1-2. (a) Ngapi wa kere ukaro womoJudeya apa Paurusa ga tjangerere mbilive Vakriste woVahebeli? (b) Ngapi mbilive ozo za va vaterere?

 VAKRISTE woVahebeli ava va kere moJerusarema nomoJudeya, kwa ligwanekerere nomaudigu konyima zonomvhura kutunda apa ga fire Jesus. Vakriste kwa va hepekere unene konyima tupu apa va tulisire po mbungakriste. (Yirug. 8:1) Konyima zonomvhura 20, varongwa vaJesus kwa hepere unene morwa nzara. (Yirug. 11:27-30) Momvhura 61 mosiruwo sovapositoli, Vakriste kapi va va hepekere unene ngwendi moomu vaya va hepekere konyima zosiruwo. Posiruwo oso sombili, Vakriste yipo va gwene mbilive zokutunda komupositoli Paurusa, omu mwa kere magano aga va hepere mokuliwapaikira eyi ya va ndindilire komeho.

² Mbilive ezi va tjangerere Vakriste woVahebeli kwa kere nomulyo morwa yininke kwaya donapere konyima. Paurusa kwa geve mavyukiso aga ga ya vaterere Vakriste yipo va lididimikire maudigu aga va ya ligwanekerere nago konyima. Ezonauko lyaJerusarema eli ga pumbire Jesus kwa hederere pepi. (Ruk. 21:20) Paurusa ntani Vakriste ava va tungire moJudeya kapi va divire asi siruwo musinke nga li horoka ezonauko olyo. Vakriste vene va vhulire kuruganesa siruwo esi sa hupire ko yipo va liwapaikire pokutunga po epuro ntani elididimiko.​—Heb. 10:25; 12:1, 2.

3. Morwasinke buke zoVahebeli za karera nomulyo koVakriste neina?

 ³ Ntaantani ngatu ligwanekere noudigu wounene kupitakana ou va ligwanekerere nawo Vakriste woVahebeli. (Mat. 24:21; Ehor. 16:14, 16) Tu tareni mavyukiso gamwe aga Jehova ga pere Vakriste owo yipo ga va vatere ntani omu naga tu vatera nose.

“TU KONDJERENI KUPAMEKA EPURO LYETU”

4. Maudigu musinke va ligwanekerere nago Vajuda ava va ya kere Vakriste? (Tara hena efano.)

⁴ Vajuda ava va ya kere Vakriste va hepere kutura po malitjindjo gomanene, eyi kapi ya kere ureru. Komeho va tulise po ukriste, Vajuda kwa kere muhoko gwaJehova. Nomvhura dononzi Jerusarema kwa kere evango ngava pangerere vahompa ava va karere po epangero lyaJehova ntani ntembeli kwa kere evango lyomulyo omu vantu ngava karere Jehovay. Vajuda navenye wovalimburukwi ngava kwama Veta zaMosesa ntani nonoveta edi ngava va rongo vampitisili vawo womaukarelikarunga. Noveta odo kwa hamenene mo nondya edi ngava linovamba ntani omu ngava tekura vantu wokonomuhoka dapeke. Pwa ya kere marunduruko konyima zonomfa daJesus, Jehova kapi ga tambwire hena nonzambo doVajuda edi ngava gava kontembeli. Eyi kwa digoperereVajuda ava va ya kere Vakriste va rundurure nkedi ezi ava karere Jehova. (Heb. 10:1, 4, 10) Nampili Vakriste ava va kere nepuro lyokupama ngwendi mupositoli Peturusa, kwa va digoperere kutura po malitjindjo gamwe. (Yirug. 10:9-14; Gar. 2:11-14)Udigu umwe kwa kere asi Vajuda ava va tambwire ukriste kwa va hepekere unene vapitisili woukarelikarunga woVajuda.

5. Kosinke va hepere kutakamesa Vakriste?

⁵ Vakriste womoJudeya kwa va rwanesere nombunga mbali. Vapitisili woukarelikarunga woVajuda kwa tere Vakriste owo asi varwanesi morwa yeeyi va sigire ukarelikarunga  woVajuda. Vakriste vamwe kwa sininikire Vakriste vakwawo asi va twikire kukwama Veta zaMosesa, nampo awo kwa yi ruganene eyi yipo va nyokere po mahepeko. (Gar. 6:12) Yisinke ya vaterere Vakriste va twikire kuhuguvara mwaJehova?

6. Yisinke Paurusa ga korangedere Vakriste vakwawo va rugane? (Vahebeli 5:14–6:1)

⁶ Mombilive zoVahebeli, Paurusa kwa korangedere Vakriste vena va lironge unene Nonkango daKarunga nokuteda ko. (Resa Vahebeli 5:14–6:1.) Paurusa kwa ruganesere Matjangwa goRuhebeli ndi gemetestamende lyekurukuru yipo a faturure asi monkedi omu Vakriste ava karere Jehova kuna kara nkedi zongwa unene kupitakana ukarelikarunga woVajuda. a Paurusa ga yi divire asi nsene Vakriste va lironga unene nonkango daKarunga nokuteda ko, awo ngava dimburura marongo goyipempa ntani ngava ga nyokera po.

7. Maudigu musinke tuna kuligwanekera nago?

⁷ Nose kuna kuligwanekera nomagano ntani nonombudi edi da li limba nonompango daJehova. Varwanesi kurwanesa mapuliro getu aga ga tunda moBibeli ngwendi eligwanekero panyama ntani awo kuuyunga asi ose nyanya. Yininke eyi vana kurugana vantu mouzuni nomu vana kugazara, kwa lisiga unene nomu Jehova a tara yininke. (Yis. 17:15) Ayo mulyo unene tu dimburure magano gomadona nokuganyokera po ntani kapisi tu pulisire varwanesi va tu pukise tu hageke kukarera Jehova.​—Heb. 13:9.

8. Yisinke nayi tu vatera tu twikire kupameka epuro lyetu?

⁸ Twa hepa kukwata mawoko gavali epukururo lyaPaurusa eli ga geve koVakriste woVahebeli asi twa hepa kupameka epuro lyetu. Ayo kwa kwatera mo kulironga unene Bibeli yipo tu dive omu Jehova a tara yininke. Twa hepa kutwikira kurugana yininke eyi nampili konyima zokuligava nokugwana ekuho. Nampili ose kwa ganda nomvhura dononzi mousili, nkenye gumwe gwetu ga hepa kuresa Bibeli nkenye ezuva nokuzilironga nkenye apa. (Epis. 1:2) Kulironga Bibeli nkenye apa nga yi tu vatera tu nkondopeke epuro lyetu, eli ga tanterere Paurusa Vakriste woVahebeli va kare nalyo.​—Heb. 11:1, 6.

“KARA NEPURO ELI NGALI KA PARURA NOMWENYO DETU”

9. Morwasinke Vakriste woVahebeli va hepere epuro lyenene?

⁹ Vakriste woVahebeli va hepere kukara nepuro lyenene yipo va paruke udigu ou va ya ligwanekerere nawo konyima moJudeya. (Heb. 10:37-39) Jesus kwa rondwere varongwa vendi komeho zosiruwo asi ngava tjwayuke apa ngava mona vakwayita vana kundurukida Jerusarema. Erondoro olyo kwa tembe koVakriste navenye ava va tungire mositata ntani ponze zositata. (Ruk. 21:20-24) Mosiruwo sanare apa vakwayita ngava homokere vantu ava va tungire ponze zositata, rorunzi vantu ngava dukire mositata esi lya kundurukidire ekuma yipo va ka gwane epopero. Pokutjwayukira konondundu mevango lyokudukira mositatakwa hepere epuro lyokupama yipo va limburukwe Jesus.

10. Ngapi epuro lyokupama lya vaterere Vakriste? (Vahebeli 13:17)

¹⁰ Vakriste woVahebeli va hepere hena kuhuguvara vantu ava ga ruganesere Jesus va  pitisire mbungakriste. Ava ngava pitisire kwa geve mavyukiso kuhamena siruwo esi nava tjwayuka Vakriste ntani nomu nava tjwayuka. (Resa Vahebeli 13:17.) Nkango zoRugereka “omu limburukwe” ezi va ruganesa moVahebeli 13:17 kutanta asi muntu kulimburukwa ogu ana kugava evyukiso morwa ga mu huguvara. Mokuyirugana oyo va hepere kuhuguvara ava ngava pitisire. Vakriste vena woVahebeli va hepere kuhuguvara ava ngava pitisire, komeho zoudigu. Nsene asi Vakriste va limburukwire vakuronambunga posiruwo esi va dilire kukara nomaudigu, ayo ya va karerere ureru kulimburukwa posiruwo soudigu.

11. Morwasinke kukara nepuro lyokupama ya karera nomulyo koVakriste neina?

¹¹ Ngwendi Vakriste woVahebeli nose twa hepa epuro. Ose kuna kuparuka posiruwo esi sinzi sovantu vanakudira kupura asi uhura wouzuni pepi una kara, awo hena kutuswaura kweyi twa yi pura ngoso. (2 Pet. 3:3, 4) Nampili ngomu Bibeli za tumbura mauzera gamwe kuhamena eyi ngayi horoka poudigu wounene, nye koyili yininke yoyinzi eyi twa dira kudiva. Twa hepa kukara nepuro lyenene asi uhura ngau wiza posiruwo souhunga ntani Jehova nga tu popera.​—Hab. 2:3.

12. Yisinke nga yi tu vatera tu ka paruke udigu wounene?

¹² Twa hepa kukara nepuro asi Jehova neina kuna kuruganesa “mukareli gokulimburukwa gonondunge” mokutupitisira. (Mat. 24:45) Apa udigu wounene ngau tameka, nampo ngatu gwana mavyukiso ngwendi moomu Vakriste woVahebeli va gwene mavyukiso apa vakwayita woVaroma va kundurukidire sitata saJerusarema. Esi kuna kara siruwo sokuhuguvara unene momavyukiso aga atu gwana kwava ava pitisire mombunga zaJehova. Nsene kapi tuna kulimburukwa mavyukiso aga tuna kugwana ngesi ayo nga yi tu karera udigu kulimburukwa mavyukiso aga ngatu gwana poudigu wounene.

13. Morwasinke epukururo eli lya kara moVahebeli 13:5 lya karera nomulyo?

¹³ Vakriste woVahebeli kwa ndindilire siruwo esi va hepere kutjwayuka, nye awo va hepere kunyokera po ‘kudowokera yimaliwa’ yipo va demenene kukarera Jehova. (Resa Vahebeli 13:5.) Vamwe kwa hepere konzara. (Heb. 10:32-34) Vamwe nampo kwa tamekere kukondjera ungawo yipo u va popere koruhepo. Nye yimaliwa kapi ya vhulire kuvapopera apa va zonagwire po Jerusarema. (Jak. 5:3) Nkenye ogu ga hara emona nga yi mu digopera kutjwayuka nokusiga yiweka yendi.

14. Ngapi omu kukara nepuro lyokupama nayi tu vatera tu ture po matokoro kuhamena yiweka?

¹⁴ Ose kunyokera po kuhara unene emona nsene tu kara nepuro asi Jehova ntaantani nga zonagure po uzuni ou woudona. Poudigu wounene, yimaliwa kapi nga yi kara nomulyo morwa Bibeli kuuyunga asi “ngorondo zawo nosisiliveli sawo ngava yi zugumina mononzira ngwendi hando, yeeyi asi zi kare ngorodo ndi sisiliveli nokuvhura si kuvaparura apa ngava handukira HOMPA.” (Hes. 7:19) Mevango lyoku lipongaikira yimaliwa, twa hepa kutura po matokoro aga naga tu vatera tu lipakere mbili kumwe nomapata getu ntani nokugwana siruwo sokukarera Jehova. Twa hepa kunyokera po makongo ntani nokuruganesa siruwo sosinzi tu pakere mbili yiweka yetu. Twa hepa kunyokera po kuhara unene yiweka yetu, kapisi yi kare yomuhowo meparu. (Mat. 6:19, 24) Ngesi udigu wounene pepi una kara, yipo nye twa hepa kulikonakona tu tare asi  ose kwa hara unene yiweka yetu ndi kwa huguvara mwaJehova.

“MWA HEPA ELIDIDIMIKO”

15. Morwasinke Vakriste woVahebeli va hepere kulididimikira?

¹⁵ Vakriste woVahebeli va hepere kulididimikira maudigu aga ga hetekere epuro lyawo morwa maukaro gomoJudeya kwa digopere. (Heb. 10:36) Nampili ngomu Vakriste vamwe woVahebeli va ligwanekerere nomahepeko, sinzi sawo kwa ya kere Vakriste posiruwo esi pwa dilire kukara mahepeko gomanzi. Paurusa kwa uyungire asi nampili ngomu va ligwanekerere nomaudigu aga ga hetekere epuro lyawo, awo kapi va hepere unene ngwendi Jesus, kutanta asi Vakriste vena va hepere kutokomena kulimburukwa dogoro konomfa. (Heb. 12:4) Vajuda kwa handukire unene morwa Vajuda wovanzi kwa ya kere Vakriste. Mbunga kwa homokerere Paurusa apa ga zuvhisilire moJerusarema. Vajuda wokupitakana po 40 “tava liyongo nokuligana asi kapi nava nwa ndi va lye yuma awo va hana kudipaga Paurusa.” (Yirug. 22:22; 23:12-14) Nampili ngomu Vakriste va ligwanekerere nomahepeko, awo va hepere kuzuvhisa mbudi zongwa nokuponga kumwe ntani nokunkondopeka epuro lyawo.

16. Ngapi omu mbilive ezi va tjangerere Vakriste woVahebeli na zi tu vatera tu tare mahepeko monkedi zouhunga? (Vahebeli 12:7)

¹⁶ Yisinke ya vaterere Vakriste woVahebeli va lididimikire mahepeko? Paurusa kwa here va limonene uwa ou au tundu mokulididimika. Eyi yiyo ga uyungilire asi Karunga kupulisira maheteko yipo a deure Vakriste. (Resa Vahebeli 12:7.) Edeuro olyo kuvhura kuvatera Mukriste yipo a tunge po nkareso zongwa. Pokudemenena komauwa aga ngava gwanena mo morwa kulididimikira maudigu, Vakriste woVahebeli ya va karerere ureru kulididimikira maudigu.​—Heb. 12:11.

17. Yisinke ga divire Paurusa kuhamena kulididimikira mahepeko?

 ¹⁷ Paurusa kwa korangedere Vakriste woVahebeli va tokomene kutwikira kulididimikira. Age kwa va pere magano gomawa kuhamena omu nava lididimikira. Morwa ga divire omu ga fene mahepeko ogo yeeyi age nga hepeke Vakriste nare. Ntani Paurusa kwa lididimikilire mahepeko konyima zapa gaya kere Mukriste. (2 Kol. 11:23-25)Paurusa ga divire nawa eyi va hepere kurugana Vakriste vena yipo va lididimikire maudigu. Age kwa diworokesere Vakriste asi nsene kuna kulididimikira maudigu, va hepere kuhuguvara Jehova mevango lyokulihuguvara vene. Paurusa kwa uyungire nouradi asi: “Jehova yige mukwafi gwange, kapi ngani tjira.”​—Heb. 13:6.

18. Yisinke nga yi tu vatera yipo tu lididimikire mahepeko aga ngatu ligwanekera nago komeho?

¹⁸ Vanavazinyetu vamwe kuna kulididimikira mahepeko. Ose kuvhura kuvavatera pokuvakanderera po ntani pamwe kuvapa eyi vana hepa. (Heb. 10:33) Nye nampili ngoso, Bibeli kuuyunga asi: “Navenye ava va tokora kukarera Karunga nokukara mouumwe naJesus Kristusa, nawo ngava va hepeka.” (2 Tim. 3:12) Natuvenye twa hepa kuliwapaikira maudigu aga gana kara komeho. Tu twikireni kuhuguvara Jehova asi age nga tu vatera tu lididimikire nkenye maudigu aga ngatu ligwanekera nago. Ntaantani tupu nga ka pwizumukise vakareli vendi navenye wovalimburukwi.​—2 Tes. 1:7, 8.

19. Yisinke natu rugana yipo tu liwapaikire udigu wounene? (Tara hena efano.)

¹⁹ Mbilive ezi Paurusa ga tjangerere Vahebeli kwa va vaterere va lididimikire maudigu aga va ya ligwanekerere nago konyima. Paurusa kwa korangedere Vakriste vakwawo va lironge unene Nonkango daKarunga nokudikwata egano. Eyi ya va vaterere va dimburure marongo nokuganyokera po morwa ngano ga va ninkisire va dire kukara nepuro. Age kwa va korangedere va nkondopeke epuro lyawo yipo va limburukwe mavyukiso gaJesus ntani nava ngava pitisire mombungakriste. Ntani age kwa vaterere Vakriste va kare nelididimiko pokutara maudigu asi azo kuna kara mpito zongwa ezi ana kuruganesa Guhyawo geharo pokuvadeura. Nose twa hepa kutura pasirugana mapukururo aga. Nsene tu yi rugana, ose ngatu lididimikira dogoro uhura.​—Heb. 3:14.