1-2. Morwasinke ya karera nomulyo kulironga sihorokwa saSimisoni?

 YISINKE ayi wiza momagano goge apa o zuvhu edina Simisoni? Ove nampo kugazara kuhamena mugara gononkondo unene. Oyo kuna kara usili. Nye Simisoni kwa tulire po etokoro lyedona eli lya twaredesere koyitundwamo yoyidona. Nye nampili ngoso, Jehova kwa demenene koyininke nayinye eyi ga rugene Simisoni yipo a mu karere. Ntani Jehova kwa tura moBibeli sihonena saSimisoni, mugara gomulimburukwi yipo nose tu lirongere ko.

² Jehova kwa ruganesere Simisoni yipo a sikise mo yininke yokutetukisa a vatere vantu vendi ava ga horowere, Vaisraeli. Konyima zonomvhura dononzi, kutunda apa ga fire Simisoni, Jehova kwa gendesere mupositoli Paurusa yipo a tjange edina lyaSimisoni melikwamo lyovagara wosihonena sosiwa ava va kere nepuro mwaJehova. (Heb. 11:​32-34) Sihonena saSimisoni kuvhura kutukorangeda. Age kwa huguvarere mwaJehova, nampili moyiruwo yomaudigu. Mosirongwa esi, ta tu ka zogera eyi natu vhura kulirongera ko kwaSimisoni ntani nomu sihonena sendi na si tu korangeda.

3. Situmbukira musinke ga gwene Simisoni?

³ Apa Simisoni va mu hampurukire, Vafilisiti ngava pangere muhoko gwaIsraeli ntani noku gu hepeka. (Vap. 13:1) Vaisraeli ngava hepa unene morwa Vafilisiti kwa kere nyanya unene. Jehova kwa horowere Simisoni yipo ‘a tameke kurugana a yoworore Vaisraeli koVafilisiti.’ (Vap. 13:5) Oso kwa kere sili sirugana soudigu! Mokuninka asi a sikise mo sirugana esi soudigu, Simisoni ga hepere kuhuguvara mwaJehova.

4. Ngapi omu Jehova ga vaterere Simisoni yipo a li zowore mwene koVafilisiti? (Vapanguli 15:​14-16)

 ⁴ Tu tareni sihonena esi a si likida omu Simisoni ga huguvarere mwaJehova. Sikando simwe, vakwayita woVafilisiti kwa wizire va ya kwate Simisoni poRehi, sitata esi nampo sa kere moJuda. Vagara woVajuda kwa kere nowoma, makura yipo va tokwere kugava Simisoni kononkore dawo. Vajuda makura yipo va mu menge nonongodi mbali donompe, kumwe noku mu twara koVafilisiti. (Vap. 15:​9-13) Nye nampili ngoso, ‘mpepo zaJehova’ kwa nkondopekere Simisoni ntani age kwa limangwinine mwene nongodi edi va mu menge. Makura yipo ga ‘mwene rupanda rosindongili rorupe,’ ta ru damuna, age kwa ru ruganesere mokudipagesa ko vagara woVafilisiti eyovi limwe.—Resa Vapanguli 15:​14-16.

5. Ngapi omu Simisoni ga yi likidire asi ga huguvarere mwaJehova apa ga ruganesere rupanda rosindongili?

⁵ Morwasinke Simisoni ga ruganeserere rupanda rosindongili? Aso kapi sa kere sirwiso sokuvhura kurwisa. Simisoni gayi divire nawa-nawa asi Jehova na mu vatera yipo a funde Vafilisiti pokuruganesa nkenye sirwiso esi ga kere naso. Yosili, mugara ogu gomulimburukwi kwa ruganesere eyi ya kere po mokurwa yipo a sikise mo mpango zaJehova. Ngoyitundwamo, Simisoni ga vhulire kufunda vagara navenye vena morwa ga huguvarere mwaJehova.

6. Sirongwa musinke simwe natu vhura kulirongera ko kosihorokwa saSimisoni?

⁶ Jehova nga tu pa nose nonkondo edi twa hepa yipo tu sikise mo yitumbukira yetu, nampili yi moneke asi kapi ta tu vhuru ku yi sikisa mo. Karunga kuvhura ku yi rugana oyo pokutuvatera monkedi ezi nazi vhura kututetukisa. Kara nehuguvaro asi Jehova, ogu ga nkondopekere Simisoni, nga kuvatera yipo o sikise mo mpango zendi nsene tupu o huguvara mwendi yipo a ku vatere.—Yis. 16:3.

7. Sihonena musinke sina kulikida mulyo gokupapara mavyukiso kwaJehova?

⁷ Sinzi sovanavazinyetu ava ava vatere mokutunga mavango goukareli wetu kwa yi likida asi awo va huguvara mwaJehova. Mosiruwo sanare, vanavazinyetu ngava faneke nokutunga sinzi soYinyanga yoUhompa yoyipe ntani nomatungo gapeke. Nye morwa vantu wovanzi kuna kugwana ekuho, mbunga zaJehova za hepere kutura  po malitjindjo. Vanavazinyetu ava ava pitisire kwa kanderere kwaJehova yipo ava pitisire ntani kwa hetekere nonkedi donompe. Pasihonena kuranda mavango ntani noku ga tungurura. Robert ogu ga lihameka mo mokutunga matungo getu goUkareli gomanzi mouzuni mudima monomvhura dantani, kwa tanta asi: “Pomuhowo, ayo kapi ya karerere ureru vamwe mokurugana yininke kuliza nonkedi ezi zompe.” Age kwa tanta hena asi: “Ayo kwa lisigire unene neyi ngatu rugana nomvhura dakapita. Nye vanavazinyetu kwa tokomenene kuyika ukaro ntani ayo kuyimonenena asi Jehova kwa tungika malitjindjo aga.” Esi kuna kara tupu sihonena simwe esi asi likida omu Jehova a pitisire vakareli vendi yipo va sikise mo mpango zendi. Natuvenye twa hepa kulipura poyiruwo noyiruwo asi: ‘Ame kuna kupapara mavyukiso gaJehova ntani noku tura po malitjindjo yipo ni mu karere monkedi zongwa po ndi?’

8. Yisinke ga rugene Simisoni sikando simwe apa lyamukwete enota lyenene?

⁸ Ove nampo kuna kudiworoka yininke yapeke yokutetukisa eyi ga rugene Simisoni. Age kwa dipagere nyime ntani konyima age kwa dipagere vagara woVafilisiti nomurongo ntatu womoAsikeroni. (Vap. 14:​5, 6, 19) Simisoni ga yi divire asi age ngano kapi ga vhulire kurugana yininke oyo pwahana evatero lyaJehova. Eyi kuyimonenena apa sikando simwe lyamukwete enota lyenene konyima zokudipaga Vafilisiti 1 000. Yisinke ga rugene? Mevango lyokulihuguvara mwene yipo a gwane mema gokunwa, age kwa kugire evatero kwaJehova.—Vap. 15:18.

9. Yisinke ga rugene Jehova apa Simisoni ga kanderere kwendi a pure evatero? (Vapanguli 15:19)

⁹ Jehova kwa limbwilire nkungo zaSimisoni poku mu pa mema pasitetu. Apa ga nwine mo “hawe, ntani nye guna kuwiza mo mwenyo.” (Resa Vapanguli 15:19.) Runone oro romema aro nampo yipo simpe rwa kere konyima zonomvhura, apa mpepo zokupongoka za pitisilire muporofete Samwere yipo a tjange buke zoVapanguli. Vaisraeli ava va mwene runone oro romema, ayo nampo kwa va diworokesere asi nsene va huguvara mwaJehova, age nga va vatera posiruwo esi ngava hepa evatero.

10. Yisinke twa hepa kurugana mokuninka asi Jehova a tu vatere? (Tara hena efano.)

¹⁰ Nose twa hepa kuhuguvara mwaJehova yipo a tu vatere, yikare asi evhuliko musinke twa kara nalyo ndi yininke musinke eyi twa sikisa mo mosirugana sendi. Twa hepa kulinunupika noku yi tambura asi ose kuvhura kurugana eyi atu pura Jehova tu rugane apa atu huguvara mwendi. Simisoni kwa gwene nonkondo apa ga nwine mema aga ga mu pere Jehova. Ngwendi Simisoni, nose twa hepa kutambura evatero eli a tu pe Jehova yipo tu twikire kumulimburukwa.—Mat. 11:28.

11. Ngapi omu natu huguvara mevatero lyaJehova ntani yisinke ga rugene munazinyetu gumwe gomugara nogu gomukadi?

¹¹ Tu tareni sihonena samunazinyetu gumwe gomugara Aleksey, gomoRussia, ogu ana kulididimikira mahepeko gomanene. Yisinke ya mu vaterere a lididimikire maudigu gomanene? Nage namukadendi ngava rugana nkenye apa elirongo lyoBibeli ntani noukareli wepata. Age kwa uyunga asi: “Ame kuhetekera ko kutwikira kurugana elirongo lyanyamwange ntani ereso lyange lyoBibeli lyankenye ezuva. Nkenye ngurangura, name namukadange kuzogera etjangwa lyankenye ezuva ntani noku kanderera kwaJehova kumwe.” Yisinke natu lirongera ko kosihonena esi? Mevango lyokulihuguvara nyamwetu, twa hepa kuhuguvara mwaJehova. Ngapi omu natu yi rugana? Pokurugana nkenye apa yininke eyi ayi nkondopeke epuro lyetu. Pasihonena kulironga Bibeli, kukanderera, kuza komapongo ntani kuzuvhisa. Ano makura Jehova  ngatu pa evatero eli ngatu hepa yipo tu twikire kumukarera. Karunga kwa nkondopekere Simisoni, ntani age kuvhura kutunkondopeka nose.

12. Etokoro musinke lyedona ga tulire po Simisoni ntani ngapi omu elikwatakano lyendi kumwe naDelira lyalisigire neli ga tulisire po pomuhowo noVafilisti?

¹² Ngwendi moomu tupu twa dira kusikilira mo, Simisoni nage kapi ga sikilire mo, yipo nye poyiruwo yimwe age kwa tulire po matokoro gomadona. Etokoro limwe eli ga tulire po kwa twaredesere koyitundwamo yoyidona. Konyima zapa Simisoni ga kere mupanguli ure wosiruwo songandi, makura yipo ga ‘pende mo mukadi gedina Delira, ogu ga kere momuramba gwaSoreki.’ (Vap. 16:4) Pomuhowo, Simisoni kwa here kukwara mukadi goMufilisiti. Jehova yige ga gendesere Simisoni ayi rugane oyo yipo a vhure kugwanena po mpito zokurwanesa Vafilisiti. Konyima, Simisoni kwa rere monzugo zomukadi gohondedi, gomositata saGasa moFilisiti. Posiruwo oso, Karunga kwa kondopekere Simisoni makura ta dura mavero gerungavero lyositata nokugalikambeka, ano eyi kwa ninkisire sitata si dire kukara mepopero. (Vap. 14:​1-4; 16:​1-3) Nye nampili ngoso, Delira nampo kwa kere Muisraeli. Yipo nye elikwatakano eli ga kere nalyo Simisoni kumwe nage kapi lyamupere mpito zokurwanesa Vafilisiti.

13. Ngapi omu Delira ga tulire Simisoni moukaro woudona?

¹³ Delira kwa tambwire yimaliwa yoyinzi eyi va mu pere Vafilisiti kweyi ga gombekere Simisoni. Morwa nampo Simisoni kwa mu here unene, age kapi ga vhulire kudimburura eyi ga here kurugana Delira. Yikare asi yisinke eyi ya horokere, Delira kwa twikilire kupura Simisoni yipo a mu tantere eyi ga karerere nononkondo dononzi, ano moruhura Simisoni yipo ga mu tanterere. Yokuguvisa yeyi asi epuko eli ga rugene Simisoni kwa  mu ninkisire a zumbanese nonkondo dendi ntani eyi kwa ninkisire Jehova a dire kumuhafera ure wosiruwo songandi.—Vap. 16:​16-20.

14. Yitundwamo musinke ga ligwanekerere nayo Simisoni morwa kuhuguvara Delira?

¹⁴ Simisoni kwa ligwanekerere noyitundwamo yoyidona morwa age kwa huguvarere Delira mevango lyokuhuguvara Jehova. Vafilisti kwa kwete Simisoni ntani kwa mu twizire menho. Awo kwa mu tulire modorongo moGasa, omu ga damwine marungavero gositata. Vantu kwa mu ninkire a kare mupika yipo a twe yisima. Makura Vafilisiti yipo va twere Simisoni kosilika sawo simwe esi va kere naso. Awo kwa zembe nzambo zonene kwakarunga gwawo Dagoni, morwa awo kwa yi pulire asi age kwa va vaterere va kwate Simisoni. Awo kwa gusire Simisoni modorongo noku mu reta kosipito aya va “danene po,” yipo va mu sindagure.—Vap. 16:​21-25.

15. Ngapi omu Simisoni ga yi likidire asi ga huguvarere hena mwaJehova? (Vapanguli 16:​28-30) (Tara efano lyopontunda.)

¹⁵ Simisoni kwa rugene epuko lyenene. Nye nampili ngoso, age kapi ga hagekere kukarera Jehova. Age kwa paparere mpito a sikise mo sirugana esi ga mu pere Karunga yipo a rwanese Vafilisiti. (Resa Vapanguli 16:​28-30.) Simisoni kwa likwamberere Jehova pokutanta asi: “Pe nge ko hena rumwe nonkondo, ni futise Vafilisiti.” Karunga gosili kwa limbwilire nkugo zaSimisoni ntani kwa mu tengwidilire nonkondo dendi dopasitetu. Ano ngoyitundwamo, Simisoni kwa dipagere Vafilisiti wovanzi posilika esi kupitakana ava ga dipagere, age simpe nomwenyo.

16. Yisinke natu lirongera ko kepuko lyaSimisoni?

¹⁶ Nampili ngomu Simisoni ga li gwanekerere noyitundwamo yoyidona yokukoresa, morwa epuko eli ga rugene, age kapi ga hagekere kurugana mpango zaJehova. Kapisi tu hageke kukarera Jehova nsene tuna tura epuko noku gwana epukururo ndi nsene tuna zumbanesa situmbukira. Diworoka asi Jehova ga li wapayikira kutugusira po. (Epis. 103:​8-10) Nampili ngomu atu tura mapuko, Jehova kuvhura kutupa nonkondo edi twa hepa yipo tu rugane mpango zendi, ngwendi moomu tupu gayi rugene kwaSimisoni.

17-18. Morwasinke sihonena saMichael sina kukukorangedera? (Tara hena efano.)

¹⁷ Tu tareni sihonena samunazinyetu gomugara gomudinkantu gedina Michael. Age nga rugana unene mosirugana saJehova ngomukwafimbunga ntani ngomuzuvhisi gokukarerera. Nye yokuguvisa yeyi asi age kwa rugene epuko eli lyamuninkisire a zumbanese yitumbukira yendi yomombungakriste. Age kwa uyunga asi: “Ame ngani litura mo unene mokukarera Jehova. Makura  hararasi tupu, yipo na lizuvhire asi kapi tani vhuru hena kurugana nkenye eyi mombunga zaJehova. Ame kapi na gazara rumwe asi Jehova nga zumba nge, nye ame kwa lipulire nsene asi elikwatakano eli na kara nendi nga li kara ngwendi moomu lya kere nare ndi nsene asi ngani vhura kumukarera mombungakriste paapa na hulira ngwendi momu ngani yi rugana nare.”

¹⁸ Yokuhafesa yeyi asi Michael kapi ga hagekere kukarera Jehova. Age kwa uyunga asi: “Ame kwa rugene unene yipo ni hedere pepi Jehova pokukanderera nkenye apa kwendi, pokulironga Bibeli ntani nokuteda ko.” Mwaza siruwo, Michael ga vhulire hena kuya gwana yitumbukira yendi yomombungakriste. Age ngesi mukuronambunga ntani muzuvhisi gokukarerera. Age kwa uyunga asi: “Ekwateso ko nekorangedo eli na gwene, unene po lyokutundilira kovakuronambunga, kwa vaterere nge ni dimburure asi Jehova ga hara nge simpe. Ame ngesi kuna kukarera Jehova nezwi lyewa lyokomutjima. Sihorokwa esi kwa ronga nge asi Jehova nga gusira po nkenye ogu a likida elitezururo lyosili.” Ose kuvhura kukara nehuguvaro asi Jehova nga tu ruganesa ntani nga tu tungika nose nampili yi kare asi twa tura mapuko, sinene tupu tu rugana nayinye eyi natu vhura kurugana ko mokuwapukurura monkedi omu atu rugana yininke ntani noku twikira kuhuguvara mwendi.—Epis. 86:5; Yis. 28:13.

19. Ngapi omu sihonena saSimisoni sina ku nkondopeke?

¹⁹ Mosirongwa esi, ose kuna tarurura mo yihorokwa yongandi yokuhafesa eyi ga ligwanekerere nayo Simisoni meparu lyendi. Age kapi ga sikilire mo, nye nampili ngoso, age kapi ga hagekere kukarera Jehova, nampili konyima zapa ga rugene epuko naDelira. Ntani Jehova kwa twikilire kuruganesa Simisoni. Jehova kwa ruganesere hena Simisoni monkedi zokutetukisa. Jehova kwa tere Simisoni ngomugara ogu ga kere nepuro lyokupama ntani kwa mu tjenge pelikwamo lyovantu wovalimburukwi ava va tumbura mobuke zoVahebeli egaununo 11. Ayo kutukorangeda pokudiva asi ose kuna kukarera Guhya geharo gemeguru ogu ana hara kutunkondopeka, unene po apa atu kara nomaudigu ntani apa atu hepa evatero lyendi! Yipo nye ngwendi Simisoni, ngano tu li kwambereni Jehova pokuuyunga asi: “Diworoka nge o pe nge ko hena rumwe nonkondo.”—Vap. 16:28.