1-2. Yisinke ayi hafesa vakareli vaKarunga? (Jakopo 1:22-25)

 JEHOVA naJesus kwa tu harera tu hafe. Mutjangi gEpisarome 119:2 kwa uyunga asi: “Verago vaava ava kwama yipango yendi, awo kumulimburukwa nonomutjima dawo nadinye.” Jesus kwa uyungire asi: “Vantu woruhafo, vaava ava zuvhu nonkango daKarunga nokudisikisa mo!”​—Ruk. 11:28.

² Vakareli vaJehova awo vantu woruhafo. Morwasinke? Yininke yinzi ayi tu retere ruhafo, nye somulyo po kuresa Bibeli nkenye ezuva ntani nokurugana paapa twa hulira pokusikisa mo eyi atu lirongo.​—Resa Jakopo 1:22-25.

3. Mauwa musinke atu gwanene mo apa atu sikisa mo eyi atu resa moBibeli?

³ Mauwa manzi atu gwanene mo apa atu ‘sikisa mo Nonkango daKarunga.’ Pasihonena, apa atu sikisa mo Nonkango daJehova, ayo kumuhafesa. Nose hena kuhafa apa atu diva asi kuna kufesa Jehova. (Muud. 12:13) Apa atu sikisa mo eyi atu resa, ose kunkondopeka ukaume wetu nava vemepata lyetu ntani nava womombungakriste. Nampo nove ya kuhorokera. Pokusikisa mo eyi atu resa moBibeli, ose kuhenduka maudigu aga ava ligwanekere nago ava ava dili kulimburukwa Jehova. Ose kulizuvha ngwendi Ndafita, konyima zapa ga uyungire morusumo kuhamena nompango daJehova asi: “Mfuto zange ngani zi gwanena mokuyilimburukwa.”​—Epis. 19:7-11.

4. Morwasinke ayi karere udigu kuresa Bibeli nokusikisa mo eyi atu resa mo?

 ⁴ Ayo kapisi ureru kuresa Bibeli nokusikisa mo eyi atu resa mo. Nampili ngomu twa kara noyirugana yoyinzi momaparu getu, twa hepa kulitulira po siruwo sokuresa Bibeli nokuzilironga yipo tu dive eyi ana tu harere Jehova tu rugane. Tu tareni magano gamwe aga naga tu vatera tu rese Bibeli nkenye ezuva. Tatu ka zogera hena eyi nayi tu vatera tu tede ko kweyi tuna kuresa ntani nokuyisikisa mo.

TURA PO SIRUWO SOKURESA BIBELI

5. Yitumbukira musinke ayi mana siruwo setu?

⁵ Sinzi sovakareli vaJehova kwa kara noyirugana yoyinzi. Ose kurugana yirugana yokulisiga-siga eyi za tumbura Bibeli asi mulyo. Pasihonena sinzi setu kurugana yipo tu lirere nomapata getu. (1 Tim. 5:8) Sinzi sovanavazinyetu kupakera mbili vekoro lyawo ava ava vere ntani wovakurupe. Ose hena kupakera mbili ukanguki wetu ntani ayo kugusa siruwo. Ose hena kwa kara noyirugana mombungakriste. Sirugana somulyo po unene kuna kara sokuzuvhisa noupampi.Ngapi no gwana siruwo sokuresa Bibeli nokuteda ko ntani nokuyisikisa mo, nampili ngomu wa kara noyirugana yoyinzi?

6. Yisinke nayi kuvatera o rese Bibeli nkenye ezuva? (Tara hena efano.)

⁶ Twa hepa kutura muhowo kuresa Bibeli morwa aso sininke ‘somulyo po unene’ koVakriste. (Fil. 1:10) Mokuninka asi muntu a gwane ruhafo, Episarome lyokuhova kwa uyunga asi: “Age kwa tokomena kuresa Veta zaHOMPA, oku ta zi konakona mutenya nomasiku.” (Epis. 1:1, 2) Eyi kutanta asi twa hepa kulitulira po siruwo sokuresa Bibeli. Siruwo musinke sosiwa kuresa Bibeli? Nkenye ogu kuvhura a horowere siruwo esi na resa kuliza noukaro wendi. Somulyo po kulitulira po siruwo yipo o zi rese nkenye ezuva. Munazinyetu gomugara Victor kwa tente asi: “Ame kwa hara kuresa  Bibeli ngurangaura. Nampili ngomu na dira kuhara kupinduka ngurangura zonene, nye aso kuna kara siruwo sosiwa esi ani dili kukara nomadonganeso. Ame kukara nina litura ntani ayo kuvatera nge ni demenene kweyi nina kuresa.” Nampo nove yimo o li zuvhu ngoso. Li pura asi: “Siruwo musinke sosiwa po kwange kuresa Bibeli?

TEDA KO KWEYI ONO KURESA

7-8. Yisinke nayi tu kondera tu dire kugwanena mo uwa mweyi tuna kuresa? Gava sihonena.

⁷ Pamwe kuvhura tu rese yininke yoyinzi twa hana kuyikwata egano. Kuvhura tu rese yuma nokuyidivara hena poopo. Natuvenye ya tu horokera. Eyi kuvhura kuhoroka hena apa atu resa Bibeli. Pasihonena, nampo tatu tura po sitambo sokuresa magaununo gongandi moBibeli nkenye ezuva. Aso sininke sosiwa. Twa hepa kulitulira po yitambo ntani nokukondja unene tu yi sikise mo. (1 Kol. 9:26) Kuresa Bibeli kuna kara tupu ngwendi etameko. Twa hepa kurugana ko hena yimwe nsene tuna hara kugwanena mo mauwa.

⁸ Gazadara ko kosihonena esi: Yimeno ya hepa mema gomvhura yipo yi paruke. Nsene zi roka mvhura zonene posiruwo sosisupi, kuvhura kuninkisa evhu likare mema-mema. Moukaro owo, nampili ngomu za kuroka mvhura unene, nye yimeno kapi tayi gwanene mo uwa. Nsene mvhura zi nyavanga, kuvhura kuninkisa mema ga ze nawa mevhu yipo yimeno yi kure nawa. Nose twa hepa kunyokera po kuresa kugenderesa morwa kapi ngatu kwata egano eyi tuna kuresa ntani ngatu yi divara usimbu ntani kapi ngatu sikisa mo eyi tuna resa.​—Jak. 1:24.

9. Yisinke natu rugana nsene asi ose kugenderera kuresa Bibeli?

⁹ Nove pamwe kugenderesa kuresa Bibeli ndi? Yisinke no rugana? Resa kuliwora. Gazadara ko kweyi ono kuresa ndi apa no mana, teda ko, ayo kapisi udigu kuyirugana. Kuteda kutanta asi kugazadara ko kweyi  ono resa. Kuvhura o ruganese siruwo sosire ko, yipo o gazadare ko eyi ono resa. Pamwe kuvhura o rese novelise dononsesu, ano siruwo sokuhupa ko o si ruganese mokugazara ko eyi ono resa. Victor ogu tuna tumbura nare kwa uyunga asi: “Ame kuresa yoyisesu nampo egaununo limwe tupu. Mokumona asi ame kuresa ngurangura, ayo kuvatera nge ni gazadare ko mwaza ezuva.” Yikare asi nkedi musinke o ruganesa mokuresa Bibeli, ayo mulyo o rese kuliwora yipo o gwanene mo mauwa gomanzi.​—Epis. 119:97; tara kakende, “ Mapuro aga no lipura.”

10. Gava sihonena omu no sikisa mo eyi ono kulironga. (1 Vatesaronika 5:17, 18)

¹⁰ Nsene kuna kuresa Bibeli, gazadara ko omu no yi sikisa mo. Li pura asi, ‘ngapi nani yisikisa mo eyi nina kuresa ngesi ntani komeho? Pasihonena, tu tante asi ono mana kuresa 1 Vatesaronika 5:17, 18. (Resa.) Konyima zokuresa novelise odo mbali, kuvhura o hageke nokugazadara ko asi yikando yingapi o kanderere ntani nsene asi ove kulitura mo unene apa o kanderere. Kuvhura o gazadare ko yininke eyi no pandwira Jehova. Nampo kuvhura o tokore kupandura Jehova koyininke yitatu. Nampili o ruganese siruwo sosisupi pokugazadara koeyi ono resa moBibeli ayo ngayi kuvatera o sikise mo nonkango. Nsene o resa nokugazara ko ntani nokusikisa mo eyi o resa nkenye ezuva, mwaza siruwo ove ngo kara mukareli gwaJehova gomuwa. Yisinke no rugana nsene yininke yinzi wa hepa kuwapukurura?

TURA PO YITAMBO EYI NO SIKISA MO

11. Morwasinke no dompera poyiruwo yimwe apa o resa Bibeli? Gava sihonena.

¹¹ Pamwe kuvhura yi kudompese pokuresa Bibeli morwa kuvhura o mone asi yininke yinzi no wapukurura. Pasihonena, ove nampo kuna kuresa kuhamena elitondororo. (Jak. 2:1-8) Makura to dimburura asi wa hepa kutura po marunduruko kuhamena omu o tekura vantu, makura to yi rugana. Sininke sosiwa ono rugana. Ano lyokusa ko to ya resa kuhamena kupangera eraka. (Jak. 3:1-12) Pokulikonakona to ya dimburura asi ove pamwe kuuyunga momudona ntani kudompesa vantu. Makura to tokora asi ngo uyunga nonkango donongwa nokukorangeda vantu. Ano ezuva lyokukwama ko to ya resa erondoro kuhamena kunyokera po vakaume wovadona. (Jak. 4:4-12) To dimburura asi wa hepa  kuhorowora nawa yilihafeso yoge. Ezuva lyaune to ya lizuvhu asi kuna kukudigopera kutura po marunduruko nagenye ogo.

12. Morwasinke nayi pilira kukugsa mukumonsene ono dimburura mereso lyoge lyoBibeli asi koyili wa hepa kutjindja? (Tara hena nonkango dokonhi.)

¹² Nsene hepero kutura po malitjindjo, ya ha ku dompesa. Eyi kulikida asi wa kara nomutjima gomuwa. Muntu ogu ga linunupika ntani gousili kuresa Bibeli nositambo sokuwapukurura nkareso zendi. a Dirowoka asi twa hepa kutwikira kudwara “muntu gomupe.” Ayo kapi ayi haga. (Koros. 3:10) Yisinke nayi kuvatera o twikire kusikisa mo Nonkango daKarunga?

13. Nkedi musinke zongwa po zokusikisa mo eyi ono lirongo? (Tara hena efano.)

¹³ Mevango lyokukondja asi o sikise mo nayinye eyi ono resa posikando simwe tupu, hetekera ko kusikisa mo sininke simwe ndi yivali. (Yis. 11:2) Heteka eyi: Tjanga yininke eyi ono hara kuwapukurura, makura horowora po simwe ndi yivali eyi ono hara kuwapukurura, ano konyima ntani ngo wapukurura yokuhupa ko. Yisinke no hova kuwapukurura?

14. Sitambo musinke sokuhova esi no tameka kulitulira po?

¹⁴ Kuvhura o tameke nositambo esi nasi kukarera ureru kusikisa mo. Kuvhura o wapukurure apa pana kara hepero unene. Nsene ono dimburura yininke eyi wa hepa kuwapukurura, rugana epaparo moyimbapiratjangwa yetu, nampo pokuruganesa Watch Tower Publications Index ndi Buke zepaparo zoNombangi daJehova. Kanderera kwaJehova kuhamena sitambo soge ntani  mu pura a ku pe “eharo nononkondo dokusikisa mo nayinye eyi ga hara.” (Fil. 2:13) Makura rugana papa wa hulira osikise mo eyi ono lirongo. Nsene o sikisa mo sitambo soge sokuhova, ayo ngayi kutumangeda o sikise mo sokukwama ko. Nsene o dimbura asi yakutompoka kutura po malitjindjo ndi kuwapukurura sikara songandi, ayo nampo ngayi kukarera ureru kutura po malitjindjo gamwe.

PULISIRA NONKANGO DAKARUNGA DI ‘KU VATERE’

15. Ngapi vantu vaJehova va lisiga novantu wovanzi ava ava resa Bibeli? (1 Vatesaronika 2:13)

¹⁵ Vantu wovanzi kwa resa Bibeli yikando yoyinzi. Nye awo sili kutambura eyi azi rongo Bibeli ndi? Awo sili kusikisa mo eyi ava lirongo ndi? Hawe, sinzi sawo kapi ava yi rugana. Eyi ya lisiga novakareli vaJehova morwa awo kusikisa mo eyi azi uyunga Bibeli. Ngwendi Vakriste womosiruwo sanare, ose kutambura Bibeli “kapisi ngononkango dokutunda kovantu nye ngononkango daKarunga.” Ose kurugana paapa twa hulira yipo tu ture pasirugana mavyukiso gomoBibeli.​—Resa 1 Vatesaronika 2:13.

16. Yisinke nayi tu vatera tu kare vasikisi mo woNonkango daKarunga?

¹⁶ Ayo kapisi ureru nkenye apa kuresa Bibeli ntani nokusikisa mo eyi tuna resa. Ayo nampo kuvhura yi tu digopere kugwana siruwo sokuresa. Ndi kuvhura tu rese Bibeli usimbu-simbu twa hana kugazadara ko kweyi tuna resa. Ndi nampo kuvhura yi tu dompese pokudiva malitjindjo nagenye aga twa hepa kutura po. Nsene wa kara noudigu kuhamena kuresa Bibeli diworoka asi kuvhura yi kutompoke. Tu tokomeneni kutambura evatero lyaJehova nokukara vasikisimo woNonkango dendi. Ngomu tuna kuresa unene Nonkango daKarunga nokuditura pasirugana momaparu getu, yimo hena ngatu hafa unene.​—Jak. 1:25.