1. Ngapi omu vantu nava vhura kutumbura Jehova?

MEPATA lyaJehova kwa hamena mo Jesus “mbeli koyisitwa nayinye” ntani novaengeli wovanzi. (Koros. 1:15; Epis. 103:20) Apa Jesus ga ya kere pevhu, age kwa vaterere vantu va tumbure Jehova asi Guhyawo. Sikando simwe apa Jesus ga uyungire novarongwa vendi, age kwa uyungire kuhamena Jehova asi: ‘Otate, Guhyeni.’ (Joh. 20:17) Ntani apa atu li gava kwaJehova nokugwana ekuho, ose kuyahama kepata lyovanavazinyetu.—Mar. 10:29, 30.

2. Yisinke natu ka lironga mosirongwa esi?

² Vamwe kuvadigopera kutara Jehova asi age Guhyawo geharo. Vamwe kapi va diva omu nava likida eharo vapuli vakwawo. Mosirongwa esi, tatu ka lironga omu Jesus ga tu vatera tu tare Jehova ngaGuhyetu geharo ogu natu vhura kuhedera pepi. Ntani natu ka lironga nonkedi dimwe omu natu tekura vanavazinyetu pokuhonena Jehova.

3. Ngapi omu ekanderero lyosihonena ali tu hedesere unene pepi naJehova?

³ Jehova age Guhya geharo. Jesus ana hara tu mu honene pokutara Jehova ngomukurona geharo ntani goureru kuhedera, nye kapisi muntu tupu ogu a tu tantere eyi natu rugana. Ose eyi kuyimonena mweyi Jesus ga tanterere varongwa vendi va kanderere. Mekanderero lyendi lyosihonena, age kwa tamekere nononkango edi asi: “Guhyetu.” (Mat. 6:9) Jesus ngano ga tu tanterere tu kanderere kwaJehova asi: “Munankondo nadinye,” ‘Musiti,’ ndi “Hompa gwanarunye,” yitumbwisiso eyi kapi ya kara epuko, morwa ayo kwa yi ruganesa moBibeli mokutamba kwaJehova. (Gen. 49:25; Jes. 40:28;  1 Tim. 1:17) Nye Jesus kwa tu tanterere tu tumbure Jehova asi “Guhyetu.”

4. Ngapi omu tuna yi diva asi Jehova ana hara tu mu hedere pepi?

⁴ Ove kukudigopera kutara Jehova asi age Guhya geharo ndi? Vamwe kuvadigopera. Nsene asi twa kere naguhyetu ogu ga dilire kutuhara, kuvhura yi tu digopere kuyipura asi kweli guhya ogu ga tu hara. Ayo kutuhengagwida pokudiva asi Jehova kukwata egano omu atu lizuvhu. Age ana hara kukara pepi nose. Eyi yiyo nye Nonkango dendi adi tu korangedere asi: “Hedereni Karunga pepi, nage a mu hedere pepi.” (Jak. 4:8) Jehova ga tu hara ntani age kwa uyunga asi nga kara Guhyetu gomunene po.

5. Kuliza naRukasa 10:22, ngapi omu Jesus a tu vatere tu hedere unene pepi naJehova?

⁵ Jesus ana hara kutuvatera tu hedere unene Jehova pepi. Jesus ga diva unene Jehova ntani age kuhonena nawa-nawa yikara yaJehova, eyi yiyo nye ga uyungilire asi: “Nkenye ogu ga mona nge, ga mona hena Otate.” (Joh. 14:9) Jesus kuturonga omu natu fumadeka nokulimburukwa Guhyetu nomu natu nyokera po kumuguvisa ntani neyi natu rugana yipo tu mu hafese. Nye unene po, Jesus kutuvatera tu kwate egano omu Jehova ga kara nonkenda ntani neharo. (Resa Rukasa 10:22.) Tu zeni tu ka konakone yihonena yimwe.

6. Gava yihonena eyi yina kulikida asi Jehova ga purakenene komakanderero gaJesus.

⁶ Jehova kupurakena kovana vendi. Tu tareni omu Jehova ga purakenene kombeli zendi. Jehova kwa purakenene komakanderero gaJesus yikando yoyinzi apa ga ya kere pevhu. (Ruk. 5:16) Jehova nga purakene Jesus apa nga tura po matokoro gomanene, pasihonena apa ga horowere vapositoli vendi 12. (Ruk. 6:12, 13) Jehova ga zuvhire hena Jesus omu ana kukanderera apa ga kere nosinka sosinene. Komeho Judasa a ya mu horore, Jesus kwa kanderere koGuhwe kuhamena eheteko eli lya mu karere komeho. Jehova ga purakenene kekanderero lyaJesus, ntani age  kwa tumine hena muengeli yipo a mu nkondopeke.—Ruk. 22:41-44.

7. Ngapi o lizuvhu pokudiva asi Jehova kupurakena komakandero getu?

⁷ Jehova kuna kutwikira kupurakena komakanderero getu neina, age hena kugalimburura posiruwo souhunga ntani monkedi zongwa po. (Epis. 116:1, 2) Tu tareni omu munazinyetu gomukadi gomoIndia ga limonene omu Jehova ga limbwilire makanderero gendi. Age kwa kere nosinka unene meparu, makura yipo ga kanderere kwaJehova kuhamena udigu owo. Age kwa tjanga asi: “Elikwamo lyaKudumonkuru 2019 lyoJW Broadcasting^® kwa zogerere eyi natu rugana nsene tuna kara nosinka unene. Elikwamo olyo kwa wizire posiruwo souhunga. Yosili, elikwamo olyo kwa limbwilire makanderero gange.

8. Mononkedi musinke Jehova ga likidire eharo kwaJesus?

⁸ Jehova ga tu hara ntani kutupakera mbili ngwendi moomu tupu ga yi rugene kwaJesus apa ga ya kere pevhu. (Joh. 5:20) Jehova kwa vaterere Jesus a nkondopeke epuro lyendi nokumukorangeda apa ga guvire ntani ga mu vaterere a gwane yihepwa yopanyama. Jehova kwa tanterere Jesus asi ga mu hara ntani ga mu za komutjima. (Mat. 3:16, 17) Jesus ga yi divire asi oGuhwe vemeguru ngava kara nkenye apa nage ntani ngava mu vatera, yipo nye kapi ga lizuvhire asi gelike ana kara.—Joh. 8:16.

9. Ngapi omu twa yi diva asi Jehova ga tu hara?

⁹ Ngwendi Jesus, ose nampo twa li monena eharo lyaJehova mononkedi dokulisiga-siga. Gazadara ko eyi ga tu ruganena Jehova. Age kwa tu kokera kwendi nokutupa epata lyopampepo eli ali tu hafesa nokutukorangeda nsene tuna guwu. (Joh. 6:44) Age kutupa hena nondya dopampepo yipo tu nkondopeke epuro lyetu. Age kutuvatera hena tu gwane yihepwa yetu yankenye ezuva yipo tu paruke. (Mat. 6:31, 32) Nsene tu gazadara ko omu Jehova ga tu hara, ose ngatu mu hara unene.

10. Yisinke natu lirongera ko kwaJehova monkedi omu a tekura vanavazinyetu?

¹⁰ Jehova kwa hara vanavazinyetu. Nye ose kapi ayi tu karerere nkenye apa ureru kuvalikida eharo. Poyiruwo yimwe kutudigopera morwa kwa tundilira konompo dokulisiga-siga ntani kwa tu rera mononkedi dokulisiga-siga. Ntani poyiruwo yimwe natuvenye kutura mapuko aga aga handukisa wopeke nokuvaguvisa. Nye nampili ngoso, kuvhura tu rugane paapa twa hulira yipo tu hare epata lyetu lyopampepo. Ngapi omu natu yi rugana? Kuvhura tu yi rugane oyo pokuhonena Jehova yipo tu likide vanavazinyetu eharo. (Efe. 5:1, 2; 1 Joh. 4:19) Tu zeni tu tare eyi natu lirongera ko kosihonena saJehova.

11. Ngapi omu Jesus ga honene nkenda zaJehova?

¹¹ Jehova kutufira “nkenda.” (Ruk. 1:78) Muntu ogu ga kara nonkenda, kuguva apa a mono wopeke kuna kuhepa ntani age kupapara nonkedi dimwe omu na vhura kuvavatera nokuvahengagwida. Monkedi omu Jesus nga tekura vantu, age kwa honene nkenda ezi va kara nazo oGuhwe. (Joh. 5:19) Sikando simwe apa Jesus ga mwene mbunga zovantu, makura “tazi fire nkenda morwa yeeyi va hepere va lifane nononzwi da hana musita.” (Mat. 9:36) Jesus kwa rugene ko yuma kupitakana tupu kuvafira nkenda. Age kwa verwire vaveli ntani ga vaterere “ava wa rorora udigu.”—Mat. 11:28-30; 14:14.

12. Gava sihonena omu natu likida nkenda kovanavazinyetu.

¹² Nsene tu gazadara ko maudigu aga vana  kupita vanavazinyetu, ngayi tu tumangeda tu va likide nkenda. Pasihonena, munazinyetu gomukadi kuvhura a kare nouvera wounene. Age kuvhura a dire kusivana kuhamena udigu wendi, nye kuvhura yi mu hafese nsene gumwe a mu vatera. Age kumutompoka kupakera mbili epata lyendi noyihepwa yopanyama ndi? Kuvhura tu mu vatere pokumuterekera ko nondya nokuzeresa embo lyendi ndi? Ndi nampo munazinyetu gomugara ka zumbanesere yirugana yendi. Kuvhura tu mu pe ko yimaliwa yongandi ose twa hana kumutantera asi kupi yina tundu, yipo yi mu vatere dogoro noku nga gwana yirugana yapeke.

13-14. Ngapi omu natu honena Jehova pokukara nougavi?

¹³ Jehova kwa kara nougavi. (Mat. 5:45) Kapisi tu ndindire dogoro vanavazinyetu kuna kutupura evatero ntani natu va likida nkenda. Twa hepa kuhonena Jehova pokuvavatera komeho va tu pure. Jehova kutupumisira ezuva nkenye apa twa hana kuyimupura. Ano ugenya wezuva kutuvatera natuvenye, nye kapisi vaava tupu va kara norupandu. Mokumona asi Jehova kutupa yininke nayinye eyi, ayo kulikida asi ga tu hara. Ose twa hara unene Jehova morwa age muwa ntani ugavi.

¹⁴ Vanavazinyetu wovanzi kuhonena Jehova pokukara nougavi. Pasihonena, mo-2013, ekundungu lyenene kwa zonagwire yininke moPhilippines. Vanavazinyetu vamwe kwa zumbanesere mambo gawo noyiweka yawo. Nye epata lyovapuli vakwetu mouzuni mudima kwa va vaterere. Wovanzi kwa geve yimaliwa ndi kwa vaterere kutungurura mambo gokusika koyiha yo-750 momakwedi ntazimwe tupu. Posiruwo souvera woCorona, vanavazinyetu kwa rugene unene yipo va vatere vapuli vakwawo. Apa atu genderere kuvatera epata lyetu lyovapuli vakwetu, ose kuyilikida asi twa va hara.

15-16. Kuliza naRukasa 6:36, nkedi musinke zimwe natu honena Guhyetu gemeguru?

¹⁵ Jehova age nkenda ntani kugusira po. (Resa Rukasa 6:36.) Nkenye ezuva Guhyetu gemeguru kutugusira po. (Epis. 103:10-14) Varongwa vaJesus kapi va sikilire mo, nye age kwa va fililire nkenda nokuvagusira po. Age  kwa lizamberere pokugava eparu lyendi yipo nonzo detu va di tu dongwenene po. (1 Joh. 2:1, 2) Mokumona asi Jehova naJesus va kara nonkenda ntani kutugusira po, eyi kutuninkisa tu va hedere unene pepi.

¹⁶ Apa atu ‘gusire po’ vanavazinyetu, ayo kutuninkisa tu li hare unene. (Efe. 4:32) Yosili poyiruwo yimwe udigu kugusira po wopeke, yipo nye twa hepa kurugana ko yuma. Munazinyetu gumwe gomukadi kwa resere sirongwa moRuhungu sosiparatjangwa asi: “Omu li gusa gusire po,” aso sa mu vaterere a gusire po wopeke. * Age kwa tjanga asi: “Sirongwa esi kwa vatera nge ni kare nomutaro gomuwa kuhamena kugusira po. Sirongwa oso kwa fatwilire asi nsene o gusira po wopeke, kapi ayi tanta asi eyi vana ku rugana yiwa ntani kapi ayi tanta asi eyi vana ku rugana kapi yina kukoresa. Nye nsene o va gusira po kapi ngo kara nonkoko ntani ngo kara nombili zomomutjima.” Nsene tu gusira po vanavazinyetu, ngatu yi likida asi twa va hara ntani kuna kuhonena Guhyetu Jehova.

17. Kuliza naMateusa 5:16, ngapi omu natu fumadeka Guhyetu gemeguru?

¹⁷ Ose kuhafa sili kweyi twa hama kepata lyovapuli vakwetu uzuni mudima ava va lihara-hara. Ose tuna hara vantu wovanzi va ya lipakerere nose yipo tu ya karere Jehova kumwe. Twa hepa kunyokera po nkenye eyi nayi gava efano lyedona kwaGuhyetu Jehova ntani nokovantu vendi. Ose kuhetekera ko kulikida nkareso zongwa ezi ngazi ninkisa vantu va hare kulironga nokukarera Jehova.—Resa Mateusa 5:16.

18. Yisinke nayi tu vatera tu zuvhise twa hana woma?

¹⁸ Vamwe kuvhura va tu rwanese ndi va tu hepeke morwa yeeyi atu limburukwa Guhyetu gemeguru. Ngapi nsene tuna kara nowoma mokutantera ko wopeke eyi twa pura? Kuvhura tu kare nehuguvaro asi Jehova naMunwendi ngava tu vatera. Jesus kwa tanterere varongwa vendi asi kapisi hepero va kare nosinka kuhamena omu nava uyunga ndi eyi nava uyunga. Morwasinke? Jesus kwa fatwilire  asi: “Yeeyi moruveze rooro ngomu diva eyi ngomu ka uyunga, kapisi nyone ngomu ka uyunga, mpepo zaGuhyeni yizo ngazi mu diworokesa eyi ngomu uyunga.”—Mat. 10:19, 20.

19. Gava sihonena sagumwe ogu ga zuvhisire nouradi.

¹⁹ Tu tareni sihonena samunazinyetu Robert. Sikando simwe apa ga kere murongwa gomupe ntani kapi ana diva nawa Bibeli, age kwa zire mompanguro zomoAfrika Mbindakano a ka faturure konda zeyi ga dilire kulihameka moukwayita. Age kwa fatwilire asi kapi ana hara kulihameka moyita morwa ga hara vapuli vakwawo. Age kwa kere norupandu kweyi ga hama kepata lyovapuli vakwawo. Makura mupanguli yipo ga mu pulire asi: “Wolye vapuli vakweni?” Nampili ngomu Robert ga dilire kundindira epuro olyo, nye ga diworokere etjangwa lyezuva olyo. Etjangwa olyo kuna kara Mateusa 12:50 eli ali uyunga asi: “Yeeyi nkenye ogu a rugana mpango zOtate vemeguru, yige mumbyange, yige mpanzange, yige nane.” Nampili ngomu Robert ga kere murongwa gomupe, mpepo zaJehova za mu vaterere a limburure epuro olyo ntani nomapuro gamwe aga ga dilire kundindira. Jehova nampo kwa hefe kweyi ga rugene Robert. Jehova hena kuhafa apa atu huguvara mwendi yipo tu gave umbangi nouradi momaukaro goudigu.

20. Yisinke tuna tokomene kurugana? (Joh. 17:11, 15)

²⁰ Tu twikireni kukara norupandu kweyi twa hamena kepata lyewa lyopampepo. Ose twa kara naGuhyetu gomuwa po unene ntani novanavazinyetu ava va tu hara. Eyi yiyo nye twa hepera kukara norupandu nkenye apa. Satana novantu vendi kuhetekera ko kutuninkisa tu singanyeke asi Jehova kapi ga tu hara ntani kuhetekera ko kuzonagura po uumwe ou twa kara nawo novanavazinyetu. Jesus kwa kanderere koGuhwe va tu kunge yipo epata lyetu li kare mouumwe. (Resa Johanesa 17:11, 15.) Jehova kuna kulimburura ekanderero olyo. Ngwendi Jesus, kapisi tu kare nomasinganyeko kwaGuhyetu asi kapi ngatu pakera mbili nokutuhara. Tu tokomeneni kutwikira kuhedera unene pepi nepata lyaJehova lyopampepo.