Ame kwa hampuruka nge mo-1934, vakondi vange kwa tundire moSwitzerland va dirukire modoropa zaTimmins doropa ezi za kere nomina moKanada. Koyiha yo-1939, oyina yipo va tamekere kuresa maRuhungu ntani nokuza komapongo goNombangi daJehova. Oyina ngava tu pitura kepongo name novamumbya vange novakuru vange, natuvenye ntambali moomu va tu reterere. Konyima tupu zosiruwo yipo va kere Mbangi zaJehova.

Otate kapi va haferere etokoro eli va tulire po oyina, nye oyina kwa here usili ntani awo kwa twikilire kuza komapongo. Awo kwa twikilire kuyirugana nampili apa sirugana setu va si silikire moKanada momvhura 1940 yikandwise. Oyina nkenye apa ngava tekura otate monkedi zongwa zefumadeko, nampili ngomu otate ngava uyunga nonkango donondona. Sihonena sawo sosiwa kwa vaterere nge novamumbyavange ntani novakuruvange tu tambure usili. Ose kwa hefe apa nkareso zotate za litjindjire ntani awo kwa tamekere kutekura nawa epata lyetu.

MwaSiwogedi 1950 ame kwa kere posigongi sosiparatjangwa Theocracy’s Increase mositata saNew York. Ayo kwa tumangedere nge ni liture mo name mosirugana saJehova konyima zapa na li gwene novanavazinyetu womouzuni mudima ntani pokupurakena kepuragero lyava va ka tundire kosikora zaGiliyata. Ame kwa kere neharo lyenene lyokutameka uzuvhisi wokukarerera. Tupu twa ya sikire kembo, yipo na tulire mo ehundiro lyokurugana uzuvhisi wokukarerera. Beteli zaKanada yipo za limbwilire nge asi pomuhowo na hepa kugwana ekuho. Yipo na gwene ekuho momazuva1 Sikukutu 1950. Konyima zokwedi kumwe yipo na kere muzuvhisi gokukarerera ntani yipo na gwene situmbukira sange sokuhova moKapuskasing. Doropa ozo kwa kere ure nembo lyetu.

 Mo-1951, Beteli kwa hundilire vanavazinyetu ava ngava uyunga Rufransa nsene kuvhura va dirukire momukunda ogu ngava uyunga Rufransa moQuebec. Mukunda ogo kwa hepere unene vazuvhisi. Morwa ngani uyunga Rufransa noRuingilisa, makura yipo na tambwire ezigido olyo ntani kwa tumine nge koRouyn. Kwato ogu na divire mo momukunda ogo. Ame kwa divire tupu embo eli va likidire nge nani za eli nina tumbura ketameko. Nampili ngoso, nayinye kwa gendere po nawa. Name naMarcel kwa yakere vakaume ntani ngani hafere kuzuvhisira moQuebec nomvhura ne edi da kweme ko, konyima yipo va tulire nge muzuvhisi gokukarerera.

Na hefe sili apa na gwene ezigido lyokuza kosikora zaGiliyata opo ame simpe moQuebec, Sikora ezi kwa kere zau-26 moNew York. Ame kwa ka mene sikora ozo mo-12 Murongankuru 1956, makura yipo va tumine nge koGhana, b koUtokero waAfrika. Komeho zokuza koGhana, na hepere kutengura koKanada ni ka ndindire nombapira pulisiro dokugendesa moyirongo, ame kwa gazarere asi tani ka kara ko tupu yivike yongandi.

Ame kwa ndindilire nombapira pulisiro odo makwedi ntambali. Posiruwo oso ame kwa tungire nepata lyamunazinyetu Cripps makura yipo na lidivire namunawo gomukadona Sheila. Ose ngatu livandekere. Apa na here kumuhundira tu likware, nombapira pulisiro edi na ndindilire yipo da wizire. Konyima zokukanderera ko, name naSheila yipo twa tokwere asi na hepa kuza kositumbukira esi va pere nge. Nye ose kwa tokwere hena asi ngatu twikira kulitjangera nombilive nokutara nsene asi kuvhura ngatu likware komeho. Alyo kapi lya kere etokoro lyoureru, nye yininke eyi ya ya horokere konyima kwa likidire asi alyo kwa kere etokoro lyewa.

Ame kwa ka sikire moAccra, moGhana konyima zokugendera kwedi kumwe mehina lyorutenda mosikepa ntani mondira. Ame kwa tulire nge ni kare mutareli gonomukunda. Eyi kwa kwaterere mo kudingura sirongo saGhana ntani Ivory Coast  (ngesi kusitumbura asi Côte d’Ivoire) ntani saTogo. Poyiruwo yoyinzi ame ngani gendi nyamelike metuwa eli zapere nge Beteli. Ame ngani hafere kukadingura vanavazinyetu.

Moyikondovike ngani kara noyitumbukira koyigongi. Kapi twa kere noYinyanga yoyigongi. Vanavazinyetu ngava dike matara-tara nonongundi doyitji ava tumbura asi bamboo ntani ngava zara po mahako yipo tu gwane mundwire. Mokumona asi kapi pwa kere noesikasi, vanavazinyetu ngava wiza noyimuna yoyizuni, ano konyima ntani nava yi dipaga yipo vanavazinyetu ava va kere posigongi va lye.

Poyigongi oyo ngapa horoka yihorokwa yimwe yokuzoresa. Sikando simwe apa Herb Jennings, c ogu nage ga kere mutumwa ga geve siuyungwa, ngombe kwa dukire. Azo kwa dukire pokatji kositantara novantu. Herb kwa hagekere kuuyunga ntani ngombe ozo kwa piyaganene. Nye vanavazinyetu wovagara vane wononkondo, kwa zi kwete noku zitengwidira mo, ano vanavazinyetu kwa sakerere.

Mwaza sivike komeho zosigongi, ame kwa likidire vidiyo zetu zosiparatjangwa asi: The New World Society in Action monomukunda dopopepiAme ngani zenzeresa ekehe konongundi mbali yipo ni likide vidiyo ozo. Vantu womomukunda kwa zi here sili. Sinzi sawo kwa kere sikando sawo sokuhova meparu lyawo kutarera vidiyo ozo. Awo kwa sakerere unene apa va mwene omu vantu vana kugwana ekuho movidiyo. Vidiyo zina kwa vaterere vantu va dimburure asi Nombangi daJehova kwa kara mouumwe uzuni mudima.

Konyima zokukara nomvhura mbali moAfrika, ame kwa hefe pokukara posigongi souzuni mudima esi sa karerere moNew York mo-1958. Ame kwa hefe pokukaligwana naSheila ogu ga tundire koQuebec omu ga kere muzuvhisi gosiruwo nasinye. Ose ngatu litjangere nombilive apa twa li gwene, yipo na mu pulire tu likware, makura ta pura. Ame kwa tjangerere munazinyetu Knorr d nokumupura nsene Sheila kuvhura nga ze koGiliyata konyima ntani nga ka lipakerera namemoAfrika. Ga yi kwatesere ko. Konyima Sheila yipo ga wizire moGhana. Ose kwa li kwere momazuva 3 Sikukutu 1959 moAccra. Ose kwa lizuvhire asi Jehova ga tu tungika kweyi twa mu tulire muhowo meparu lyetu.

Mo-1961 kwa tumine nge ni ka ruganene moCameroon. Vanavazinyetu kwa pulire nge ni ka vatere kutulisa po Beteli zompe, yipo nye ame kwa kere noyirugana yoyinzi. Mokumona asi ame kwa kere gumwe gomoKomitiye zoBeteli, na hepere kulironga yininke yoyinzi. Mo-1965 Sheila kwa kere nomarutu gavali. Kapi twa yi ndindilire asi ngatu kara vareti, ayo kwa gusire siruwo mokuyitambura. Ose kwa tambwire situmbukira esi sosipe, ntani ngomu twa liwapaikilire mokutengura koKanada, ose kwa ligwanekerere nehudi.

Munetu kwa fililire mezimo. Ndokotora kwa tu tanterere asi age kwa kere munona gomumati. Eyi kwa horokere nomvhura 50 da ka pita, nye simpe kapi twa yi divara. Nampili ngomu ya tu horokerere yininke eyi, ose kwa twikilire nosirugana setu morwa twa si here.

Vanavazinyetu womoCameroon kwa ligwanekerere nomahepeko morwa kudira kulihameka moupolitika. Ukaro kwa didire unene posiruwo somahoroworo. Momazuva 13 Kudumonkuru 1970 yipo ya horokere yininke eyi twa dilire kundindira, sirugana soNombangi daJehova kwa si hagekesere po. Epangero kwa tu hokwene Beteli zetu zompe ezi twa ruganesere tupu makwedi gatano. Momazuva tupu gongandi, vatumwa navenye kukwatera mo name naSheila kwa tu tjidire mo mosirongo. Ayo kwa tu karere udigu kusiga vanavazinyetu morwa ose twa va here ntani twa kere nosinka kuhamena eyi nayi va horokera.

Makwedi ntazimwe aga ga kweme ko ose kwa kere moBeteli zaFransa. Ame kwa twikilire kurugana yipo ni vatere vanavazinyetu womoCameroon. MwaSindimba momvhura zoozo yipo va tu tumine koBeteli zaNigeria ezi nga zi pakere mbili sirugana somoCameroon. Vanavazinyetu womoNigeria kwa tu tambwire nawa ntani twa haferere kuruganena mo nomvhura dongandi.

Mo-1973 twa hepere kutura po etokoro lyedigu. Sheila kwa verere unene. Apa twa kere posigongi moNew York, age kwa lilire nokutantera nge asi: “Kapi tani vhuru hena kutwikira nosirugana sange! Na roroka ntani nare na gusa kuvera.” Age kwa rugene name koUtokero waAfrika nomvhura dokupitakana po-14. Ame kwa haferere sirugana sendi esi ga rugene noulimburukwi, nye twa hepere kutura po malitjindjo. Konyima zokuzogera ukaro wetu nokukanderera unene, ose kwa tokwere kutengura koKanada yipo a ka gwane uhaku. Kusiga sirugana setu soutumwa nosirugana sosiruwo nasinye kwa kere etokoro lyoudigu eli twa tulire po meparu.

Apa na ka sikire moCanada, ame kwa gwene yirugana kwakaume gwange gwanare ogu nga randesa matuwa modoropa ava tumbura asi Toronto. Ose kwa hilire nzugo nokuranda yininke yomonzugo eyi va ruganesa nare ntani ose kapi twa gusire makongo. Ose kwa here kurerupika eparu lyetu morwa twa here kutengwira mosirugana sosiruwo nasinye. Ayo kwa tu tetukisire apa twa tamekere usimbu sirugana sosiruwo nasinye kupitakana omu twa yi ndindilire.

Ame kwa tamekere kuvatera nkenye Mapeu  ketungo lyoSinyanga soYigongi moNorval moOntario. Mwaza siruwo yipo va tulire nge ni kare mutareli goSinyanga soYigongi. Sheila kwa tamekere kuveruka, makura yipo twa gazarere asi kuvhura tu sikise mo situmbukira esi sosipe. MwaPembagona mo-1974 yipo twa dirukilire monzugo zokurara ezi za kere poSinyanga soYigongi. Ose kwa hefe pokutengura hena mosirugana sosiruwo nasinye.

Sheila kwa twikilire kuveruka. Konyima zonomvhura mbali, ose kwa tamekere sirugana sokudingura nombungakriste. Ose ngatu ruganene momukunda gwaManitoba omu mwa kere utenda unene. Nye nampili ngoso, vanavazinyetu kwa tu likidire eharo. Ose twa lironga asi somulyo po kutwikira kukarera Jehova, nye kapisi kevango oku twa kara.

Konyima zonomvhura dongandi mosirugana sokudingura nombungakriste, yipo vatu zigidire tu ka rugane moBeteli zaCanada. Konyima tupu zosiruwo, ame kwa lirongere sirongwa soudigu nye somulyo unene. Kwa pere nge situmbukira sokukagava siuyungwa sovili zimwe noharufa moRufransa pepongo limwe lyomulyo moMontreal. Ehudi, siuyungwa sange kapi sa gumine vapurakeni komutjima, ano munazinyetu gomodepartemende zoyirugana yokuzuvhisa yipo ga pukwilire nge. Posiruwo sina kapi na yi dimbwilire asi ame kapisi muuyungi gomuwa unene, ngwendi moomu na yi dimburura ngesi. Ame kapi na tambwire nawa epukururo eli va pere nge. Nzogera zetu kapi za gendere po nawa. Ame kwa handukire morwa kwa gazarere asi age kwa demenene tupu komapuko gange ga hana kupandadeka nge. Ame kapi na tambwire epukururo olyo morwa monkedi omu va li geve ntani monkedi omu na lizuvhire kuhamena muntu ogu ga li geve, alyo epuko sili na rugene.

Konyima zomazuva gongandi gumwe gomoKomitiye zoBeteli kwa uyungisire nge kuhamena sihorokwa oso. Ame na yi tambwire asi kapi na tambwire nawa epukururo ntani na hundilire egusiro po. Makura yipo na zogerere namunazinyetu ogu ga pukwilire nge. Age kwa gusilire nge po. Sihorokwa oso kwa rongere nge mulyo gokulinunupika ntani kapi ngani divara sirongwa oso. (Yis. 16:18) Ame kwa kanderere yikando yoyinzi asi kapisi ni tare mapukururo monkedi zondona ame kwa tokomena kutambura mapukururo.

Ngesi nina kara moBeteli zaKanada nomvhura dokupitakana po-40 ntani kutundilira mo-1985 dogoro ngesi, ame kwa kara gumwe gomoKomitiye zoBeteli. Mukadange Sheila kwa dogorokere mwaMurongankuru 2021. Kugusa ko kulididimika nomfa dendi, ame hena kuna kulididimikira udigu woukanguki wange. Sirugana saJehova kuvatera nge ni viyauke unene nokuhafa na hana ‘kusivana unene yokuhamena koukaro wousupi.’ (Muud. 5:20) Nampili ngomu na ligwanekera nomaudigu, nye yininke yinzi eyi na hafera. Kutura muhowo Jehova meparu lyange ntani nomvhura 70 edi na kara mosirugana sosiruwo nasinye kwa retera nge ruhafo rorunene. Ame kukanderera po vadinkantu yipo nawo va twikire kutura Jehova muhowo meparu morwa na yi pura nawa-nawa asi ngava gwanena mo mauwa nokukara neparu lyoruhafo nsene tupu va karera Jehova.