1. Yisinke twa hepa kurugana ngomu twa ku kurupa?

NGOMU TUNA ku kurupa, ose kuvhura tu lizuvhe asi kapi tuna kara hena nomulyo kwaJehova kupitakana omu twa kere nare vadinkantu. Nampili ngomu tuna dili kukara nononkondo dononzi ngesi ngwendi nare, nye ose kuvhura kuruganesa unongo ntani neyi twa limonena meparu mokuvatera vadinkantu yipo va sikise mo yitumbukira mombunga zaJehova. Mukuronambunga gumwe ogu ga karera Jehova siruwo sosire kwa tanta asi: “Apa na dilire kukara nononkondo dokurugana eyi ngani rugana nare morwa ukurupe, ame kwa kere norupandu morwa twa kere novadinkantu ava va vhulire kurugana sirugana oso.”

2. Yisinke natu ka zogera mosirongwa esi?

² Mosirongwa sa ka pita, katu lirongere omu vadinkantu nava gwanena mo uwa nsene va tulisa po ukaume novakurupe. Mosirongwa esi natu ka tara omu yikara ngwendi elinunupiko, kudiva apa da hulira nonkondo doge, kukara norupandu ntani nougavi nayi vhura kuvatera vakurupe yipo va ruganene kumwe novadinkantu. Ano eyi ngayi retera uwa nkenye gumwe gomombungakriste.

3. Kuliza noVafilipi 2:3, 4, yisinke ali tanta elinunupiko ntani ngapi omu nayi vatera Mukriste?

³ Mokuninka asi vakurupe va vatere vadinkantu, ntudi vakurupe va hepa kulinunupika. Muntu ogu ga linunupika, kutara vakwawo asi va mu pita mekuto. (Resa Vafilipi 2:3, 4.) Vakurupe ava va kara nosikara oso, rorunzi awo ku ya dimburura asi  kuvhura o rugane yininke eyi ya liza noBibeli mononkedi dokulisiga-siga. Awo kapi ava ndindire ko kwa nkenye ogu a rugane yininke ngwendi moomu tupu ngava yi rugana awo nare. (Muud. 7:10) Awo kuvhura kutantera vadinkantu eyi va lironga. Nye awo hena va diva asi “yihorokwa yomouzuni ou kuna kurunduruka” yipo nye, awo kuvhura kulironga nonkedi donompe omu nava vhura kurugana yininke.—1 Kol. 7:31.

4. Ngapi omu nkareso zovatareli wonombunga za lifana nezi zoVarevhi?

⁴ Vakurupe ava va linunupika, kuyidimburura asi ngomu vana ku kurupa, kapi tava vhuru kurugana yoyinzi ngwendi nare. Tu zeni tu ka tare sihonena sovatareli wonombunga. Apa ava siki ponomvhura 70, awo kuhageka sirugana oso nokurugana sapeke. Ayo kuvhura kuvakarera udigu. Ntani awo ngava hafere sirugana sawo sokuvatera vanavazinyetu. Aso kuna kara situmbukira esi va here unene. Ntani ha va karera neharo lyokusirugana. Nye awo kuhafa pokudiva asi koveli vadinkantu ava nava rugana sirugana oso. Awo kulikida nkareso ngwendi ezi va kere nazo Varevhi womosiruwo soVaisraeli. Apa va sikire ponomvhura 50, awo va hepere kuhageka sirugana sawo sokurugana koNkongoronzugo. Ruhafo roVarevhi owo wovakurupe, kapi rwa korerere moyitumbukira eyi va kere nayo. Nye awo ngava rugana unene mwa nkenye yitumbukira eyi va kere nayo ntani ngava vatere vadinkantu. (Num. 8:25, 26) Nampili ngomu vatareli wonombunga ava hageke sirugana sawo ngesi  sokudingura nombungakriste apa ava siki konomvhura 70, awo simpe kuvatera nokukorangeda vanavazinyetu womombungakriste ezi va kara.

5. Yisinke ono lirongere ko kosihonena saDan naKatie?

⁵ Tu zeni tu ka tare sihonena samunazinyetu Dan, ogu ga kere mutareli gonombunga ure wonomvhura 23. Apa Dan ga kere nonomvhura 70, nage namukadendi Katie, kwa va tulire va kare vazuvhisi wosiruwo nasinye. Ngapi omu sina ku va genda po sirugana sawo sosipe? Dan kwa uyunga asi age ngesi kuna kara noyirugana yoyinzi kupitakana pwa nare. Age kupakera mbili yitumbukira yomombungakriste zawo, kuvatera vanavazinyetu wovagara yipo va kare vakwafimbunga ntani kuvatera wopeke yipo va lihameke mo mosirugana sokuzuvhisira komavango gopeke ngwendi moyitata ntani monodorongo. Vakurupe, yikare asi mosirugana sosiruwo nasinye mwa kara ndi hawe, one kuvhura kurugana yoyinzi mokuvatera wopeke. Monkedi musinke? Tambureni ukaro weni, litulireni po yitambo ntani demeneneni koyininke eyi muna kusikisa mo, nye kapisi kweyi muna ku dira kusikisa mo.

6. Morwasinke ya karera nomulyo kudiva apa da hulira nonkondo doge? Yifanekesa.

⁶ Muntu gokulinunupika ga diva apa da hulira nonkondo dendi. (Yis. 11:2) Age kapi a gazara asi age kurugana yoyinzi kupitakana wopeke morwa ga diva apa da hulira nonkondo dendi. Ngoyitundwamo, age kutwikira kukara muntu goruhafo ntani kurugana unene. Muntu ogu ga diva apa da hulira nonkondo dendi, kuvhura kumufanekesa komuntu ogu ana kusinga etuwa yipo a pite ndundu. Musingi ga hepa kugoworora siputa, yipo a pite nawa ndundu ozo. Yimo, age na singa ngaroro nakauke nakauke, nye na twikira ngaroro kuza komeho. Mokulifana, muntu ogu ga diva apa da hulira nonkondo dendi, ga diva siruwo esi na “tura po malitjindjo” yipo a twikire kukarera Jehova nokuvatera wopeke.—Fil. 4:5.

7. Yisinke yina kulikida asi Barasirayi ga divire apa da hulira nonkondo dendi?

⁷ Tu tareni sihonena saBarasirayi. Age kwa kere nonomvhura 80 apa hompa Ndafita ga mu zigidire va ka kare kumwe mombara zendi. Barasirayi kwa nyokere kutambura ezigido olyo. Mokumona asi Barasirayi ga yi divire asi kapi ta vhuru kurugana yininke yoyinzi morwa ukurupe, age kwa tokwere asi munendi Kimuhamu a pinganesere pevega lyendi mokuza kumwe nahompa. (2 Sam. 19:35-37) Ngwendi Barasirayi, vanavazinyetu wovakurupe, kugava yitumbukira yawo kovanavazinyetu wovadinkantu.

8. Ngapi omu hompa Ndafita gayi likidire asi ga diva apa da hulira nonkondo dendi, apa ga here kutunga ntembeli?

⁸ Hompa Ndafita kwa tu tulira po sihonena sosiwa sokudiva apa da hulira nonkondo detu. Age kwa here kutungira Jehova ntembeli nomutjima gwendi nagunye. Nye apa Jehova ga mu tanterere asi Saromo yige nga mu tungira ntembeli, Ndafita ga tambwire etokoro lyaJehova nokukwatesa ko sirugana oso. (1 Hist. 17:4; 22:5) Nye Ndafita kapi ga lizuvhire asi Saromo kapi sa mu wapera situmbukira oso morwa age simpe ‘munona ntani nondunge nonsesu.’ (1 Hist. 29:1) Ndafita ga yi divire asi sirugana oso ngasi tompoka morwa Jehova yige nga si pitisira nye kapisi morwa nomvhura ndi kukara noudivi wokupitisira. Vanavazinyetu wovakurupe neina nawo kuhonena Ndafita pokutwikira kukarera Jehova nampili situmbukira sawo silitjindje. Ntani awo va yi diva asi Jehova nga tungika vadinkantu yipo yi va tompoke kusikisa mo sirugana esi ngava rugana awo nare.

9. Ngapi omu munazinyetu gumwe gomoKomitiye zoBeteli gayi likidire asi ga diva apa da hulira nonkondo dendi?

 ⁹ Neina ose kuvhura kulirongera ko kosihonena sosiwa samunazinyetu gomugara Shigeo, ogu ga divire apa da hulira nonkondo dendi. Mo-1976, apa ga kere nonomvhura 30, kwa mu tulire a kare gumwe gomoKomitiye zoBeteli. Ano mo-2004 yipo va mu tulire a kare muwapaiki gomoKomitiye zoBeteli. Konyima ga ya yi dimbwilire asi kapi ana kara nononkondo ngwendi nare ntani ngayi mu digopere kusikisa mo sirugana sendi. Age kwa kanderere kuhamena ukaro wendi nokugazadara mauwa ga kara mo nsene situmbukira sendi va si pa munazinyetu gomudinkantu. Nampili ngomu ana dili kukara muwapaiki goKomitiye zoBeteli, nye age simpe kuna kara gumwe gomoKomitiye zoBeteli. Ngomu tuna yi mono mosihonena saBarasirayi nahompa Ndafita ntani saShigeo, muntu ogu ga linunupika ntani ogu ga diva apa da hulira nonkondo dendi, kapi nga demenena kweyi va dira kudiva vadinkantu nye age nga demenena kweyi vana kusikisa mo. Age kapi nga rumbasana kumwe nawo nye ngava tara asi awo varugani kumwe nendi.—Yis. 20:29.

10. Nkareso musinke va kara nazo vanavazinyetu wovakurupe kovadinkantu womombungakriste?

¹⁰ Vanavazinyetu wovakurupe kutara vadinkantu ngouhwi wokutunda kwaJehova. Awo kukara norupandu kweyi vana kusikisa mo. Ngomu dina kusesupa nonkondo dawo, vakurupe kukara norupandu kweyi vadinkantu vana kuruganesa nonkondo dawo mokulizambera nokuvatera mombungakriste.

11. Ngapi omu etjangwa lyaRutu 4:13-16, a li likida asi vakurupe kuvhura kugwanena mo uwa nsene va tambura evatero lyokutunda kovadinkantu?

¹¹ Naomi kuna kara gumwe gosihonena sosiwa somoBibeli ogu ga tambwire evatero  lyokutundilira komudinkantu. Pomuhowo, Naomi kwa tanterere ngumweyi zendi Rutu a tengure kekoro lyendi. Nye Rutu kwa nyokere ntani kwa zire kumwe nangumweyi zendi Naomi koBeterehema. Naomi kwa hefe kweyi Rutu ga zire nage ntani age kwa tambwire evatero lyendi. (Rutu 1:7, 8, 18) Ano eyi kwava hafesere navenye mouvali wawo. (Resa Rutu 4:13-16.) Vanavazinyetu wovakurupe ava valinunupika, kuvhura va lirongere ko kosihonena saNaomi.

12. Ngapi omu mupositoli Paurusa ga likidire rupandu rwendi?

¹² Mupositoli Paurusa kwa kere norupandu kevatero eli ga gwene. Pasihonena, age kwa pandwire Vakriste womoFilipi apa va mu tuminine mauhwi. (Fil. 4:16) Age hena kwa likidire rupandu kevatero eli ga mu pere Timoteusa. (Fil. 2:19-22) Ntani Paurusa kwa pandwire Karunga kweyi vapuli vakwawo va mu korangedere ngomu ga kere morugendo rokuza kodorongo zokoRoma. (Yirug. 28:15) Paurusa kwa kere muntu goupampi ogu nga gendi sinano sosire yipo a ka zuvhise ntani noku ka nkondopeka nombungakriste. Nye nampili ngoso, age kwa linunupikire noku tambura evatero lyokutunda kovapuli vakwawo.

13. Ngapi omu vanavazinyetu wovakurupe nava likida rupandu kovadinkantu?

¹³ Vanavazinyetu wovakurupe, none kuvhura kulikida rupandu rweni mononkedi dokulisiga-siga kovadinkantu womombungakriste zeni. Nsene vana hara kumuvatera nougendero, kuza kositora ndi noyihepwa yimwe hena, kareni norupandu pokutambura evatero lyawo. Diworokeni asi evatero lyawo kuna kara nkedi zimwe omu Jehova ana ku mu likida eharo. Ayo ngayi mu vatera mokutulisa po ukaume wounene nava vana kumuvatera. Hetekereni ko kuvatera vadinkantu nkenye apa yipo va twikire kukara nelikwatakano lyenene naJehova. Ntani va tantereni asi ayo kumuhafesa pokumona omu vadinkantu vana kulitura mo mokuvatera mbungakriste. Ntani litulira po siruwo sokukara kumwe nawo yipo o va tantere eyi wa limonena meparu lyoge. Nsene mu yi rugana ngoso, one ngomu likida asi mwa kara norupandu kwaJehova kweyi ga kokera vadinkantu kombunga zendi.—Koros. 3:15; Joh. 6:44; 1 Tes. 5:18.

14. Ngapi omu hompa Ndafita ga likidire sikara sougavi?

¹⁴ Vanavazinyetu wovakurupe kuvhura kulirongera ko kwa hompa Ndafita sikara simwe somulyo sougavi. Age kwa geve yimaliwa yoyinzi ntani noyiruganeso yendi yimwe yipo a kwatese ko etungo lyontembeli. (1 Hist. 22:11-16; 29:3, 4) Age kwa yi rugene oyo nampili ngomu gayi divire asi vantu ngava tumbura etungo olyo asi ntembeli zamunendi Saromo. Mokulifana, nsene kapi tuna kara nononkondo dokulihameka mokutunga mavango goukareli, ose kuvhura kukwatesa ko sirugana oso pokugava yigava eyi tuna kuvhura kugava ko. Ntani kuvhura hena tu vatere vadinkantu yipo va gwanene mo uwa mediwo eli twa kara nalyo.

15. Uhwi musinke womulyo ga geve Paurusa kwaTimoteusa?

¹⁵ Tu zeni tu ka tare sihonena somupositoli Paurusa, omu ga likidire ugavi. Age kwa pulire Timoteusa yipo va ze kumwe nendi mosirugana soutumwa. Ntani Paurusa kwa likidire ugavi pokuronga Timoteusa nonkedi dendi dokuzuvhisa nokuronga. (Yirug. 16:1-3) Paurusa kwa dewire Timoteusa yipo a kare murongi nomuzuvhisi gomuwa gombudi zongwa. (1 Kol. 4:17) Ano konyima, Timoteusa kwa ruganesere edeuro eli ga gwene kwaPaurusa yipo a deure wopeke.

16. Morwasinke munazinyetu Shigeo ga dewilire wopeke?

¹⁶ Vakurupe neina kapi ava lizuvhu asi awo  kwato mulyo nsene va deura vadinkantu va rugane sirugana esi ngava rugana nare mombungakriste. Pasihonena, munazinyetu Shigeo ogu ka tu tumbura muhowo, kwa geve edeuro kovadinkantu ava va kere moKomitiye zoBeteli. Age kwa yi rugene oyo yipo a kwatese ko sirugana soUhompa mosirongo esi ga kere. Ngoyitundwamo, apa munazinyetu Shigeo ga hagekere kukara muwapaiki goKomitiye zoBeteli, gumwe govanavazinyetu ava va dewire, kwa gusire situmbukira oso. Munazinyetu Shigeo kwa kere gumwe gomoKomitiye zoBeteli nomvhura dokupitakana po 45 ntani age kutwikira kuruganesa ediwo eli ga gwana mokuvatera vanavazinyetu wovagara wovadinkantu. Yosili vanavazinyetu ava, kuvatera vantu vaKarunga ntani awo kuna kara etungiko lyenene.

17. Kuliza naRukasa 6:38, yisinke nava gava vanavazinyetu wovakurupe kwava wopeke?

¹⁷ Vanavazinyetu namuvenye wovakurupe, one kwa yi likida asi kukarera Jehova nepuro noulimburukwi, yilyo eparu lyewa po. One mwa yi likida nawa-nawa kupitira mosihonena seni asi ose ngatu gwanena mo uwa nsene tu lironga nokutura pasirugana nompango domoBibeli momaparu getu. One mwa kara noudivi kuhamena omu ngomu rugana yininke pwa nare. Nye nampili ngoso, one simpe mwa dimburura mulyo gokukwama malitjindjo kuliza noukaro weni. None vakurupe komugwene ekuho ntaantani, mwa kara neyi yoyinzi yokugava kovadinkantu. Ntani kuvhura mu va tantere omu kukarera Jehova ya mu retera ruhafo ngesi meparu lyeni. Vadinkantu ngava yi hafera pokuzuvha eyi mwa pita ntani neyi mwa lironga meparu. Nsene mu ‘kara nougavi’ pokuruganesa ediwo eli mwa lironga meparu pokudeura wopeke, Jehova nga mu tungika unene.—Resa Rukasa 6:38.

18. Ngapi omu vakurupe novadinkantu nava livatera-vatera?

¹⁸ Ngomu vakurupe muna ku tulisa po elikwatakano novadinkantu, one ngomu vhura kulivatera-vatera. (Rom. 1:12) Nkenye gumwe ga kara neyi nayi vhura kuvatera wopeke. Vakurupe kwa kara nonondunge ntani nediwo eli vagwana meparu lyawo. Ano vadinkantu kwa kara nononkondo. Apa vadinkantu novakurupe ava ruganene kumwe ngovakaume, awo kuyererepeka Guhyetu geharo gemeguru ntani awo navenye kuna kara etungiko lyomombungakriste.