24:37-39; 2 Pet. 2:5) Yipo nye, tuna hara kutura muhowo sirugana sokuzuvhisa meparu lyetu.

5. Ngapi omu etjangwa lyomoYirugana 1:6-8 ali likida omu sirugana sokuzuvhisa sa lihana?

⁵ Naina twa hepa kudemenena unene kosirugana sokuzuvhisa mbudi zongwa. Jesus kwa pumbire asi sirugana esi ngasi li gwederera unene konyima zonomfa dendi. (Joh. 14:12) Konyima zapa Jesus ga fire, varongwa vendi vamwe kwa tengwire konongesefa dawo dokukwata nomfi. Konyima zapa Jesus va mu vhumbwire, age kwa rugene sitetu pokuvatera varongwa vendi vamwe va kwate nomfi dononzi. Age kwa ruganesere siruwo oso mokunkondopeka asi sirugana sokuzuvhisa nokutulisa po varongwa mulyo unene kupitakana nkenye sirugana. (Joh. 21:15-17) Komeho tupu a tengure meguru, age kwa tanterere varongwa vendi asi sirugana sokuzuvhisa esi ga tamekere ngasi ligwederera unene mouzuni mudima. (Resa Yirugana 1:6-8.) Konyima zonomvhura dononzi, Jesus kwa geve emoneko komupositoli Johanesa pokumulikida eyi ngayi horoka “mezuva lyaHompa.” * Sininke simwe esi ga mwene Johanesa memoneko olyo kuna kara muengeli ogu ga twere “Mbudi zoNgwa zanarunye” a ka zi zuvhisire “yirongo nayinye nomarudi nagenye nomaraka nagenye nonomuhoko nadinye.” (Ehor. 1:10; 14:6) Eyi kulikida asi Jehova kuna hara tu zuvhise mbudi zongwa mouzuni mudima, dogoro nga uyunge asi sirugana sina pu.

6. Ngapi natu twikira kutura muhowo sirugana sokuzuvhisa meparu lyetu?

 ⁶ Nsene tu gazadara ko omu Jehova ana kutuvatera ayo ngayi tu tumangeda tu ture muhowo sirugana sokuzuvhisa meparu lyetu. Pasihonena, age kuna kutupa nondya dononzi dopampepo kupitira moyimbapiratjangwa yokunduruka neyi yokointaneta, monovidiyo ntani kobroadcasting. Ngesi intaneta zetu jw.org, kuzigwana momaraka gokupitakana 1000. (Mat. 24:45-47) Mouzuni ou, vantu kapi va kara mouumwe morwa awo kukwatesa ko nombungapolitika dokulisiga-siga ntani awo kwa hamena komaukarelikarunga gokulisiga-siga. Nye vakareli vaJehova wokupitakana pomamiliyona ntantatu kwa kara mouumwe mouzuni mudima. Pasihonena, Moutano 19 Kudumogona 2019, Nombangi daJehova kwa tarerere vidiyo ezi za likidire etjangwa lyemezuva olyo. Mongurova zezuva olyo, vantu wokusika 20 919 041 kwa kere poMurarero gonomfa daJesus. Apa atu gazadara ko komfumwa ezi twa kara nazo mokulihameka mosilika esi, ayo kututumangeda tu ture muhowo sirugana sokuzuvhisa meparu lyetu.

7. Ngapi sihonena saJesus asi tu vatere tu ture muhowo sirugana sokuzuvhisa meparu lyetu?

⁷ Sihonena saJesus kutuvatera tu ture muhowo sirugana sokuzuvhisa meparu lyetu. Age kapi ga pulisilire yininke yi mu kondere a dire kugava umbangi kuhamena usili. (Joh. 18:37) Age kapi ya mu pukisire apa Satana ga here kumupa “mauntungi gouzuni nomaufuuli gamo,” napa ga here kumuninka a kare hompa. (Mat. 4:8, 9; Joh. 6:15) Edowo lyemona kapi lya mu pukisire ntani kapi ga dompere mutjima nampili ngomu va mu hepekere. (Ruk. 9:58; Joh. 8:59) Nsene epuro lyetu kuna kuliheteka, ose kuvhura simpe tu twikire kutura muhowo sirugana sokuzuvhisa meparu lyetu nsene tu diworoka nonkango daPaurusa. Age kwa tanterere Vakriste va kwame sihonena saJesus yipo va ‘dire kuroroka gu va tororoke’!—Heb. 12:3.

8. Yisinke elididimiko ntani morwasinke ya karera nomulyo tu lididimike ngesi?

⁸ Elididimiko kutanta asi kundindira ukaro dogoro u ka litjindje. Twa hepa kulididimika, yi kare asi kuna kundindira yininke yoyidona yi ka hage po ndi kuna kundindira yininke yoyiwa eyi twa hara yi ka sike mo. Muporofete Habakuku kwa ndindilire asi yininke yoyidona eyi nga va rugana Vajuda yi hage po. (Hab. 1:2) Varongwa vaJesus kwa ndindilire asi Untungi waKarunga ‘u wize usimbu’ nokuyava gusa mo mepangero lyoVaroma. (Ruk. 19:11) Ose kuna kundindira nononkondo apa Uhompa waKarunga ngau ka gusa po udona naunye nokukaretesa po uzuni woupe omu ngava ka kara vantu wovalimburukwi. (2 Pet. 3:13) Nye nampili ngoso, twa hepa kulididimikira nokundindira siruwo esi ga tura po mwene Jehova. Tu tare ni ko nonkedi dimwe omu Jehova a tu rongo yipo tu lididimikire.

9. Yihonena musinke yina kulikida asi Jehova ga kara nelididimiko?

⁹ Jehova yige ga tu tulira po sihonena sosiwa kuhamena elididimikiro. Age kwa pere Nowa siruwo sosire yipo a tunge emuwato ‘nokuudisira vantu uhungami.’ (2 Pet. 2:5; 1 Pet. 3:20) Jehova kwa purakenene kwaAbirahamu apa ga mu pulire yikando yoyinzi kuhamena etokoro lyendi lyokuzonagura vantu wovadona mositata saSodoma naGomora. (Gen. 18:20-33) Nomvhura dononzi, Jehova kwa lididimikire unene apa Vaisraeli ngava dili kumulimburukwa. (Neh. 9:30, 31) Jehova kuna kulikida hena elididimiko pokupulisira siruwo sosire yipo vantu ava a koko va “litezurure.” (2 Pet. 3:9; Joh. 6:44; 1 Tim. 2:3, 4) Yihonena eyi kuna kutuvatera nose tu lididimikire  ngomu tuna kutwikira kuzuvhisa nokuronga. Jehova kuturonga hena omu natu lididimikira kupitira mosifanekeso simwe esi sa kara moNonkango dendi Bibeli.

10. Yisinke asi tu rongo sihonena somunandima esi sa kara mwaJakopo 5:7, 8?

¹⁰ Resa Jakopo 5:7, 8. Sihonena somunandima ogu a limi, kuturonga asi twa hepa kulididimikira. Yimeno yimwe kukura usimbu. Nye yimeno yoyinzi, unene po eyi ayi reta mbuto kugusa siruwo komeho va ka yi zangure. Nombuto edi ngava limi moIsraeli ngadi gusa hambara makwedi ntazimwe komeho va ka di zangure. Munandima nga kunu mbuto zendi apa mvhura ngazi tameke pomangenyena, ano nga zangura mbuto zendi poyiha yokufu. (Mar. 4:28) Twa hepa kuhonena munandima monkedi omu a li didimikire, nye nampili ngoso ayo kapisi ureru.

11. Ngapi omu elididimiko ngali tu vatera mosirugana sokuzuvhisa?

¹¹ Ngovantu wokudira kusikilira mo, ose kwa hara kumona usimbu-simbu yitundwamo yoyirugana yetu. Nye nsene tuna hara mbuto zetu zomosikunino zi kure, twa hepa kuzipakera mbili nkenye apa. Pasihonena, twa hepa kutopagera, kukuna, kuherera ntani nokuzitekera. Mokulifana, mokutulisa po varongwa nose twa hepa kurugana unene. Ayo kugusa siruwo mokuvatera varongwa vetu va lironge kunyokera po mpongo ntani va kare neharo. Elididimikiro kutuvatera tu dire kudompa apa vantu ava dili kutupurakena. Nye twa hepa hena kulididimikira apa vantu ava purakene kombudi zetu. Kapi tatu vhuru kusininika murongwa a kare nepuro. Nampili varongwa vaJesus, poyiruwo yimwe kapi ngava kwata usimbu egano eyi ngava rongo Jesus. (Joh. 14:9) Tu diworokeni asi ose kukuna nokutekera nye Karunga yige ayi kulisa.—1 Kol. 3:6.

12. Ngapi natu likida elididimiko nsene kuna kuzuvhisira vekoro lyetu ava va dira kupura?

¹² Nkedi zimwe omu ayi tu digopere kulikida elididimiko kuna kara apa atu zuvhisire  vekoro lyetu ava va dira kukara Nombangi. Mpango ezi za kara mwaMuudisi 3:1, 7 kuvhura kutuvatera. Azo kutanta asi pwa kara “siruwo sokumwena nosiruwo sokuuyunga.” Nkareso zetu zongwa kuvhura kuninkisa vekoro lyetu va hare kutupurakena, yipo nye twa hepa kupapara nompito tu va tantere ko usili womoBibeli. (1 Pet. 3:1, 2) Twa hepa kulididimika apa atu zuvhisa nokuronga vantu kukwatera mo vekoro lyetu.

13-14. Yihonena musinke yavamwe ava valididimikire natu honena?

¹³ Ose kuvhura kulirongera koyihonena yavamwe wovalimburukwi womosiruwo sanare ntani womosiruwo setu kuhamena elididimiko. Habakuku kwa ndindilire nononkondo udinikarunga u hage po nye ga likidire elididimiko apa ga uyungire asi: “Ame ngani ronda koruhungu rwange ni ndindire.” (Hab. 2:1) Mupositoli Paurusa kwa tente asi age kwa here ‘kusikisa mo’ sirugana sendi sokuzuvhisa. Nye, ga twikilire ngorooro ‘kusanseka mbudi zongwa zonkenda zaKarunga’—Yirug. 20:24.

¹⁴ Tu tareni sihonena sovalikwali ava va ka tundire kosikora zaGiliyata ava va tumine kosirongo oku kwa kara Nombangi dononsesu ntani oku vantu wovanzi va kara asi awo kapisi Vakriste. Mosirongo oso, vantu wovasesu tupu va here kulironga Bibeli. Nye mukwawo ogu va ka kere nendi koSikora zaGiliyata ngava tumine nombudi kuhamena omu nga vatere vantu va ya kare Nombangi daJehova. Valikwali ava kwa twikilire kuzuvhisa nampili ngomu ya kere asi wovasesu tupu ngava va purakene. Konyima zokuzuvhisira momukunda ogo nomvhura ntantatu, awo kwa hefe apa va mwene murongwa gwawo gumwe kuna kugwana ekuho. Yisinke tuna kulirongera ko koyihonena eyi yomosiruwo sanare ntani yomosiruwo setu? Vanavazinyetu ava wovalimburukwi kwa twikilire ngorooro kuzuvhisa nelididimiko, ano Jehova ga va futire. Tu honeneni vantu ava ‘ngava ka pinga eyi ga tumbwidira Karunga, morwa epuro noudidimiki wawo moudigu.’—Heb. 6:10-12.

15. Nkedi musinke zimwe omu epuro ali tu vatere tu tokomene kuzuvhisa?

¹⁵ Ose twa pura mbudi ezi atu zuvhisa. Yipo nye, twa hepa kutantera ko vantu wovanzi. Ose twa huguvara matumbwidiro aga ga kara moNonkango daKarunga. (Epis. 119:42; Jes. 40:8) Ose twa mona omu mauporofete gomoBibeli ga sikilira mo momazuva getu. Twa mona omu vantu ava tura po malitjindjo meparu apa ava sikisa mo nompango domoBibeli. Maumbangi aga kutupa ehuguvaro asi mbudi zongwa zokuhamena Uhompa waKarunga va hepa kuzizuvha vantu navenye.

16. Ngapi Episarome 46:1-3 ali likida asi nsene tu pura mwaJehova naJesus ngayi tu tumangeda tu zuvhise?

¹⁶ Ose twa pura hena mwaJehova mugavi gombudi ezi atu zuvhisa ntani twa pura mwaJesus ogu va pa nonkondo dokukapangera moUhompa. (Joh. 14:1) Yi kare asi yisinke yina kutuhorokera, Jehova nga tu popera nokutupa nonkondo. (Resa Episarome 46:1-3.) Ntani twa yi pura nawa-nawa asi Jesus kuna kupitisira sirugana sokuzuvhisa kutundilira meguru pokuruganesa nonkondo edi ga mu pa Jehova.—Mat. 28:18-20.

17. Gava sihonena sina kulikida konda zeyi natu twikilira kuzuvhisa.

¹⁷ Epuro kutuvatera tu yi pure nawa-nawa asi Jehova nga tungika elituromo lyetu mononkedi edi twa dira kugazara rumwe. (Muud. 11:6) Pasihonena, nkenye ezuva vantu wovanzi kumona yitoroli yetu noyitafura apa atu tura yimbapiratjangwa yetu. Ngoso nkedi ezi kuna kututompoka mokuzuvhisa ndi? Nhi. Mosimbapira setu Yirugana yetu yoUhompa  saMangundu 2014 kwa simwitilire mo kuhamena mudinkantu gokouniversity ogu ga here kutjanga sirongwa sokuhamena Nombangi daJehova. Kapi ga vhulire kugwana Sinyanga soUhompa, nye posure zawo pouniversity ga gwene sitafura soyimbapiratjangwa, makura yipo ga gusire po yimwe yi ka mu vatere mokukatjanga eyi ga here. Konyima ga ya gwene ekuho ntani age ngesi muzuvhisi gokukarerera. Yihorokwa yangesi kututumangeda tu twikire kuzuvhisa morwa ayo kulikida asi simpe vantu vanzi vana hepa kuzuvha mbudi zongwa.

18. Morwasinke natu yi pulira asi sirugana sokuzuvhisa ngasi pwa posiruwo esi ga tura po Jehova?

¹⁸ Kuvhura tu yi pure nawa-nawa asi sirugana sokuzuvhisa ngasi pwa posiruwo esi va tura po. Koneka eyi ya horokere momazuva gaNowa. Jehova ga yi likidire asi age kurugana yininke posiruwo esi ga tura po. Nomvhura 120 komeho zoruhanzo, Jehova ga tokwere nare asi siruwoke ngaru tameka ruhanzo. Konyima zonomvhura dononzi, Jehova kwa tanterere Nowa a tunge emuwato. Alyo nampo kwa gusire nomvhura 40 ndi 50 komeho ru ya tameke ruhanzo. Nowa nga rugana unene. Nampili ngomu vantu ngava dili kumupurakena, age kwa twikilire kuzuvhisa mbudi zerondoro dogoro apa Jehova ga ya uyungire asi siruwo sina siki sokutwara yikorama mowato. Makura, “Hompa ta zedire evero” posiruwo esi ga tulire po mwene.—Gen. 6:3; 7:1, 2, 16.

19. Yisinke tuna kundindira komeho nsene tu twikira kuzuvhisa?

¹⁹ Ntaantani tupu Jehova nga ka hagekese po sirugana sokuzuvhisa. Makura ntani ngaka zonagura po uzuni ou waSatana nokukaretesa po uzuni woupe. Posiruwo esi, tu twikireni kuhonena Nowa naHabakuku ntani navamwe ava va twikilire kukarera Jehova. Tu twikire ni kudemenena kosirugana sokuzuvhisa nokulididimikira ntani nokukara nepuro lyenene momatumbwidiro gaJehova.