1. Posiruwo musinke ayi tu karere udigu unene kukarera Jehova?

POSIRUWO musinke ayi tu karere udigu unene kukarera Jehova? Apa atu kara nomaudigu gomanzi ndi apa atu dili kukara nomaudigu gomanzi? Apa atu ligwanekere nomaudigu, ayo kuturerupira usimbu kuhuguvara mwaJehova. Nye yisinke atu rugana apa atu kara noumanguruki wokukarera Jehova? Ose kudivara kukarera Jehova ndi? Jehova kwa rondwere Vaisraeli asi eyi kuvhura kuvahorokera.—Deut. 6:10-12.

2. Sihonena musinke ga tu tulira po hompa Asa?

² Hompa Asa kuna kara mugara ogu ga ruganesere nawa siruwo sendi pokuhuguvara unene mwaJehova. Age nga karere Jehova moyiruwo yoyidigu nomoyiruwo yoyiwa. “Age kwa limburukwire ngorooro kwaHOMPA ukaro wendi naunye.” (1 Vah. 15:14) Nkedi zimwe omu ga yi likidire asi age nga karere Jehova nomutjima gwendi nagunye, kuna kara pokuzonagura po ukarelikarunga woyimpempa moJuda. Bibeli kutanta asi: “Ta zungurura yizambero yokoyirongo nomavega govapagani gokutongamena, ta bamagura mamungundi gokupongoka gomamanya.” (2 Hist. 14:3, 5) Age hena kwa gusire po ozinakuru Maka pevega eli vava tulire lyozinya hompa. Morwasinke? Morwa awo ngava tantere vantu va karere sikarunga soyimpempa.—1 Vah. 15:11-13.

3. Yisinke natu ka zogera mosirongwa esi?

³ Kugusa ko kuzonagura po yikarunga yoyimpempa, Asa kwa vaterere vantu va tameke kukarera hena Jehova. Jehova  kwa tungikire Asa ntani noVaisraeli posiruwo esi va kere mombili. * ‘Sirongo kwa kere mompora’ ure wonomvhura murongo mepangero lyaAsa. (2 Hist. 14:1, 4, 6) Mosirongwa esi, tatu ka zogera eyi ga rugene Asa mosiruwo oso sompora ndi sombili. Ntani tatu ka zogera hena eyi va rugene Vakriste womosiruwo sovapositoli, posiruwo sombili. Konyima tatu ka limburura epuro eli asi: Nsene asi ove kwa tunga mosirongo omu va pulisira ukarelikarunga wetu, ngapi omu no ruganesa siruwo oso monaruwa?

4. Kuliza no-2 Histoli 14:2, 6, 7, yisinke ga rugene Asa mosiruwo sombili?

⁴ Resa 2 Histoli 14:2, 6, 7. Asa kwa tanterere vantu asi Jehova ‘kwava pere mpora.’ Nye Asa kapi ga gazarere asi ga hepere kuruganesa siruwo oso yipo a hafere tupu eparu. Nye mokulisiga, age kwa dikire yitata, makuma, marungavero nomaruhungu. Age kwa tanterere Vajuda asi: “Epangero lyosirongo lyetu.” Yisinke ga tembe Asa? Age kwa tembe asi kapi kwa kere nonkore mosirongo, edi ngano da va konderere va dire kugenda nokutungurura. Age kwa tanterere vantu va ruganese nawa siruwo esi va kere mombili.

5. Morwasinke Asa ga wapaikilire vakwayita vendi?

⁵ Apa za kere ko mbili, Asa kwa ruganesere hena siruwo oso yipo a wapaike vakwayita vendi. (2 Hist. 14:8) Eyi kutanta nye asi kapi ga huguvarere mwaJehova ndi? Hawe. Age kwa yi tere asi aso kwa kere situmbukira sendi ngahompa, mokuwapaika vantu vendi yipo va ya pite moyiruwo yoyidigu eyi ya va kere komeho. Asa ga yi divire asi siruwo sombili esi ngava hafere Vajuda ngasi haga, ano eyi yiyo ya ya horokere.

6. Yisinke va rugene Vakriste womosiruwo sovapositoli posiruwo apa za kere ko mbili?

⁶ Nampili ngomu Vakriste womosiruwo sovapositoli ngava va hepeke nkenye apa, nye poyiruwo yimwe va kere nosiruwo sombili. Yisinke ngava rugana posiruwo sombili? Vakriste owo kwa twikilire kuzuvhisa mbudi zongwa. Sihorokwa somoYirugana kututantera asi awo ‘kwa tjilire Jehova.’ Awo kwa twikilire kuzuvhisa mbudi zongwa ano ngoyitundwamo, awo kwa ‘vhukire.’ Eyi kulikida asi Jehova ga va tungikire posiruwo esi va kere mombili.—Yirug. 9:26-31.

7-8. Yisinke ga rugene Paurusa novakwawo apa va gwene mpito zokuzuvhisa? Faturura.

⁷ Vakriste womosiruwo sovapositoli, ngava ruganesa nkenye ezi mpito ngava gwana yipo va zuvhise mbudi zongwa. Pasihonena, apa Paurusa ga dimbwilire asi kuvhura a zuvhisire moEfeso, age kwa kere mositata oso yipo a zuvhise nokutulisa po varongwa.—1 Kol. 16:8, 9.

⁸ Paurusa noVakriste vakwawo, va kere hena nompito zokuzuvhisa apa udigu wovamba va u kohwenene po momvhura 49 C.E. (Yirug. 15:23-29) Konyima zapa Paurusa novakwawo va tanterere nombungakriste kuhamena etokoro olyo, awo kwa zuvhisire unene “mbudi zehafo zononkango daHompa.” (Yirug. 15:30-35) Yitundwamo musinke ya kere? Bibeli kutanta asi: “Nombungakriste kwa di korekere mepuro, tadi kuru nkenye ezuva.”—Yirug. 16:4, 5.

9. Ukaro musinke una kara moyirongo yoyinzi naina?

⁹ Moyirongo yoyinzi naina, ose kuzuvhisa nemanguruko twa hana kuligwanekera nomahepeko. Ove kwa tunga mosirongo omu va pulisira ukareli wetu ndi? Nsene yimo, lipura asi ‘yisinke nina kurugana posiruwo esi una kara mo umanguruki mosirongo setu?’ Pomazuva aga gopouhura, aso kuna kara siruwo sosiwa kovakareli vaJehova morwa awo kuna kurugana unene mokuzuvhisa ntani nokuronga vantu. Esi kuna kara sirugana sosinene po mouzuni mudima. (Mar. 13:10) Ngovakareli vaJehova, ngesi pana kara yirugana yoyinzi eyi twa hepa kurugana.

10. Yisinke lina kutukorangeda etjangwa lya-2 Timoteusa 4:2, eyi natu rugana?

¹⁰ Yisinke natu rugana posiruwo esi tuna kara mombili? (Resa 2 Timoteusa 4:2.) Kuvhura o konakone ukaro woge ndi wa gumwe gemepata lyeni, nsene kuvhura mu li hameke mo unene mokuzuvhisa ndi mu rugane uzuvhisi wokukarerera. Esi kapisi siruwo sokukondjera emona morwa yininke eyi kapi ngatu ka pita nayo moudigu wounene.—Yis. 11:4; Mat. 6:31-33; 1 Joh. 2:15-17.

11. Yisinke va rugana vazuvhisi vamwe yipo va zuvhisire vantu wovanzi mbudi zongwa?

¹¹ Vazuvhisi wovanzi kwa li ronga eraka lyepe yipo va zuvhisire vantu nokuvaronga. Mbunga zaJehova kwa pwagesa yimbapiratjangwa momaraka gokulisiga, yipo tu zuvhisire vantu momaraka gomanzi. Pasihonena, mo-2010 yimbapiratjangwa yetu kwa yi pwagesere momaraka gokusika 500. Nye naina, yimbapiratjangwa yetu kuyipwagesa momaraka gokupitakana 1000.

12. Uwa musinke ava gwanene mo vantu apa ava zuvhu mbudi zoUhompa meraka lyavene? Gava sihonena.

¹² Ngapi omu ava lizuvhu vantu apa ava zuvhu usili womoBibeli meraka lyavene? Tu tareni sihonena samunazinyetu gomukadi ogu ga gwanenene mo uwa mosigongi esi sa kere mositata saMemphis Tennessee, moAmerika. Sigongi oso kwa kere meraka lyoRukinyarwanda, eraka eli ava uyunga po unene moRwanda, moCongo (Kinshasa) ntani moUganda.  Konyima zosigongi, munazinyetu ogu a uyunga Rukinyarwanda kwa tente asi: “Esi kuna kara sikando sange sokuhova kukwata nawa egano elikwamo lyoposigongi kutunda apa na wiza moAmerika nomvhura 17 da ka pita.” Yosili, eyi kulikida asi eyi ga zuvhire munazinyetu ogu melikwamo olyo meraka lyawo, kwa mu twire komutjima. Nsene asi ukaro woge una kupulisire, kuvhura o lironge eraka lyapeke yipo o vatere vantu womomukunda gweni ndi? Ayo mulyo kuyirugana ngoso, nsene asi momukunda gweni mwa kara vantu ava ava uyunga eraka lyapeke. Pokuyirugana ngoso, ngo hafa.

13. Ngapi omu vanavazinyetu womoRusia ava ruganesa siruwo sawo apa ava kara mombili?

¹³ Vanavazinyetu vamwe kapi va kara nemanguruko lyokuzuvhisa. Moyirongo yimwe, vanavazinyetu kapi ava zuvhisa nemanguruko morwa epangero kwa silika sirugana setu sokuzuvhisa. Tu tareni sihonena sovanavazinyetu womoRusia. Awo ngava va hepeke nomvhura dononzi, nye mwaNsinano 1991, epangero kwa pulisilire ukareli wawo. Posiruwo sina, moRusia kwa kere mo vazuvhisi 16 000. Nye konyima zonomvhura 20, sivaro oso kwa ligwederera novazuvhisi wokupitakana 160 000. Yosili, vanavazinyetu kwa ruganesere nkenye mpito va zuvhise noumanguruki. Awo kapi va kere siruwo sosire mombili. Nampili ngomu va dira kuvapulisira va rugane ukareli wawo mosirongo sawo, awo simpe kuna kutwikira kukarera Jehova. Awo kuruganesa nkenye mpito vana gwana va karere Jehova.

14-15. Ngapi omu Jehova ga likidire nonkondo dendi apa ga vaterere Asa?

¹⁴ Momazuva gaAsa, siruwo sombili kwa hege. Vakwayita emiliyona wononkondo kwa tundire koEtiyopiya. Ano mupitisili gwawo  Zera kwa gazarere asi nage novakwayita vendi tava ka funda Vajuda. Nye nampili ngoso, hompa Asa kapi ga huguvarere mosivaro sovakwayita, nye age kwa huguvarere mwaJehova. Makura ta kanderere asi: “Tu kwafa nye HOMPA Karunga gwetu, morwa ose koge tuna lihameke, ano ose hena medina lyoge tuna wizire tu ya rwise emumbunga eli lyovakwayita wovanzi.”—2 Hist. 14:11.

¹⁵ Nampili ngomu vakwayita womoEtiyopiya va kere wovanzi, nye Asa ga yi divire asi Jehova ga kara nononkondo dononene ntani na popera vantu vendi. Ano eyi yiyo ya horokere. Jehova kwa poperere vantu vendi, ano vakwayita wovaEtiyopiya kwava fundire.—2 Hist. 14:8-13.

16. Ngapi omu twa yi diva asi mbili zomouzuni ou kapi ngazi karerera?

¹⁶ Nampili ngomu twa dira kudiva eyi ngayi tu horokera nawa-nawa komeho, nye twa yi diva asi mbili ezi ava hafere vakareli vaJehova kapi ngazi karerera. Jesus kwa tente asi pomazuva gopouhura, varongwa vendi ‘ngava va hepeka momudona.’ (Mat. 24:9) Paurusa nage kwa uyungire asi “navenye ava va tokora kukerera Karunga momalikwatakano naKristusa, nawo yimo ngorooro ngava va hepeka.” (2 Tim. 3:12) Satana ana kara “nehandu lyenene” ntani ose kapi tatu vhuru kuhenduka ehandu lyendi.—Ehor. 12:12.

17. Mononkedi musinke nampo ngava heteka epuro lyetu?

¹⁷ Ntaantani tupu ngava heteke epuro lyetu natuvenye. Makura ntani nye “ngapa kara udigu wounene, ou wa dilire kukara po kutunda ketameko lyouzuni dogoro nokwanaina.” (Mat. 24:21) Posiruwo oso, vekoro lyetu kuvhura ngava tu rwanese ntani ukareli wetu kuvhura ngava u silike. (Mat. 10:35, 36) Ngatu huguvara mwaJehova ngwendi Asa yipo a tu popere ndi?

18. Kuliza noVahebeli 10:38, 39, yisinke nayi tu vatera tu liwapaikire udigu wounene?

¹⁸ Jehova kuna kutuvatera ngesi yipo tu kare nepuro eli ngali katu vatera moyihorokwa yokomeho eyi tuna kundindira. Age kuna kuruganesa “mukareli gokulimburukwa gonondunge” a tu pe nondya posiruwo sado, yipo tu twikire kumukarera. (Mat. 24:45) Nye natuvenye twa hepa kurugana ko yuma  yipo tu nkondopeke epuro lyetu mwaJehova.—Resa Vahebeli 10:38, 39.

19-20. Kuliza no-1 Histoli 28:9, mapuro musinke natu lipura ntani morwasinke natu ga lipulira?

¹⁹ Ngwendi hompa Asa, nose twa hepa ‘kupapara’ Jehova. (2 Hist. 14:4; 15:1, 2) Ose kutameka kupapara Jehova apa atu ya mu diva ntani apa atu gwana ekuho. Ose kurugana paapa twa hulira yipo tu hare Jehova unene. Nsene tuna hara tu dive nsene asi twa hara Jehova unene, twa hepa kulipura asi, ‘Ame kuza komapongo nkenye apa ndi?’ Apa atu kara komapongo, ose kugwana nonkondo yipo tu twikire kukarera Jehova ntani kugwana ekorangedo kovanavazinyetu. (Mat. 11:28) Twa hepa hena kulipura asi, ‘Ame kulironga Bibeli nkenye ezuva ndi?’ Nsene asi ove kwa tunga nepata lyeni, one kurugana ukareli wepata nkenye sivike ndi? Nsene asi nyovelike wa kara, ove kulitulira po siruwo yipo o rugane ukareli wepata ndi? Ove kuruganesa nkenye mpito yipo o zuvhise nokutulisa po varongwa ndi?

²⁰ Morwasinke natu lipulira mapuro ogo? Bibeli kututantera asi Jehova kukonakona magazaro getu neyi ya kara momutjima gwetu. Yipo nye, nose twa hepa kulikonakona nyamwetu. (Resa 1 Histoli 28:9.) Nsene tuna dimburura asi twa hepa kutura po malitjindjo monkareso zetu, twa hepa kupura Jehova a tu vatere tu ture po malitjindjo gangoso. Esi kuna kara siruwo natu rugana ko yuma yipo tu li wapaikire eyi yina kara komeho. Wa ha pulisira nkenye eyi yi ku kondere mokuruganesa nawa siruwo esi sombili.