SIRONGWA SELIRONGO 39
Nsene gumwe ogu twa hara va mu gusa mombunga
“Yikando yoyinzi . . . ngava mu guvisa.”—EPIS. 78:40.
RUSUMO 102 “Kwafa vankundi”
ETWAROMO *
1. Ngapi ava lizuvhu vemepata nsene gumwe gemepata vana mu gusa mombunga?
KWELI GUMWE gomombunga zeni ogu va gusa mombunga ndi? Ayo kukoresa sili unene komutjima. Munazinyetu gomukadi Hilda kwa tanta asi: “Apa mugara gwange ga fire konyima zokulikwara nomvhura 41, ame kwa gazarere asi ako kwa kere kukora kokunene oku na li gwanekera nako meparu lyange. * Nye apa munange gomumati va mu gusire mombunga nokusiga mukadendi novana vendi, kwa koresere nge unene kupitakana kukora oku na lizuvhire apa na fisire mugara gwange.”
Jehova kukwata egano omu atu lizuvhu nsene gumwe gemepata lyetu vana mu gusa mombunga (Tara paragarafu 2-3) *
2-3. Kuliza nEpisarome 78:40, 41, ngapi omu Jehova a lizuvhu apa gumwe govakareli vendi ava mu gusa mombunga?
2 Gazadara ko omu Jehova ya mu guvisire apa vaengeli vendi vamwe va hagekere kumukarera. (Juda 6) Ntani gazadara ko hena omu ya mu koresere apa Vaisraeli ngava mu rwanesa yikando yoyinzi. (Resa Episarome 78:40, 41.) Kara nehuguvaro asi Guhyetu gemeguru nage kumukoresa apa a mono gumwe gemepata lyeni vana mu gusa mombunga. Age kukwata egano kukora oku muna kulizuvha. Age nga mu pa ekorangedo nevatero eli ngomu hepa.
3 Mosirongwa esi, tatu ka zogera eyi natu rugana yipo Jehova a tu vatere tu lididimikire nsene gumwe gemepata lyetu vana mu gusa mombunga. Tatu ka zogera hena omu natu vatera womombungakriste nsene gumwe gemepata lyawo kwa mu gusa mombunga. Nye pomuhowo, tu zogereni magazaro gomadona aga twa hepa kunyokera po.
NYOKERA PO KULIPA NYAMOGE USIMA
4. Ngapi omu ava lizuvhu vakurona nsene munawo vana mu gusa mombunga?
4 Apa munona gomumati ndi gomukadona ava mu gusa mombunga, vakurona kulipa usima pokulitantera vene asi ngano twa rugene ko yuma yipo tu vatere munetu a twikire kukarera Jehova. Konyima zapa munaLuke gomumati va mu gusire mombunga, Luke kwa tente asi: “Ame ngani li pe nyamwange usima ntani ngani roto nonzondi donondona. Poyiruwo yimwe ame ngani lili ntani mutjima gwange ngagu koro.” Elizabeth ogu nage munendi va gusire mombunga kwa lipulire asi: “Koyili nampo yoyidona na rugene ngazinya ndi? Ame kwa lizuvhire ngwendi kapi na rugene unene yipo ni vatere munange a hare Jehova.”
5. Usima walye au kara nsene gumwe vana mu gusa mo mombunga?
5 Twa hepa kudiworoka asi Jehova kwa tu pa natuvenye umanguruki wokutura po matokoro. Eyi kutanta asi kuvhura tu tokore nyamwetu kumulimburukwa ndi hawe. Vadinkantu vamwe, vakurona vawo kapi vava tulira po sihonena sosiwa, nye nampili ngoso awo kwa tokora kukarera Jehova noulimburukwi. Vakurona vamwe kwa li tura mo unene va vatere vana vawo yipo va hare Jehova, nye konyima zo siruwo vana vawo kwa ya va gusa mombunga. Yipo nye, natuvenye twa hepa kutokora nsene asi ngatu twikira kukarera Jehova. (Jos. 24:15) Vakurona ava va kara novana vawo ava va gusa mombunga, va hepa kunyokera po kulipa vene usima.
6. Ngapi omu munona nampo na lizuvha nsene oguhwe ndi ozina va va gusa mombunga?
6 Poyiruwo yimwe, zinya ndi guhya kumugusa mombunga ntani nokusiga epata lyawo. (Epis. 27:10) Apa ayi horoka oyo, vana vawo ku va guvisa sili unene. Esther ogu oguhwe va gusire mombunga kwa tanta asi: “Ame ngani lili nkenye apa morwa otate kapi tupu va tokwere kusiga usili nye hena kwa tokwere vene asi kapi va here kukarera Jehova. Ame kwa hara sili otate, ano apa va va gusire mombunga, na kere sili nosinka sosinene kwawo. Ntani ame kwa tamekere hena kutukauka komutjima.”
7. Ngapi omu a lizuvhu Jehova kuhamena munona ogu ga kara novakurona ava va gusa mombunga?
7 Vanona, nsene vakurona veni vava gusa mombunga, nose kutuguvisa. Kareni nehuguvaro asi Jehova ga diva kukora oku muna kupita. Age ga mu hara ntani kuhafera ulimburukwi weni ntani vanavazinyetu womombungakriste nawo kuhafa. Diworokeni hena asi matokoro aga va tura po vakurona veni, kapisi unzoni weni. Ngomu tuna yi tumbura muhowo, Jehova kwa pa nkenye gumwe umanguruki wokutura po etokoro lyamwene. Nkenye mukareli gwaJehova ogu ga li gava nokugwana ekuho, ga hepa “kusimba mudigo gwendi.”—Gar. 6:5.
8. Yisinke nava rugana vemepata ngomu vana kundindira ogu va gusa mombunga a tengure kwaJehova? (Tara kakende “ Tengura kwaJehova.”)
8 Apa gumwe ogu wa hara ava mu gusa mombunga, ove kukara nehuguvaro asi ezuva limwe ngaka tengura. Yisinke no rugana ngomu ono kundindira nga tengure kwaJehova? Rugana paapa wa hulira o nkondopeke epuro lyoge. Nsene o rugana ngoso, ove ngo tulira po sihonena sosiwa vemepata lyeni kukwatera mo nogu va gusa mombunga. Ntani ove ngo gwana nonkondo o lididimikire kukora oku ono kara nako. Tu zeni tu ka zogere yininke yimwe eyi no rugana o nkondopeke epuro lyoge.
YISINKE NO RUGANA YIPO O NKONDOPEKE EPURO LYOGE?
9. Yisinke no rugana yipo o nkondopeke epuro lyoge? (Tara hena kakende “ Matjangwa gokuhengagwida nsene gumwe ogu wa hara va mu gusa mombunga.”)
9 Rugana paapa wa hulira yipo o nkondopeke epuro lyoge. Ayo mulyo kutwikira kulinkondopeka nyamoge ntani nava vemepata lyeni. Ngapi omu no yi rugana? Ove kuvhura kugwana nonkondo pokuresa Bibeli nokuteda ko ntani nokukara nkenye apa momapongo. Oguhwe vaJoanna namukurwendi gomukadi kwava gusire mombunga. Ano Joanna kwa tanta asi: “Ame kulizuvha mbili apa ani resa yihonena yomoBibeli ngwendi saAbigayili, Esitera, Joba, Josefa ntani saJesus. Yihonena yawo kukorangeda nge ntani kuvatera nge ni kare nomagazaro gomawa. Ame nayi dimburura hena asi marusumo gomoBroadcasting kukorangeda sili.”
10. Ngapi omu etjangwa lyEpisarome 32:6-8, ali tu vatere tu lididimikire kukora?
10 Tantera Jehova nayinye eyi yina kukuretera sinka. Wa ha hageka kukanderera kwaJehova nsene ono kara noyinka. Likwambera kwaJehova yipo a ku vatere o tare yininke monkedi omu a yi tara ntani a ku ronge nzira ezi no genda (Resa Episarome 32:6-8.) Yimo, ayo kapisi ureru kutantera Jehova kukora oku ono kulizuvha. Nye Jehova kukwata egano kukora oku ono kulizuvha. Age ga ku hara unene ntani ana hara o mu tantere maudigu goge nagenye.—Ex. 34:6; Epis. 62:7, 8.
11. Kuliza noVahebeli 12:11, morwasinke natu kwatesera ko episuro eli a gava Jehova? (“ Kugusa muntu mombunga kulikida eharo lyaJehova.”)
11 Kwatesa ko etokoro lyovakuronambunga. Kugusa muntu mombunga kuna kara ewapaiko lyokutunda kwaJehova. Alyo kuna kara ewapaiko lyewa eli nali vhura kuvatera ogu vana gusa mombunga ntani navamwe hena. (Resa Vahebeli 12:11.) Vamwe womombungakriste kuvhura va uyunge asi vakuronambunga kapi vana tura po etokoro lyewa pokugusa muntu gongandi mombunga, nye diworokeni asi vantu vangoso kapi va hara kutanta kuhamena yininke yoyidona eyi ana rugana muntu ogu vana gusa mombunga. Ose kapi twa kara nomauzera nagenye. Yipo nye, ya kara nomulyo tu huguvare vakuronambunga ava ava pangwire po Jehova, pokuruganesa nompango domoBibeli.—2 Hist. 19:6.
12. Mauwa musinke va gwanena mo vamwe pokukwatesa ko ewapaiko lyokugusa muntu mombunga?
12 Nsene o kwatesa ko etokoro lyovakuronambunga lyokugusa muntu mombunga, ove ngo vatera muntu ogo yipo nga tengure kwaJehova. Elizabeth ogu ka tu tumbura kwa tanta asi: “Ayo kwa tu digoperere kunyokera po kukara namunetu gomumati. Konyima zapa va mu tengwidilire mombunga, age kwa tente asi alyo kwa kere etokoro lyewa lyokumugusa mombunga. Konyima zosiruwo age kwa tente asi yinzi ga lirongerere ko. Age hena kwa tente asi episuro lyaJehova uhunga nkenye apa.” Mugara gwendi Mark kwa tanta asi: “Munetu kwa tanterere nge asi konda zimwe zeyi ga harerere kutengura mombunga morwa yeeyi ngatu dili kukara nage. Nina hafa kweyi Jehova ga tu vaterere tu twikire kukara noulimburukwi.”
13. Yisinke nayi kuvatera o lididimikire kukora oku ono kulizuvha?
13 Uyunga kumwe novakaume ava ava kwata egano omu o lizuvhu. Litulira po siruwo sokukara kumwe novanavazinyetu yipo va ku vatere o kare nomagazaro gomawa. (Yis. 12:25; 17:17) Joanna ogu ka tu tumbura muhowo kwa tanta asi: “Ame ngani lizuvhu mukuma, nye apa ngani uyunga novakaume vange ava na huguvarere, kwa vaterere nge ni lididimikire.” Nye yisinke no rugana nsene vamwe womombungakriste kuna kukuuyungira yininke eyi yina kukukoresa unene?
14. Morwasinke natu twikilira kulididimikira-didimikira nokulidongwenena-dongwenena po nomutjima nagunye nsene wopeke vana tu zonene?
14 Wa ha handuka usimbu nsene vanavazinyetu kuna kukuuyungira yininke yoyidona. Kapi tatu vhuru kundindira kwa nkenye gumwe a uyunge yininke youhunga. (Jak. 3:2) Mokumona asi natuvenye kapi twa sikilira mo, ya ha ku tetukisa nsene vamwe va ku uyungira yininke eyi nayi kukoresa. Diworoka epukururo eli ga tjenge mupositoli Paurusa asi: “Twikireni kulididimikira-didimikira nokulidongwenena-dongwenena po nomutjima nagunye nsene wopeke vana mu zonene.” (Koros. 3:13) Munazinyetu gumwe gomukadi ogu ga kere nekoro lyendi ogu va gusa mombunga kwa tanta asi: “Jehova kwa vatera nge ni gusire po vanavazinyetu ava va hetekerere ko kurugana yininke youhunga monkedi zepuko.” Yisinke nava rugana womombungakriste yipo va vatere epata lyogu vana gusa mombunga?
MBUNGAKRISTE NAZO KUVHURA KUVATERA
15. Yisinke natu rugana yipo tu vatere vemepata lyogu ka va gusire mombunga?
15 Kara nombili nava vemepata lyogu va gusa mombunga. Munazinyetu gomukadi Miriam kwa tanta asi apa mumbyendi gomunona gomumati va mu gusire mombunga, age kwa kere nowoma wokuza komapongo. Age kwa uyunga hena asi: “Ame kwa kere nosinka seyi nava ka uyunga vantu. Nye pwa kere vanavazinyetu wovanzi ava nawo va guvire apa va gusire mumbyange mombunga, nye awo kapi va uyungire yininke yoyidona kuhamena mumbyange. Ame kuvapandura sili morwa kapi na lizuvhire asi nyamelike nina kara.” Munazinyetu gumwe gomukadi kwa tanta asi: “Konyima zapa munetu gomumati va mu gusire mombunga, vakaume vetu kwa wizire va ya tu hengagwide. Vamwe kwa tente asi kapi va divire asi yinke eyi nava uyunga. Vamwe kwa lilisire nge ko, ano vamwe kwa tuminine nge nombilive dekorangedo. Eyi va rugene kwa vaterere nge sili unene.”
16. Ngapi omu womombungakriste nava twikira kuvatera epata lyogu va gusa mombunga?
16 Twikira kuvatera vemepata lyogu va gusa mombunga. Awo vana hepa unene eharo nekorangedo lyoge. (Heb. 10:24, 25) Poyiruwo yimwe, vemepata lyogu va gusa mombunga kulizuvha asi vamwe womombunga kapi ava va uyungisa hena ngwendi asi nawo kwava gusa mombunga. Kapi tuna hara va lizuvhe ngoso. Twa hepa kupandadeka nokukorangeda vadinkantu ava vakurona vawo va gusa mombunga. Maria ogu mugara gwendi va gusa mombunga ntani nokusiga epata lyendi kwa tanta asi: “Vakaume vange vamwe womombungakriste kwa wizire kembo lyange nokuyaterekera nge nondya ntani kwa vaterere nge ni lironge novana vange. Awo kwa kwete nge egano omu na lizuvhire ntani kwa lilisirenge ko. Awo kwa uyungilire nge po apa vantu vamwe va uyungire yininke yepuko kuhamena nge. Awo kwa korangedere nge sili.”—Rom. 12:13, 15.
Womombungakriste kuvhura kulikida eharo nokuvatera epata lyogu va gusa mombunga (Tara paragarafu 17) *
17. Ngapi omu vakuronambunga nava hengagwida ava vana guwu?
17 Vakuronambunga, ruganeseni nkenye mpito muna gwana yipo mu vatere nokukorangeda epata lyogu va gusa mombunga. One kwa kara nositumbukira somulyo sokuhengagwida epata lyogu va gusa mombunga. (1 Tes. 5:14) Uyungeni nawo pokuvakorangeda komeho li tameke epongo ntani konyima zepongo. Ka va dingureni komambo gawo ntani nokukanderera kumwe nawo. Ruganeni kumwe nawo mokuzuvhisa ndi poyiruwo yimwe kuvhura mu va zigide koukareli weni wepata. Vakuronambunga va hepa kupakera mbili epata eli lina guwu pokuvalikida nkenda ntani neharo.—1 Tes. 2:7, 8.
KARA NEHUGUVARO NTANI TWIKIRA KUHUGUVARA MWAJEHOVA
18. Kuliza na-2 Peturusa 3:9, yisinke a ndindire ko Jehova kwava va gusa mombunga?
18 Jehova “kapi ga hara asi ngapa ka zonauke nampili gumwe, nye age kwa hara asi navenye va litezurure.” (Resa 2 Peturusa 3:9.) Nampili muntu a ture nzo zonene, nye eparu lyendi simpe mulyo kwaKarunga. Diworoka asi Jehova kwa futire mfuto zonene, pokugava Munendi a huru a ya tu fire. Nkenda zaJehova kuninkisa ava va gusa mombunga va tengure kwendi. Age kukara nehuguvaro asi ngava tengura kwendi ngomu va yi likida mosifanekeso saJesus somumati gokuzumbana. (Ruk. 15:11-32) Sinzi sava va gusire mombunga, konyima awo kwa ya tengura kwaGuhyetu gemeguru geharo. Ano vanavazinyetu kwava tambwire noruhafo. Elizabeth ogu ka tu tumbura kwa hefe sili unene apa munendi gomumati va mu tengwidilire mombunga. Age kwa tanta asi: “Ame kupandura vanavazinyetu ava va tu korangedere tu twikire kukara nehuguvaro.”
19. Morwasinke natu twikilira kuhuguvara mwaJehova?
19 Ose kuvhura kutwikira kuhuguvara mwaJehova. Mapukururo gendi kutuvatera nkenye apa. Age Guhyetu gougavi nonkenda ogu ga hara unene ava va mu hara nokumukarera. Kara nehuguvaro asi Jehova kapi ngaku sigilira mosiruwo esi ono kulizuvha kukora. (Heb. 13:5, 6) Mark ogu ka tu tumbura muhowo kwa tanta asi: “Jehova kapi ngatu siga ntani age kapi a kara ure nose apa atu piti momaudigu.” Jehova nga twikira kukupa nonkondo. (2 Kol. 4:7) Ove kuvhura o twikire kukara noulimburukwi ntani nehuguvaro nsene gumwe gemepata lyeni va mu gusa mombunga.
RUSUMO 44 Ekanderero lyomulinunupiki
^ para. 5 Ayo kutuguvisa unene apa gumwe ava mu gusa mombunga. Sirongwa esi tasi ka zogera omu a lizuvhu Jehova apa ayi horoka oyo. Tasi ka zogera hena eyi nali rugana epata omu mwa kara ogu va gusa mombunga yipo va li didimikire nokutwikira kukarera Jehova. Sirongwa esi nasi ka zogera hena omu womombungakriste nava gava evatero nehengagwido kepata olyo.
^ para. 1 Madina gamwe gomosirongwa esi kwa ga tjindja.
^ para. 79 EFANO EPENUNO: Apa munazinyetu gomugara ava mu gusa mombunga, mukadendi novana vendi kuhepa.
^ para. 81 EFANO EPENUNO: Vakuronambunga vavali kuna wiza va ya korangede epata lyogu va gusa mombunga.
