1-2. Ngapi atu gwanene mo mauwa kweyi Jehova ga tu sita nevhuliko lyokuhafa unene apa atu gava kupitakana kutambura?

 JEHOVA kwa tu sita nevhuliko lyokugwana ruhafo rorunene pokugava kupitakana kutambura. (Yirug. 20:35) Eyi ngesi kutanta asi kapi tatu gwana ruhafo nsene wopeke va tu pa yuma ndi? Hawe. Natuvenye kuhafa apa atu gwana uhwi. Nye ose kuhafa unene apa atu gava kwava wopeke. Ntani aso sininke sosiwa kweyi Jehova ga tu sita monkedi ezi. Morwasinke?

² Morwa Jehova gatu sita monkedi ezi, ose kuhafa. Ose ngatu hafa unene nsene tu papara nonkedi omu natu gava. Jehova kwa tu sita monkedi zongwa.​—Epis. 139:14.

3. Morwasinke Bibeli azi tumbwire Jehova asi “Karunga goruhafo”?

³ Matjangwa kuuyunga asi kugava kureta ruhafo, yipo nye kuvhura tu kwate egano kweyi Bibeli azi uyungire asi Jehova “Karunga goruhafo.” (1 Tim. 1:11) Yige ga hova kugava ntani yige Mugavi po gomunene. Mupositoli Paurusa kwa uyungire asi: “Mwendi yimo twa karera neparu tu ligumagure.” (Yirug. 17:28) “Nkenye uhwi wouwa ou wa sikilira mo” kutunda kwaJehova.​—Jak. 1:17.

4. Yisinke nayi tu vatera yipo tu hafe unene?

⁴ Natuvenye tuna hara kulimonena ruhafo oru aru tundu mokugava. Ose kuvhura tu yi rugane eyi nsene tu honena monkedi omu Jehova a gava. (Efe. 5:1) Ngomu natu ka zogera omu Jehova a gava, tatu ka zogera hena eyi natu rugana nsene wopeke kapi vana kulikida rupandu kweyi atu va ruganene. Eyi nayi ka tu vatera tu twikire kugava kwava wopeke ntani nokugwana ruhafo rorunene.

 HONENA JEHOVA POKUGAVA KWAVA WOPEKE

5. Yihepwa musinke yimwe a tu pe Jehova?

⁵ Mononkedi musinke dimwe Jehova a gava? Tu zeni tu ka tare ko yihonena yimwe. Jehova kutupa eyi twa hepa. Jehova kutupa yininke eyi twa hepa nampili ngomu twa dira kukara noyininke yoyinzi. Pasihonena, Jehova kutupa nondya noyidwara ntani nevango oku natu kara. (Epis. 4:8; Mat. 6:31-33; 1 Tim. 6:6-8) Ngoso Jehova kutupa yihepwa yetu morwa age kulizuvha asi ga hepa tupu kuyirugana ndi? Hawe. Morwasinke Jehova a tu pere yihepwa yetu?

6. Yisinke tuna kulirongera ko ketjangwa lyaMateusa 6:25, 26?

⁶ Jehova kutupa yihepwa yetu morwa gatu hara. Tu tareni nonkango edi ga uyungire Jesus edi da kara mwaMateusa 6:25, 26. (Resa.) Jesus kwa ruganesere yininke eyi ga sita Jehova. Jesus kwa uyungire kuhamena yidira asi: “Ayo kapi ayi kunu, kapi ayi zangura, kapi hena ayi pongaikire moyihete.” Nye konekeni nonkango dendi dokukwama ko edi ga uyungire asi: “Guhyeni gemeguru kuyirera.” Jesus yipo ga va pulire asi: “One nani kapi mwa yi pitakana momulyo?” Yisinke ga here kuturonga? Jehova kutara vakareli vendi asi mulyo unene kupitakana yikorama. Yipo nye, nsene asi Jehova kupakera mbili yikorama, kuvhura tu kare nehuguvaro asi nose nga tu pakera mbili. Ngwendi Guhya ogu a pakere mbili epata lyendi, Jehova nage kupakera mbili epata lyendi morwa ga li hara.​—Epis. 145:16; Mat. 6:32.

7. Nkedi musinke zimwe omu natu honena Jehova pokugava kwava wopeke? (Tara hena efano.)

⁷ Ngwendi Jehova, kuvhura tu pe wopeke eyi vana hepa morwa twa va hara. Pasihonena, wa diva ko munazinyetu ogu ana hepa nondya ndi yidwara ndi? Jehova kuvhura a ku ruganese yipo o mu pe eyi ana hepa. Vantu vaJehova kwa va diva asi awo kuvatera usimbu wopeke apa yimpagwa ayi horoka. Pasihonena, posiruwo souvera woKorona, vanavazinyetu kwa geve kwava wopeke nondya, yidwara ntani yininke yimwe eyi va hepere. Ntani vanavazinyetu wovanzi kwa geve yimaliwa kosirugana setu souzuni mudima. Awo kwa vaterere vanavazinyetu uzuni mudima ava va hepere evatero morwa yimpagwa. Vanavazinyetu owo kwa tulire pasirugana etjangwa lyomoVahebeli 13:16 eli ali uyunga asi: “Walye omu divara kurugana yoyiwa nokuligavera  novakweni eyi mwa kara nayo, yeeyi Karunga kumuhafesa unene nonzambo dangoso.”

8. Ngapi omu adi tu vatere nonkondo daJehova? (Vafilipi 2:13)

⁸ Jehova kugava nonkondo. Jehova ga kara nononkondo dononene ntani age kudigava kovakareli vendi wovalimburukwi. (Resa Vafilipi 2:13.) Wa kanderera rumwe kwaJehova yipo a ku pe ko nonkondo yipo o nyokere po eheteko ndi o lididimikire udigu ndi? Ove nampo wa kanderera yipo o gwane nonkondo dokusikisa mo yininke eyi wa hepere kurugana mezuva. Apa ekanderero lyoge va li limbwilire, ove nampo wa kwatesere ko nonkango domupositoli Paurusa edi ga uyungire asi: “Yeeyi ame kuvhura nayinye nononkondo dogu a pameke nge.”​—Fil. 4:13.

9. Monkedi musinke natu honena Jehova pokuruganesa nonkondo detu? (Tara hena efano.)

⁹ Kapi twa kara nononkondo dononene ngwendi Jehova ntani kapi tatu vhuru kugava nonkondo kwava wopeke ngwendi moomu a yi rugana. Nye kuvhura tu mu honene pokuruganesa nonkondo detu yipo tu vatere wopeke. Pasihonena, kuvhura tu vatere vakurupe ndi vanavazinyetu woyirema pokuvarandera ko yuma koyitora ndi pokuvavatera nayimwe yemembo. Nsene ukaro wetu una tu pulisire, kuvhura tu vatere mokuzeresa Sinyanga setu nokusipakera mbili. Nsene tu ruganesa nonkondo detu monkedi ezi, ose ngatu vatera vanavazinyetu yipo va gwanene mo mauwa.

10. Ngapi natu vatera wopeke kupitira mononkango detu?

¹⁰ Diworoka hena asi nonkango edi atu uyunga kuvhura kukorangeda wopeke. Kuvhura o gazadare ko ogu na vhura kugwanena mo uwa mekorangedo lyoge ndi? Wa diva ko gumwe ogu ana hepa ehengagwido ndi? Nsene yimo, mukorangeda. Kuvhura o ka mu dingure, kumubela ndi kumutumina sikarata ndi kumutjangera mbudi. Wa ha kara nosinka asi yisinke no uyunga. Nonkango doge donongwa kuvhura di vatere mupuli mukweni yipo a twikire kulididimikira ndi a tare ukaro wendi monkedi zapeke.​—Yis. 12:25; Efe. 4:29.

11. Ngapi omu Jehova a ruganesa unongo wendi?

¹¹ Jehova kugava unongo. Jakopo kwa tjenge asi: “Nsene pweli gumwe gweni ga dira unongo, a twikire kuuhundira kwaKarunga nga u mu pe, yeeyi age kugava kwanavenye nomutjima nagunye ga hana mutjimakoka.” (Jak. 1:5) Eyi kulikida asi Jehova kugava unongo kwava wopeke. Koneka asi apa Jehova a gava unongo, age kugava kwanavenye nomutjima nagunye ga hana mutjimakoka. Kapi ana hara tu lizuvhe udona nsene kuna kupura mavyukiso  kwendi. Nye age kutukorangeda tu hundire unongo.​—Yis. 2:1-6.

12. Mononkedi musinke natu gava unongo wetu kwava wopeke?

¹² Nose kuvhura tu honene Jehova pokugava unongo wetu kwava wopeke. (Epis. 32:8) Vantu vaJehova kwa kara nonompito dononzi omu nava vhura kutantera ko wopeke yininke eyi va lironga. Pasihonena, ose kudeura vazuvhisi wovape mokuzuvhisa. Vakuronambunga kuvatera vakwafimbunga ntani vanavazinyetu wovagara ava va gwana ekuho omu nava vhura kusikisa mo yitumbukira yawo mombungakriste. Ano vanavazinyetu ava va kara noudivi wokutunga ntani wokupakera mbili mavango kuvhura va deure wopeke yipo va rugane yirugana yokomatungo gomombunga zetu.

13. Ngapi natu honena Jehova nsene kuna kugava unongo kwava wopeke?

¹³ Ava ava gava edeuro kuhetekera ko kuhonena Jehova monkedi omu a gava unongo wendi kwava wopeke. Diworoka asi Jehova kugava unongo wendi nomutjima nagunye. Nose tuna hara kugava unongo wetu nomutjima nagunye kwava vana hara kulironga. Kapi tuna hara kukara noutjirwe asi nsene tu ronga wopeke, ngava tu gusa yitumbukira yetu. Ntani kapi tuna hara kukara ngwendi vantu ava ava gazara asi kapi tava vhuru kudeura wopeke morwa nawo kwato ogu ga va dewire. Vakareli vaJehova kapi va kara nonkareso zangoso. Nye ose kuhafa apa atu tantere ko wopeke eyi twa diva ntani nokuvadeura. (1 Tes. 2:8) Twa si huguvara asi nawo ngava ‘wapera kuronga wopeke.’ (2 Tim. 2:1, 2) Nsene tu gava unongo wetu kwava wopeke, natuvenye ngatu kara vanongo ntani ngatu hafa.

NSENE VANTU KAPI AVA TU PANDURA KWEYI ATU VA RUGANENE

14. Yisinke ava rugana sinzi sovantu apa atu va pe yuma?

¹⁴ Apa atu gava yuma, unene po kovanavazinyetu, awo nkenye apa kutupandura. Awo kuvhura va tu pandure pokututjangera sikarata ndi monkedi zimwe zapeke. (Koros. 3:15) Ose kuhafa unene apa ava tu pandura.

15. Yisinke natu diworoka nsene vamwe kapi vana kutupandura?

¹⁵ Poyiruwo yimwe vantu kapi ava tu pandura koyininke eyi atu va ruganene. Poyiruwo yimwe kuvhura tu ruganese siruwo setu nononkondo detu ndi yininke eyi twa kara nayo, nye vantu kuvhura va dire kukara nosinka kweyi atu va ruganene. Nsene yihoroka oyo, yisinke natu rugana yipo tu twikire kukara noruhafo ntani nokunyokera po kuhanduka? Diworoka nonkango edi da kara moYirugana 20:35 edi dina kwatesa ko siparatjangwa setu. Ruhafo rwetu kapi rwa korera kovantu nsene tava tu pandura ndi hawe. Ose kuvhura tu gwane ruhafo pokugava nampili wopeke kapi ava tu pandura. Yisinke nayi tu vatera? Tu zeni tu ka tare ko nonkedi dimwe.

16. Yisinke nayi tu vatera tu twikire kugava noruhafo?

¹⁶ Twikira kuhonena Jehova. Age kugava yininke yoyiwa kovantu, yi kare asi tava mu pandura ndi hawe. (Mat. 5:43-48) Jehova kwa tu tumbwidira asi nsene tu gava ‘twa hana kundindira mfeto, mfeto zetu ngazi kara zonene.’ (Ruk. 6:35) “Mfeto” ezi ngatu gwana kuvhura kukwatera mo rupandu. Yikare asi ngatu gwana rupandu ndi hawe, Jehova nkenye apa ngatu futa koyininke yoyiwa eyi twa ruganena wopeke morwa ose ‘kugava neharo.’​—Yis. 19:17; 2 Kol. 9:7.

17. Konda musinke zomulyo po zeyi natu harera kugava kwava wopeke? (Ruk. 14:12-14)

¹⁷ Nkedi zimwe omu natu honena Jehova nsene kuna kugava, kuna kara pokutura pasirugana eyi ga uyungire Jesus mwaRukasa 14: 12-14. (Resa.) Ayo kapisi epuko kuzigida wopeke tu ya lye kumwe nsene tuna diva asi nawo ngava tu zigida kembo lyawo. Nye ngapi nsene tu dimburura asi yikando yoyinzi ose kugava yuma kwava wopeke morwa tuna hara ngava tu pe yuma? Nsene yimo ngoso, hetekera ko kurugana eyi ga uyungire Jesus. Kuvhura tu gave yuma kovantu ava tuna diva asi kwato eyi ngava vhura kutupa. Makura eyi ngayi tu hafesa morwa ose kuna kuhafesa Jehova. Ayo ngayi tu vatera hena tu twikire kuhafa nampili wopeke kapi vana kutulikida rupandu.

18. Yisinke natu nyokera po kurugana ntani morwasinke?

¹⁸ Wa ha gazara asi wopeke kapi va kara norupandu. (1 Kol. 13:7) Nsene wopeke kapi vana kutupandura, kuvhura tu li pure asi: ‘Awo sili kapi va kara norupandu ndi kuna divara tupu kutupandura?’ Nampo podili nokonda dimwe deyi vana dilire kutupandura. Vamwe kuvhura va hare kutupandura, nye udigu kuyiuyunga. Awo kuvhura va lizuvhe nomuga kutambura evatero, unene po nsene ngava vatere wopeke. Nye nampili ngoso, nsene twa hara vanavazinyetu ose kapi ngatu va gazarera yoyidona ntani ngatu twikira kugava noruhafo.​—Efe. 4:2.

19-20. Uwa musinke wa kara mo melididimiko? (Tara hena efano.)

¹⁹ Lididimika. Hompa Saromo kwa uyungire kuhamena ugavi asi: “O pungure yimaliva yoge momarandesero peke, ezuva limwe pwaga ngo gwanena po nsonso.” (Muud. 11:1) Velise ezi kulikida asi vamwe kuvhura va tu pandure konyima zomazuva gomanzi. Eyi yiyo ya horokerere munazinyetu gomukadi.

²⁰ Nomvhura dongandi dina ka pita, mukada mutareli gonombunga kwa tjangerere mbilive munazinyetu gomukadi age opo ntani ana kugwana ekuho. Age kwa mu korangedere a twikire kulimburukwa Jehova. Konyima zonomvhura ntantatu, munazinyetu ogo kwa limbwilire mbilive ozo, pokuuyunga asi: “Ame kuna tjanga mbilive ezi pokukutantera omu wa vatera nge nomvhura nadinye edi wa hana  kuyidivira.” Age kwa uyungire hena asi: “Ove wa tjangerere nge nonkango donongwa sili ntani kapi ngani divara matjangwa aga wa tulire mo.” a Konyima zokufaturura maudigu aga ga li gwanekera nago, age kwa uyunga asi: “Poyiruwo yimwe ame kwa here kuhageka kukarera Jehova, nye ame nkenye apa kudiworoka matjangwa aga wa tjangerere nge ntani ago kupa nge nonkondo yipo ni twikire kulimburukwa.” Age kwa uyunga hena asi: “Monomvhura nadinye ntantatu, matjangwa ogo kwa vatera nge.” Gazara tupu omu ya hafesere mukada mutareli gonombunga pokugwana mbilive ozo konyima zosiruwo sosire. Nose kuvhura va tu pandure koyininke yoyiwa eyi twa rugana konyima zosiruwo sosire.

21. Morwasinke ono tokomenene kuhonena ugavi waJehova?

²¹ Ngomu ka tu yi tumbura, Jehova kwa tu sita nevhuliko lyokulikarera. Nampili ngomu atu hafa apa wopeke ava tu pe yuma, nye ose kuhafa unene apa atu gava yuma kwava wopeke. Ose kulizuvha nawa apa atu vatere vanavazinyetu. Ntani ayo kutuhafesa apa ava tu pandura. Yikare asi vantu kutupandura ndi hawe, ose kuhafa morwa kuna rugana sirugana sosiwa. Diworoka asi yikare asi yokuhura kupi o gava, Jehova kuvhura “ngaku tengwidire yokupitakana poyo!” (2 Hist. 25:9) Ose kapi tatu vhuru kugava yoyinzi kovantu kupitakana pweyi atu pe Jehova. Ose kuhafa unene apa Jehova a tu futu. Tutokomeneni kuhonena Guhyetu gougavi Jehova.