1. Komeho tupu mupositoli Peturusa a ka fe, yisinke ga mu ruganesere Jehova a rugane?

 MUPOSITOLI Peturusa ga yi divire asi eparu lyendi kwa kere pepi nokuhaga. Monomvhura nadinye dononzi dosirugana sendi esi ga twikilire kurugana noulimburukwi, age nga gendi kumwe naJesus nokuzuvhisira nomuhoko dapeke ntani kwa kere gumwe gomombungagendesi. Komeho a ka fe, Jehova kwa mu pere ko hena yirugana yimwe. Koyiha yomvhura 62-64, Jehova kwa mu ruganesere yipo a tjange nombilive mbali. Ado kuna kara buke za 1 Peturusa ntani 2 Peturusa. Peturusa ga kere nehuguvaro asi nombilive edi ngadi vatera Vakriste konyima zonomfa dendi.—2 Pet. 1:​12-15.

2. Morwasinke da karerere hepero nombilive edi ga tjenge Peturusa?

² Peturusa kwa tjenge nombilive dendi posiruwo esi Vakriste vakwawo va guvire morwa “maudigu gokulisiga-siga.” (1 Pet. 1:6) Vadinikarunga kwa hetekerere ko kureta marongo goyimpempa ntani noyirugana yoyidona mombungakriste. (2 Pet. 2:​1, 2, 14) Vakriste ava vatungire moJerusarema kwa kere pepi ‘nouhura woyininke nayinye,’ kutanta asi ezonauko lyositata saJerusarema. Vakwayita woVaroma yiwo va zonagwire sitata oso. (1 Pet. 4:7) Twasihuguvara asi nombilive daPeturusa da vaterere Vakriste va twikire kulididimikira maudigu aga va pitire posiruwo sina ntani da va vaterere va li wapaikire maudigu aga gava kere komeho. b

3. Morwasinke natu konakonena nombilive daPeturusa?

 ³ Nampili ngomu Peturusa ga tjangerere Vakriste womosiruwo sina nombilive edi, Jehova kwa divilisire asi va di ture moNonkango dendi. Ose ngesi kuvhura kugwanena mo mauwa monombilive odo. (Rom. 15:4) Ngwendi Vakriste womosiruwo sanare, nose kwa tunga mouzuni omu muna kara nonkareso dononzi donondona edi nadi tu ninkisa yi tu digopere kukarera Jehova. Ntani hena ntaantani ngatu ligwanekere noudigu wounene kupitakana ou wa horokere apa Jerusarema va zi zonagwire po. Monombilive mbali daPeturusa, amo kwa kara mo madiworokeso gomulyo. Madiworokeso ogo ngaga tu vatera tu liwapaikire uhura wouzuni ou nokunyokera po kutjira vantu ntani tu li hare unene. Madiworokeso gangoso kuvhura kuvatera hena vakuronambunga yi va tompoke kupakera mbili siunda saJehova.

4. Ngwendi moomu tupu va yi likida mwa 2 Peturusa 3:​3, 4, yisinke nayi vhura kuheteka epuro lyetu?

⁴ Neina ose kwa tunga mokatji kovantu ava va dira kupura momauporofete gomoBibeli. Varwanesi usili kuvhura va tu swaure morwa ose kwa uyunga nomvhura dononzi asi uhura wouzuni pepi una kara. Vantu vamwe kuuyunga asi uhura wouzuni kapi ngau wiza. (Resa 2 Peturusa 3:​3, 4.) Nsene vantu ava atu zuvhisire ndi varugani vakwetu ndi vemepata lyetu va uyunga nonkango odo, epuro lyetu kuvhura kuliheteka. Peturusa kwa fatwilire yininke eyi nayi tu vatera.

5. Yisinke nayi tu vatera tu kare nomutaro gouhunga kuhamena uhura wouzuni ou? (2 Peturusa 3:​8, 9)

⁵ Vamwe kuvhura va yi mone asi Jehova kuna kuliranga mokuhagekesa po uzuni ou woudona. Nonkango daPeturusa kuvhura kutuvatera tu kare nomutaro gouhunga morwa ado kutudiworokesa asi ayo ya lisiga monkedi omu Jehova a tara siruwo nomu ava si tara vantu. (Resa 2 Peturusa 3:​8, 9.) Nomvhura eyovi kwaJehova, ngwendi ezuva limwe tupu. Jehova kapi ana hara asi nampili muntu gumwe ngava ka mu zonagure po. Apa ezuva eli ga tura po ngali sika, uzuni ou ngau haga po. Ose tuna kara nositumbukira yipo tu ruganese siruwo esi sina hupu ko tu zuvhisire vantu navenye vepevhu.

6. Ngapi omu natu vhura “kudiworoka” ezuva lyaJehova? (2 Peturusa 3:​11, 12)

⁶ Peturusa kutukorangeda tu ‘diworoke’ ezuva lyaJehova eli lina kuwiza. (Resa 2 Peturusa 3:​11, 12.) Ngapi natu yi rugana? Nkenye ezuva, ose kuvhura tu hetekere ko kugazara omu eparu ngali ka wapa mouzuni woupe. Limona nyamoge mouzuni woupe omu ono kuhesera mpepo zongwa nomu ono kulya nondya doukanguki nomu ono kutambura ava vana kuvhumbura ntani nomu ono kuronga ava va parukire nomvhura dononzi dakapita kuhamena mauporofete gomoBibeli. Nsene o teda ko koyininke eyi ayo ta yi kuvatere o ndindire nononkondo siruwo apa ngayi horoka ntani o kare nehuguvaro asi uhura wouzuni ou pepi una kara. Nsene tu kara ‘nediwo’ lyangesi lyokuhamena yininke yokomeho, vaporofete woyimpempa kapi ngava tu ‘pukisa.’—2 Pet. 3:17.

7. Ngapi omu utjirwe wokutjira vantu na u vhura kutukundama?

⁷ Mokumona asi ose tuna diva asi ezuva lyaJehova pepi lina kara, tuna hara kurugana paapa twa hulira yipo tu zuvhisire ko wopeke mbudi zongwa. Nye poyiruwo yimwe kuvhura nampo tu kare nowoma wokuyirugana oyo. Morwasinke? Morwa kuvhura tu tjire eyi vantu nava tu gazarera ndi eyi nava tu rugana. Eyi yiyo ya horokerere Peturusa. Momasiku aga Jesus va mu twere kompanguro, Peturusa kwa kere nowoma mokulidivisa mwene asi age murongwa gwaJesus ntani kwa rugurukire kupatana asi kapi ga mu diva. (Mat. 26:​69-75) Nye  Peturusa ga ya fundire po woma ou ga kere nawo. Ano konyima age kwa tjenge asi: “Mwa ha tjira eyi ava tjira vantu ndi asi mu kare nosinka.” (1 Pet. 3:14) Nonkango daPeturusa kutupa ehuguvaro asi ose kuvhura tu funde po utjirwe wokutjira vantu.

8. Yisinke nayi tu vatera tu funde po utjirwe wokutjira vantu? (1 Peturusa 3:15)

⁸ Yisinke nayi tu vatera tu funde po utjirwe wokutjira vantu? Peturusa kututantera asi: “Fumadekeni Kristusa ngaHompa monomutjima deni.” (Resa 1 Peturusa 3:15.) Ose kuvhura tu lidiworokese nyamwetu asi Jesus Kristusa age Hompa gwetu ntani asi ga kara nononkondo dononene. Nsene ngo li zuvha woma apa ngo gwana mpito zokuzuvhisa mbudi zongwa kwava wopeke, diworoka Hompa gwetu. Mumona momagano goge ngomu ana kara meguru ntani kuna mu kundurukida vaengeli wovanzi. Diworoka asi age kwa kara ‘nononkondo nadinye demeguru, nedi depevhu’ ntani asi nga kara ‘nove dogoro pouhura wouzuni.’ (Mat. 28:​18-20) Paurusa kututumangeda tu ‘liwapaikire nkenye apa’ kutantera ko wopeke eyi twa pura. Ono hara kuzuvhisira ko gumwe, kosure, koyirugana ndi komavango gamwe hena ndi? Gazadara ko komeho zosiruwo asi siruwo musinke no vhura kuyirugana oyo makura liwapaikira eyi ngo vhura kuuyunga. Kanderera kwaJehova a ku pe ko uradi ntani kara nehuguvaro asi ngaku vatera o funde po utjirwe wokutjira vantu.—Yirug. 4:29.

9. Ngapi omu Peturusa ga dilire kulikida eharo sikando simwe? (Tara hena efano.)

⁹ Peturusa kwa lirongere kuhamena omu na likida eharo. Nage yipo ga kere apa Jesus ga uyungire asi: “Ame kuna kumupa sipango sosipe asi omu lihara-hare, moomu na mu hara ame, none yimo nomu lihara-hara.” (Joh. 13:34) Nye nampili ngoso, konyima Peturusa kwa nyokere kulya novapuli vakwawo ava va dilire kukara asi Vajuda morwa age kwa tjilire Vakriste vakwawo wovaJuda. Mupositoli Paurusa kwa tumbwire yininke eyi ga rugene Peturusa asi ‘kwalininkisire.’ (Gar. 2:​11-14) Peturusa ga tambwire epukururo olyo ntani ga lirongerere ko. Monombilive dendi nadinye, age kwa tjenge mo asi kapisi tulizuvhe tupu asi twa hara vanavazinyetu nye hena twa hepa kulikida eharo olyo.

10. Yisinke ayi tu vatere tu likide “eharo lya hana uyilipaki” kovanavazinyetu? (1 Peturusa 1:22)

¹⁰ Peturusa kwa uyungire asi twa hepa kukara “neharo lya hana uyilipaki” kovanavazinyetu womombungakriste. (Resa 1 Peturusa 1:22.) Eharo lyangoso kuna kara yitundwamo ‘yokulimburukwa kousili.’ Usili ou kwa kwatera mo erongo eli asi “Karunga kapi ga kara nompongo.” (Yirug. 10:​34, 35) Ose kapi tatu vhuru kulimburukwa mpangera zaJesus zokuhamena eharo nsene tupu tu likida eharo kwavamwe womombungakriste nye tu dire kulikida eharo kwava wopeke. Yimo, ose nampo kuvhura tu tulise po ukaume wounene navamwe ngwendi moomu ga yi rugene Jesus. (Joh. 13:23; 20:2) Nye Peturusa kutudiworokesa asi twa hepa kulikida “eharo lyosili lyosiumbya” kovanavazinyetu navenye morwa awo kwa hamena kepata lyetu.—1 Pet. 2:17.

11. Yisinke ya kwatera mo kuhara vakwetu “nomutjima nagunye”?

¹¹ Peturusa kututumangeda tu ‘lihara-hare unene kutundilira komutjima.’ Kuliza novelise ezi, ‘kuhara unene’ kutanta asi kuhara muntu nampili yi dire kukara ureru kumulikida eharo. Pasihonena, ngapi nsene munazinyetu a tu handukisa ndi a tu koresa? Pomuhowo ose kuvhura tu hare kumutekura ngwendi moomu ga tu tekura, mevango lyokumulikida eharo. Nye Peturusa ga lirongere kwaJesus asi nkareso ezi kapi azi hafesa Karunga. (Joh. 18:​10, 11) Peturusa kwa tjenge asi: “Mwa ha lirugwidira udona noudona ndi mu liswaure-swaure. Nye omu liruganene uwa.” (1 Pet. 3:9) Nsene o kara neharo lyenene, ove ngo kara nombili ntani ngo gazadara ko wopeke kukwatera mo nampili ava va ku koresa.

12. (a) Yisinke hena nali tu tumangeda eharo lyenene tu rugane? (b) Yisinke ono tokomene kurugana ngwendi moomu tupu vana yi likida movidiyo zosiparatjangwa Kondjera kukara mouumwe, awo uhwi?

¹² Mombilive zendi zokuhova, Peturusa kwa ruganesere mo nkango “lihareni unene.” Eharo lyangoso kapi ali dongwenesa po tupu nonzo dononsesu nye hena “nonzo dononzi.” (1 Pet. 4:8) Nampo Peturusa kwa diworokere sirongwa sokuhamena kugusira po esi ga mu rongere Jesus. Posiruwo sina, Peturusa nampo ga yi pulire asi age kwa kere muntu gonkenda apa ga geve egano asi nga gusira po mupuli mukwawo “dogoro yikando ntambali.” Nye Jesus kwa rongere Peturusa ntani nose asi tu gusire po vakwetu “dogoro yikando 77,” kutanta asi twa hana kuvarura yikando eyi tuna va gusire po. (Mat. 18:​21, 22) Ya ha kudompesa nsene asi ayo kwa ku karera udigu kutura pasirugana epukururo olyo. Vakareli navenye vaJehova wokudira kusikilira mo, poyiruwo yimwe nawo kwava digopera mokudira kugusira po wopeke. Sininke somulyo ngesi koge kuna kara kurugana eyi no vhura kurugana ko yipo o gusire po mupuli mukweni ntani nokutulisa po mbili nage. c

13. Yisinke nayi vhura kuninkisa vakuronambunga yi va karere udigu kukorangeda vapuli vakwawo?

¹³ Peturusa kapi ga divarere eyi ga mu tanterere Jesus konyima zevhumbuko lyendi asi: “Kunga nonzwigona dange.” (Joh. 21:16) Nsene asi ove mukuronambunga, ove wa yi diva asi mapukururo ogo kwa tamba hena koge nove. Ayo kuvhura kukara udigu komukuronambunga mokugwana siruwo yipo a sikise mo situmbukira esi somulyo. Pomuhowo vakuronambunga va hepa kupakera mbili yihepwa yomapata gawo yopanyama, yopamalizuvho ntani yopampepo. Awo hena kulitura mo unene mosirugana sokuzuvhisa ntani kuliwapaikira nokugava maruha gemepongo nopoyigongi. Vamwe kwa hamena moKomitiye zeruganeno kumwe noSipangero ndi kurugana modepartmente zokutunga mavango goukareli wetu. Vakuronambunga kwa kara noyirugana yoyinzi!

14. Yisinke nayi vhura kutumangeda vakuronambunga va korangede siunda saJehova? (1 Peturusa 5:​1-4)

¹⁴ Peturusa kwa tumangedere vakuronambunga vakwawo asi: “Pitisireni siunda saKarunga.” (Resa 1 Peturusa 5:​1-4.) Nsene asi ove mukuronambunga, twa yi diva asi wa hara vapuli vakweni ntani ono hara kuvapitisira. Nye poyiruwo yimwe nampo kuvhura o lizuvhe asi ono kara noyirugana yoyinzi ndi ono roroka nokulizuvha asi kapi to vhuru kusikisa mo situmbukira oso. Yisinke no rugana? Tantera Jehova kuhamena omu ono kulizuvha. Peturusa kwa tjenge asi: “Nsene gumwe kuna kuvatera wopeke, a huguvare mononkondo daKarunga.” (1 Pet. 4:11) Vapuli vakweni kuvhura nampo va li gwanekere nomaudigu aga naga dira kukohonoka po nawa-nawa mouzuni ou. Nye diworoka asi Jesus Kristusa “Musita gomunene,” kuvhura a va vatere kupitakana omu no vhura kuvavatera. Age kuvhura a yi rugane oyo neina ntani mouzuni woupe. Eyi Jehova ana harere vakuronambunga va rugane kuna kara tupu kuhara vapuli vakwawo nokuvapitisira ntani nokukara “sihonena kosiunda.”

15. Ngapi omu mukuronambunga gumwe a korangeda siunda saJehova? (Tara hena efano.)

¹⁵ William, ogu ga kara mukuronambunga nomvhura dononzi, kukwata egano mulyo gokutakamesa vanavazinyetu nokuvakorangeda. Apa uvera woKorona wa tamekere, nage novakuronambunga vakwawo kwa litulilire po sitambo nkenye sivike va pulide omu ana karere nkenye gumwe gomokambunga kawo komokuzuvhisa.  Age kwa faturura konda zeyi va yi ruganenene asi: “Sinzi sovanavazinyetu velike va kere momambo ntani awo ngano va tamekere kugazara yininke yoyidona.” Apa munazinyetu a kara nomaudigu, William kupurakena nelituromo yipo a dive asi yisinke ana hepa ntani noyinka yendi. Makura age kuhetekera ko kugwana yimbapiratjangwa ndi novidiyo kowebsite zetu, eyi na vhura kuruganesa yipo a korangede munazinyetu ogo. Age kwa tjanga asi: “Kukorangeda kuna kara nomulyo unene ngesi kupitakana pwanare. Ose kurugana unene yipo tu vatere vantu va lironge kuhamena Jehova, twa hepa hena kurugana unene yipo tu vatere vanavazinyetu va twikire kukara mousili.”

16. Mononkedi musinke nampo natu vhura kutura pasirugana yirongwa eyi tuna lirongere ko konombilive daPeturusa?

¹⁶ Ose kuna zogere tupu yirongwa yoyisesu monombilive mbali daPeturusa. Nampo ono dimburura yuma yongandi eyi ono hara kuwapukurura. Pasihonena, ono hara kuteda ko momunene komatungiko aga ngatu ka gwana mouzuni woupe ndi? Wa li tulira po sitambo sokuzuvhisira koyirugana, kosure ndi komavango gamwe apa o dili kukara mokuzuvhisa ndi? Ove kudimburura nonkedi omu no vhura kulikida eharo lyenene kovanavazinyetu momunene ndi? Vakuronambunga, muna tokomene kulikida eharo lyenene kononzwi daJehova ndi? Nsene o li kona-kona nyamoge, kuvhura o ya dimburure asi wa kara nomaupirankondo goge gamwe, nye ya ha kudompesa. ‘Hompa kwa kara nonkenda’ ntani ngaku vatera o ture po malitjindjo. (1 Pet. 2:3) Peturusa kutuhuguvaresa asi: “Karunga . . . mwene nga mu deura nawa-nawa. Age nga mu pameka nokumunkondopeka, ntani nokumutura petateko lya kora.”—1 Pet. 5:10

17. Yitundwamo musinke ngayi kara nsene tu twikira kukarera Jehova nokumupulisira a tu deure?

¹⁷ Sikando simwe Peturusa kwa lizuvhire asi age kapi ya mu fililire kukara kumwe naJesus. (Ruk. 5:8) Nye nevatero lyaJehova naJesus, Peturusa kwa twikilire kukara murongwa gwaKristusa. Ngoyitundwamo, Jehova kwa pulisilire Peturusa a ‘hwilire moUntungi wanarunye waHompa Muzowoli gwetu Jesus Kristusa.’ (2 Pet. 1:11) Ee mfeto musi kouwa! Nsene o twikira kukarera Jehova ngwendi moomu ga yi rugene Peturusa ntani nokupulisira Jehova a ku deure, nove ngoka gwana mfeto zomwenyo gwanarunye. Ove ngo kara nehuguvaro asi ‘epuro lyoge ngali parura mwenyo goge.’—1 Pet. 1:9.