1-2. (a) Kuliza noYisewe 16:31, ngapi omu natu tara vakurupe? (b) Mapuro musinke nasi ka limburura sirongwa esi?

MOAMERIKA kwa kara mo evango lyonodiamande eli ava dingura vadinguli. Nye nodiamande odo kapi va di zeresa nokudiputja. Sinzi sovantu ku di pita-pita ntani kapi va yi dimburura asi ado mulyo unene.

² Ngwendi nodiamande odo, vanavazinyetu wovakurupe kuna kara emona lyomulyo. Bibeli kufanekesa nomvhi dawo konkata. (Resa Yisewe 16:31; 20:29) Poyiruwo yimwe kuvhura tu dire kudimburura mulyo govakurupe. Apa vadinkantu ava kwata egano asi vakurupe mulyo, awo kugwanena mo mauwa gomanzi kupitakana ungawo. Sirongwa esi tasi ka limburura mapuro gatatu. Morwasinke Jehova a tarere vakurupe asi awo emona lyomulyo? Morwasinke vakurupe va karera nomulyo mombunga zaJehova? Yisinke natu rugana yipo tu gwanene mo uwa moyihonena yawo?

3. Kuliza nEpisarome 92:12-15, morwasinke vakurupe va karera nomulyo kwaJehova?

³ Vakurupe mulyo kwaJehova. Age ga diva asi awo vantu musinke ntani kuhafera yikara yawo yoyiwa. Ntani age kuhafa apa a mono vakurupe kuna kutantera vadinkantu mauwa aga va limonena nomvhura nadinye edi va karera Jehova. (Joba 12:12; Yis. 1:1-4) Jehova kuhafera hena elididimiko lyawo.  (Mara. 3:16) Nampili ngomu va li gwanekera nomaudigu meparu, nye awo simpe ha va karera nepuro mwaJehova. Ehuguvaro lyawo lyokomeho lina nkondopara unene kupitakana apa va tamekere kulironga Bibeli. Jehova ga va hara morwa awo kuna kutwikira kumukarera nampili “moukurupe moomu.”—Resa Episarome 92:12-15.

4. Yisinke nayi vhura kuhengagwida vanavazinyetu wovakurupe?

⁴ Nsene asi ove kuna kukurupa, diva asi Jehova kudiworoka yirugana yoge eyi wa mu ruganena. (Heb. 6:10) Ove kwa li hameka mo noupampi mosirugana sokuzuvhisa ntani ayo kwa hafesa Guhyetu gemeguru. Wa li didimikira maudigu gomanene nokukwama nompango domoBibeli nokusikisa mo yitumbukira eyi va ku pere ntani wa deura wopeke. Ove wa hetekera ko paapa wa hulira mokukwama malitjindjo gomombunga zaJehova. Ove wa korangeda nokukwatesa ko ava va kara mosirugana sosiruwo nasinye. Jehova ga ku hara sili unene morwa ulimburukwi woge. Age kwa tumbwidira asi: “Kapi a zumbu ava ava mu limburukwa.” (Epis. 37:28) Age kwa ku tumbwidira asi: ‘Ame ngani kupakera mbili dogoro moukurupe.’ (Jes. 46:4) Nampili ngomu ono kukurupa, wa ha lizuvha asi ove kwato mulyo mombunga zaJehova. Ove mulyo unene.

5. Yisinke va hepa kudiworoka vakurupe?

⁵ Vakurupe mulyo unene mombunga zaJehova. Nampili ngomu nampo vana dili kukara nononkondo ngwendi edi va kere nado nare, nye awo va kara nediwo lyenzi eli va gwana monomvhura dononzi. Jehova kuvhura kuvaruganesa mononkedi dokulisiga-siga ngwendi moomu ga yi rugene kwavamwe ava natu ka zogera moyihonena yomosiruwo sanare nomosiruwo setu.

6-7. Gava yihonena yomoBibeli yovakurupe ava ga tungikire Jehova morwa ulimburukwi wawo.

⁶ MoBibeli, ose kugwana mo yihonena yovantu ava va twikilire kukarera Jehova dogoro moukurupe. Pasihonena, Mosesa kwa kere koyiha yonomvhura 80 apa Jehova ga mu horowere a kare muporofete gwendi ntani nokukara mupitisili goVaisraeli.  Apa Ndaniyera ga kere nampo nonomvhura dokupitakana 90, Jehova kwa mu ruganesere simpe a kare muporofete. Mupositoli Johanesa nampo nage kwa kere nonomvhura dokupitakana 90 apa ga tjenge buke zEhororo.

⁷ Vakurupe vamwe wovalimburukwi kapi va divikwire ntani nampo vantu kapi va va tere asi awo mulyo. Nye Jehova ga va mwene ntani ga va tungikire. Pasihonena, Simiyoni mugara ‘gomuhungami ogu ga tjilire Karunga’ kwa mu tumbura yikando tupu yoyisesu moBibeli, nye Jehova ga mu divire ntani ga mu pere mpito zokumona mukeke Jesus ntani ga porofetere kuhamena Jesus nozina. (Ruk. 2:22, 25-35) Gazadara ko hena muporofete gomukadi Ana ogu ga kere mufisayendi. Age kwa kere nonomvhura 84, nye “nkenye apa nga zi kontembeli.” Jehova ga mu tungikire morwa ngazi nkenye apa kontembeli ntani ga mu pulisilire a mone mukeke Jesus. Jehova kwa tere Simiyoni naAna asi awo mulyo unene kwendi.—Ruk. 2:36-38.

8-9. Yisinke ava twikire kurugana vafisavayavawo mombunga zaJehova?

⁸ Neina, sinzi sovakurupe kutulira po vadinkantu sihonena sosiwa. Tu zeni tu ka tare sihonena samunazinyetu gomukadi gomukurupe Lois Didur. Age kwa kere nonomvhura 21 apa ga tamekere uzuvhisi wosiruwo nasinye moKanada. Konyima zoyo, nage namugara gwendi John, kwa kere mosirugana sokudingura nombungakriste nomvhura dononzi. Konyima awo kwa ya rugene moBeteli zaKanada nomvhura dokupitakana po 20. Apa Lois ga kere nonomvhura 58, nage namugara gwendi John kwa va pere sirugana sosipe moUkraine. Yisinke ngano va rugene? Ngoso awo ngano va uyungire asi ose tuna kurupa kapi tatu vhuru kukaruganena mosirongo sapeke? Awo kwa tambwire sirugana oso, ano John kwa mu tulire a kare gumwe gomoKomitiye zoBeteli. Konyima zonomvhura ntambali apa John ga dogorokere, Lois kwa twikilire nosirugana sendi. Ngesi Lois nomvhura dendi 81, nye age kutwikira kurugana moBeteli zaUkraine ntani vanavazinyetu va mu hara unene.

⁹ Vakadi ava va fisa vagara vawo ngwendi Lois, vantu kuvhura va va tare asi awo kwato mulyo, nye nampili ngoso awo simpe mulyo. Jehova kutara vanavazinyetu wovakadi ava ngava kwatesa ko vagara vawo asi awo mulyo ntani ngesi awo kuna kutwikira simpe kumukarera noulimburukwi. (1 Tim. 5:3) Awo hena kukorangeda vadinkantu.

10. Sihonena musinke sosiwa ga tura po Tony?

¹⁰ Sinzi sovakurupe ava va kara moyipangero ndi momambo govakurupe, awo simpe mulyo. Pasihonena, munazinyetu Tony kwa tunga momambo gangoso. Age kwa gwene ekuho nonomvhura 20, mwaSiwogedi 1942 moAmerika. Konyima tupu zapa ga gwene  ekuho, age kwa mu sininikire a li hameke moukwayita, ano apa ga nyokere yipo va mu tulire modorongo nomvhura mbali noharufa. Nage namukadendi Hilda kwa rerera vana vawo vavali mousili. Mwaza nomvhura, Tony kwa ya kere mutareligendesi (ngesi kwa divikwa asi Muwapaiki gombunga zovakuronambunga) ntani kwa kere mutareli gosigongi. Age nga rugana malirongo goBibeli nokupitisira epongo modorongo. Nampili ngomu Tony ana kara nonomvhura 98, age simpe kwa ku rugana paapa ga hulira mokukarera Jehova ntani nokuruganena kumwe novanavazinyetu womombungakriste zawo.

11. Ngapi natu likida efumadeko kovakurupe ava va tunga momambo govakurupe?

¹¹ Ngapi omu natu likida efumadeko kovakurupe ava va tunga momambo govakurupe? Vakuronambunga kuvhura va vatere vakurupe owo yipo va ponge mepongo nokulihameka mokuzuvhisa. Kuvhura tu va likide asi twa va hara pokukavadingura ndi pokuvabela kupitira kovidiyo. Unene po twa hepa kupakera mbili vakurupe ava va li kara ure nonombungakriste dawo. Nsene kapi tuna kutakamesa kuvhura tu dire kukara nosinka kwawo. Vamwe kuvhura kuvakarera udigu kuuyunga kuhamena vene. Nye ngatu gwanena mo mauwa nsene tu va pura mapuro nokupurakena apa ava tu tantere kuhamena ruhafo oru va li monena mombunga zaJehova.

12. Yisinke natu vhura kugwana mombungakriste zetu?

¹² Mombungakriste zetu kuvhura kugwana mo yihonena yoyiwa yovakurupe. Munazinyetu gomukadi Harriette kwa karera Jehova nomvhura dononzi mombungakriste zawo zomoAmerika. Konyima yipo ga dirukire a ka tunge namunendi gomukadi. Vanavazinyetu womombungakriste zendi zompe kwa li tulilire po siruwo yipo va mu dive, ano awo kwa ya dimbwilire asi age mulyo unene. Age nga va korangeda pokuvasimwitira eyi ga li monena mokuzuvhisa apa ga lirongere usili koyiha yomvhura 1925. Posiruwo sina, age nga simbi siputjiso sokomazego mokuzuvhisa morwa ga yi divire asi kuvhura va mu kwate nokumutura modorongo. Mo-1933 kwa mu tulire modorongo yikando yivali, age kwa kere mo sivike. Posiruwo esi ga kere modorongo, mugara gwendi gomuhapuli kwa takamesere vana vawo vatatu. Yosili, vanavazinyetu ava wovalimburukwi wovakurupe ngwendi Harriette, va hepa efumadeko.

13. Ngapi omu vakurupe va kara nomulyo unene mombunga zaJehova?

¹³ Vanavazinyetu wovakurupe mulyo unene kwaJehova nokombunga zendi. Awo va li monena omu Jehova ga tungika mbunga zendi ntani nomu ga va tungika. Awo va li rongera ko komapuko gawo aga va tulire. Va tara asi awo “ntundiliro zounongo” ntani lirongera ko kwawo. (Yis. 18:4) Nsene o li tulira po siruwo sokuvadiva, epuro lyoge ngali pama ntani ngo lirongera ko kwawo yininke yoyinzi.

14. Kuliza netjangwa lyaDeuteronomium 32:7, yisinke lina ku korangeda vadinkantu va rugane?

¹⁴ Litulira po siruwo o uyunge novakurupe. (Resa Deuteronomium 32:7.) Yimo, awo ngesi kuvhura va dire kumona nawa ndi va dire kugenda nawa ntani kuvhura va dire kukara nezwi lyenene. Nye vana hara simpe kurugana paapa va hulira mweyi yopampepo ntani awo va tura po “edina lyewa” naJehova. (Muud. 7:1) Diworoka asi Jehova kutara vakurupe asi mulyo unene.  Twikira kuvafumadeka. Kara ngwendi Elisa. Age kwa here a kare pepi naEliya ezuva lyawo lyokuhulilira eli va kere kumwe. Eliya kwa uyungire yikando yitatu asi: ‘Kapi nani ku siga.’—2 Vah. 2:2, 4, 6.

15. Mapuro musinke natu vhura kupura vakurupe?

¹⁵ Likida elituromo movakurupe pokuvapura mapuro. (Yis. 1:5; 20:5; 1 Tim. 5:1, 2) Pura mapuro ngwendi gaga asi: “Apa mwa kere vanona, yisinke ya mu ninkisire mu dimburure asi muna gwana usili?” “Ngapi omu yininke eyi mwa li gwanekerere nayo ya mu vaterere mu hedere unene pepi Jehova?” “Yisinke ya mu vatera mu kare noruhafo mosirugana saJehova?” (1 Tim. 6:6-8) Makura purakena ngomu vana kukusimwitira.

16. Mauwa musinke ngava gwanena mo vakurupe novadinkantu nsene va uyunga kumwe?

¹⁶ Apa vakurupe ava zogere novadinkantu, navenye kugwanena mo mauwa. (Rom. 1:12) Vadinkantu, one ngo mu yi pura nawa-nawa asi Jehova kupakera mbili vakareli vendi wovalimburukwi ntani vakurupe ngava lizuvha asi twa va hara. Awo ngava yihafera kukusimwitira omu Jehova gava tungika.

17. Morwasinke Jehova a tarere vakurupe asi vawa unene nampili ngomu vana kukurupa?

¹⁷ Apa muntu a kurupa, rutu rwendi kulitjindja, nye Jehova kutara vakareli vendi wovalimburukwi asi awo vawa unene nampili yi kare asi kwa ku kurupa. (1 Tes. 1:2, 3) Morwasinke ya karera ngoso? Morwa awo kwa pulisira mpepo zaKarunga zi va deure nokuvavatera va tunge po yikara yoyiwa. Nsene tu diva vanavazinyetu wovakurupe nokuvafumadeka ntani nokulirongera ko koudivi wawo, ose ngatu va tara asi awo mulyo unene.

18. Yisinke ngatu kazogera mosirongwa sokukwama ko?

¹⁸ Mbungakriste kunkondopara nsene vadinkantu va tara vakurupe asi awo mulyo ntani hena azo kunkondopara nsene vakurupe va tara vadinkantu asi nawo mulyo unene. Mosirongwa sokukwama ko, ngatu kazogera omu vakurupe nava yi likida asi vadinkantu mulyo mombungakriste.