1. Yisinke nga ka rugana Jesus?

 OSE kuna kuparuka posiruwo esi tuna kundindira malitjindjo gomanene. Ntaantani Jesus nga ka pangure vantu. Jesus kwa fatwilire siruwo esi ngasi twaredesa kompanguro apa ga tanterere varongwa vendi “sidiviso” sekaropo lyendi ntani ‘souhura wouzuni.’ (Mat. 24:3) Sidiviso esi kwa si tumbura mwaMateusa egaununo 24 no-25 ntani mwaMarukusa 13 ntani mwaRukasa 21.

2. Yisinke natu ka zogera ntani morwasinke yina karere nomulyo?

² Jesus kwa geve erondoro kupitira moyifanekeso yitatu yipo a tu vatere tu liwapaikire. Sifanekeso sononzwi noyikombo sovakadona womagova nava wonondunge ntani soyimaliwa. Yifanekeso eyi kutuvatera tu dive asi Jesus nga pangura vantu kuliza nonkareso zawo. Ngesi tatu ka konakona yifanekeso eyi nokutara eyi natu lirongera ko nomu natu yi sikisa mo. Tu zeni tu ka zogere sifanekeso sononzwi noyikombo.

NONZWI NOYIKOMBO

3. Posiruwo musinke Jesus nga ka pangura vantu?

³ Kosifanekeso sononzwi noyikombo, Jesus kwa tente asi nga pangura vantu kuliza nomu va tere mbudi zongwa nokukwatesa ko vamumbya vendi wovagwavekwa. (Mat. 25:31-46) Age nga ka pangura vantu ‘poudigu wounene’ nsene asi awo nonzwi ndi yikombo komeho tupu zoHarumagedoni. (Mat. 24:21) Ngwendi moomu musita a hangura nonzwi koyikombo, Jesus nga ka hangura ava va kwatesere ko vagwavekwa, kwava ava dili kuvakwatesa ko.

4. Kuliza naJesaya 11:3, 4, morwasinke natu karera nehuguvaro asi Jesus nga ka pangura vantu pauhunga? (Tara hena efano .)

 ⁴ Mauporofete gomoBibeli kulikida asi Jesus nga pangura pauhunga. (Resa Jesaya 11:3, 4.) Age kutara nkareso zovantu neyi ava gazara ntani neyi ava uyunga kukwatera mo nomu ava tekura vagwaveka. (Mat. 12:36, 37; 25:40) Jesus nga yi diva asi wolye va kwatesa ko vagwavekwa ntani nosirugana sawo. a Nkedi zomulyo po unene omu nonzwi dapeke adi kwatesa ko vagwavekwa kuna kara pokuzuvhisa. Ava ava kwatesa ko sirugana esi, ngava va tara asi “vahungami” ntani ngava ka gwana “mwenyo gwanarunye” moparadisa. (Mat. 25:46; Ehor. 7:16, 17) Ezi kuna kara mfeto zongwa unene ngava ka gwana ava ava twikire kulimburukwa. Nsene ngava twikira kulimburukwa poudigu wounene nokonyima, madina gawo nga ga kara ngororo “mobuke zomwenyo.”​—Ehor. 20:15.

5. Yisinke natu lirongera ko kosifanekeso sononzwi noyikombo ntani wolye nava gwanena mo hena uwa?

⁵ Yi likideni asi one valimburukwi. Sifanekeso saJesus sononzwi noyikombo kwa demenena unene kwava va kara nehuguvaro lyokukaparukira pevhu. Awo kapi tupu ava likida epuro lyawo pokukwatesa ko vamumbya vaKristusa mosirugana sokuzuvhisa, nye hena pokukwama mavyukiso aga aga tundu komukareli gokulimburukwa. (Mat. 24:45) Nye ava va kara nehuguvaro lyokukaparukira meguru, nawo va hepa kukwama erondoro lyomosifanekeso esi. Morwasinke? Morwa Jesus kutara nkareso zawo neyi ava gazara ntani neyi ava uyunga. Nawo va hepa kulimburukwa. Jesus kwa geve hena yifanekeso yivali omu mwa kara marondoro aga ga tamba unene po kovagwavekwa. Ose kugwana hena yifanekeso oyo mwaMateusa egaununo 25. Ngesi tu zeni tu ka zogere sifanekeso sovakadona wonondunge ntani womagova.

VAKADONA WONONDUNGE NAVA WOMAGOVA

6. Ngapi omu vakadona vatano va yi likidire asi awo nondunge? (Mateusa 25:6-10)

⁶ Mosifanekeso sovakadona, Jesus kwa simwitilire kuhamena vakadona murongo ava va simbagwilire mukwali. (Mat. 25:1-4) Navenye kwa here kuza kosipito. Jesus kwa fatwilire asi “vatano kwa kere vanandunge” ano ava vatano kwa kere “magova.” Vakadona wonondunge kwa liwapaikilire ntani kwa vangararere. Awo va liwapaikilire kundindira mukwali, nampili moomu ga gusire siruwo mokuwiza, awo kwa ndindilire dogoro masiku. Awo kwa simbire mawoli noramba yipo va liminikise ko momundema. Awo kwa simbire ko hena maholi gamwe aga nava ruganesa nsene mukwali kapi na wiza usimbu. Yipo nye, awo va liwapaikilire mokuninka noramba dawo di twikire kutwera. (Resa Mateusa 25:6-10.) Apa mukwali ga ya sikire, vakadona wonondunge kwa hwililire nage omu sa karere sipito. Mokulifana, vagwavekwa ava ngava twikira kuvangarara nokulimburukwa dogoro apa nga wiza Jesus, ngava ka gwana mfeto zawo pokukalipakerera nomukwali Jesus moUhompa wendi wemeguru. b (Ehor. 7:1-3) Ngapi kuhamena vakadona vatano womagova?

7. Yisinke ya horokerere vakadona vatano womagova ntani morwasinke?

 ⁷ Vakadona vatano womagova kapi va liwapaikilire apa mukwali ga ya sikire. Noramba dawo kwa here kudima ntani kapi va simbire ko maholi gamwe. Apa va zuvhire asi mukwali ntaantani a sike, makura yipo va zire va ka rande maholi. Apa mukwali ga ya sikire, awo simpe kapi vana ka tengura. Posiruwo oso, “ava va liwapaikilire, tava hwilire nage monzugo zosipito sononkwara, makura evero tava li zedire.” (Mat. 25:10) Ano apa vakadona womagova va ka tengwire nokuhara kuhwilira, mukwali yipo ga va tanterere asi: “Kapi na mu diva.” (Mat. 25:11, 12) Vakadona owo kapi va liwapaikilire kundindira mukwali siruwo sosire komeho aya sike. Yisinke nava lirongera ko vagwavekwa?

8-9. Yisinke nava lirongera ko vagwavekwa kosifanekeso sovakadona murongo? (Tara hena efano.)

⁸ Liwapaikireni ntani vangarareni. Jesus kapi ga pumbire asi ngapa kara nombunga mbali dovagwavekwa, mbunga zimwe zava ngava liwapaikira. Age kwa tembe kweyi nga yi horokera vagwavekwa nsene kapi ngava lididimikira nokulimburukwa dogoro kouhura, awo kapi ngava gwana mfeto zawo. (Joh. 14:3, 4) Olyo kuna kara erondoro lyomulyo. Yi kare asi ehuguvaro lyetu lyemeguru ndi lyepevhu, natuvenye twa hepa kutambura erondoro lyokuhamena sifanekeso sovakadona murongo. Natuvenye twa hepa kuvangarara ntani nokudidimika dogoro kouhura.​—Mat. 24:13.

⁹ Konyima zapa Jesus ga mene kusimwitira sifanekeso sovakadona murongo esi a si likida mulyo gokuliwapaikira nokuvangarara, age kwa geve sifanekeso soyimaliwa. Sifanekeso oso kulikida mulyo gokurugana unene.

YIMALIWA

10. Ngapi omu vakareli vavali va likidire ulimburukwi? (Mateusa 25:19-23)

¹⁰ Mosifanekeso soyimaliwa, Jesus kwa simwitilire vakareli vavali ava va limburukwire  hekurwawo ntani gumwe ogu ga dilire kulimburukwa. (Mat. 25:14-18) Vakareli vavali kwa likidire ulimburukwi pokurugana unene yipo va gwanene hekurwawo yimaliwa yoyinzi. Komeho a ze kougenda, age kwa va pere yimaliwa yoyinzi. Vakareli vavali wovalimburukwi kwa rugene unene ntani kwa ruganesere nawa yimaliwa yawo. Yisinke ya kweme ko? Apa ga ka tengwire hekurwawo, awo va gwederera po poyimaliwa eyi ga va pere. Hekurwawo kwa va pandadekere ntani awo kwa ‘hefe kumwe nahekurwawo.’ (Resa Mateusa 25:19-23.) Nye ngapi kuhamena mukareli gwautatu? Yisinke ga ruganesere yimaliwa eyi ga mu pere hekurwendi?

11. Yisinke ya horokerere mukareli “goudwa” ntani morwasinke?

¹¹ Mukareli gwautatu kwa mu pere simaliwa simwe nye age ‘udwa.’ Hekurwendi kwa mu harerere a ruganese nawa simaliwa esi ga gwene. Nye age kwa si vhumbikire mevhu. Apa hekurwendi ga ka tengwire, mukareli ogo ta gava simaliva simwe tupu. Mukareli ogo kapi ga kere nonkareso zongwa. Age kapi ga pulire va mu gusire po kweyi ga dilire kugwanena po yimaliwa yoyinzi, nye ta tumbura hekurwendi asi “muntu ogu ga hara kupanga.” Hekurwendi kwa handukilire mukareli ogu, yipo ga mu hokwene simaliva nokumutjida.​—Mat. 25:24, 26-30.

12. Wolye va fanekesa neina vakareli vavali wovalimburukwi?

¹² Vakareli vavali wovalimburukwi, kwa fanekesa vagwavekwa wovalimburukwi. Hekurwawo Jesus kuvazigida yipo va ‘hafe kumwe nendi.’ Awo kugwana mfuto zawo pevhumbuko lyokuhova. (Mat. 25:21, 23; Ehor. 20:5) Ano sihonena somukareli goudwa, kugava erondoro kovagwavekwa. Monkedi musinke?

13-14. Yisinke nava lirongera ko vagwavekwa kosifanekeso soyimaliwa? (Tara hena efano.)

¹³ Yi likideni asi one kurugana unene. Ngwendi moomu tuna yi mono mosifanekeso sovakadona murongo, mokulifana sifanekeso soyimaliwa, Jesus kapi ga tembe asi vagwavekwa ngava kara noudwa, nye age  kwa fatwilire eyi nga yi va horokera nsene kapi nga va kara noupampi. Awo kapi ngava ‘wapera ezigido nehoroworo’ eli vava zigidira ntani kapi ngava va pulisira va ka hwilire moUhompa wemeguru.​—2 Pet. 1:10.

¹⁴ Sifanekeso saJesus sokuhamena vakadona murongo ntani yimaliwa, kulikida nawa-nawa asi vagwavekwa navenye va hepa kuliwapaikira nokuvangarara ntani nokurugana unene. Kolili hena erondoro eli ga geve Jesus kovagwavekwa ndi? Yimo! Erondoro eli kuligwana mononkango edi ga uyungire mwaMateusa 24:40, 41.

YILYE OGU “NGAVA GUSA PO”?

15-16. Ngapi omu etjangwa lyaMateusa 24:40, 41 ali likida asi vagwavekwa va hepa kuvangarara?

¹⁵ Jesus kwa fatwilire mpanguro zokuhulilira zovagwavekwa, komeho a gave yifanekeso yitatu eyi twa zogere. Age kwa uyungire kuhamena vagara vavali ava va rugene mepya ntani vakadi vavali ava va twire yilya. Ayo kumoneka asi vagara owo vavali kwa rugene sirugana simwe ntani vakadi nawo kwa rugene sirugana simwe nye Jesus kwa uyungire asi “ngava gusa po gumwe, mukwawo tava mu sigi po.” (Resa Mateusa 24:40, 41.) Makura yipo ga tanterere varongwa vendi asi: “Vangarareni, yeeyi kapi mwa diva ezuva eli nga wiza Hompa gweni.” (Mat. 24:42) Jesus kwa uyungire egano lyokulifana apa ga simwitilire sifanekeso sovakadona murongo. (Mat. 25:13) Magano ogo ga liza ndi? Yimo. Vagwavekwa tupu wovalimburukwi yiwo ngava ya “gusa po” va ze moUhompa waKarunga kumwe naJesus.​—Joh. 14:3.

¹⁶ Yi likideni asi one mwa vangarara. Nkenye mugwavekwa ogu nga dira kutwikira kuvangarara, kapi nga hamena mwava va ‘horowora.’ (Mat. 24:31) Ntani navenye ava va kara nehuguvaro lyokukaparukira pevhu va hepa kuvangarara nokutwikira kulimburukwa.

17. Morwasinke natu dilira kukara nosinka nsene Jehova a gwaveka vamwe posiruwo esi?

¹⁷ Ose twa diva nawa-nawa Jehova ntani twa huguvara asi age kupangura pauhunga. Kapisi hepero tu kare nosinka nsene Jehova a gwaveka vamwe va kare vagwavekwa posiruwo esi. c Ose kudiworoka eyi ga uyungire Jesus kuhamena varugani ava va wizire povili zo-11, mosifanekeso somandjembere. (Mat. 20:1-16) Varugani ava va hovere nava va hulilire, kwa gwene mfuto zimwe. Mokulifana, yi kare asi siruwo musinke vagwavekwa vava horowora, awo ngava ka gwana mfuto zawo zemeguru nsene va twikira kulimburukwa.

TAMBURA MARONDORO

18-19. Yisinke tuna lirongere ko koyifanekeso eyi tuna zogere?

¹⁸ Yisinke tuna lirongo? Kwava va kara nehuguvaro lyokukaparuka narunye pevhu, sifanekeso sononzwi noyikombo kwa va korangeda tuva twikire kulimburukwa Jehova ngesi ntani poudigu wounene ou una kuwiza. Komeho, Jesus nga ka pulisira vantu wovalimburukwi va ka gwane “mwenyo gwanarunye.”​—Mat. 25:46.

¹⁹ Tuna lirongo hena yifanekeso yivali eyi ayi gava erondoro kovagwavekwa. Mosifanekeso saJesus sovakadona murongo, vatano wovagova, ano vatano kwa kere nonondunge. Awo kwa liwapaikilire nokuvangarara nokundindira mulikwali yi kare  asi siruwo sokuhura kupi ga gusire mokuwiza. Nye vakadona wovagova kapi va liwapaikilire. Makura mukwali yipo ga nyokere kuvatambura posipito. Nose twa hepa kuliwapaikira kundindira, yi kare asi siruwo sokuhura kupi nga gusa Jesus mokuyazonagura po uzuni ou woudona. Ntani mosifanekeso saJesus soyimaliwa tuna zogere vakareli vavali wovalimburukwi ava va rugene unene. Awo kwa ruganene unene hekurwawo ntani ga va haferere. Nye mukareli goudwa kwa mu nyokere. Yisinke natu lirongere ko? Twa hepa kulitura mo unene mosirugana saJehova dogoro kouhura wouzuni. Ano moruhura tuna zogere omu vagwavekwa nava twikira kuvangarara, yipo ngava va ‘guse po’ va ka gwane mfeto zawo meguru. Awo kundindira nononkondo ngava va ‘pongaike’ mokukakara kumwe naJesus meguru. Konyima zoyita yaHarumagedoni, awo ngava za mononkwara dopasifanekeso kumwe naJesus kosipito sekwareko lyoNzwigona.​—2 Tes. 2:1; Ehor. 19:9.

20. Yisinke Jehova nga ruganena vantu ava ava tambura marondoro gendi?

²⁰ Kapisi hepero tu tjire siruwo sompanguro esi sina kara pepi. Nsene tu twikira kulimburukwa, Guhyetu geharo gemeguru nga tu pa “nonkondo edi va dira kukara nado vantu” yipo ngatu vhure “kuyoworoka” nokukasikama “komeho zaMunwaMuntu.” (2 Kol. 4:7; Ruk. 21:36) Yi kare asi ehuguvaro lyetu lyokukaparukira meguru ndi pevhu, ose nga tu hafesa Guhyetu nsene tu tambura marondoro aga tuna gwana moyifanekeso yaJesus. Morwa nkenda zonene zaJehova, madina getu ngava ga ‘tjanga mobuke zomwenyo.’​—Ndan. 12:1; Ehor. 3:5.