1. Ngapi omu Peturusa ga lizuvhire apa Jesus ga mu vaterere a kwate nomfi dononzi?

 PETURUSA kwa hugire masiku mudima ga hana kukwata nomfi. Hararasi tupu, Jesus yipo ga mu tanterere asi: “Twara petondo, makura mu tege makwe geni mu kwate.” (Ruk. 5:4) Peturusa kwa kere nomasinganyeko asi kapi nava vhura kukwata nampili mfi zimwe, nye nampili ngoso age kwa rugene eyi ga mu tanterere Jesus. Peturusa ntani novagara ava ga hugire kumwe nawo kwa kwete nomfi dononzi makura makwe ta ga hara kutauka. Awo “kwa va tetwire” apa va kwete egano asi Jesus ana rugana sitetu. Peturusa kwa uyungire asi: “Tunda po pwange Hompa, morwa ame mugara gononzo.” (Ruk. 5:​6-9) Ayo kumoneka asi Peturusa nampo kwa lizuvhire asi kapi ya mu fililire kukara kumwe naJesus.

2. Mauwa musinke natu gwanena mo pokukona kona sihonena saPeturusa?

² Peturusa mouhunga ga kere apa ga uyungire asi age “mugara gononzo.” Matjangwa kwa uyunga asi poyiruwo yimwe yininke eyi nga uyunga neyi nga rugana kwa mu ninkisire aya li vere konyima. Nove kulizuvha poyiruwo yimwe ngwendi Peturusa ndi? Kosili sikara simwe esi sina kukudigopera kuwapukurura ndi ove kwa li didimikira upirankondo woge siruwo sosire ndi? Nsene yimo, sihonena saPeturusa kuvhura kukuhengagwida nsene o si lironga. Morwasinke? Koneka sitwa esi sina kukwamako. Ngano yige gumwe, Jehova ngano kapi ga pulisilire mapuko gaPeturusa va ga tjange moBibeli. Nye ago kwa ga tjanga moBibeli yipo tu lirongere ko. (2 Tim. 3:​16, 17) Pokulironga kuhamena mugara ogu ga kere nomaupirankondo ntani nomalizuvho ngwendi getu, kuvhura kutuvatera tu yi kwate egano asi Jehova kapi a ndindire ko kwetu tu sikilire mo. Age ana hara tu twikire kumukarera nampili ngomu twa kara nomaupirankondo.

3. Morwasinke natu twikilira kukarera Jehova?

³ Morwasinke ya karera nomulyo tu twikire kukarera Jehova? Morwa  apa atu liyomberesa yuma yongandi, ose kuya diva nawa yuma oyo. Pasihonena nsene gumwe ana hara kulironga kusika sikitira, ayo kuvhura yi mu guse nomvhura dononzi. Posiruwo nasinye oso, age kuvhura a rugane mapuko, nye nsene a twikira kuliyomberesa, age nga wapukurura unene monkedi omu a siki. Nampili a dive kusika nawa sikitara, poyiruwo yimwe kuvhura a rugane mapuko. Nye nampili ngoso, age kapi a yi fu unye. Age kutwikira kuliyomberesa yipo a dive kusika nawa sikitara. Mokulifana, nampili konyima zokunyokera po upirankondo wetu umwe, poyiruwo yimwe kuvhura tu ya tameke hena kukara nawo. Nye ose kutwikira kurugana ko yuma yipo tu wapukurure upirankondo wetu. Natuvenye kuuyunga ndi kurugana yininke eyi natu ya livera konyima, nye nsene tu twikira ngorooro, Jehova ngatu vatera yipo tu ture po ezokomeho. (1 Pet. 5:10) Tuzeni tu ka tare sihonena saPeturusa omu ga twikilire kukarera Jehova. Nkenda ezi ga mu likidire Jesus nampili ngomu ga kere nomaupirankondo kuvhura kututumangeda tu twikire kukarera Jehova.

4. Kuliza naRukasa 5:​5-10, yisinke ga uyungire Peturusa kulihamena mwene, nye ngapi omu Jesus ga mu hengagwidire?

⁴ Matjangwa kapi ga gava konda ezi za ninkisire Peturusa a litumbure mwene asi “mugara gononzo” ndi nonzo edi ga gazarere posiruwo esi ga uyungire nonkango odo. (Resa Rukasa 5:​5-10.) Nye age nampo kwa tulire mapuko gomanene. Jesus ga divire asi Peturusa kwa kere nowoma morwa nampo Peturusa kwa lizuvhire asi age kwato mulyo. Nye Jesus ga yi divire hena asi Peturusa kuvhura a twikire kukara mulimburukwi. Makura Jesus yipo ga tanterere Peturusa nonkango edi donongwa asi “wa ha tjira.” Ehuguvaro eli Jesus ga pere Peturusa kwa ya rundwilire eparu lyendi. Konyima Peturusa namumbyendi Andiliyasa kwa ya sigire ngesefa zawo zokukwata nomfi nokuyalipakerera kumwe naJesus va rugane sirugana sokuzuvhisa, makura Jehova yipo gava tungikire unene.—Mar. 1:​16-18.

5. Mauwa musinke ga gwanenene mo Peturusa apa ga nyokerere po utjirwe wokutjira vantu ntani nokukwama Jesus?

⁵ Peturusa kwa limonenene yihorokwa yoyiwa yoyinzi morwa age kwa kere murongwa gwaKristusa. Age ga mwene omu Jesus ga verwire vaveli nokutjida nompepo donondona ntani nokupindura vafe. b (Mat. 8:​14-17; Mar. 5:​37, 41, 42) Peturusa ga mwene hena emoneko lyokutetukisa lyaJesus ngaHompa gokomeho goUhompa waKarunga. Peturusa kapi ga divarere sihorokwa oso. (Mar. 9:​1-8; 2 Pet. 1:​16-18) Yosili, Peturusa ngano kapi ga mwene yininke eyi nsene ngano kapi ga kere murongwa gwaJesus. Age nampo kwa hefe unene  kweyi ga nyokerere po malizuvho gomadona ntani nokuyalimonena matungiko nagenye aga!

6. Ngoso Peturusa ga fundire po usimbu maupirankondo gendi ndi? Faturura.

⁶ Nampili ngomu Peturusa ga mwene yininke ntani nokuyizuvha, age simpe ga kere nomaupirankondo. Tu tareni ko yihonena yongandi. Apa Jesus ga fatwilire kuhamena omu nga hepa ntani nokukafa mokusikisa mo uporofete womoBibeli, Peturusa kwa mu keve. (Mar. 8:​31-33) Yikando yoyinzi, Peturusa novakwawo ngava lipatana asi yilye munene po mokatji kawo. (Mar. 9:​33, 34) Mesiku lyokuhulilira komeho Jesus va ka mu dipage, Peturusa kwa homokerere mugara gumwe nokuteta ko kutwi kwendi. (Joh. 18:10) Masiku googo, Peturusa kwa tjilire kuhamena eyi nava mu gazarera vantu ntani age kwa patanene yikando yitatu asi kapi ga diva kaume kendi Jesus. (Mar. 14:​66-72) Oyo kwa ninkisire Peturusa a lire unene.—Mat. 26:75.

7. Mpito musinke va mu pere Peturusa konyima zevhumbuko lyaJesus?

⁷ Jesus kapi ga zumbire mupositoli gwendi ogu ga guvire unene. Konyima zapa Jesus va mu vhumbwire, age kwa pere Peturusa mpito yipo a yi likide asi simpe haga mu harera. Jesus kwa pere Peturusa situmbukira sokukara musita gononzwi dendi. (Joh. 21:​15-17) Peturusa ga liwapaikilire kurugana eyi ga mu tanterere Jesus. Age kwa kere moJerusarema mezuva lyoPentekoste ntani nage kwa kere gumwe govantu wokuhova ava va gwavekere nompepo zokupongoka.

8. Epuko musinke lyenene ga tulire Peturusa apa ga kere moAntiyokiya?

⁸ Nampili konyima zapa Peturusa ga ya kere Mukriste gomugwavekwa, age simpe kwa twikilire kukara nomaupirankondo. Momvhura 36, Peturusa yipo ga kere apa Koroneliusa mupagani gokudira kurugana yovamba va mu gwavekere nompepo zokupongoka, ayo kwa geve nawa-nawa umbangi asi “Karunga kapi ga kara nompongo” ntani asi vantu ava va dilire kukara asi kapisi Vajuda nawo kuvhura kuyahamena kombungakriste. (Yirug. 10:​34, 44, 45) Kutunda opo, Peturusa kwalizuvhire emanguruko mokulya kumwe novapagani, sininke esi nga dili kurugana pomuhowo. (Gar. 2:12) Nye nampili ngoso, Vakriste vamwe woVajuda kwa lizuvhire asi Vajuda novapagani kapi tava vhuru kulya kumwe. Apa Vajuda vamwe ava va kere nomutaro ogo va zire koAntiyokiya, Peturusa kwa hagekere kulya kumwe novapuli vakwawo woVapagani, nampo morwa kwa tjilire asi kuvhura a handukise Vakriste vakwawo woVajuda. Mupositoli Paurusa ga mwene ukaro ou, makura yipo ga pukwilire Peturusa moyitarameho yovantu. (Gar. 2:​13, 14) Nampili ngomu Peturusa ga tulire epuko eli, age kwa twikilire kukarera Jehova. Yisinke ya mu vaterere?

9. Ngapi omu Johanesa 6:​68, 69, azi likida asi Peturusa kwa kere mulimburukwi?

⁹ Peturusa kwa kere mulimburukwi; age kapi ga pulisilire nkenye eyi yi mu ninkise a hageke kukwama Jesus. Sikando simwe, age kwa likidire ulimburukwi apa Jesus ga uyungire yuma yimwe eyi va dilire kukwata egano varongwa vendi. (Resa Johanesa 6:​68, 69.) Mevango lyokuninka asi varongwa va ndindire ndi va mu pure eyi ga tembe, sinzi sawo kwa hagekere kukwama Jesus, nye Peturusa kapi gayi rugene oyo. Age kwa kere noulimburukwi ntani kwa uyungire asi Jesus yige gelike ga kara “nononkango domwenyo gwanarunye.”

10. Ngapi omu Jesus ga yi likidire asi ga huguvarere Peturusa? (Tara hena efano.)

¹⁰ Jesus kapi ga zumbire Peturusa. Momasiku gendi gokuhulilira apa pevhu, Jesus ga yi divire asi Peturusa ntani novapositoli vakwawo nava mu zumba. Nye nampili ngoso, Jesus kwa tanterere Peturusa asi age ga kere nehuguvaro asi Peturusa ngaka tengura ntani noku twikira kulimburukwa. (Ruk. 22:​31, 32) Jesus ga yi kwete egano asi “mutjima kupura usimbu, nye rutu kapi rwa paka nonkondo.” (Mar. 14:38) Yipo nye, nampili konyima zapa Peturusa ga patanene asi kapi ga diva Jesus,  age kapi ga zumbire mupositoli gwendi. Konyima zapa Jesus va mu vhumbwire, age kwa monekerere Peturusa. Ayo kumoneka asi posiruwo oso, Peturusa kwa kere gelike. (Mar. 16:7; Ruk. 24:34; 1 Kol. 15:5) Gazara tupu omu nampo ya nkondopekere Peturusa ogu ga guvire unene morwa yeeyi ga rugene!

11. Ngapi omu Jesus ga huguvaresere Peturusa asi Jehova nga mu pakera mbili?

¹¹ Jesus kwa huguvaresere Peturusa asi Jehova nga mu pakera mbili. Jesus ogu va vhumbwire kwa rugene sitetu pokuninka Peturusa novapositoli vakwawo va kwate nomfi dononzi. (Joh. 21:​4-6) Sitetu oso nampo sa hengagwidire Peturusa asi Jehova kuvhura kumupa usimbu yihepwa yendi yopanyama eyi ga hepere. Mupositoli ogu nampo ga diworokere nonkango daJesus asi Jehova nga pakera mbili ava ava tura muhowo “Uhompa waKarunga.” (Mat. 6:33) Nayinye eyi kwa vaterere Peturusa a ture muhowo sirugana sokuzuvhisa meparu lyendi nye kapisi ngesefa zendi zokukwata nomfi. Age kwa zuvhisire nouradi mezuva lyoPentekoste momvhura 33, ano eyi kwa vaterere vantu mayovi va tambure mbudi zongwa. (Yirug. 2:​14, 37-41) Ano kutunda opo, age kwa vaterere Vasamaliya noVapagani yipo va lironge kuhamena Kristusa nokumukwama. (Yirug. 8:​14-17; 10:​44-48) Jehova kwa ruganesere Peturusa momunene a vatere vantu navenye va wize kombungakriste.

12. Ngapi omu sihonena saPeturusa nasi tu vatera nsene tuna kara noupirankondo ou una kudira kuhaga?

¹² Jehova kuvhura kutuvatera tu twikire kumukarera. Poyiruwo yimwe kapisi ureru kutwikira kukarera Jehova, unene po nsene asi ose kuna kukondja noupirankondo. Ntani poyiruwo yimwe maupirankondo getu kuvhura ga digope unene kupitakana aga ga ligwanekerere nago Peturusa. Nye Jehova kuvhura kutupa nonkondo yipo tu twikire kumukarera. (Epis. 94:​17-19) Pasihonena, munazinyetu gumwe gomugara nga li rara novagara vakwawo nomvhura dononzi komeho a ya lironge usili. Konyima age kwa tjindjire eparu lyendi nokusiga yirugana nayinye yoyidona ntani nokukwama eyi azi uyunga Bibeli. Nye poyiruwo yimwe age simpe nga kara nomadowo gomadona. Yisinke ya mu vaterere a twikire kukarera Jehova? Age kwa faturura asi: “Jehova kutunkondopeka.” Age kwa gweda ko asi: “Nevatero lyompepo zaJehova . . . , ame kwa ya lirongere asi kuvhura yi tompoke nge [kutwikira] kuparuka monkedi omu Jehova ga harera nge ni paruke . . . Jehova kuruganesa nge ntani nampili ngomu na kara nomaupirankondo age kutwikira kuruganesa nge.”

13. Ngapi omu natu honena Peturusa ngomu va yi tumbura moYirugana 4:​13, 29, 31? (Tara hena efano.)

¹³ Ngomu tuna yi mono, Peturusa kwa tulire mapuko gomanene morwa kwa tjilire vantu. Nye apa  ga kanderere kwaJehova a mu pe ko uradi, Peturusa ga ya kere nouradi. (Resa Yirugana 4:​13, 29, 31.) Nose kuvhura tu funde po utjirwe ou twa kara nawo. Tu tareni eyi ya horokerere mudinkantu gomugara Horst ogu ga tungire moGermany posiruwo soYita Yauvali Youzuni Mudima. Posiruwo sina vantu kwava ndindilire va ruganese nkango ezi za tembe asi “Hitler ngatu parura!” Nampili ngomu Horst ga divire asi ayo epuko kuuyunga nonkango odo, poyiruwo yimwe ngadi uyunga morwa nga tjira vamitili vendi ntani novarongwa vakwawo. Mevango lyokuninka asi vakurona vendi va mu handukire, awo kwa kanderere kumwe nendi nokupura Jehova a mu pe ko uradi. Nevatero lyovakurona vendi ntani nokuhuguvara mwaJehova, Horst ga gwene nonkondo yipo a twikire kukarera Jehova. Ano konyima age kwa ya tente asi: “Jehova kapi ga zumba nge.” c

14. Ngapi omu vakuronambunga nava hengagwida ava vana dompo?

¹⁴ Jehova naJesus kapi ngava tu zumba. Konyima zapa Peturusa ga patanene asi kapi ga diva Jesus, age ga hepere kutura po etokoro lyomulyo nsene asi ta hageke kukara murongwa gwaJesus ndi ta twikire kukara murongwa gwaJesus. Jesus kwa likwamberere kwaJehova asi epuro lyaPeturusa lya ha sesupa. Jesus ga tanterere Peturusa kuhamena ekanderero olyo ntani ga kere nehuguvaro asi konyima Peturusa nga nkondopeka vamumbya vaKristusa. (Ruk. 22:​31, 32) Peturusa nampo kwa mu hengagwidire apa ga diworokere nonkango daJesus! Apa atu hepa kutura po etokoro lyomulyo, Jehova kuvhura a ruganese vakuronambunga yipo va tu pe ehuguvareso eli twa hepa yipo tu twikire kulimburukwa. (Efe. 4:​8, 11) Mukuronambunga gedina Paul, kuhetekera ko kugava ehengagwido olyo. Age kupura ava ava lizuvhu ngwendi va hageke kukarera Jehova yipo va gazadare ko omu va lizuvhire apa Jehova ga va kokere sikando sawo sokuhova kousili. Makura  age kuvahengwagwida asi eharo lyaJehova lyanarunye kapi ngali mu pulisira a va zumbe. Age kwa tanta asi: “Ame kwa mwene vantu wovanzi ava va dompere mutjima kuna kutwikira kulididimikira nevatero lyaJehova.”

15. Ngapi omu sihonena saPeturusa asi likida usili wononkango edi da kara mwaMateusa 6:33?

¹⁵ Ngwendi moomu tupu Jehova ga pakerere mbili yihepwa yopanyama yaPeturusa ntani yovapositoli vakwawo, age hena nga pakera mbili yihepwa yetu yopanyama nsene tupu tu tura muhowo sirugana sokuzuvhisa meparu lyetu. (Mat. 6:33) Konyima zoYita Yauvali Youzuni Mudima, Horst ogu ka tu tumbura kwa gazadarere ko kutameka uzuvhisi wokukarerera. Age kwa kere ruhepo sili ntani ga kere nomasinganyeko nsene asi nga gwana yimaliwa yokugwanena po yipo a twikire uzuvhisi wokukarerera. Yisinke ga vhulire kurugana? Age kwa hetekere Jehova yipo a tare nsene asi kuvhura nga mu pakere mbili, makura age kwa lihamekere mokuzuvhisa sivike nasinye posiruwo sedinguro lyomutareli gonombunga. Kehagero lyosivike, age kwa tetukire sili apa mutareli gonombunga ga mu pere kuferiti omu mwa kere yimaliwa, nye kapi ga mu tanterere asi yilye ga yi geve. Amo kwa kere mo yimaliwa yoyinzi eyi ya mu vaterere mosirugana sendi souzuvhisi wokukarerera makwedi gongandi. Horst kwa tere uhwi owo ngwendi Jehova ana kumuhengagwida asi nga mu pakera mbili. Age kwa tulire muhowo Uhompa meparu lyendi nalinye.—Mara. 3:10.

16. Mauwa musinke natu gwanena mo nsene tu lironga yoyinzi kuhamena Peturusa ntani neyi ga tjenge monombilive dendi?

¹⁶ Peturusa nampo ga hefe sili kweyi Jesus ga dilire kumuzumba, ngwendi moomu ga mu pulire Peturusa! Kristusa kwa twikilire kudeura Peturusa yipo nga kare mupositoli gomulimburukwi ntani yipo nga kare hena sihonena sosiwa koVakriste. Ntani ose kulirongera ko yirongwa yoyinzi yomulyo kedeuro olyo. Peturusa kwa tjenge yirongwa oyo ntani nayimwe monombilive dendi mbali edi ga tjangerere konombungakriste domosiruwo sovapositoli edi ngesi da hamena moBibeli. Mosirongwa sokukwama ko ngatu ka lironga madiworokeso gongandi aga ga kara monombilive odo ntani nomu natu ga tura pasirugana meparu lyetu neina.