Ngomu tuna kuliwapaikira yipo tu lironge, kuvhura tu lipure asi, ‘yisinke nani ka lirongera ko?’ Twa hepa kudiworoka asi nampili tu gazare asi ta tu ka lironga yininke yongandi, eyi kapi ayi tanta asi kwato yininke yoyipe eyi ana tu harere Jehova tu lironge. Yisinke natu rugana yipo tu dive yininke yoyipe nsene kuna kulironga?

Kanderera kwaJehova a ku pe ko unongo. Pura Jehova a ku vatere o kwate egano eyi ana ku harere o lironge ngesi. (Jak. 1:5) Kapisi yi ku gwanene po tupu yininke eyi wa diva nare.​—Yis. 3:5, 6.

Pulisira nonkondo doBibeli di kundame eparu lyoge. “Nonkango daKarunga kwa kara nomwenyo.” (Heb. 4:12) Nonkango daKarunga ngadi tu kundama mononkedi dokulisiga nkenye apa ngatu di resa nsene tupu tu yi tambura asi twa hepa kulironga eyi ana tu harere Karunga.

Pandura Jehova kwanainye eyi a tu rongo. Yininke eyi atu pe Jehova tu kare nelikwatakano nendi kwa fana ngwendi ‘sipito sonondya dononzi.’ (Jes. 25:6) Wa ha nyokera po kuresa yirongwa eyi ono kugazara asi kapi no yi hafera. Nsene o yi rugana ngoso, ngo gwanena mo mauwa ntani ngo hafera kulironga.